Gén 43

Ri Benjamín xuk'uex-el pan Egipto

1Ri wayjal kan janila k'a xnimer yan chupan ri ruwach'ulew Canaán. 2Ri Jacob y konojel ri ralk'ual xkik'is yan k'a qa ri trigo ri xbekiloq'o' pan Egipto, roma ri' ri Jacob xubij chike ri ruk'ajol: Kixbiyin chik jun bey, ja tibeloq'o' juba' chik qa-trigo richin qaway, xcha' chike.

3Jak'a ri Judá xubij chire ri kitata': Ri q'atoy-tzij ri k'o chiri' kan kere' k'a rubin-pe chiqe: Wi man xtik'en ta pe ri ichaq' más ko'ol, kan man xtiya'ox ta k'a q'ij chiwe richin yixok-pe wik'in, chayineq-pe chiqe. 4Roma ri' wi xtateq-el ri Benjamín chiqij, kan xtibeqaloq'o' ri a-trigo. 5Y wi xa man xtaya' ta el q'ij chire ri Benjamín richin chi nibe chiqij, roj man xqojbe ta, roma ri achin ri' xubij-pe chiqe: Wi man xtik'en ta pe ri ichaq' más ko'ol, kan man xtiya'ox ta q'ij chiwe richin yixok-pe wik'in, chayineq-pe chiqe, xcha' ri Judá.

6Y ri Jacob, ri rubini'an chuqa' Israel, xubij k'a: ¿Achike roma xiniya' pa k'ayew richin xiq'alajirisaj chire ri achin ri' chi k'o chik jun ichaq'?, xcha'.

7Y rije' xkibij k'a chire ri kitata': Rija' kan k'iy k'a xuk'utuj chiqij roj y chikij ri qate-qatata' y ri qixjayilal y qalk'ual y xubij chiqe: ¿K'a k'es na ri itata'? ¿K'o chik jun iwach'alal?, xcha' chiqe. Y roj k'o chi xqaq'alajirisaj-apo ri qitzij. ¿Achike qetaman roj wi nubij-pe chiqe chi k'o chi niqak'uaj-el ri qachaq'?, xecha'.

8K'ari' ri Judá xubij chik apo chire ri rutata': Taya-el ri Benjamín chuwij yin y kan jare' xqojbe. Richin man yojken ta roj, ni rat y ni ri e qalk'ual. 9Pa nuq'a' k'a yin xtik'oje-wi-el ri Benjamín; chuwe yin xtak'utuj-wi, wi k'o ri nuk'uluwachij. Y wi man xtonjacha' ta chik chawe k'a re wawe', kan ja yin k'a ri xkinejqalen chupan chijun ri nuk'aslen. 10Man ta oj aq'aton-qa rik'in re', xa ka'i' yan ta mul qojbe y qojtzolin-pe, xcha' ri Judá.

11K'ari' ri kitata' xubij k'a chike: Man jun k'a xtiban, wi kan k'o k'a chi nibanatej achi'el ri nibij rix, kan keri' k'a ri'; xaxe k'a tik'uaj jun sipanik chukojol ronojel ri nik'uaj-el, tik'uaj chire ri q'atoy-tzij ri', ri más utz ri yeruya' chupan re ruwach'ulew re': Tik'uaj-el jutaqba' bálsamo, kab ri nikiya' ri taq chikopi', jubulej taq aq'om, mirra, nuez y almendra. 12Y tik'uaj-el ri méro richin chi yixbeloq'on, y chuqa' man timestaj chi nik'uaj-el ri méro ri peteneq pan i-costal, roma rik'in juba' xa xesach-pe. 13Y kan tik'uaj chuqa' el ri ichaq' iwik'in; kan kixbiyin y ja' tibek'utu' ri ichaq' chuwech ri achin ri'. 14Y kan ja ta k'a ri Dios ri k'o ronojel uchuq'a' pa ruq'a' xtich'on pa ránima ri achin ri', richin nrelesaj-pe ri iwach'alal Simeón y man ta k'a xtuk'en kan re Benjamín. Y wi man jun chik walk'ual xtik'oje' kan, keri' k'ari', man jun xtinben, xcha' ri Jacob.

Toq ri Benjamín xapon rik'in ri José

15K'ari' rije' xebe, xekik'uala-el ri sipanik, ri méro ri richin ri jun bey kan y ri richin yeloq'on-pe ri wakami y xkik'uaj-el ri kichaq' Benjamín richin xebe pan Egipto. Y keri' k'a xe'apon chik rik'in ri José, 16y rija' kan chi'anin k'a xutz'et chi beneq ri Benjamín chikij, y xubij chire ri k'o pa kiwi' ri rusamajela': Ke'ak'uaj-el re achi'a' re' pa wachoch y takamisaj-qa jun wákix richin naben jun rukil, roma rije' xkewa' wik'in paq'ij.

17Ri rusamajel xuben k'a achi'el ri xbix-el chire, xeruk'uaj-el ri achi'a' ri' k'a pa rachoch ri José, 18jak'a rije' xa janila xkik'en rukiy y toq ye'apon yan pa rachoch, xkibij-qa chikiwech: Xojk'amer-pe wawe' roma ri méro ri xtzolix-el chiqe chupan ri qa-costal toq xojpe pa nabey mul. Wakami xqojkichop y xtikiben chi xqojxime' kan pa samaj re wawe' y chuqa' ri qabur xkekikusaj richin samaj, xecha' chikiwech.

19Y toq ye'ok yan apo pa rachoch ri José, nabey xech'on rik'in ri aj-raqen kichin ri samajela', 20y xkibij chire: Táta, roj kan qitzij niqabij chawe, chi toq xojpe pa nabey mul wawe', xojpe richin xojoloq'on-el, 21xa jak'a toq xojapon akuchi niqak'owisaj-wi ri aq'a', xqanik'oj-qa rupan ri qa-costal y jari' toq xqatz'et chi ri méro ri xqatojbej kan, xa jari' k'o-el chupan ri qa-costal chiqajujunal. 22Y wakami qak'amon-pe ri méro richin niqatzolij kan, roma man qetaman ta achike ri xya'on-el pa taq qa-costal. Chuqa' qak'amon-pe ri nik'atzin richin yojloq'on chik el, xecha' chire.

23Y ri samajel xubij chike: Tik'oje' uxlanen pan iwánima y man tixibij-iwi', ri i-Dios, ri ru-Dios chuqa' ri itata', jari' ri xsipan ri beyomel ri' chupan ri i-costal. Roma yin kan xink'ul kan ri méro chuwi-iq'a', xcha' chike.

K'ari' xberelesaj-pe ri Simeón y xuk'en-pe k'a kik'in ri rach'alal. 24K'ari' ri samajel xerukusaj-apo pa rachoch ri José y xuya' kiya' ch'ajbel kaqen y kiway ri kibur. 25Y rije' xkiben k'a ruchojmil ri sipanik richin nikiya' chire ri José toq xtapon ri paq'ij, roma rije' xketamaj chi chiri' xkewa-wi.

26Y toq ri José xapon k'a pa rachoch ri paq'ij, rije' xkiya' k'a ri sipanik chire, ri e kik'amalon-pe y xkiqasaj-qa-ki' k'a pan ulew chuwech. 27Y ri José xuk'utuj rutzil kiwech y xubij chike: ¿Y ri itata' ri xitzijoj chuwe, utz ruwech, man jun ruk'uluwachin? ¿K'a k'es na?, xcha'.

28Y rije' kan rik'in k'a qasanri'il xkibij: Ri qatata' k'a k'es na, utz ruwech matiox, xecha' chire.

29Y toq rija' xerutzu' k'a konojel, jari' toq xutzu' chuqa' ri Benjamín, ri ruchaq', ri kan junan kite' rik'in. Y jari' toq rija' xuk'utuj chike: ¿Jare' ri jun chik iwach'alal chaq'laxel ri xitzijoj kan chuwe?

Y xubij chire ri Benjamín: Ja ri Dios pan awi', xcha'.

30Ri José kan janila k'a xkikot toq xutz'et ri ruchaq' y re' xuben chire chi kan jari' xpe roq'ej chiri', roma ri' chi'anin k'a xel-el y xbe pa jun chik jay y k'a ja ri chiri' xbe'oq'-wi. 31Y toq xq'ax yan ri roq'ej, xuch'ej-pe ri rupalej y xel-pe, y k'ari' xubij: Tiya-pe ri qaway, xcha'.

32Ri José xk'oje' ruyon pa jun mesa y ri rach'alal xek'oje' pa jun chik mesa, y pa jun rox mesa chiri' xek'oje' ri aj-Egipto. Roma chikiwech ri winaqi' aj-Egipto kan man ruk'amon ta chi yewa' junan kik'in ri winaqi' hebreo. 33Ri e rach'alal ri José xetz'uye-apo ri pa mesa, pa juk'an chik ruchi' ri mesa, chuwech ri akuchi xtz'uye-wi ri José, kan achi'el ri xubij rija' chike. Y janila xkimey y xkitzula-ki', roma xban chike chi xetz'uye' achi'el ri kijuna' chikijujunal, nitiker-el rik'in ri nimalaxel k'a rik'in ri ch'i'p. 34Y ri José xujech k'a ri kiq'utun ri rach'alal y kan ja ri nutej rija' jari' ri xuya' chike; jak'a ri Benjamín xuya' wo'o' mul más k'iy ke chuwech ri xuya' chike ri ch'aqa' chik. Rija' y ri e rach'alal junan k'a xkiqum vino y janila xekikot chupan ri q'ij ri'.

Currently Selected:

Gén 43: KQC

Highlight

Copy