Cybinchben 26
26
Aju tcolbil tib Pablo twitz rey Agripa
1Xitzun tma'n rey Agripa te Pablo:
—At ambil teya tu'n tyolina te tcolbil tiba.
Atzunte Pablo xi tyec'un tk'ab, octzun ten yolil te tcolbil tib, ex tma:
2—In nna'ne jun tzalajbil, aya tat rey Agripa, tu'n t-xi nma'ne ja'lo aju ncolbil wibe twitza ti'j tcyakilju in cyma'n xjal judiy wi'je. 3Tnejelxix in chin tzalaje porque ojtzki'n tu'na tcyakil cycostumr xjal judiy ex aju in yolinjtz cyxol; cyja'tzun chin cubsale twitza tu'n tten ch'in tpasensa tu'n t-xi tbi'na nyole.
O yolin Pablo ti'j tza'n tten tchwinklal nej tej na'nxtok tocslan
4Cycyakil xjal judiy ojtzki'n cyu'n tza'n tten nchwinklale nej tej matok cu'xunx kine, tza'nx tej ntene tuj ntanmiye ax icx tuj tnam Jerusalén. 5Ex ba'n cyu'n nokwit cyaj tu'n ttzaj cyma'n, atxix ojtxi parisey we kin, ax in tene cyxol jun c'loj aju mas in japunxix kocslabl cyu'n. 6Atzun ja'lo, ma chin oque tuj xjel tu'n tlaj ju yol in xi nma'ne, oc che jawil ank'in ke cyimni tu'n Dios, ic tza'nx tzaj ttziyan Dios cye kxe'chel. 7Ke cablaj c'loj kiyjil in che ayon ti'j tu'n cyc'monte aju tziyimaj tu'n Dios, tocxix tilil cyu'n tu'n cyc'ulun twitz Dios ex tu'n cyajben te k'ijl ex konic'an. Tu'n tlaj k'ukl nc'u'je ti'j ka oc che jawitz ank'in ke cyimni tu'n Dios, tu'ntzunju in cyma'n xjal judiy ka at wile, aya tat rey Agripa. 8¿Tiku'n in cub cyximane ka mlayx che jaw ank'in ke cyimni tu'n Dios?
O yolin Pablo ti'j tza'n tten e yajlanjtz ocslal tu'n nej tej na'nxtok tocslan
9Ax toc, weye cub nximane nej alcye tu'n nbinchanteye, nim in k'ojine ti'j Jesús aj Nazaret; 10banttzun wu'ne tuj Jerusalén. Nimcu ocslal e ocx nk'o'ne tuj pres, porque otok tzaj k'o'n woclene cyu'n ke nejenel cye pal; ex tej cycub byo'n ke ocslal cyu'n, icx weye xi nma'ne ka ba'n jlu. 11Nimcu maj e baj nc'ixbisa'ne cyuj cycyakil ja te c'ulbil, ex e oc njwersine tu'n tcyaj cycolin cyocslabl. Ex tu'nju nimxix nk'oje tzaj cyi'j, inxe yajlal cye cyuj ke tnam najchak.
Xi tchic'ba'n Pablo juntl maj tza'n tten ajtz ti'j tanmi ex tza'n tten ocslan
Cybinchben 9.1-19; 22.6-16
12In nbincha'ntoke jlu, cyja' nxi'ye tuj tnam Damasco, otok tzaj k'o'n woclene ex otok tzaj k'o'n orden weye cyu'n ke nejenel cye pal. 13Pero cyja'tok nxi'ye tuj be, tat rey, o wile cub koptz'aj jun spic'un tzaj tuj cya'j te chilcuk'ij, mas in koptz'aj twitz t-spic'umal k'ij, cub koptz'aj wibaje ex cyibaj keju in che bet wuc'ile. 14Kcyakiltzune o cub tz'ake twitz tx'otx', ex o nbiye jun tk'ajk'ajel tzaj tma'n weye tuj yol ebrey chi cyja': Saulo, Saulo, ¿tiku'n in chin baj tyajla'na? Tu'nx tiba in baj tc'ixbisan tiba ic tza'n jun wacẍ nne'tz t-xajo'n puy, chi weye. 15Atzun weye xi nma'ne te: ¿Alcyeya Tat? Atzunte Kajaw tma: Akine Jesús, akine in chin baj tyajla'na. 16Pero we'ctza porque ma cub nyec'un wibe twitza tu'n toc nk'o'na te ajbel weye ex tu'n toca te testiw ti'j tcyakilju ma tila ex ti'j ju cxel nyec'untle teya. 17Ccletela wu'ne tuj cyk'ab ke t-xjalila, ex tuj cyk'ab txkantl xjal jatum cxel nsama'na ja'lo cyxol. 18Cxel nsama'na tu'n tjaket cywitz tu'na, tu'n cyetz tuj klolj ex tu'n cyul tuj spic'un, ex tu'n cyetz tjak' tipumal Satanás tu'n cyul tuc'il Dios; ex tu'n cyocslan wi'je, tu'ntzun tcub najset cyil ex tu'n cyc'monte jun etzbil cyxol keju pa'maj ke tu'n Dios tu'n cyajben o'cx te.
Xi tniman Pablo aju tzaj k'ma'n te ic tza'n tuj witzic'
19Cyja'tzun aya tat rey Agripa, xi nnimane aju tzaj k'ma'n weye tej nlonteye aju spic'un tzaj tuj cya'j. 20Tnejelxixtzun xi npacba'ne cye keju ate' tuj Damasco, ax icx tuj Jerusalén ex tuj tcyakil tx'otx' Judey, ax icx cye xjal mya judiy ke, xi nma'ne tu'n tajtz ti'j cyanmi ex tu'n cyul meltz'aj tuc'il Dios, ex tu'n cybinchante aju ba'n tu'ntzun tel nic'baj cyi'j ka otok tz'ajtz ti'j cyanmi. 21Tu'ntzun tlaj jlu in tzaj tzyu'ne cyu'n xjal judiy tuj tja Dios, o cyajbe tu'n ncub byo'ne cyu'n. 22Pero nok tu'nju onbil in tzaj tk'o'n Dios weye, cucx wa'l kine ja'lo, in xi nchic'ba'ne tyol Dios cye cycyakil, keju ma' cyoclen ex keju ch'in cyoclen, minti' in xi nma'ne juntl, nok o'cx aju o cyma t-sanjel Dios ex o tma Moisés, 23cyma ka ilxix ti'j tu'n tcyim ju Crist aju at toclen tu'n Dios, ex ka ate tnejel tu'n tjaw ank'in cyxol cyimni, tu'n tk'onte tkanil colbil cye kxjalil ex cye txkantl xjal cyuj mastl nasyon, chi Pablo.
Xi tma'n Pablo te Agripa tu'n toc te ocslal ti'j Crist
24Tejtzun tmante Pablo jlu te tcolbil tib, jaw tk'ajk'ajel twi' Festo cyuw, ex tma:
—Pablo, ma tz'oca te loc. Tu'nju nim in xnak'tzana ma tz'oca te loc, chi Festo.
25Atzunte Pablo tma:
—Mya locwe kin, tat Festo aya ma' toclena, o'cx in xi nma'ne aju yol ax toc ex tuj tumelxix. 26Porque lu rey Agripa lu, tcyakil jlu ba'n tu'n, cyja'tzun in ke'xix nc'u'je tu'n nyoline twitz. Porque tuj nnable minti' jun minti'wt ba'n tu'n; porque mya tuj ewaj bant jlu. 27¿Ocsla'npe cyyol t-sanjel Dios tu'na, aya tat rey Agripa? Ba'n wu'ne ocsla'n tu'na.
28Atzunte Agripa xi tma'n te Pablo:
—Tuj tnabla ka jurat naj jacu chin oque ocslal ti'j Crist.
29Entons xi tma'n Pablo:
—Ka jurat naj ex ka yajxi, cuchiwt tu'n toca ocslal ti'j Crist ic tza'n weye, ax icx cycyakil keju in che bin ti'j nyole ja'lo, pero myatzun wajbile tu'n cyoc c'alete tu'n caden ic tza'n weye.
30Tejtzun tbaj tma'n Pablo jlu, jaw we' rey tuc'ix gobernador, tuc'ix Berenice ex cyuc'ix keju k'ukl ke'tok cyuc'il. 31Tejtzun cyel lak'e' cyjunalx, e oc ten yolil cyxolx:
—Minti' jun mya ba'n ma tbincha xjal lu tu'n tcyim ex ka tu'n tocx tuj pres, che chi.
32Ex tma Agripa te Festo:
—Mawtlo txi tzokpet ju xjal lu nokwit minti' o tma tu'n tpon twitz tat gobierni tu'n toc tuj xjel, chi rey Agripa.
Currently Selected:
Cybinchben 26: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993
