Jos 18
18
Ri ruwach'ulew kichin ri ch'aqa' chik tzobaj
1Konojel ri winaqi' israelita xkimol-ki' chiri' pa tinamit Siló y chiri' xkipaba-q'anej ri rachoch ri Jehová richin molojri'il, y re' xkiben toq xjach yan ri ruwach'ulew chike. 2Y k'a ek'o na kan e wuqu' tzobaj chike rije' ri man jani tijach ri kulew ri k'o chi nikichinaj kan.
3K'ari' ri Josué xubij chike: ¿Achike iwoyoben rix richin niwichinaj ri ruwach'ulew ri xa jachon chik chiwe roma ri Jehová ri qa-Dios y ri ki-Dios chuqa' ri qati't-qamama'? 4Ke'icha' k'a e oxi' achi'a' chikikojol ri jujun tzobaj richin yenteq-el, y xkebe k'a richin nibekinik'oj ri ruwach'ulew ri achike rubanik. K'ari' xketzolej-pe richin nikitzijoj chuwe; k'ari' xtinjech chiwech richin xtiwichinaj kan. 5Re achi'a' re' xtikelesaj k'a pa wuqu' ri ruwach'ulew ri man jani tijach; jak'a ri tzobaj richin ri Judá kan xkek'oje' chiri' pa kiruwach'ulew ri k'o pa xokon, y chuqa' ri e rijatzul ri José kan xkek'oje' chiri' pa kiruwach'ulew ri k'o pa xaman. 6Xtikelesaj k'a pa wuqu' ri ruwach'ulew ri'. Y k'ari' xkixpe k'a chinuwech yin, y kan chuwech k'a ri Jehová xtiqaben-wi ri sakinik pa ruwi' ri ruwach'ulew ri'. 7Jak'a ri tzobaj richin ri Leví man jun ulew xtikichinaj kan chi'ikojol rix, roma ronojel ri nusuj ri tinamit chire ri Jehová, jari' ri nikichinaj kan rije'. Y ri tzobaj richin ri Gad, ri Rubén, y ri nik'aj tzobaj richin ri Manasés, rije' kan xjach yan k'a chike ri ulew ri xkichinaj kan ri k'o pa relebel-q'ij chire ri raqen-ya' Jordán; jare' ri xujech yan kan ri Moisés ri rusamajel ri Jehová, xcha' ri Josué chike.
8Ri achi'a' ri xecha'ox-el richin nibeketaj ri ruwach'ulew kan xkiben k'a rutzijol richin yebe. Y k'ari' ri Josué xubij-el chike: Kixbiyin chupan chijun ri ruwach'ulew ri'; tibewetaj, y toq xkixk'achoj kan, k'ari' xkixtzolin-pe wik'in re wawe' pa Siló, richin xtinben ri sakinik chuwech ri Jehová ri qa-Dios, xcha'. 9Xebe k'a ri achi'a' ri' richin xbekinik'oj chijun ruwach'ulew. K'ari' xkelesaj k'a pa wuqu', y xkitz'ibaj k'a pe chupan jun wuj y k'ari' xetzolej akuchi ek'o-wi-qa ri kiwinaq chiri' pa tinamit Siló y xe'apon k'a rik'in ri Josué. 10K'ari' rija' xuben ri sakinik chuwech ri Jehová chiri' pa Siló. Y chiri' xujech-wi kan ri ulew chike ri ch'aqa' chik tzobaj ri e rijatzul kan ri Israel.
Ri xkichinaj kan ri tzobaj richin ri Benjamín
11Ri nabey sakinik xuk'ulumaj k'a ri tzobaj richin ri e rijatzul kan ri Benjamín, y xya'ox k'a chike achi'el ri kajlabal chi kach'alal-ki'; y xkik'ulumaj ri ruwach'ulew ri k'o chikikojol ri kiruwach'ulew ri tzobaj richin ri Judá y ri kiruwach'ulew ri e rijatzul kan ri José. 12Ri k'ulba't ri' k'o pa xaman chire ri ruwach'ulew nitiker-el chuchi' ri raqen-ya' Jordán, y nuchojmij-el-ri' pa qajbel-q'ij y nijote-q'anej y niq'ax pa xaman chire ri tinamit Jericó; y chirij re' nijote-q'anej chuwi-juyu' y napon-q'anej pa tz'iran ruwach'ulew richin ri tinamit Bet-avén. 13Chiri' niq'ax-el pa xokon chire ri tinamit Luz ri chuqa' nibix Betel chire. K'ari' nixule-qa pa tinamit Atarot-adar, y niq'ax rik'in ri juyu' ri k'o pa xokon chire ri tinamit Bet-horón ri k'o pa xulan. Jari' ri k'ulba't ri k'o pa xaman. 14Ri ruk'ulba't ri k'o pa qajbel-q'ij chire ri ruwach'ulew nitiker-pe pa Bet-horón, y nuchojmij-el-ri' pa xokon y napon k'a pa rutinamit Baal ri chuqa' nibix Quiriat-jearim chire; re tinamit re' kichin ri e rijatzul kan ri Judá. Jari' ri k'ulba't ri k'o pa qajbel-q'ij. 15Y ri k'ulba't ri k'o pa xokon nitiker-pe pa ri tinamit Jearim, nuchojmij-ri' pa relebel-q'ij y napon k'a pa ralaxbel-ya' richin ri tinamit Neftóah. 16Y re k'ulba't re' nuchojmij-ri' pa xokon y niqaqa pa taq'aj kojol juyu' Ben-hinom, ri k'o pa xaman chire ri taq'aj kojol juyu' Refaim. Chirij re' nuchojmij-ri' pa relebel-q'ij y niq'ax pa xokon chire ri juyu' kichin ri aj-Jebús, y napon-qa pa ralaxbel-ya' richin Roguel. 17Nuchojmij-el-ri' pa xaman y niq'ax-el chuchi' ri ralaxbel-ya' richin Semes, y chiri' nuchojmij-ri' pa relebel-q'ij y napon k'a pa tinamit Guelilot, ri k'o-pe chuwech ri ruwa-juyu' richin Adumim. Y k'ari' niqaqa rik'in ri abej richin ri Bohan ri ruk'ajol kan ri Rubén. 18Napon k'a pa xaman chire ri ruwa-juyu' akuchi natzu-wi ri raqen-ya' Jordán. Y chirij ri' nixule-qa pa taq'aj kojol juyu', 19y napon k'a pa xaman chire ri tinamit Bet-hoglá y nibetane' k'a rik'in ri ruq'a' ya' ri k'o pa xaman chire ri palou, ri akuchi nok-wi ri raqen-ya' Jordán. Jari' ri ruk'ulba't ri k'o pa xokon. 20Y ri raqen-ya' Jordán jari' ri ruk'ulba't ri k'o pa relebel-q'ij. Jari' ri xkichinaj kan ri rijatzul ri Benjamín, achi'el ri kajlabal chi kach'alal-ki'.
21Ri tinamit kichin ri tzobaj richin ri Benjamín, achi'el ri kajlabal chi kach'alal-ki', xkichinaj kan ri Jericó, Bet-hoglá, ri taq'aj kojol juyu' richin Quesís, 22Bet-arabá, Semaraim, Betel, 23Avim, Pará, Ofrá, 24Quefar-haamoní, Ofní y Gueba; ronojel re' e kablajuj tinamit rik'in kokoj kitinamit. 25Y chuqa' xkichinaj ri tinamit: Gabaón, Ramá, Beerot, 26Mispá, Quefirá, Mosá, 27Réquem, Irpeel, Taralá, 28Selá, Élef, Jebús ri chuqa' nibix Jerusalem chire, Guibeá y Quiriat; ronojel re' e kajlajuj tinamit rik'in kokoj kitinamit. Jare' ri xkichinaj ri e rijatzul ri Benjamín, achi'el ri kajlabal chi kach'alal-ki'.
Currently Selected:
Jos 18: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
