Gén 44

Ri ruqumbal ri José

1Y ri José xuteq-el ri achin aj-raqen pa kiwi' ri rusamajela' ri ek'o pa rachoch y xubij-el chire: Tanojisaj-el chi trigo ri ki-costal re achi'a' re', ri janipe' yetikir nikik'uaj-el y ri kiméro taya-el chupan ri ki-costal, 2y pa ruchi' ri ru-costal ri ch'i'p naju-el ri nuqumbal y ri méro rajel ri ru-trigo, xcha' chire.

Y re samajel re' xuben achi'el xbix chire roma ri José. 3Toq xseqer-q'anej, ri rach'alal ri José xejach-el richin chi xetzolin-el y xekik'en-pe ri bur. 4Y toq e eleneq chik el chupan ri tinamit y man jani nej ta kebiyin, jari' toq ri José xubij chire ri rusamajel: Kabiyin y kebe'aq'i' ri achi'a' y tabij chike: ¿Achike roma xiben ri man ruk'amon ta y xa utz ri xban-pe chiwe? ¿Achike roma xiweleq'aj-pe ri ruqumbal ri wajaw ri banon rik'in saqipueq? 5Ja qumbel re' ri nik'atzin chire ri wajaw richin niqumun y richin nitikir nutz'et ri achike nibanatej. Re xiben-pe kan man utz ta, kacha' chike, xcha-el ri José chire ri rusamajel.

6Y toq xeberuq'i', kan ja na wi ch'abel ri' ri xubij chike. 7Y rije' xkibij: ¿Achike roma nubij keri' ri qajaw? Roj man jun bey tiqaben achi'el ri nabij. 8Roma ri' toq roj xqatzolij k'a ri méro ri xqil chupan ri qa-costal ri pa nabey mul y kan k'a pa Canaán xqak'en chik pe richin chi xbeqatzolij kan. ¿Achike ta k'a roma niqeleq'aj-pe saqipueq o q'anapueq pa rachoch ri awajaw? 9Jak'a wi nawil ri qumbel chupan ri ru-costal jun chiqe roj, kan tikamisex k'a ri' y roj xtiqaya-qi' pa samaj rik'in ri awajaw y xqojxime' rik'in, xecha'.

10K'ari' ri samajel xubij: Tibanatej k'a achi'el ri xibij rix; xaxe achoq ik'in xtilitej-wi ri qumbel xtok kan pa nuq'a' yin y ri ch'aqa' chik chiwe rix xkekolotej chuwech ri itzel banobel, xcha'.

11Chikijujunal chi'anin xkiqasala-qa ri ki-costal pan ulew y xkijaqala' ruwi' ri ki-costal. 12Y ri samajel xuchop k'a nukanoj ri qumbel chupan ri ru-costal ri nimalaxel y xapon k'a rik'in ri ch'i'p y chupan ri costal ri' xberila-pe ri qumbel. 13Rije' xkiretz ri kitziaq chikij roma bis, k'ari' xkiben chik pe ri rejqa'n ri kibur richin xetzolin chik pa tinamit. 14Toq ri Judá y konojel ri rach'alal xe'apon chik pa rachoch ri José, rija' k'a k'o na chiri'. K'ari' rije' xkiqasaj-qa-ki' k'a pan ulew chuwech, 15y rija' xubij chike: ¿Achike k'a ri xiben? ¿Man iwetaman ta k'a chi jun achin achi'el yin, nitikir nutz'et ri achike nibanatej?

16Ri Judá xubij chire: ¿Achike k'a xtiqabij wakami? ¿Achi'el toq xtiq'alajin chi man oj aj-maki' ta? Ri Dios xril ri qamak ri qabanon. Wakami k'a, jare' ojk'o pan aq'a', xqojok k'a asamajela' junan rik'in ri achoq ik'in xilitej-wi ri qumbel, xcha' ri Judá.

17Y ri José xubij chike: Man ruk'amon ta chi keri' ninben. Xaxe achoq ik'in xilitej-wi ri qumbel xtok kan nusamajel y xtixime' kan pa samaj wik'in. Rix kixtzolin pa rachoch ri itata' rik'in uxlanibel-k'u'x, xcha'.

Ri Judá xch'on pa ruk'exel ri Benjamín

18K'ari' ri Judá xjel-apo rik'in ri José y xubij chire: Táta, nink'utuj jun nimalej utzil chawe, richin chi tawak'axaj ri xtinbij chawe, roma rat kan at achi'el ri rey, ri k'o q'atbel-tzij pa ruq'a' y roma ri' tabana' utzil man tiyakatej awoyowal chuwe. 19Toq xojpe pa nabey mul, rat xak'utuj chiqe chi wi k'a k'es na ri qatata' y wi k'o jun chik qach'alal, 20y roj xqabij chawe: Qajaw, k'a k'es na ri qatata', xa ja ri ti ri'j chik y k'a k'o jun ruk'ajol ri xalex pa rurijixinen y ri qatata' kan janila nrajo', chuqa' xqabij chawe chi k'o jun qach'alal ri xken y roma ri' xaxe chik re jun ruk'isibel qachaq' ri xk'oje' kan chike ri e ka'i' ri junan kite', xojcha'. 21Y rat xabij chiqe chi tiqak'ama-pe ri qachaq' roma nawajo' nawetamaj ruwech. 22Jak'a roj xqabij chawe chi rija' man nitikir ta nuya' kan ri qatata' roma wi xtuya' kan, ri qatata' niken. 23Y rat xabij chiqe chi wi ri qachaq' más ko'ol man xtipe ta chiqij man xqojak'ul ta chik.

24Toq xojtzolin-el rik'in ri qatata' xbeqatzijoj chire ronojel ri abin-el chiqe. 25Jak'a toq ri qatata' xubij chik chiqe chi qojpe chik jun bey chuloq'ik juba' trigo; 26roj xqabij chire chi man yojpe ta roma rat kan man xqojak'ul ta wi ri qachaq' xa man nipe ta chiqij roma keri' abin-el chiqe. 27Y ri qatata' xubij chiqe chi roj kan qetaman-wi chi rik'in ri Raquel ri rixjayil xek'oje' xaxe e ka'i' ruk'ajol; 28ri nimalaxel chike rije' e ka'i', xa xbe yan, roma jun itzel chikop xwech'on richin y man jun bey chik xtutz'et ruwech. 29Y wakami xqak'en chik pe re jun chuwech y wi k'o ta jun xtuk'uluwachij, xubij-pe chiqe chi kan ja roj k'a k'o qamak ri' wi ri qatata' xtiken roma bis.

30Jak'a re wakami achike xtiqaben re xqojtzolin-el rik'in ri qatata', wi man qak'uan ta ri qachaq', roma ri qatata' kan rik'in ri qachaq' k'o-wi ri ránima roma janila nrajo'. 31Y toq xtutz'et chi ri qachaq' man beneq ta chik qik'in, xtiken roma bis y qoma roj xtiken-el. 32Yin kan nuya'on kan nutzij chire ri nata', chi ja yin ri yipa'e' chuwech re' y yin k'o chi ninjech re qachaq' re' chire y chuqa' xinbij kan chire chi wi man xtinbentzolij ta chire, kan ja yin k'a in aj-mak chuwech rija' chijun ri ruk'aslen. 33Y roma ri' nink'utuj k'a utzil chawe chi ja yin ri yinok kan awichin rat pa ruk'exel ri nuchaq' y rija' titzolin junan kik'in ri ch'aqa' chik wach'alal. 34Roma ¿Achi'el ta k'a toq xkinapon chuwech ri nata' wi xa nuyon chik yin y man beneq ta ri qachaq'? Man ninwajo' ta nintz'et ri tijoj-poqonal ri xtuq'axaj ri nata', xcha' ri Judá.

Currently Selected:

Gén 44: KQC

Highlight

Copy