Zacarías 5
5
Aju o til Zacarías ti'j jun botz' u'j tz'iban yol twitz
1Ax icx o wile jun botz' u'j tz'iban yol twitz ex in lipantok twitz cya'j. 2Tzaj tkanin anjel weye:
—¿Ti in tila? Chi.
Xi ntzak'we'ne:
—Ma wile jun botz' u'j tz'iban yol twitz ex in lipan twitz cya'j, at laj var tnukbil ex jwe' var twitz. 3Tzajtzun tma'n anjel weye: Atzun tz'ibamaj tcyakilju mya ba'n ctzajel tuj tcyakil twitz tx'otx'. Ic tza'nx in tma'n tuj jun pac' twitz, cbel cycastiw cycyakil keju ma che elk'an, ex cycyakil keju ma txi cytziyan yol mya ax toc, cbel cycastiw tu'n cycyim ic tza'nx tz'iban tuj juntl pac'. 4Ate Kman aju Tajaw Tcyakil chi in tma'n cyja': A kine chin xel samante mya ba'n tuj tja ju xjal in elk'an ex tuj tja ju xjal in ttziyan yol mya ax toc ex nno'c tk'o'n kine te testiw ti'j tyol. Aju mya ba'n ax ctel tuj cyja ex cbajel xitj tcyakil tu'n, cyuc'ix ke viga ex ke abj.
Aju o til Zacarías ti'j jun cajón ex jun xu'j
5Etz aju anjel in yolintok wuc'ile ex tzaj tma'n weye cyja':
—K'onca cwent ti'j aju ctzajel yec'un teya ja'lo.
6Xi nkanine:
—¿Titzun jlu? Nchiye.
Atzun te tzaj ttzak'we'n:
—Ate jlu jun cajón. Ex tzaj tma'ntl: Aju cajón lu, atzun malbil cyil cycyakil ke aj Israel.
7Tcubtok jun tmaksil cajón, plom ttx'otx'il. Jaw jako'n tmaksil ex attok jun xu'j k'ukl tcu'x tuj. 8Ex tzaj tma'n anjel weye:
—Aju xu'j lu, atzun jun techal ti'j ju mya ba'n, chi.
Cu'x tlamo'n juntl maj tuj cajón ex cub tmaksi'n ttzi' tu'n tmaksil plom ttx'otx'il.
9Xi nque'yine juntl maj ex o wile cabe xu'j attok cyxic' mer ic tza'n cyxic' garza ex tu'n cyk'ik' in che bet. Xi cyi'n aju cajón twitz cya'j.
10Xitzun nkanine te anjel aju in yolintok wuc'ile:
¿Jatum cpol cyi'n xu'j aju cajón? Nchiye.
11Atzunte anjel tzaj ttzak'we'n:
—Ma che'x binchalte jun tja tuj Babilonia. Octzun tjupet tja, cpol cyi'n aju cajón tuj ex axtzun cyjel ten tibaj jun tk'ukbil.
Currently Selected:
Zacarías 5: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993
