Rom 4

Jun yec'bil te ke ti'j Abraham

1¿Ti oc kma'? ¿Ti o tcamba kxe'chel Abraham jatum elni ko' ti'j? 2Nokwit tu'n tak'unben Abraham o tz'oc k'o'n te tz'aklxix tu'n Dios, atwitlo tumel tu'n tjaw tniman tib cywitz xjal, pero mya twitz Dios. 3Chi in tma'n tuj Tu'jil: Xi tocsla'n Abraham tyol Dios; cyja'tzun oc k'o'n te tz'aklxix tu'n Dios nok tu'n tocslabl, chi tuj Tu'jil. 4Pero aju in ak'nan, mlay kma ka nok jun oyaj aju twi tc'u'j, a jlu chojbil te. 5Atzun teju minti' nno'c ke' tc'u'j ti'j tbinchben, nok o'cx nno'c ke' tc'u'j ti'j Dios aju nno'c k'onte cye xjal aj il te tz'aklxix, atzunju nno'c k'o'n te tz'aklxix tu'n Dios nok tu'n tocslabl. 6Ic tza'n in tma'n David, at tzalajbil te xjal aju nno'c k'o'n te tz'aklxix tu'n Dios mya tu'n tak'unben. 7Porque chi David:

At tzalajbil cye xjal in cub najsa'n cyil, ex in cub maksi'n cyil.

8At tzalajbil te xjal aju mlay tzaj na'ntl til tu'n Kman, chi tuj Tu'jil.

9¿Alcyetzun ke xjal tu'n tten tzalajbil cye? ¿O'cxpe keju sircunsidarimaj ke, ex ka icx keju mya sircunsidarimaj ke? Porque ma kmaye, o tz'oc k'o'n Abraham te tz'aklxix tu'n Dios nok tu'n tocslabl. 10Katzun icju, ¿alcyetzun k'ij toc k'o'n Abraham te tz'aklxix? ¿Otokpe sircunsidarinjtz, ex ka na'nxtok? Pwes na'nxtok t-sircunsidarinjtz. 11Te tibajxi o sircunsidarinjtz Abraham tu'n toc te jun techal ka otok tz'oc k'o'n te tz'aklxix tu'n Dios, nok tu'n tocslabl tej na'nxtok t-sircunsidarinjtz; cyja'tzun ma tz'oc te mambaj cye cycyakil ocslal mya sircunsidarimaj ke, ax icx cye tu'n cyoc te tz'aklxix tu'n Dios nok tu'n cyocslabl. 12Ax icx oc Abraham te mambaj cye keju sircunsidarimaj ke, pero mya o'cx sircunsidarimaj ke, ax icx at cyocslabl, ic tza'n tocslabl kxe'chel Abraham tej na'nxtok t-sircunsidarinjtz.

Tu'n tocslabl Abraham o tc'am aju tziyimaj tu'n Dios

13Porque tzaj ttziyan Dios te Abraham ex cye tiyjil tu'n cyoc te etzal te tcyakil twitz tx'otx', mya tu'nju otok txi tniman Abraham ju ley tzaj ttziyan Dios jlu, nok o'cx tu'nju otok tz'ocslan Abraham; cyja'tzun oc k'o'n Abraham te tz'aklxix tu'n Dios nok tu'n tocslabl. 14Porque ka o'cx ke xjal in xi cyniman ju ley at cyoclen ti'j ju etzbil, entons nokxlo gan tu'n kocslan ti'j Jesucrist, ex aju yol tzaj ttziyan Dios, minti'wtlo tajben. 15Porque ate ley at castiw tu'n; katzun minti' jun ley, ax mlay cub cycastiw xjal, porque mlay tz'el knic' ti'j ka otok che ic' xjal tibaj ley.

16Cyja'tzun, nok tu'nju at tocslabl Abraham tzaj ttziyan Dios jun tyol te, tu'n toc te jun xtalbil, tu'ntzun tcyuwsanjtz ju yol tzaj ttziyan Dios cye cycyakil tiyjil Abraham. Mya o'cx cye keju in xi cyniman ju ley tzaj ttziyan Dios ju yol lu, ax icx cye keju in che ocslan ic tza'n te Abraham ocslan; cyja'tzun ma tz'oc Abraham te mambaj ke kcyakil, 17ic tza'n in tma'n tuj Tu'jil: Ma tz'oc nk'o'ne te mambaj cye nimcu nasyon, chi tuj Tu'jil. Ate Abraham kman twitz Dios, porque xi tocsla'n tyol Dios, aju Dios in che jatz ank'in cyimni tu'n, ex oc tyolin Dios in bant aju minti'tok at nej.

18Masque minti' tumel tuj twitz Abraham tu'n titz'j jun tc'wa'l, pero xi tocsla'n tyol Dios ex cub tyo'n ex o ke'xix tc'u'j ti'j tu'n toc te mambaj cye nimcu xjal, ic tza'nx o tma Dios te: Ictzun c'oquel cyajlal tiyjila, chi Dios. 19Ex minti' cub numj Abraham tuj tocslabl, minti' cub t-ximan ka otok tijin t-ximlal, porque ch'ixtok tjapun jun syent abk'i tu'n, ex minti' cub t-ximan ka miban alin Sara. 20Ex minti' jolpaje' tc'u'j ti'j ju yol tzaj ttziyan Dios te; o'cx tcyuwsa tib tuj tocslabl ex xi tk'o'n chjonte te Dios. 21O ke'xix tc'u'j ti'j ka at tipumal Dios tu'n tbinchante tcyakilju otok tzaj ttziyan Dios te. 22Cyja'tzun oc k'o'n te tz'aklxix tu'n Dios nok tu'nju tocslabl.

23Ex mya nok o'cx ti'j Abraham o tz'ibanjtz ka otok tz'oc k'o'n te tz'aklxix tu'n Dios, 24ax icx o tz'ibanjtz ki'j, porque icx ke in ko oc k'o'n te tz'aklxix tu'n Dios nok tu'n kocslabl, ako' in ko ocslan ti'j Dios aju jatz ank'in Kajaw Jesús tu'n cyxol cyimni. 25Ate Jesús xi k'o'n tuj cyk'ab xjal tu'n tcyim tu'n tlaj kil, ex jatz ank'in tu'n koc te tz'aklxix twitz Dios.

Currently Selected:

Rom 4: MAMH

Highlight

Copy