Cybinchben 24

Aju tcolbil tib Pablo twitz Félix

1Tel-lenxitzun jwe' k'ij, cu'pun Ananías tuj Cesarey cyuc'ix junjun cytijil xjal, ex jun xjal lisensyad, Tértulo tbi, ate Ananías nejenel cye pal. E pontzun twitz gobernador chic'balte alcye til Pablo. 2Tejtzun ttxquet Pablo, oc ten Tértulo tx'olbalte alcye til Pablo, xi tma'n te Félix:

—Chjonte teya, tat gobernador, tu'nju ato'ye tuj txubtxaj tu'na ex ba'nxix tleya tcub cyibaj tnam tu'nju tnabla ba'nxix. 3Cyja'tzun in kc'mo'ne t-xtalbila tcyakil k'ij ex tuj tcyakil lugar, nimxix in xi kk'o'ne chjonte teya tat Félix, aya nimxix toclena. 4Pero tu'n mi'n t-sicta mas nim tuj, chin cubsale twitza tu'n t-xi tbi'na cab ox kyole, ka ma tbinchaya xtalbil. 5Ma cnet ju xjal lu ku'ne nok in tzpet-san cynabl xjal, ex in ocsan cyc'u'j cycyakil xjal judiy tuj tcyakil twitz tx'otx' tu'n cyk'ojin cyxolx, ex nejenel cyxol jun c'loj xjal t-xnak'tzben jun xjal aj Nazaret. 6Ax icx o tajbe tu'n tbaj ttz'ilsa'n tja Dios; cyja'tzun tzyet ku'ne [ex o kajbeye tu'n toc tuj xjel ku'ne ic tza'nx in tma'n kleye. 7Pero pon coronel Lisias, el ti'n tuj kk'abe tuc'il tipun, 8ex tzaj tma'n tu'n kule tuc'ila k'malte alcye til.] Ax icx teya oc toc tuj xjel tu'na, c'elel tnic'a ti'j ka at til ic tza'n in kma'ne, chi Tértulo.

9Ax icx cye xjal judiy xi cymojtza'n:

—Tcyakil jlu ax toc, che chi.

10Tzajtzun tyec'un tk'ab gobernador tu'n tyolin Pablo, xitzun tma'n Pablo:

—Ba'n wu'ne ela'xi abk'i toclen tena te jwes tuj ju nasyon lu, cyja'tzun ma ke'xix nc'u'je tu'n t-xi nma'ne ncolbil wibe teya. 11Ba'n tu'n t-xi tkanina tu'n tbinteya, ma cablaj k'ij njaxlene tuj Jerusalén c'ulul te Dios. 12Minti' in cnete cyu'n xjal judiy tzinwt chin yoline cyuc'il xjal ex ka tzinwt che jaw tilj xjal wu'ne, mi tuj tja Dios, mi cyuj ja te c'ulbil, mi tuj tnam; 13ex mlay che el twitz ti'j wile in cyma'n. 14Pero ax toc cxel nma'ne teya, ocsla'n wu'ne aju ocslabl in che yolin ti'j ka mya ba'n, ex in chin ajbene te Dios, aju Cydios ktzan nxe'chele, porque ocsla'n wu'ne tcyakilju tz'iban tuj tu'jil ley ex tuj cyu'jil t-sanjel Dios. 15Ex k'ukl nc'u'je ti'j Dios, ic tza'n cye k'ukl cyc'u'j ti'j, ka oc che jawil ank'in ke cyimni, tza'nx keju tz'aklxix, ax icx keju mya tz'aklxix. 16Cyja'tzun nno'c tilil wu'ne cucx tu'n nbinchanteye ba'n twitz Dios ex cywitz xjal ic tza'nx in tma'n wanmiye, ex tu'n ntene minti' npaltile.

17Tbajlenxitzun ela' abk'i, in ultzune tuj ntanmiye k'ol cotzbaj cye nxjalile ex k'ol oyaj te Dios. 18Matok in bant jlu wu'ne tuj tja Dios te tx'ajbil weye, tej ncnete cyu'n junjun xjal judiy aj Asia, mya nim xjal uc'in wu'ne ex mya in che tilin xjal wuc'ile. 19Awttzun keju ma che ul twitza k'malte alcye wile, ka at cyk'oj wi'je. 20Ex ka mi'n, ax ke xjal ate' tzalu ba'n tu'n ttzaj cyma'n alcye wile cnet cyu'n tej npone cywitz Aj Sanjelal cye xjal judiy. 21Katzun ka a wile tuj cywitz, tej ntene cyxol jaw tk'ajk'ajel nwi'ye cyuw ex xi nma'ne cyja': Ti'j ank'ibl cye cyimni ma chin oque tuj xjel cyu'ne ja'lo, nchiye cye, chi Pablo.

22Atzunte Félix, tej tbaj tbi'n jlu xi tma'n tu'n cyayon, porque elni tnic' ti'j ju Ocslabl lu, ex xi tma'n cye:

—Ocxi tcubil coronel Lisias c'eleltzun baj nnic'e ti'j cyxtise.

23Xitzun tma'n Félix te capitán tu'n toc xk'ukit Pablo, pero tzokpi'n ch'in ex tu'n mi'n cymayet ke tamiw oc cypon tuc'il tu'n cyajben te.

24Tbajlenxitzun cab k'ij, pon juntl maj Félix tuc'ix t-xu'jil Drusila tbi, ex judiy xjal. Txquettzun Pablo tu'n Félix, ex xi tbi'n aju tyol Pablo in yolin ti'j ka il ti'j tu'n kocslan ti'j Jesucrist. 25Pero tej tmante Pablo tu'n koc tz'aklxix ex tu'n kjac'unte kib ex tej tyolin ti'j ju jwisi tzul, bi'x jaw sec'paj Félix, ex tma:

—Txi'ya ja'lo; alcye k'ij at ambil weye ctxquetela juntl maj wu'ne, chi Félix.

26Ax icx in ayontok Félix ti'j tu'n t-xi tk'o'n Pablo ch'in pwak te tu'n t-xi ttzokpi'n; cyja'tzun nimcu maj xi txocbaj Pablo tu'n ex o yolin tuc'il. 27Tejtzun tjapun cab abk'i, eltzun k'i'n Félix, ex cyaj ten Porcio Festo te t-xel; ex como o tajbe Félix tu'n tcub xtalin cyu'n xjal judiy, cyja'tzun cyaj k'o'n Pablo tuj pres tu'n.

Currently Selected:

Cybinchben 24: MAMH

Highlight

Copy