Jos 17
17
Ri ruwach'ulew kichin ri tzobaj richin ri Manasés
1Ri sakinik xban chuqa' kik'in ri tzobaj richin Manasés, ri nabey ruk'ajol ri José. Y ri nabey ruk'ajol ri Manasés, ja ri Maquir. Y ri e rijatzul kan ri Maquir kan e richin labal, y roma ri' xkichinaj kan ri ruwach'ulew Galaad y Basán. 2Jak'a ri ch'aqa' chik e kijatzul ri e ruk'ajol kan ri Manasés xkichinaj kan rik'in sakinik ri kiruwach'ulew ri k'o pa qajbel-q'ij chire ri raqen-ya' Jordán. Y ri e ruk'ajol kan ri Manasés xkibini'aj Abiézer, Hélef, Asriel, Siquem, Héfer y ri Semidá. Y ja rije' ri xe'ok aj-raqen pa kiwi' ri kitzobaj, y ri tzobaj ri' xe'ichinan k'a kan achi'el ri kajlabal chi kach'alal-ki'.
3Chikikojol ri rijatzul kan ri Manasés xk'oje' k'a jun achin rubini'an Selofhad. Y rija' ruk'ajol ri Héfer, y rumam ri Galaad ri ruk'ajol ri Maquir. Y ri Selofhad ri' kan man jun k'a ruk'ajol xk'oje', xaxe rumi'al xek'oje', y xkibini'aj: Ri Mahlá, ri Noá, ri Hoglá, ri Milcá y ri Tirsá. 4Re ixoqi' re' xe'apon chikiwech ri sacerdote Eleazar, ri Josué y ri e tata'al richin ri tinamit. Y xkibij chike: Ri Jehová rubin kan chire ri rusamajel Moisés richin roj k'o chuqa' chi yojichinan kan chikikojol ri rach'alal ri qatata', xecha'. K'ari' ri Josué xuya' kan ri kulew richin xkichinaj kan junan kik'in ri kich'utitata'. Rije' xkik'ul k'a kan ri kulew achi'el rubin ri Jehová.
5-6Ri e wo'o' rumi'al ri Selofhad xya'ox kan kulew richin xe'ichinan kan chikikojol ri e ch'aqa' chik rijatzul ri Manasés, y roma ri' ri tzobaj richin ri Manasés xkichinaj kan lajuj kulew chiri' pa Canaán. Y chuqa' ri ch'aqa' chik rijatzul kan ri Manasés xkichinaj ri ruwach'ulew Galaad y ri Basán, ri k'o juk'an-apo chire ri raqen-ya' Jordán.
7Ri ruwach'ulew richin ri Manasés nitiker-el rik'in ri ruwach'ulew Aser, napon k'a rik'in ri tinamit Micmetat ri k'o pa relebel-q'ij chire ri tinamit Siquem, y nuchojmij-el-ri' pa xokon y napon k'a akuchi k'o-wi ri ralaxbel-ya' richin Tapúah. 8Ri ruwach'ulew Tapúah k'o junan rik'in ri k'ulba't richin ri tzobaj richin Manasés. Ri ruwach'ulew ri' xok k'a richin ri Manasés, jak'a ri tinamit richin Tapúah xya'ox kan chike ri rijatzul ri Efraín. 9Ri k'ulba't ri' niqaqa chuchi' ri ch'uti'n raqen-ya' richin Caná; ri ruwach'ulew ri' k'o pa xaman chire ri ch'uti'n raqen-ya'. Ri nima'q tinamit ri ek'o pa xokon chire ri ch'uti'n raqen-ya' jari' ri e richin ri tzobaj richin Efraín, stape' xa xrichinaj ta kan ri Manasés. Y ri k'ulba't ri ruwach'ulew richin ri Manasés nixule-qa pa xaman junan rik'in ri ch'uti'n raqen-ya' y napon k'a chuchi' ri palou.
10Ri e rijatzul ri Efraín xkik'ulumaj kan pa xokon chire ri ch'uti'n raqen-ya' y ri e rijatzul ri Manasés pa xaman. Ri kik'ulba't xk'oje' pa qajbel-q'ij chire ri palou. Ri pa xaman nuk'ul-ri' rik'in ri ruwach'ulew Aser, y ri pa relebel-q'ij nuk'ul-ri' rik'in ri ruwach'ulew Isacar.
11Chuqa' ri e rijatzul ri Manasés xkichinaj kan jujun tinamit ri ek'o pa kiruwach'ulew ri Isacar y ri Aser. Ja tinamit re' rik'in ri kokoj kitinamit ri ek'o chikinaqaj: Ri Bet-seán, Ibleam, Dor, Endor, Taanac, ri Meguido y ri oxi' taq'aj ruwi-juyu'. 12Jak'a ri rijatzul ri Manasés man xetikir ta xekelesaj-el ri aj-Canaán, roma ri winaqi' ri' kan xkipaba-ki' chikiwech y man xe'el ta el chiri', xa xek'oje-qa chikikojol rije'. 13Stape' ri israelita xk'oje-q'anej kuchuq'a', man xekelesaj ta el ri aj-Canaán, xa xkiben chike richin xeyuqe' pa samaj kik'in.
14Ri e rijatzul kan ri José xkibij k'a chire ri Josué: ¿Achike k'a roma xaxe jun sakinik ri xaya' chiqe roj richin xqichinaj kan juba' ok qulew, man natz'et ta chi roj xa kan oj jun tinamit ri yalan nim, roma ri Jehová ruya'on urtisanik pa qawi' k'a re q'ij re'?, xecha'.
15K'ari' ri Josué xubij: Wi rix ix jun tinamit ri janila ix k'iy y man yixruben ta ri iruwach'ulew, kixbiyin k'a chupan ri taq'aj richin ri kiruwach'ulew kan ri winaqi' ferezeo y refaíta; tiqasaj ronojel che' ri k'o chuwech y kixk'oje' chiri', xcha'.
16K'ari' xkibij chire: Ri qulew kan man yojruben ta wi. Y stape' yojruben ta ri taq'aj richin Jezreel, roj xa man xqojtikir ta xkeqelesaj-pe chiri' ri winaqi' aj-Bet-seán, ni ri ek'o pa kokoj kitinamit ni konojel ri ek'o chupan ri taq'aj ri' roma konojel rije' k'o ki-carruaje ri e tz'apen-kij rik'in ch'ich', xecha'.
17Jari' toq ri Josué xubij chike: Kan qitzij na wi chi rix ix jun nimalej tinamit y k'o janila uchuq'a' iwik'in, y man ruk'amon ta richin juba' ok xiwichinaj kan. 18Kan xtok k'a iwichin ri taq'aj ri', stape' che' k'o chuwech. Rix xtijosq'ij k'a ruwech ri ulew ri', y xtiq'atapuj k'a ronojel ri akuchi xtapon-wi ri k'ulba't. Stape' janila kuchuq'a' ri aj-Canaán y kan k'o ki-carruaje e tz'apen-kij rik'in ch'ich', rix kan xkixtikir xke'iwelesaj-pe, xcha'.
Currently Selected:
Jos 17: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
