Zacarías 4
4
Aju o til Zacarías ti'j tcubil candil ex cyi'j tze' olivo
1Aju anjel in yolintok wuc'ile ajtz meltz'aj juntl maj ex in jaw tc'asun ic tza'n nno'cx c'asun jun xjal in tan. 2Tzaj tkanin weye:
—¿Ti in tila?
Atzun weye xi ntzak'we'ne:
—In wile jun tcubil candil k'an pwak ttx'otx'il, tuc'ix jun tcubil aseyt tcub tibaj ex wuk candil; ex cyuj wuk tubo in pon canun aseyt cyi'j. 3At cabe tkan olivo tcub ttxlaj tcubil candil, jun tuj tbank'ab ex jun tuj tnayaj.
4Ax icx xi nkanine te anjel aju in yolintok wuc'ile:
—Tat, ¿ti t-xilen jlu? Nchiye.
5Atzunte anjel tzaj ttzak'we'n cyja':
—¿Minti'petzun ba'n tu'na ti t-xilen?
Xi ntzak'we'ne:
—Tat, minti' ba'n wu'ne, nchiye.
6Atzunte anjel tzaj tma'n weye:
—Atzun tkanil lu tu'n Kman te Zorobabel: Mya tu'n cyipumal txkan soldad, ex mya tu'n cyipumal xjal cbantel ak'untl, nok o'cx tu'n Nxewe, chi Kman aju Tajaw Tcyakil. 7¿Ti toclena aya matij witz? C'oquela te jun chk'ajlaj twitz Zorobabel. Ate Zorobabel cbel k'onte aju mancbil abj tu'n tjupet tja Dios, ex cjawiltzun tk'ajk'ajel cywi' cycyakil xjal te ak'bil chjonte: Tbanilxix te jlu, tbanilxix te jlu, che chilo.
8Tzaj tma'ntl Kman juntl tkanil weye:
9Ate Zorobabel ma cub k'onte t-simyentil tja Dios, ex tu'nx Zorobabel cpol baj ak'untl. Cyja'tzun c'elel cynic' ti'j, akine Dios aju Tajaw Tcyakil ma chinx samante teya. 10Akeju minti' xi cyniman tej ttzaj xe't ak'untl, ja'lo che jawil tzalaj oc tcyil oc tpon baj ak'untl tu'n Zorobabel, chi Kman.
Ax icx tzaj tma'ntl anjel weye:
—Akeju wuk candil lu, atzun ke tbak' twitz Kman in che que'yin tuj tcyakil twitz tx'otx'.
11Xi nkanine te anjel: ¿Ti cyxilen ke cabe tze' olivo cycub ttxlaj tcubil candil, jun tuj tbank'ab ex jun tuj tnayaj? 12Ax icx xi nkanintle te: ¿Ti cyxilen ke cabe tk'ab olivo cycub junx cyuc'il ke tubo k'an pwak cytx'otx'il, akeju in che ajben tu'n tpon aseyt cyi'j ke candil?
13Tzaj ttzak'we'n anjel:
—¿Minti'petzun ba'n tu'na ti cyxilen? Xi ntzak'we'ne:
—Tat, minti' ba'n wu'ne, nchiye.
14Atzun te tzaj ttzak'we'n:
—Atzun ke cabe xjal lu ma txi k'o'n cyoclen tu'n cyajben te Kman aju Tajaw Tcyakil twitz tx'otx'.
Currently Selected:
Zacarías 4: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993