Prov 19
19
1Ma' xta riq'or reh chi xa neb'aa' jino'q, xa re' la', mi korik wach ruk'ux.
Chuwach i ma' nimanik taj, eh xa tz'aqal wach mahk.
2Awach i ma' xta runa'ojb'al, ma' holohik ta chi reh.
Eh re' tehwachiil inq'eb'wik pamahk.
3Ruum i yiib' wach na'ojb'al i rub'an i winaq, i ruq'eb' i holohik b'eeh.
Eh noq inooj kuxoq panaah chik i QaJaaw Dios i rukoj.
4Re' b'ehoom laj winaq, ma' k'isiin taqe i ramigo.
Eh re' neb'aa' reh aha' naq wilik taqe i ramigo inq'eb'arik kuum.
5Awach i ma' re' tee korik i ruq'or, korehtaal inye'arik chutojariik i ru mahk.
Re' chukul q'orik ma' jaruuj naa reliik korik.
6Awach i ma' pixp taj, eh xa q'e' insihinik,
chu'nchel insik'wik reh, eh inkik'am chi amigohiil.
7Re' neb'aa' ni xata re' taqe ras oon ruchaaq' inaajwanik wach.
Ra'j naa chik re' taqe i ramigo ma' neenq'eb'wik reh.
Eh noq i rupahqaaj chik naa rutoob'jiik ma' awach ta chik taaj reh.
8Awach i rutijej riib', eh i rub'an paruk'achariik i rutijej
i ruk'ax riib', eh i nelik korik i rub'an.
9Awach i ma' re' taj i korik i ruq'or, naa ruye'ariik chutojariik i ru mahk.
Eh re' chukul q'orik kimik i ruk'am cho chinaah.
10Re' ma' nimanik taj ma' ruk'ul taj chi suq neen wihik,
ni xata neeruyee riib' chi re' i xa móso
neenkahnik chi taaq'anik chikinaah i k'amal b'eeh.
11Awach i wilik runa'ojb'al ma' jumehq'iil ta nchalik ruk'aah.
Re' i naa ruye'wiik runimaal wach re' chi naa rukuyum ransil i naa rub'aan reh.
12Noq inchalik ruk'aah i reey, xa je' chik rukab' i kaq b'ahlam.
Eh re' otob'il i rub'an i reey, je' rukab' noq
inqajik chaloq i mus jab' chinaah i kok' ch'ahn.
13Re' ak'uunb'ees ma' nimanik taj, xaruti'kiil ruk'ux i rajaaw i ruyeew.
Re' ixoq xa re' i k'aah i rub'an, je' rukab' i kojweel cho nah paat ma' jaruuj i rumay.
14Re' i kooch inkiyeew i tuutb'ees i ajaab'ees, xa paat, eh xa b'ehomal.
Eh re' i ehk'eenb'ees wilik runa'ojb'al, re' i QaJaaw Dios inye'wik cho reh.
15Re' sikilal inchalik jinaj suq laj wirik ruum.
Eh re' sikiil laj winaq, naa rukuyum ruwa' ruhaa'.
16Awach i rub'an i ruq'or i k'uhb'aal, i ruko'leej riij i ruk'achariik.
Awach i ma' imponik ta panaq'wach
i rub'eeh i QaJaaw Dios, kimik i naa ruchaliik chinaah.
17Awach i ruyeew rukemeel i neb'aa', je' naa re' i QaJaaw Dios i ruyeew rukemeel.
Eh re' i QaJaaw Dios naa ruye'wiik jilow reh i otob'il i rub'an.
18Chatijej aawak'uun awixq'uun noq koruyee riib' chi neenatijej,
xa re' la', maakansaj wo' chik ruuk' i rutijiik naa a'nam.
19Awach i q'e' josq', naa ruk'ulum i rutojb'aal.
Eh wila' ehteesjik chutojariik i ru mahk, xa ruman nee nuhtik wach i ruk'aah.
20Chak'am naah aak'uhb'aaljiik,
eh cha nimaj aatijiik imb'aan chi je' re' neenooj areq ana'ojb'al chi manlik.
21Re' winaq xama' k'isiin naq i ruyejaa' wach rub'aan.
Xa re' la' xa re' wo' inooj eloq wach i ruyeew q'ab' i QaJaaw Dios chi naa rub'anam.
22Awach i ruk'ax wach i b'ehomal, re' re' inq'eb'wik reh pan k'axik.
Ruum aj re', ma' xta reet chi xa neb'aa' jino'q chuwach i aj chukul q'orik.
23Re' ruyohljiik QaJaaw Dios, pan holohik laj k'acharik ink'amwik.
Noq ma' xta k'axik chinaah jino'q,
xasuq i k'acharik i rub'an.
24Re' i winaq xiik' naah sikilal,
atoob' ta wo' naq tuqlik chuwach i ruwa',
ni xata ruk'uxariik iraaj rub'anam.
25Wila' xye'arik chutojariik i ru mahk i ma' xta runa'ojb'al
nee rukoj rehtaal chi ma' holohik taj i rub'an.
Eh re' wilik runa'ojb'al reh neerutijej ruuk' i ruq'ilariik neemb'aan.
26Awach i relq'aaj chib'ih reh i rajaaw, eh iresaj reje i rutuut pampaat,
re' re' k'ixb'ilaal imb'anik ma' ruk'ul ta naq chi naa rub'anam i je' re'.
27Hat wak'uun noq wilkaat, maayeew chi re' chi ma' re' aq'ilariik.
Chak'am la' naah aak'uhb'aaljiik ruum re' re' inye'wik ana'ojb'al.
28Re' i ma' re' taj i korik i ruq'or, xa rukaqse'laaj i korik.
Eh re' yiib' wach runa'ojb'al, xa re' i yiib' wach q'orik i nelik cho pan chi'.
29Re' i ti' k'axik korjinaq chik cho chi keh i yiib' wach kib'anik.
Eh re' i ma' kinimanik taj, kow naakiye'ariik chi tz'uhuum.
Currently Selected:
Prov 19: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
