Pitɛ Veerɛi 3
3
Kúnuu-namui pá-mɛni maa-kono-teei
1Ŋánûa, gɔlɔi veerɛi ká ŋí ŋa bɔ̃̀yɛ kápɔ naa. Gɔlɔi veerɛi ŋí sú, ŋa kátɔ̃yâ-kili mu siɣe nâa a mɛni-toɔɔ kákili ŋá. 2Ŋa ŋ̀wɛlii mɛnii Ɣâla ŋɔlóno-kɛ-ƃela maa waa-ŋai dí mò nàa tuɛi, é lɛ́ɛ kákili-ŋá é pɛ́lɛ Kúnuu-namui da Kúƃalo-nuui ŋɔtɔ̂ŋ ma, nyíi ká zɔlɔ ƃô kásia-ƃelai sârai. 3Maa-ŋuŋ fɛ̂ɛ ká táre nyíŋi su a gɛɛ ɣɛlɛ-maa-ƃela da pâi pâi a ɣɛlɛ-maa a ŋelei gbɛɛ ŋái, díkɛ pîlaŋ díkpîŋ-tua-pere-nyɔŋ maa-sɛŋ-wɛliɛi pôlu, 4díkɛ mò, díyɛɛi, “Ŋɔpâi maa-kono-teei kɔɔ? Kpɛ́ni fêi, ǹúu-pɔlɔ-ŋai da wɔ́lɔ saa, kɛ́lɛ, mɛni-ŋai kélee díkaa nɔ́ yɛ̂ɛ berei dí wɔ́lɔ kɛ̀ la é síɣe ŋ̀éniɛi kpɛtɛ-tãi mai.” 5Dí díŋɛi nàɣiŋ dɔ̃yâi ŋí mɛi, a gɛɛ tãi su kôyaa Ɣâla ŋɔwóoi è gɛ̀ ŋ̀elei é kɛ́ naa, è ǹɔii kpɛtɛ a yá é kúla yá su. 6Ǹyaŋ ŋ̀éniɛi nyíi kɛ̀ naai, mɛi è pɛ̀lɛ a yá zu é kara. 7Kɛ́lɛ, ŋelei da ǹɔii nyíi-ŋai díkaa naa tãi ŋí sui, Ɣâla ŋɔwóo tɔnɔi a dílɛɛ naa ŋɔŋ mɛni ma. A dílɛɛ naa é lɛ́ɛ la zu mɛni-ŋa tee-tãi da diai dífe láa ní a Ɣâla-mɛnii dísu-kara-tãi é seri.
8Kɛ́lɛ, káfe nia mɛni tɔnɔi ŋí ma ŋáwɛli-kɛ-maa ƃelai, a gɛɛ fólo tɔnɔ káa Kúnuu-namui ŋɛ́i yɛ̂ɛ kóraŋ wála tɔnɔ (1,000). Kóraŋ wála tɔnɔ (1,000) kɛ̀ ƃo ŋ̀ɛi yɛ̂ɛ fólo tɔnɔ. 9Kúnuu-namui maa fé tínaŋ ní ŋɔkono-teei ŋa-see kɛ-mɛni ma yɛ̂ɛ berei núu da-ŋa da dòli la a maa tinaŋ. Kɛ́lɛ, a ǹíi kpèle kâa, va ŋ̀wɛli núu da kélee é sáa. Kɛ́lɛ, a ŋ̀wɛli núu kélee dí dílii pene. 10Kúnuu-namui ŋɔɣelei a pâi pâi yɛ̂ɛ ŋúma-nuu. Maa-foloi tí ŋele-ŋai da pâi tɛɛ̂i a díwoo su kɛ́tɛ, maa-sãai kélee dí séɣeŋ a ŋɔŋ. Ǹɔii da zu-sãa kélee da pâi kérenîi dí kpɛ̂ɛ.
11Tãi ká gɔ́lɔŋ la a gɛɛ zãâi ŋí kélee da pâi séɣenîi, nûa-sii kɛ́ɛ léŋ ƃe ka pɔ̂ri kɛ̂i la kátûa-pere kélee sui? Káfulu-laa é kɛ́ a maa-waa dɛ̀ɛ Ɣâla pɔ́. 12Kákaa Ɣâla ŋɔɣelei maa kpɛnii lai, ka kɛ̀ ŋ̀wɛ̂li a gɛɛ é pá a maa félaai. Ŋ̀elei ŋí ƃe ŋele-kɔlɔŋ a pâi kérenîi la, ŋ̀elei su sãai kélee dia máŋ díkɛ séɣeŋ. 13Kɛ́lɛ, ŋɔkono-teei sârai kwa ɣele nina-ŋa maa kpɛnîi da lɔii, nyíi maa-waa-laa a pâi kɛ̂i zui.
14Mɛni ma ŋáwɛli-kɛ-maa ƃelai, tãi ka zãâi ŋí maa kpɛnîi lai, ka kɔ́ a gbanaŋɔɔ a gɛɛ é kákaa lii-sêe sú kásɔŋ fé kɛ̀ káa ŋ̀ɛi-tuɛ da mɛni nyɔ́mɔɔ kélee. 15Ka Kúnuu-namui maa-kpɛŋ lii-kpele siɣe a ƃalo-laa. Bere nɔ́ ƃe máŋ kúwɛli-kɛ-maa-ƃarâŋ Pɔ̂ɔ è kɔlɔ pɔ̃yɛ la kápɔ naa yɛ̂ɛ berei Ɣâla è maa-tare tɛ̀ɛ la bɔi. 16È nyíŋi maa-mɛni ƃò yɛ̂ɛ berei a gɛ̀ la ŋɔkɔlɔ-ŋai kélee sui. Ŋɔkɔlɔ-ŋai su mɛni-ŋa da-ni díkaa naa díŋa kâai kpanaŋɔɔ̂i nyíi-ŋai diai dífa mɛni ŋá kàai, da gili-tama-ƃelai, da dípene a díkpɔɔ̂i-su-kara, yɛ̂ɛ berei da gɛ̀ la a Ŋ̀âla-kɔlɔ kpéli-ŋai. 17Mɛni ma, ŋáwɛli-kɛ-maa-ƃelai, yɛ̂ɛ berei ká nyíŋi kɔ́lɔŋ la nàa tuɛi, ka kámɛi káa, à wàla kɛ̀ tí ŋ̀wana-lɔ̂ɔ-ƃelai dítûa-pere-nyɔŋ a pâi kákulâi berei ma é kákili-tɔɔ-maa tɔnɔi láŋ káyêei. 18Kɛ́lɛ, ka ƃɔlɔ Kúnuu-namui da Kúƃalo-nuui Zîsɛ Kôrai ŋɔƃɛlɛ-sêei su da ŋɔtárei. Fólo-laa é kɛ́ ma sâa da wɔlɔ-wɔlɔ. É kɛ́ ti.
Currently Selected:
Pitɛ Veerɛi 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
