Zac 6
6
Caneb carruaje yet owal
1Ay c'apax junxa tzet max tx'oxlay wila'. Max wil yeltek caneb carruaje yet owal bay nan xol cab tzalan tol naba bronce. 2A jun babel carruaje tu', ibil oc yuj jun cakyin chej. Axa jun yet is cab, k'ekyin no' inej ocok. 3Axa jun yet is yox, sakyin no' inej ocok. Axa jun yet is can, tz'ibibi yili no' inej ocok.
4Max in k'anlen bay cham ángel chi k'anjab wetok tu' axca ti': Mamin, ¿tzet wal chi yal elapnok junxa ti'? quin chi bay. 5Max yalon jun ángel tu' ayin axca ti': A juntzan ti' chi toj bay caneb makanil bay chi tit cak'ek', yet mayal lajwi yoc eb satak Cham Yajaw bay masanil yulyibank'inal. 6A jun carruaje ibil oc yuj no k'ekyin chej tu', chi toj bay nación bay norte. Axa jun carruaje ibil oc yuj no sakyin chej tu', tzakan toj yintak. Axa no tz'ibibi inej oc carruaje tu', chi tojcan bay sur, ẍi cham ángel tu'.
7A juntzan no chej caw wal ay yip tu', chi yochejxac'al chi toj yil bay masanil yulyibank'inal. Max yalon cham ángel tu' bay no' axca ti': Asek e yil bay masanil yulyibank'inal, ẍi. Cax max toj no' xin.
8Max lajwi tu', max awji jun ángel tu' ayin axca ti': Ila wali, a yuj jun carruaje max toj bay nación bay norte, xan ok oc wanaj yowal c'ul Jehová yiban nación tu', ẍi.
Max oc yikbej cham Josué
9A Jehová max alon juntzan k'anej ti' ayin axca ti': 10Cha' junok ofrenda bay eb meltzojnaktek yin preso bay Babilonia: a ton Heldai, Tobías, c'al Jedaías. Ac'ala' yet jun c'u tu' chach toj pax bay is yatut Josías is c'ajol Sofonías. 11A yetok ch'en plata c'al ch'en oro ok a cha tu', cha watx'nej corona, cax chaon oc yin is jolom Josué sat sacerdote, is c'ajol Josadac. 12Cax chalon bay axca ti': A Jehová Cham Yajaw yin Masanil chi aloni, tol a jun mac chi yik Wolej, ok yi' yip bay ayic' tu', cax ok ca watx'nen aj in templo. 13A ton t'inanc'alta' ca watx'nen aj in templo tu', cax ok chaon is mimanbilal axca yet junok rey; axa yay chotan yiban is trono yin yajawilal. A bay tz'eyil is trono tu' ok ay chotan jun sacerdote, junxanej yak'on nabal eb cawanil. 14Axa corona ok a watx'nej tu', axca nabaniltek chi yun cancan bay in templo yet chi nalaytek Helem, Tobías, Jedaías c'al Hen, is c'ajol Sofonías, cachi bay, ẍi Jehová.
15Ok tit eb anima bay najat colwaj e yetok, yuj ca watx'nelay aj is templo Jehová. Caytu' ok yun nachaj el e yuj, tol a Jehová Cham Yajaw yin Masanil max in chekontek walon ayex. A jun ti' ok yunej, tatol ayex ti' ok e cha e yabej, c'al e yiken tzet chi yal Jehová co Diosal.
Currently Selected:
Zac 6: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
