Rom 5

Nimcu in tzaj tk'o'n Dios ke, tu'nju ma bant kten tuc'il

1Cyja'tzun ma ko oc te tz'aklxix tu'n Dios nok tu'n kocslabl, ex ma bant kten tuc'il Dios nok tu'n Kajaw Jesucrist. 2Ma tzaj tk'o'n Dios t-xtalbil ke nok tu'n Jesucrist, porque ma ko ocslan ti'j, ex wa'l ko'xix tuj t-xtalbil, ex in ko tzalaj tu'nju k'ukl kc'u'j ti'j tu'n kten tuc'il Dios tuj tajwalil. 3Ex mya nok o'cx jlu; ax icx in ko tzalaj tuj yajbil ke, porque ba'n ku'n, aju yajbil ke in tk'o'n kpasens tu'n tic'x ku'n; 4ex tu'n kpasens, cyuw kten tu'n tic'x ku'n; ex tu'nju nnic'x ku'n, mas in ke' kc'u'j ti'j Dios; 5ex tu'nju k'ukl kc'u'j ti'j Dios, mlay ko el tuj kch'ixwi; porque in kna'n tuj kanmi aju tc'ujlalil Dios ki'j tu'nju Xewbaj Xjan tzaj tk'o'n ke.

6Porque tej minti'tok kipun tu'n kclet ku'nx kib, cyja'tzun cyim Crist tu'n klaj tujxix tk'ijlalil, porque aj il ko'. 7Porque mlaylo txi tk'on tib jun xjal tu'n tcyim tu'n tlaj jun xjal tz'aklxix; ex katzunlo ka at jun xjal jacu tak' tib tu'n tcyim tu'n tlaj jun xjal ba'n. 8Pero in tzaj tyec'un Dios ka at tc'ujlalil ki'j, tu'nju o cyim Crist te kxel tej aj ilxtok ko'. 9Ic tza'n ma ko oc k'o'n te tz'aklxix tu'n Dios tu'nju cyim Crist, cyja'tzun mas in ke'xix kc'u'j ti'j, ko cletel tu'n oc ttzaj cycastiw xjal tu'n Dios. 10Ma bant kten tuc'il Dios tu'nju tcyimlen Tc'wa'l tej aj k'ojtok ko' ti'j, cyja'tzun mas in ke'xix kc'u'j ti'j ka oc ko cletel tu'n, tu'nju banin kten tuc'il Dios ex tu'nju jatz ank'in Jesucrist ex itz' ja'lo. 11Ex mya o'cx jlu; ax icx nim in ko tzalaj ti'j Dios tu'n Kajaw Jesucrist, porque tu'n Crist ma bant kten tuc'il Dios.

Aju tbincha Adán ex aju tbincha Crist

12Cyja'tzun, ic tza'n nok tu'n jun xinak ocx il cyxol cycyakil xjal, ex tu'nju il tzaj camic, cyja'tzun ilxix ti'j tu'n cycyim cycyakil xjal tu'nju cycyakil e binchan il. 13Porque na'nxtok tk'onjtz ley, attok il cyxol xjal, pero mlay k'manjtz ka at cyil xjal na'nxtok tul ley. 14Masque icju, pero ate camic cucx cycyim xjal tu'n; ttzajlenx ti'j Adán ul ti'j Moisés e cyim xjal masque mya icx tten cyil ic tza'n til Adán, porque ate Adán ic' tibaj jun mandamyent tzaj tk'o'n Dios te. Ate Adán jun techal ti'j Crist, aju attok tulel.

15Pero aju toyaj Dios ma tzaj tk'o'n ke mya ic tten ic tza'n til Adán. Porque nok tu'n til junx xjal cycyakil xjal in che cyim; pero mas nim aju t-xtalbil Dios in tzaj tk'o'n ke, porque nok cucx ma tzaj tk'o'n colbil cye nimcu xjal nok tu'n t-xtalbil junx xjal, a Jesucrist. 16Ex mya ic tten toyaj Dios ic tza'n til Adán o bant, porque nok tu'n jun il tbincha Adán cub cysentens xjal tu'n cynaj; pero aju toyaj Dios tzaj tk'o'n, in che oc xjal te tz'aklxix tu'n masque nim il otok cybincha. 17Porque nok tu'n jun il tbincha jun xjal in che cyim cycyakil xjal; ax icx nok tu'n jun xjal, a Jesucrist, oc ko ank'il ex oc ko cawil ako' ma kc'am nimxix t-xtalbil Dios, ex ma ko oc te tz'aklxix tu'n; jun oyaj jlu ma tzaj k'o'n ke.

18Cyja'tzun, ic tza'n e cub k'o'n cycyakil xjal tjak' sentens tu'n cynaj nok tu'n til jun xjal, ax icxtzun nok tu'n jun xjal tbincha aju tz'aklxix, jacu che oc cycyakil xjal te tz'aklxix tu'n Dios ex tu'n tten cychwinklal. 19Porque ic tza'n e oc nimcu xjal aj il nok tu'n tlaj jun xinak minti' xi tniman tyol Dios, ax icxtzun nimcu xjal oc che oquel te tz'aklxix tu'n Dios nok tu'n jun xinak xi tniman tyol Dios.

20Tzaj tk'o'n Dios tley tu'n telxix cynic' xjal ti'j ka aj il ke twitz Dios, pero ic tza'n o chmet-xix cyil xjal, ax icxtzun mas nimxix t-xtalbil Dios tzaj tk'o'n. 21Ic tza'n e cyaj xjal tjak' tipumal il ex e cyim tu'n, ax icxtzun te Dios t-xtalbil at tipumal tu'n koc te tz'aklxix tu'n, ex tu'n tten kchwinklal te jumajx nok tu'n Jesucrist aju Kajaw.

Currently Selected:

Rom 5: MAMH

Highlight

Copy