Azaya 21
21
Babelɔŋ wólo mɛni maa zĩ̂ai
1M̀ɛni-ŋai kɛ̂i Babelɔŋ maa worɛ-wooi ká ŋí.
Lɔii-ŋuŋ wála-walaa da a pâi pâi a mɛni kpɔ̂lu Babelɔŋ é gɛ́ ǹɔii é lɛ́ɛ a bûŋ yɛ̂ɛ fãa kpânaŋ a tɛ̀ɛ kwaa ma a ǹaa kɔ̀ɔ. 2M̀ɛni kpɔ̂lu-ŋai pâi lâai ǹɔii ŋí mai, ŋá ǹaa kàa zĩ̂a su. Ŋá kíri-ƃela da mɛni su-kara-ƃela kàa zĩ̂a su.
Elaŋ da Midia kɔ-kɔ́-ƃelai, ka pá ká daa-lêei sóŋ! Ɣâla a pâi m̀ɔ̃lɛ-laai kperâi Babelɔŋ lɔii a gɛ́ nûa díkɛ ƃò zui.
3M̀ɛnii ŋá m̀ɛni, ŋá ǹaa káa zĩ̂ai sui, a gɛ́ yao támaa a pá ŋ́gɔlɔ̂i. Ǹyaoi ŋí káa a sɛŋ sôli-maa yɛ́ɛ nɛnî a kɛ̀ koi-têe su. 4Ŋá kɛ̀ yaôi, ŋuŋ su kɛ́ tìnaŋ, ŋ́gɛ kpɛ̃̀liŋ. Ŋá kɛ̀ kpîŋ ŋ̀wɛ̂lii a gɛɛ ɣele-wûlii é kɛ́, kɛ́lɛ tãi ɣele-wûlii è kɛ̀ lai, yao tee-tee nɔ́ ƃé kɛ̀ ŋ́gbonôi.
5Ŋá kúu kɛ́tɛ ǹaa kàa zĩ̂ai su. Dí têƃele pìlaŋ, dí gára-ŋa pɛ̀lɛ diai dí m̀ɛlɛ-tôlii ƃò a diai dí sèe mɛni ma. Dí kɛ́ dílaa miî díkɛ kpele-sãa kpèle. Nya ƃe ŋá wóo da mɛ̀ni ǹyɛɛi, “Kɔ́kɔ-ƃela, ka kákpala ŋá ɣále kɔli-kalaŋ-ŋai síɣe!”
6Ǹuu-namui è m̀o ḿâ ǹyɛɛi, “Kwaa ma maa kpɛɛ-nuu tɔnɔ kɔ́ri. M̀ó mà a gɛɛ é kɛ́ kwaa maa kpɛɛ̂i a tɛɛ-ŋa. M̀ɛnii a pâi gâai, é mó. 7À kɛ̀ a nûa kàa soo-ŋa mɛi díkɛ sìa a díkîe-ni kóo feerɛ-feerɛ, da-ŋa díkɛ ƃò wɛlɛ-sôo-ŋa da soo-fáleŋ-ŋa mɛi, é dímaa kpɛ́ɛ a ǹɛ́lɛɛ.”
8Ǹaa kɛ́ɛ tíi, gwaa ma maa kpɛɛ-nuui è mò ḿâ ǹyɛɛi, “Kamɔ̂ɔ, ƃɛ́i í ḿbù naai, naa nɔ́ ƃé ŋá kɛ̀ tɔɔ̂ni naa a kpíni da fólo kélee.”
9È kɛ̀ nɔ́ tí, ŋá kpakolo-ŋa kàa díkɛ ƃò soo-ŋa mɛi feerɛ-feerɛ! Nya ƃe gwaa ma maa kpɛɛ-nuui è mò ǹyɛɛi, “Da Babelɔŋ soŋ, da Babelɔŋ soŋi! Da ŋɔɣâla pɔkɔɔŋ-ŋai kélee wólo-wôlo da dáa-tâa ǹɔii ma!”
10Ŋánûai Eezuɛ-ŋai, nûa dí kátâŋ yɛ̂ɛ mɔlɔŋ. Kɛ́lɛ duŋ lɛ́lɛɛi Ŋ̀wála-wâla kélee Yâwɛɛ Eezuɛ Ŋɔɣâlai è mò ḿâi, ŋá mò kâa.
Ŋ̀orɛ̂-wooi bîlaŋɔɔi Idɔŋ mai
11Ŋ̀orɛ̂-wooi káa ŋí é pîlaŋ Idɔŋ ma.
Idɔŋ nuu da è ńdôlii ǹyɛɛ ḿâi, “Kwaa ma maa kpɛɛ-nuu, ɣele-ƃɔɔ su-kôyaai niî? Gbínii fé niî kɛ́ ní tâɣai?”
12Ŋá m̀o m̀a ńyɛ̃ɛi, “Ɣele a pâi ƃɔ̂i, kpíni é ŋɔ́nɔ pɛ́lɛ. À kɛ̀ ya ŋ̀wɛ̂lii í gɔ́lɔŋ ŋɔ́nɔ à kɛ̀ kpíni a pâi pɛlɛ̂i, pá ŋɔ́nɔ pôlu í m̀aa mare-kɛ̂ɛ kɛ́.”
Ŋ̀orɛ̂-wooi Arebia mɛni mai
13M̀ɛnii pâi kɛ̂i a Arebiai maa worɛ-wooi ká ŋí.
Káai a Dedaŋ-ƃelai nyii-ŋai da sîa a soo-fáleŋ-ŋa kpîri kɛ́ ƃò dípôlui, ká kɛ́ kaƃûui pù Arebia fɛ̃ɛ-kpalaŋ sui, 14ka yá tɛ́ɛ diai pɔ́ kpele wɛ̂li káa díkɛi. Káai a Tema lɔii su-ƃelai, ka mii-sɛŋ tɛɛ gɔpû-ƃelai pɔ́ 15Da pûi kɔ́ ma a gɛɛ dí dífulu-laai maa kɔ̃ɔ. Da pûi a gɛɛ dí kúla ƃóa-sɔkpɔ-ŋa da kerâŋ-ŋa perêi. Da pûi díkɛ kùla gɔ́-kɔ́-ƃelai perêi.
16Nya ƃe Ǹuu-namui è m̀o ḿâ ǹyɛɛi, “Kóraŋ tɔnɔ kpéŋ-kpeŋ a tɛ̀ɛ, wála-wala-laa dɔnɔ kpîŋ fé pâi lɛɛ̂i Keda-ƃelai dɔnɔ kpîŋ yêei. 17Gerâŋ kɔ-kɔ́-ƃela líi kpeleɛɛ-ŋai díkaa Kedai, dɛi-tɛ́i nɔ́ ƃé pâi lɛɛ̂i naa. Ńyãa Yâwɛɛ Eezuɛ Ŋɔɣâlai ƃé m̀o tí.”
Currently Selected:
Azaya 21: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
