Jos 16
16
Ri ruwach'ulew kichin ri tzobaj richin ri Efraín
1Ri ruwach'ulew ri xkik'ulumaj kan rik'in sakinik ri e rijatzul kan ri José, nitiker-pe chuchi' ri raqen-ya' Jordán chunaqaj ri tz'ukubel-ya' ri k'o pa relebel-q'ij richin Jericó, nuchojmij-ri' pa qajbel-q'ij y napon k'a pa tz'iran ruwach'ulew k'a rik'in ri tinamit Jericó, y nijote-q'anej chuwi' taq juyu' richin Betel. 2Y nel-el chiri' pa Betel y chuqa' pa tinamit Luz. Chuqa' ri k'ulba't pa kiruwach'ulew ri arquita ri akuchi k'o-wi ri tinamit Atarot-adar. 3Y nixule-qa pa qajbel-q'ij, y napon pa kiruwach'ulew ri jafletita, y napon k'a chuchi' ri ruk'ulba't Bet-horón, ri k'o pa xulan, y napon k'a pa tinamit Guézer; y nibek'is kan chuchi' ri palou. 4Xkik'ul k'a kan ri ulew ri' richin xkichinaj kan ri e kijatzul ri Manasés y ri Efraín, ri e ka'i' ruk'ajol kan ri José.
5Ri kiruwach'ulew ri xkichinaj kan ri e rijatzul ri Efraín, ri xya'ox chike achi'el ri kajlabal chi kach'alal-ki': Nitiker-pe pa tinamit Atarot-adar ri k'o pa relebel-q'ij chire ri tinamit Bet-horón ri k'o pa jotol y napon k'a pa qajbel-q'ij, 6y ri ruchi' napon k'a pa palou. Ri k'ulba't ri k'o juk'an chire ri xaman nitiker-el rik'in ri tinamit Micmetat y nuchojmij-el-ri' pa relebel-q'ij y napon k'a pa tinamit Taanat-siló, y nel-el chiri' y niq'ax-el pa tinamit Janóah. 7Nel-el chiri' pa Janóah y napon-qa k'a pa tinamit Atarot y chuqa' pa tinamit Naará y niq'ax chuchi' ri tinamit Jericó, y nibek'ulun-el chuchi' ri raqen-ya' Jordán. 8Nitiker chik el rik'in ri tinamit Micmetat y nuchojmij-el-ri' pa qajbel-q'ij y napon k'a pa tinamit Jepúah, y napon chuqa' rik'in ri ch'uti'n raqen-ya', ri nibix Caná chire, y nuchojmij-qa ri raqen-ya' richin napon k'a pa palou. Jare' ri ulew ri xkichinaj kan ri tzobaj richin ri Efraín achi'el ri kajlabal chi kach'alal-ki'. 9K'o k'a chuqa' ri ch'aqa' chik tinamit rik'in kokoj kitinamit ri xch'ar kan richin ri rijatzul ri Efraín; re tinamit re' ek'o chikikojolil ri ruwach'ulew ri xkichinaj kan ri e rijatzul ri Manasés. 10Jak'a ri e rijatzul ri Efraín man xekelesaj ta el ri aj-Canaán ri ek'o chiri' pa tinamit Guézer, ri xa xek'oje-qa chikikojol rije'. Y xban chike ri aj-Canaán richin xeyuqe' pa samaj kik'in.
Currently Selected:
Jos 16: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
