Zia-ƃelai Kɛ́-mɛni-ŋai 1
1
1Ŋákɔlɔi m̀aa-ŋuŋ su, Tiofelɛ, ŋá m̀ɛnii kélee pɔ̃̀yɛ Zîsɛ è pɛ̀lɛ gɛ̂i, gɛ́ nɛ̀i, 2é lɛ́ɛ la zu dí dɛ́ ɣelêi. É lɛ́ɛ pâi tɛ̂i ŋ̀elei su, è bàma ŋɔsia-ƃelai dîa M̀ɔlêŋ Maa Waai sârai, nyíi-ŋai a wɔ́lɔ dísiɣei. 3È gbîŋ lɛ̀ dîa a tɔ̃yâ pere sii támaa su ŋɔmɛni soli-káai pôlu ma nyíi ǹɛ dîa a gɛ́ɛ gáa a vúlui. Zaa ɣele kûu buu náaŋ pôlu ma, è kùla díŋɛi a ɣele kûu támaa, é lóno dípɔ é pîlaŋ Ɣâla ŋɔkâloŋ-laai ma. 4Da dîa-ni díkɛɛ kɛ̀ díkîe mai, è mò dîa ǹyɛɛi, “Káfè kùla Zerusâlɛŋ. Ka lɛɛ naa ká Ǹaŋ-nuui ŋɔkono-têe-wooi maa kpɛ́ŋ, nyíi è mò, ǹyɛɛ, ‘Ká mɛ̀ni ńa.’ 5Zɔ̂ŋ è batâi kɛ̀ a yá. Kɛ́lɛ, nàa fé pâi tûai, da pâi kábatâi kɛ̂i a M̀ɔlêŋ Maa Waai.”
Zîsɛ è tɛ̀ Ɣâla-taa
6Zîsɛ da ŋɔpôlu-ƃelai kɛ́ɛ da dia ni da díŋaa tɛ́ gîe mai, dí m̀arê kɛ̀, dîyɛɛ m̀ai, “Kúnuu-namui, ya pâi Eezuɛ-ŋai díkâloŋ laai tɛɛ̂i dípɔ pôlu tãi ŋí su?” 7È mò dîa, ǹyɛɛi, “Ǹaŋ-nuui m̀ɛnii ŋí maa wála-wala káa ǹyêei. 8Kɛ́lɛ, ka pâi wála-wala sɔlɔ ƃôi a tãi M̀ɔlêŋ Maa Waai a pâ la kápɔi. Ka pâi kɛ̂i a ŋásere-ŋa Zerusâlɛŋ, Zuda gwaa kélee, da Sameria, é too máŋ ǹɔii koyâŋ ma.” 9Gɛ́ɛ a nyíŋi ƃói, dí lɛ̀ɛ gâai e tɛ ŋ̀elei su ŋ̀ele-kɔlɔŋ kolei è gula díŋɛi. 10Díkɛɛ Zîsɛ kâai kɛ̀ tɛ̂i ŋ̀elei sui, núu feerɛ díkɛ̀ tɔ̂ɔni díkɔlɛ seɣe kole kɛ́ ƃo dîa, 11dîyɛɛ dîai, “Galalii-ƃela, lé ƃé ka tɔ̂ɔni kákɛ ŋ̀elei su kàai? Zisɛi ŋí tɛ̀ ŋ̀elei sui, a pâi pâi nɔ́ bere sîi tɔnɔi ŋí su ká gàa la gɛ́ tɛ̀ ŋ̀elei sui.”
Dí núu da pù Zudasi pɔ́ɔ ŋá
12Nya ƃe dí lène pôlu Zerusâlɛŋ dí kula ǹyéei ma da dòli a Ŋulɔ-wuru Yeei nyíi gáa Zerusâlɛŋ kɔlɛ mai. Nàa è kɛ̀ nɔ́ a fii-tɔɔ ɣele sia kɛ̂i. 13Dítɛɛ daai sui, bɛ́rɛi dí lɔ̀ mui, dí tɛ̀ ŋ̀elei-pere loŋpoi su. Nàa ƃe dí kɛ̀ naa. Diai kɛ̀ naai dia ƃa, Pitɛ, Zɔ̂ŋ, Zĩi, Aŋdulu, Fele, Tama, Batâlomio, Maafîu, Afîa ǹóŋ Zĩi, Zɛɛla-nuui Samaŋ da Zĩi ǹóŋ Zudasi. 14Ǹûai ŋí kélee díkɛ̀ zu tɔnɔɔ dí díkpîŋ pu Ɣâla fɛliɛ su, da nɛyâai, Zîsɛ ǹee Mere da ǹêɣe-sinaâi.
15M̀aa ɣele kûu kpɛ́-kpɛ̂ɛ tɛ̂ɛi pôlu ma, ǹaa-la-ƃelai ŋí dí kòyaŋ. Diai kɛ̀ goyâŋ ŋí sui dí kɛ̀ núu ŋuŋ tɔnɔ pôlu buu feerɛ. Nya ƃe Pitɛ m̀u-sìɣe é tɔ́ɔ a gɛ́ɛ lóno dípɔ. 16È m̀o dîa ǹyɛɛi, “Ŋánûa, fɛ̂ɛ nɔ́ Ɣâla ŋɔwóoi ŋ̀aa-see é kɛ́, nyíi M̀ɔlêŋ Maa Waai è bù Deeƃé lá a gɛ́ɛ é m̀ó naa túɛ é pîlaŋ Zudasi ma nyíi tɔ̀ɔ Zîsɛ soŋ-ƃelai tuɛi. 17È kɛ̀ a kútà nyíi díi ŋí da sɔlɔ ƃôi.”
( 18Ǹalôŋ ŋí è lɔii kpua yà a zɛŋ è zɔlɔ ƃò ŋɔwana-lɔ̂ɔ tuai sui. È tòo kpɔ́ gɔŋ mɛi, é ƃela zâmai, búru kélee é kúla. 19Nya ƃe Zerusâlɛŋ-ƃelai kélee dí gɔ̀lɔŋ, dí m̀aa lɔii kpuai ŋí tóli dísîi-wooi su a Akedama. Ŋ̀óoi ŋí su-kulâi ƃa Ŋãa Lɔii.)
20“Bɔ̃yɛɛ̂i Ŋ̀ule-woo Kɔlɔi su,
‘Tɔɔ gɛ̂i é kara,
núu da fé kɛ́ naa.’
Bɔ̃yɛɛ̂i máŋ,
‘Tɔɔ núu da kpɛ́ni é bɔ́ɔ ŋá síɣe.’
21“M̀ɛni ma, diai kwa dia ni kú kɛ̀ Kúnuu-namui Zîsɛ kpono ma gɛ́ lɔ̀ gɛ́ kula, 22é sìɣe tãi Zɔ̂ŋ è kɛ̀ ɣâla-woo ƃôi la é pîlaŋ batâi ma ma é tóo tãi ma Zîsɛ è kùla la kúsama é tɛ́ ŋ̀elei sui fɛ̂ɛ nɔ́ ǹûai ŋí dɔnɔ é kɛ́ a m̀u-siɣe saa-yeei maa sêre-ŋai da.”
23Nya ƃe dí núu feerɛ lɛ̀, Zosɛ, nyíi da dòli a Basabasi, nyíi ǹáa kpéli è kɛ̀ a Zɔsitɔ da Matâya. 24Dí Ɣâla fɛ̀li, dîyɛɛi, “Kúnuu-namui, ƃiai í núu kélee líi su kɔ́lɔŋ, ǹúu feerɛi ŋí nyíi lɛ́ kûa ya ziɣe zui, 25a gɛ́ɛ é zia tii ŋí kɛ́ nyíi Zudasi e ǹɛɛ é lí gbɔɔi kwaa mai.” 26Nya ƃe dí kpɛɛŋ tòo ǹúu feerɛi ŋí loai, gbɛɛ̂ŋ é ǹɛ̃ɛ a Matâya láa. Dí nâa bɛ̀lɛ zia-ƃela puu kao tɔnɔi dîa.
Currently Selected:
Zia-ƃelai Kɛ́-mɛni-ŋai 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
