Zɔ̂ŋ Maa-ŋuŋ 2
2
Kôrai ƃa kúkpɔŋ-mâ nuui
1Nónîi, ŋa mɛnii ŋí pɔ̃yɛɛ̂i kápɔ naa a gɛɛ káfe sɔnyɔ̂ŋ kɛ̀. Kɛ́lɛ, à kɛ̀ núu da à sɔnyɔ̂ŋ kɛ̀, kúmɛi-woo ƃo-nuu káa naa Nàŋ-nuui pɔ́ naa, ǹyaa ƃa dɔ̃yâ-nuui Zîsɛ Kôrai. 2Ǹyaa kpîŋ ƃa kúsɔnyɔ̂ŋ maa-sala-sɛŋ. Vé nɔ́ kúa tɔnɔ kúsɔnyɔ̂ŋ mɛni ma, kɛ́lɛ, gáa ǹɔii kélee ŋɔsɔnyɔ̂ŋ mɛni ma. 3Nyíŋi a nɛ̀ a tɔ̃yâ a gɛɛ kú gɔ́lɔŋ, à kɛ̀ kwa ŋɔtɔ̂ŋ ŋai mɛi kâa. 4Ǹúui a mò nyɛɛ, “Ŋá gɔ́lɔŋ,” kɛ́lɛ, va ŋɔtɔ̂ŋ-ŋai mɛi kâai, gáa a lɛ́ɛ-nuu, dɔ̃yâi fé gbonôi. 5Kɛ́lɛ, ǹúui a ŋ̀óoi lâai kɛ̀i, tɔ̃yâ ma, ŋwɛli-kɛ-maai gáa gbonôi Ɣâla maa-mɛni mai, ǹáa fɛɛ̂i. Ǹyaŋ nyíŋi a nɛ̀ kûa a tɔ̃yâ a gɛɛ kúkaa gbonôi. 6Ǹúui a mò a gɛɛ gáa gbonôi, fɛ̂ɛ é sía yɛ̂ɛ berei è sía lai.
Dɔ̂ŋ ninai
7Ŋáwɛli-kɛ maa-ƃelai, fé tɔ̂ŋ nina pɔ̃yɛɛ̂i kápɔ naa, kɛ́lɛ, dɔ̂ŋ pɔlɔi nyíi kɛ̀ káyêei é kúla gɔ́ɔ pîlanii mai ƃê. Dɔ̂ŋ pɔlɔi ƃa ŋ̀óoi nyíi ka m̀ɛnii. 8É máŋ kɛ́ tí, ŋa tɔ̂ŋ nina pɔ̃yɛɛ̂i kápɔ naa nyíi gáa a tɔ̃yâ gbonôi da kákponôi, kpɛ́ni fêi, gbínii káa tɛ̂ɛ, dɔ̃yâ-kwaa-ponoɔi kɛ́ nâa fólo. 9Ǹúui a mò a gɛɛ gáa gwaa-ponoɔi su, kɛ́lɛ, gɛ m̀arâai kpɔarai, maa-nuui káa niî gbínii su. 10Ǹúui a m̀arâŋ-nuu wɛ̀lii, gáa gwaa-ponoɔi su, ǹyaŋ núu-karêŋ mɛni fé zu. 11Kɛ́lɛ, ǹúui a m̀arâŋ-nuu kpɔ̀arai, gáa gbínii su, gɛ sia gbínii su, vé ƃɛ́i kɔ́lɔŋ a liî naai, kpɛ́ni fêi, gbínii a ŋ̀ɛi pú.
12Ŋa kɔlɔ pɔ̃yɛɛ̂i kápɔ naa, ńônii, kpɛ́ni fêi, kásɔnyɔ̂ŋ-ŋai su-mɛni a lɛɛ zarâi. 13Ŋa kɔlɔ pɔ̃yɛɛ̂i kápɔ naa, ńâŋ-ni, kpɛ́ni fêi, ka ǹúui kɔ́lɔŋ kùla gɔ́ɔ pîlanii. Ŋa kɔlɔ pɔ̃yɛɛ̂i kápɔ naa, ǹyaŋ-kpa-ŋa, kpɛ́ni fêi, káyee a tɛɛ ŋwana-lɔ̂ɔ-nuui ma. Ŋa kɔlɔ pɔ̃yɛ kápɔ naa, nîa-pɛlɛɛ, kpɛ́ni fêi, ka Nàŋ-nuui kɔ́lɔŋ. 14Ŋa kɔlɔ pɔ̃yɛ kápɔ naa, ńâŋ-ni, kpɛ́ni fêi, ka ǹúui kɔ́lɔŋ kùla gɔ́ɔ pîlanii. Ŋa kɔlɔ pɔ̃yɛ kápɔ naa, ǹyaŋkpa-ŋa, kpɛ́ni fêi, kákponôi kpanaŋɔɔ̂i, Ɣâla ŋɔwóoi kɛ́ ƃo kákponôi, ǹyaŋ ka ŋwana-lɔ̂ɔ-nuui yée mɛi ɣále.
15Káfe ŋ̀éniɛi wɛ̀li, kpaa máŋ zãâi díkaa ŋ̀éniɛi sui. À kɛ̀ núu da a ŋ̀éniɛi wɛ̀li, Nàŋ-nuui ŋɔwɛli-kɛ-maai fé gbonôi. 16Kpɛ́ni fêi, sɛŋ kélee gáa ŋ̀éniɛi sui, núu kpono ŋɔsɛŋ-wɛliɛ, núu ŋ́ɛi ŋɔsɛŋ-wɛliɛ da fulu-laa maa-yoŋka-teɛɛ dífe kula ni Nàŋ-nuui yêei, kɛ́lɛ, díkaa a ŋ̀éniɛi su-sãa. 17Ŋ̀éniɛi a tɛɛ̂i da ŋɔsu-sɛŋ-wɛliɛi kélee. Kɛ́lɛ, ǹúui a Ɣâla nîa-mɛni kɛ̀i, a pâi kɛ̂i naa wɔlɔ-wɔlɔ da wɔlɔ-wɔlɔ.
Kôrai-tɔɔ maa-nuui
18Nîa-pɛlɛɛ, tãi gbɛɛ ŋái ká yɛ̂ɛ berei ka mɛni la a gɛɛ Kôrai ŋɔtɔɔ-maa-nuu a pâi, ŋɔtɔɔ-maa-ƃela támaa da nâa pá. Maa-mɛni ma kwa gɔ́lɔŋ a gɛɛ gáa a tãi gbɛɛ ŋái. 19Dí kùla kúsama, kɛ́lɛ, dífe kɛ́ ni a kúta. Kpɛ́ni fêi, eêi kɛ̀ dîi kɛ̀ a kúta, dîi lɛɛ kúsama. Kɛ́lɛ, dí kùla kûa a gɛɛ é lɛ́ a gɛɛ dí kélee dífe a kúta. 20Kɛ́lɛ, Núu Maa Waai a wulɔ pú káŋûa. Ǹyaŋ ká kélee ká tareɛ̂i zu. 21Ŋa kɔlɔ pɔ̃yɛ kápɔ naa, zu-kulai fa káfe dɔ̃yâi kɔ́lɔŋ, kɛ́lɛ kpɛ́ni fêi, ká gɔ́lɔŋ. Ǹyaŋ ka gɔ́lɔŋ a gɛɛ lɛ́ɛ fa kùla dɔ̃yâi su. 22Gbɛ̂ɛ ƃa ǹɛ́ɛ-nuui é kúla ǹuui pôlu a Zîsɛ maa sîa tòo a gɛɛ vé a Kôrai? Maa-nuui ƃa Kôrai ŋɔtɔɔ-maa-nuui nyíi a Nàŋ-nuui maa sîa tòo da Nòŋ-nuui. 23Ǹúui kélee a Nòŋ-nuui maa sîa tòo Nàŋ-nuui fé ǹyêei. Ǹúui a Nòŋ-nuui maa-mɛni ƃòi, Nàŋ-nuui káa ǹyêei máŋ. 24Mɛnii ká mɛ̀ni gɔ́ɔ pîlanii, tɔɔ é kɛ́ kákponôi. À kɛ̀ mɛnii ká mɛ̀ni gɔ́ɔ pîlanii à kɛ̀ kákponôi, gɛ̀ ní, káa kpîŋ ka pâi kɛ̂i Nòŋ-nuui kponôi da Nàŋ-nuui. 25Nyii a góno tée la ku-yêei, ǹyaa ƃa wɔlɔ-wɔlɔ fulu-laa.
26Ŋá mɛnii ŋí pɔ̃yɛ kápɔ naa é pîlaŋ ǹûai dîa da ŋ̀wɛlii dí kápɛlɛ̂i. 27Kɛ́lɛ, ŋulɔ-puɔɔ-ŋuai ká zɔlɔ ƃô ǹyêei, gáa kákponôi, ǹyaŋ vé a sɛŋ núu da é sɛŋ lɛ́ kâa; kpɛ́ni fêi, ŋɔwùlɔ-puɔɔ-ŋuai a mɛni kélee lɛ́ káa é pîlaŋ sɛŋ kélee ma, ǹyaŋ gáa a tɔ̃yâ, lɛ́ɛ fé zu, yɛ̂ɛ berei è ǹɛ la kâai, ka kɛ́ gbonôi.
28Nîa-pɛlɛɛ, ka kɛ́ nâa gbonôi a gɛɛ tãi a pâi pâi lai, lii-kpele é kɛ́ kúyêei, a gɛɛ ŋumɛ fé kúkɛ kú kúla pôlu a bá-tãi. 29À kɛ̀ ká gɔlɔŋ a gɛɛ gáa a tɔ̃yâ-nuu, ká gɔlɔŋ a gɛɛ ǹúui kélee a mɛni-sãa kɛ̀i, Kôrai a zɔlɔ ƃo a lóŋ.
Currently Selected:
Zɔ̂ŋ Maa-ŋuŋ 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
