Zac 5
5
Tx'an un chi ec' jenenok
1Ay junxa tzet max tx'oxlay wila'. Ay jun un tz'ibbil, tol chi ec' jenenok max wila'. 2Axa cham ángel tu' max k'anlej ayin axca ti': ¿Tzet yetal chel tu'? ẍi ayin. Max walon bay: Ay jun un tz'ibbil chi wila', tol chi ec' jenenok. Baloneb metro is k'atil, yetok nan is so' metro is sat, quin chi.
3Max yalon ayin axca ti': A bay tu' tz'ibbil ay jun yailal tol ok jay yiban masanil eb yobtakwom bay jun nación ti'. Atac'ala' tzet tz'ibbil oc yin is ca paq'uil. Masanil eb elk'om, c'al masanil eb chi yak' is ti' yin lek'tial, ok ilay el eb bay sat tx'otx' tx'otx'. 4A wal caw Jehová Cham Yajaw yin Masanil chi alon axca ti': Ayin ok watok jun yailal ti', yet watx' chi octok yul yatut eb elk'om, c'al eb chi locbaj in bi yin lek'tial, cax ok ayjokc'al ec' jun yailal tu' bay tu', masantac'al tol c'amxa junok te patzab, tamwal junokxa ch'en ch'en ok canok, ẍi Jehová, ẍi cham ángel.
Jun ix ix ayaytok yul jun echbal
5Max eltek cham ángel max k'anjab wetok tu', cax max yalon ayin axca ti': Chi cam wal elon jun lanan tx'oxon aj ba tu', ẍi ayin. 6Max in k'anlej bay axca ti': ¿Tzet yetal jun tu'? quin chi. Max yalon ayin: A jun tu', echbal. A ton chi tx'oxontek is yobtakil eb anima cajan bay yulyibank'inal ti', ẍi.
7A jun echbal tu', plomo ayoc is makilok. Axa yet max ilay aj is makil tu xin, ix jun chotan aytok yul jun echbal tu'. 8Max yalon jun ángel tu' ayin axca ti': A jun ix max el tu', a mulej chi tx'oxtek, ẍi. Lajwi tu' max tenlaycan aytok ix yul yuj, axa makchen can ay is makil tol plomo tu'.
9Max wilon paxok, ay cawan ix chi tit jenenok. A eb tu' ay xic' eb, axca yet no garza, max yiaj eb jun echbal tu', max toj pax jenenok eb.
10Max in k'anlen pax bay jun ángel chi k'anjab wetok tu' axca ti': ¿Baytal chi yitok eb jun echbal tu'? quin chi bay. 11Max yalon ayin: Tol ok tok watx'nej eb jun templo bay yul yet Sinar. A yet mayal watx'ji el jun templo tu', axa watx'nen octok chotan eb jun echbal tu' yiban is batxlubal, ẍi.
Currently Selected:
Zac 5: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
