Cybinchben 25

Tej tpon k'i'n Pablo twitz Festo

1Ultzun Festo tuj tnam Cesarey tu'n toc te gobernador, tujtzun toxin k'ij jax tuj tnam Jerusalén. 2Atzun cye nejenel cye pal ex ke nejenel cyxol xjal judiy, e pon twitz Festo k'malte alcye til Pablo, ex e cubsan twitz, 3xi cykanin te tu'n tbinchante xtalbil tu'n tul k'i'n Pablo tuj Jerusalén, otok bant ti'j cyu'n tuj ewaj tu'n tcub Pablo cyu'n tuj be. 4Atzunte Festo xi ttzak'we'n:

—Ax ta' Pablo tuj Cesarey tocx tuj pres, ax icx weye chin ajel naje tu'n npone tuj Cesarey. 5Cyja'tzun, akeju nejenel cyxole ba'n tu'n cycu'pun wuc'ile, ex ka at jun til xjal lu, ba'n tu'n cymanteye, chi Festo.

6Axtzun o ten Festo tuj Jerusalén wajxak k'ijlo ex ka laj, cu'xtzun tuj Cesarey. Tujtzun juntl k'ij, cub ke' tuj tk'ukbil tu'n tcawin, ex xi tma'n tu'n ttzaj k'i'n Pablo. 7Tejtzun tul Pablo, oc cychmon cyib xjal judiy ti'jele, akeju otok che tzaj tuj Jerusalén, cymatzun ka ma'xix til Pablo ex nimxix mya ba'n in tbincha'n, pero minti' bant tu'n cyel twitz. 8Yolintzun Pablo te tcolbil tib chi cyja':

—Minti' ma nbinchaye jun il ti'j cyley xjal judiy, mi ti'j tja Dios, mi ti'j tat gobierni.

9Atzunte Festo o tajbe tu'n tcub xtalin cyu'n xjal judiy, cyja'tzun xi tkanin te Pablo:

—¿Tajpeya tu'n tjaxa tuj Jerusalén ex matzun tu'n toca tuj xjel wu'ne ti'j tcyakil jlu?

10Xi ttzak'we'n Pablo:

—Twitz tcawbil gobierni atine, jatum tu'n woque tuj xjel. Ba'n tu'na minti' jun mya ba'n ma nbinchaye cyi'j xjal judiy. 11Ka at jun mya ba'n ma nbinchaye ex ka at jun wile tu'n ncyime, mlay cub nxc'ayin wibe tu'n ncyime; pero ka minti' jun ma nbinchaye ic tza'n in cyma'n jlu, mi a'l jun ba'n t-xi k'onte weye tuj cyk'ab. Mas ba'n, chin t-samanxa tu'n woque tuj xjel twitz tat gobierni.

12Atzunte Festo tbajlenxi tkanin cye tuc'il, xi tma'n te Pablo:

—Ma tmaya tu'n t-xi'ya twitz tat gobierni tu'n toca tuj xjel. Cxe'ltzuna twitz tat gobierni.

Tej tpon k'i'n Pablo twitz rey Agripa

13Tbajlenxitzun cab k'ij, ul rey Agripa tuc'ix tanb aju Berenice tbi, e ul tuj tnam Cesarey k'olbelte Festo. 14Ex axtzun e ten ela' k'ij; xitzun ttx'olba'n Festo te rey aju tcaws Pablo, ex tma:

—At jun xjal tzalu cyaj k'o'n tuj pres tu'n Félix. 15Tejtzun nxi aje tuj Jerusalén, tzaj cytx'olba'n ke nejenel cye pal ex ke cytijil xjal judiy ti'j ju xjal lu, tzaj cykanin tu'n tcub t-sentens. 16Xitzun nma'ne cye, minti' cycostumr aj Rom icju, tu'n tcub k'ot t-sentens jun xjal tu'n tcyim ka mi a'l te xjal cywitz ke aj k'oj ti'j ex tu'n t-xi k'ot ambil te ka at jun tyol te tcolbil tib. 17Cyja'tzun, tej cyul tzalu wuc'ile, te juntl k'ij jurat in cub ke'ye tuj nk'ukbile tu'n ncawine, xi nma'ne tu'n t-xi k'ibaj ju xjal. 18Tejtzun cyul nwitze ke aj k'oj ti'j, mya ic tten til o cyma ic tza'n otok cub nximane, 19nok o'cx in che k'ojin ti'j tu'n tlaj cyocslabl ex tu'n tlaj jun xjal Jesús tbi, o cyim, pero in tma'n Pablo ka itz'. 20Minti' pujet wu'ne alcye tumel ti'j jlu, cyja'tzun xi nkanine te Pablo ka tajbil tu'n t-xi' tuj Jerusalén ex matzun tu'n toc tuj xjel ti'j tcyakil jlu. 21Atzunte Pablo tzaj tma'n tu'n t-xi k'it twitz president August, tu'ntzun toc tuj xjel tu'n president, cyja'tzun xi nma'ne ax tu'n tten tuj pres acutzun in chin ximane ti'j alcye k'ij tu'n t-xi nsama'ne twitz president, chi Festo.

22Xitzun tma'n Agripa te Festo:

—Ax icx weye wajbile tu'n nbinteye tyol ju xjal lu.

Entons xi tma'n Festo te:

—Nchi'jxi tbiya tyol, chi Festo.

23Tujtzun juntl k'ij, tzaj Agripa tuc'ix Berenice cyuc'ix nim xjal cyuc'il, e ocxtzun tuj despach cyuc'ix ke coronel, ex ke cytijil xjal tujx tnam. Xitzun tma'n Festo tu'n ttzaj k'i'n Pablo. 24Entons tma Festo:

—Aya rey Agripa ex cycyakile akeye xinak ate'ye tzalu junx kuc'ile, lu jun xjal lu in che kanin cycyakil xjal judiy ti'j, e pon k'malte weye tuj Jerusalén ax icx tzalu, in jaw tk'ajk'ajel cywi' cyuwxix in cyma'n ka ba'n tu'n tcyim. 25Atzun weye ma tz'el nnic'e ti'j minti' jun mya ba'n ma tbincha tu'n tcyim, ex axte o kaninte tu'n toc tuj xjel twitz president August, cyja'tzun cyaj bant ti'j wu'ne tu'n t-xi nsama'ne tuc'il. 26Ex tu'nju minti' jun tumel axix toc tu'n t-xi ntz'ibane te tat gobierni, cyja'tzun ma tzul wi'ne Pablo cywitze, ex tnejelxix twitza, aya rey Agripa, tu'ntzun toc tuj xjel ex tu'n nbinteye jun tumel tu'ntzun t-xi ntz'ibane tuj u'j. 27Porque tuj nnable ka mya tuj tumel tu'n t-xi nsama'ne jun pres ka minti' ma txi ntz'ibane tuj u'j alcye til, chi Festo xi tma'n cye.

Currently Selected:

Cybinchben 25: MAMH

Highlight

Copy