Prov 18
18
1Re' i ruq'eb'em riib', xa re' i k'axb'al riib' i reh i rusik'.
Eh ma' runimaj taj i ruk'uhb'aljiik.
2Re' i ma' nimanik taj, ma' raaj ta rutijem i korik.
Xa re' la' i rub'aan i yiib' wach wilik cho paránima.
3Re' i rub'anariik i yiib' wach na'ojb'al, xa q'eb'ej iib' i ruk'am chaloq.
Eh re' i niimb'isanik wachiis xa k'ixb'ilaal i ruk'am chaloq.
4Re' ruq'oral i winaq, je' rukab' i chaamlaj ha',
je' rukab' i nim ha' kow rooq, ruum nujinaq chi na'ojb'al.
5Ma' ruyee ta riib' chi neenq'orarik chi ma' xta ru mahk i yiib' wach runa'ojb'al.
Eh chi neenkojarik ru mahk i ma' xta ru mahk.
6Re' ma' nimanik taj, xa ruum i chii' i rumin riib' pan peleto.
Eh ruuk' ruq'oral i ruyeew riib' chi q'ojarik.
7Eh re' i ma' nimanik taj, re' ruq'oral inq'eb'wik reh.
Ruum taqe i ruq'oral je' naa rujihk'aaj i ralaq chi k'ahaam.
8Re' ruq'oral i xa tz'aqal wach k'utaaj yiib' wach i ruk'am chaloq.
Eh imponik wach b'aaq i ruti'kiil i rub'an.
9Awach i rusikileej wach i rukamaj,
eliik kiwach ruuk' i aj sachool
10Re' i rub'ihnaal i QaJaaw Dios, je' rukab' inajt naah tz'aq,
eh ar inooj kiko'leej kiib' i korik wach kik'ux.
11Re' b'ehoom reh i rukapaaj chi re' i rub'ehomal,
je' rukab' i tinamit kotimaj riij chi najt naah tz'aq ko'lemb'al reh.
12Awach i q'e' nim wach i rub'an riib', ma' naa ta reliik korik.
Eh awach i xama' nim ta wach i rub'an riib', naa reliik korik.
13Awach i xa ruchaq'weej lom i q'orik noq komajaa' irib'iraj rukorkiil,
xiik' naah yib'kiil wach i rub'an, eh k'ixb'ilaal chi reh.
14Noq yowaab' jino'q, neerukuy ransil wila' xuchop ruk'ux.
Raaj wi xyoj ruk'ux chi jumpech, ma' awach ta chik neenuksanik reh.
15Re' taqe i wilik kina'ojb'al, eh holohik i wilik cho pan kánima,
inkireq wo' hoq i na'ojb'al inkisik'.
16Eh noq wilik i rusiij i winaq, xa chu'nchel neenk'ulwik reh,
eh nee wo' nooj okoq kuuk' i nimaq wach kina'ojb'al.
17Re' imponik chi peet pan q'atb'al q'orik, i ruq'or chi ma' xta ru mahk.
Eh noq imponik awach uuk' wilik rupeleto, re' reh inq'orik reh chi wilik ru mahk.
18Re' i QaJaaw Dios ineesanik reh i peleto,
i rukoj taqe panotob'il peleto inki a'n chikiwach.
19Awach i hermano inq'ehtjik, je' naa jino'q tinamit kotimaj riij chi tz'aq,
ruum re' i peleto inki a'n taqe i hermano, je' rukab' i tz'ilom imb'aan wii' tz'ahpik.
20Re' ju'jun naa rub'anam rusuqkiil wila' holohik taqe i ruq'or.
Eh naa wo' ruk'ulum jilow wila' ma' holohik taqe i ruq'or.
21Awach i holohik i ruq'or ruuk' i ju' raaq', k'acharik i ruk'am cho chinaah.
Awach i yiib' wach i ruq'or ruuk' i ju' raaq', kimik i ruk'am cho chinaah.
22Noq i rureq rehk'een i winaq, ma' k'isiin ta loq'il.
Ruuk' i re', i ruk'ul nimlaj rotob'il i QaJaaw Dios.
23Re' neb'aa' noq i rutoq'aa' q'orik ko rupahqaaj rukuyb'al.
Eh re' i b'ehoom reh, pank'aah inchaq'wik.
24Wilik taqe i amígo jumehq'iil inyoj kik'ux.
Eh wilik taqe i amígo xti q'e' neetikik'ax chuwach jino'q aawas oon achaaq'.
Currently Selected:
Prov 18: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
