Jos 15
15
Ri ruwach'ulew kichin ri rijatzul ri Judá
1Ri ruwach'ulew ri xuk'ulumaj rik'in sakinik ri tzobaj richin ri Judá, xya'ox k'a chike achi'el ri kajlabal chi kach'alal-ki', y ri kik'ulba't nitiker-el chuchi' ri ruwach'ulew Edom, y ri pa xokon napon rik'in ri tz'iran ruwach'ulew nibix Sin chire, jari' ruchi' ri xokon. 2Y ri ruk'ulba't ri k'o pa xokon nitiker-el chuchi' ri Tzayi-Choy akuchi k'o-wi ri ruq'a-ya' ri nitzu'un-apo pa xokon. 3Ri pa xokon nel k'a pe rik'in ri ruwa-juyu' Acrabim, niq'ax rik'in ri Sin y nijote-q'anej pa xokon, napon k'a pa tinamit Cadés-barnea, niq'ax k'a pa tinamit Hesrón y nijote-q'anej k'a pa tinamit Adar y nuchojmij-ri' pa qajbel-q'ij chire ri tinamit Carcá. 4Y keri' niq'ax-el pa tinamit Asmón y niq'ax-el rik'in ri ch'uti'n raqen-ya' richin Egipto, y nibek'is k'a rik'in ri palou. Jari' ri ruk'ulba't ri pa xokon.
5Ri k'ulba't ri k'o pa relebel-q'ij ja ri Tzayi-Choy, y napon k'a rik'in ri akuchi nok-wi-apo ri raqen-ya' Jordán.
Y chiri' ri k'ulba't ri k'o pa xaman, nel-pe k'a rik'in ri ruq'a' ya' y nuchojmij ri raqen-ya' Jordán ri nibe pa xaman, 6re k'ulba't re' napon-q'anej pa tinamit Bet-hoglá, y nuchojmij-el-ri' k'a pa xaman chire ri tinamit Bet-arabá, y nijote-q'anej k'a akuchi k'o-wi ri abej richin Bohan ri ruk'ajol kan ri Rubén. 7Y napon k'a pa taq'aj kojol juyu' richin Acor y nijote-q'anej k'a pa tinamit Debir, nuchojmij-el-ri' pa xaman y napon k'a jun chik tinamit Guilgal, nitzu'un-qa chuwech ri ruwa-juyu' Adumim, ri k'o pa xaman y ri ch'uti'n raqen-ya' niq'ax chikikojol. Y ri k'ulba't ri' niq'ax-el k'a rik'in ri ralaxbel-ya' richin Semes, y napon k'a rik'in ri ralaxbel-ya' richin Roguel. 8Re k'ulba't re' nijote-q'anej pa taq'aj richin ri ruk'ajol ri Hinom y niq'ax pa xokon chire ri Jebús, ri chuqa' rubini'an Jerusalem; y k'ari' nijote-q'anej pa xaman y nuchojmij ri taq'aj kojol juyu' richin ri Hinom y napon k'a rik'in ri taq'aj kojol juyu' richin ri Refaim chuxikin ri xaman. 9Y re k'ulba't re' nuchojmij ri ruwi' ri juyu' chiri' y napon-qa k'a rik'in ri ralaxbel-ya' richin ri Neftóah, y nel-pe pa taq tinamit ri e richin ri juyu' Efrón, y nuchojmij ri tinamit Baalá ri chuqa' nibix ri rutinamit Jearim chire. 10Chirij re' ri k'ulba't nuchojmij-el-ri' k'a pa qajbel-q'ij chire ri tinamit ri' y napon k'a rik'in ri jun chik juyu' Seír, y niq'ax k'a chuxikin ri juyu' Jearim, niq'ax-el chuchi' ri xaman; ri chuqa' nibix juyu' Quesalón chire. K'ari' niqaqa-qa pa tinamit Bet-semes y niq'ax-qa k'a pa tinamit Timná. 11Nel k'a pe pa ruk'ulba't ri tinamit Ecrón, niq'ax-el chuchi' ri xaman; y nuchojmij-el-ri' pa xaman y napon k'a pa tinamit Sicrón, y niq'ax k'a el chuchi' ri juyu' Baalá y nel-el pa tinamit Jabneel. Y ri ruk'ulba't nik'is k'a chupan ri palou.
12Ri k'ulba't ri k'o pa qajbel-q'ij ja ri palou; jari' ri k'ulba't kichin ri e rijatzul kan ri Judá ri xkitaluj chikiwech achi'el ri kajlabal chi kach'alal-ki'.
Ri Caleb xuch'ek kan ri tinamit Hebrón y ri tinamit Debir
13Ri Josué xuya' kan ri tinamit Hebrón chire ri Caleb ruk'ajol ri Jefuné richin ri tzobaj richin kan ri Judá, richin xrichinaj kan achi'el ri rubin ri Jehová chire ri Josué. Y ri tinamit ri' k'o chupan ri ruwach'ulew Judá, ri ojer kan nibix rutinamit ri Arbá chire, y ri Arbá ri' jari' ri ánima rutata' ri Anac. 14Ri Caleb xerelesaj k'a pe chi e oxi' rijatzul kan ri Anac: Ri Sesai, ri Ahimán y ri Talmai. 15Y chiri' xjote-q'anej kik'in ri ek'o chiri' pa tinamit Debir ri ojer kan xubini'aj ri rutinamit ri Séfer. 16Y ri Caleb xubij chike ri aj-labal: Ri xtibebanon oyowal y xtuch'ek ri tinamit Séfer, yin kan xtinya' ri numi'al Acsa chire richin nok rixjayil, xcha'.
17Ri Caleb k'o k'a jun rach'alal rubini'an Quenaz, y ri rach'alal ri' k'o k'a jun ruk'ajol rubini'an Otoniel; y ja rija' ri xch'akon. K'ari' ri Caleb kan xuya' k'a ri Acsa chire richin xok rixjayil. 18Toq rije' xe'el-pe chiri' richin yebe yan pa kachoch, jari' toq ri Otoniel xubij chire ri Acsa chi tuk'utuj*f3* juba' kulew richin tiko'n chire ri rutata'. Y jari' toq rija' xqaqa chirij ri rubur. Y ri Caleb xuk'utuj chire ri achike nrajo'.
19Rija' xubij-apo: Nink'utuj jun utzil chawe chi taya' jun chik sipanik chuwe. Kan qitzij wi chi aya'on chik wulew jak'a xa janila chaqi'j richin tiko'n y yin ninwajo' chi naya' ta ulew chuwe ri akuchi ek'o-wi ri ralaxbel-ya', xcha'. Ri rutata' kan xuya' k'a ulew chire ri k'o ralaxbel-ya' chupan ri k'o pa jotol y ri jun chik ri k'o pa xulan.
Ri tinamit ri nibeya'ox kan chike ri tzobaj richin ri Judá
20Jare' ri ulew ri xkichinaj kan ri tzobaj richin ri Judá, achi'el ri kajlabal chi kach'alal-ki'. 21Ri tinamit ri xok kan kichin ri pa xokon ri k'o pa k'ulba't chire ri Edom: Ja ri Cabseel, Éder, Jagur, 22Quiná, Dimoná, Adadá, 23Quedes, Hasor, Itnán, 24Zif, Télem, Bealot, 25Hasor-hadatá, Quiriot, Hesrón ri chuqa' nibix Hasor chire, 26Amam, Semá, Moladá, 27Hasar-gadá, Hesmón, Bet-pélet, 28Hasar-sual, Beerseba, Bisotia, 29Baalá, Iim, Ésem, 30Eltolad, Quesil, Hormá, 31Siclag, Madmaná, Sansaná, 32Lebaot, Silhim y En-rimón; ronojel k'a re' e juwineq beleje' tinamit rik'in ri kokoj kitinamit.
33Ri tinamit ri ek'o chuwa taq juyu': Ja ri Estaol, Sorá, Asná, 34Zanóah, En-ganim, Tapúah, Enam, 35Jarmut, Adulam, Socó, Azecá, 36Saaraim, Aditaim, Guederá, y Guederotaim; ronojel re' e kajlajuj tinamit rik'in ri kokoj kitinamit. 37Y ja chik ch'aqa' tinamit re': Ri Senán, Hadasá, Migdal-gad, 38Dileán, Mispá, Jocteel, 39Laquis, Boscat, Eglón, 40Cabón, Lahmam, Quitlís, 41Guederot, Bet-dagón, Naamá y Maquedá; ronojel re' e waqlajuj tinamit rik'in ri kokoj kitinamit. 42Y ja chik ch'aqa' tinamit re': Ri Libná, Éter, Asán, 43Iftah, Asná, Nesib, 44Queilá, Aczib, y Maresá; ronojel re' e beleje' tinamit rik'in ri kokoj kitinamit. 45Y chuqa' xkichinaj ri nima-tinamit Ecrón rik'in ri e rutinamit y ri kokoj rutinamit, 46y chuqa' ri tinamit y ri kokoj kitinamit ri ek'o chikikojol ri Ecrón y ri tinamit Asdod, y napon k'a chuchi' ri palou. 47Y chuqa' xkichinaj ri nima-tinamit Asdod rik'in ri e rutinamit y ri kokoj rutinamit, y chuqa' ri nima-tinamit Gaza rik'in ri e rutinamit y ri kokoj rutinamit ri napon k'a rik'in ri raqen-ya' richin Egipto y ri palou. 48Y chuqa' xkichinaj ri tinamit ri ek'o chuwi' taq juyu'; y ja kibi' re tinamit re': Ri Samir, Jatir, Socó, 49Daná, rutinamit ri Saná ri chuqa' nibix Debir chire, 50Anab, Estemoa, Anim, 51Gosen, Holón y Guiló; ronojel re' e julajuj tinamit rik'in ri kokoj kitinamit. 52Y chuqa' xkichinaj ri tinamit Arab, Dumá, Esán, 53Janum, Bet-tapúah, Afecá, 54Humtá, rutinamit Arbá ri chuqa' nibix Hebrón chire, y ri Sior; ronojel re' beleje' tinamit rik'in ri kokoj kitinamit. 55Y chuqa' xkichinaj ri tinamit Maón, Carmel, Zif, Jutá, 56Jezreel, Jocdeam, Zanóah, 57Caín, Guibeá y Timná; ronojel re' e lajuj tinamit rik'in ri kokoj kitinamit. 58Y chuqa' xkichinaj ri tinamit Halhul, Bet-sur, Guedor, 59Maarat, Bet-anot y Eltecón; ronojel re' e waqi' tinamit rik'in ri kokoj kitinamit.
60Y chuqa' xkichinaj ri rutinamit Baal ri chuqa' nibix rutinamit Jearim chire, y chuqa' ri tinamit Rabá; ka'i' tinamit rik'in ri kokoj kitinamit.
61Chupan ri tz'iran ruwach'ulew xkik'ulumaj ri tinamit Bet-arabá, Midín, Secacá, 62Nibsán, y ri jun chik tinamit ri nibix Atz'an chire, y ri En-gadi; ronojel re' e waqi' tinamit rik'in ri kokoj kitinamit.
63Ri rijatzul kan ri Judá man xetikir ta xekelesaj-pe ri jebuseo ri ek'o chiri' pa Jerusalem, xa xek'oje-qa chikikojol rije' k'a re wakami.
Currently Selected:
Jos 15: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
