Gén 31
31
Ri Jacob nuch'ob richin nanimej-el chuwech ri Labán
1Y ri Jacob xrak'axaj k'a ri nikibila' ri ralk'ual ri Labán, y kere' k'a nikibij: Ri Jacob xumej ri rubeyomel ri qatata'. Y roma ri' xbeyomer-q'anej rija', yecha'. 2Y ri Jacob xutz'et chi ri Labán man ja ta chik achi'el ri rubanon-pe y chuqa' xujel runa'oj rik'in. 3Y ri Jehová xch'on k'a rik'in ri Jacob y xubij chire: Más utz chi yatzolin pa kiruwach'ulew ri awati't-amama' ri akuchi ek'o-wi ri awach'alal y yin kan xkibe awik'in, xcha' chire.
4Y ri Jacob k'o k'a pa juyu' yeruyuq'uj ri rawej y jari' toq xuteq koyoxik ri Raquel y ri Lea ri e rixjayil. 5Y xubij chike: Yin nintz'et chi ri itata' xujel runa'oj y man junan ta chik rik'in ri rubanon kan, jak'a ri ru-Dios ri nata' xa man in rumalin ta kan, kan k'o-wi-pe wik'in. 6Rix kan iwetaman k'a chi yin xinwilij-pe ri itata' rik'in ronojel wuchuq'a'. 7Y man rik'in ri' ri itata' janila k'iy mul kiruq'ol. Lajuj yan mul tujel ri wajel. Jak'a ri Dios man ruya'on ta q'ij chire richin nuben itzel chuwe. 8Y ri itata' kere' k'a nubij chuwe: Yatintoj rik'in re taq awej ri e seq y q'eq kij, nicha' chuwe, kan jari' toq konojel ri ixoqi' taq awej ye'alex taq kal seq y q'eq kij. Y toq nubij chik chuwe: Yatintoj rik'in re taq awej ri xilon q'eq kij. Jari' toq ye'alex más taq awej xilon q'eq kij. 9Keri' k'a ri Dios xerelesaj ri rawej ri itata' y xeruya' chuwe yin.
10Y chupan k'a ri q'ij toq ri chikopi' ye'etz'an, jari' toq yin xinwachik'aj y xintz'et k'a chupan ri wachik' chi ri achija' taq tzuntzun ri yek'oje' kik'in ri ixoqi' taq tzuntzun, k'o seq y q'eq chikij, y chuqa' taq e xilon q'eq. 11Jari' toq ri ángel richin ri Dios xch'on wik'in ri pa wachik' y xubij: Jacob, xcha'.
Y yin xinbij: Jare' ink'o wawe', xicha'. 12Y chuqa' xubij: Tatz'eta' jebel konojel ri achija' ri ye'etz'an kik'in ri ixoqi' taq tzuntzun kan ruyon k'a xilon q'eq kij, seq y q'eq kij. Roma yin kan nutz'eton ronojel ri rubanon chawe ri Labán. 13Ja yin ri in Dios richin Betel akuchi xaya-wi kan aceite pa ruwi' ri abej y akuchi xajikiba-wi ri ach'abel chinuwech, wakami kayakatej k'a y katel-el chupan re ruwach'ulew re'. Katzolin akuchi xatalex-wi, xcha' chuwe, xcha'.
14Ri Raquel y ri Lea xkibij k'a chire ri Jacob: Ri qatata' xa man jun chik k'o kan pa ruq'a' richin chi niqichinaj ta kan roj. 15Xa man oj rumi'al ta rubanon chiqe y xojruk'ayij chawe rat y kan xuk'is yan ronojel ri qajel. 16Roma ronojel ri rubeyomel ri qatata', xa xelesex yan chire roma ri Dios y xok k'a kan qichin roj y kichin ri qal. Wakami k'a tabana' ronojel ri nubij ri Dios chawe, xecha' ri rixjayilal chire.
Ri Jacob xanimej-el chuwech ri Labán
17Chirij ronojel re', ri Jacob kan jari' xuben chi nibe, xeruch'okoba-el ri rixjayilal y ri e ralk'ual chikij ri camello. 18Xeruk'uaj chuqa' konojel ri rawej y ronojel ri k'o rik'in, ri ruch'akon chiri' pa Padán-aram toq xsamej rik'in ri Labán, y jari' nitzolin k'a rik'in ri Isaac, ri rutata', k'a pa ruwach'ulew Canaán. 19Jak'a ri Labán xa xberusokaj kisumal ri rukarne'l. Roma ri' ri Raquel xtikir xereleq'aj-el ri wachibel ri yek'atzin chire ri rutata' richin nuya' kiq'ij. 20Ri Jacob xuq'ol k'a kan ri Labán, ri arameo, roma man xubij ta kan chire chi nibe. 21Xanimej k'a pe rik'in ronojel ri k'o rik'in y xuq'axaj-pe ri raqen-ya' Éufrates y choj xbe chupan ri bey ri nibe-el pa ruwa-taq'aj richin Galaad, ri k'o chuwi' taq juyu'.
Ri Labán xutzeqelibej-el ri Jacob
22Pa rox q'ij xbeya' k'a rutzijol chire ri Labán chi ri Jacob xanimej-el. 23K'ari' ri Labán xerumol-el ri rach'alal richin xbekiq'i' ri Jacob, xebiyin k'a wuqu' q'ij y xeberuq'i' k'a pa taq juyu' richin Galaad. 24Jak'a ri Dios xch'on rik'in ri Labán, ri arameo, pa rachik' chupan ri aq'a' ri'. Y xubij chire: Tawak'axaj, man kabech'on rik'in ri Jacob rik'in oyowal, xcha'.
25Ri Labán xeruq'i' k'a ri Jacob akuchi kipabalon-q'anej ri taq kachoch ri banon rik'in tzieq y chiri' pa ruwa-taq'aj richin Galaad ri k'o el chuwi' taq juyu', chiri' xek'oje-wi-qa rik'in ri rach'alal. 26Y ri Labán xubij chire ri Jacob: ¿Achike roma xinaq'ol kan, y xe'ak'en-pe ri numi'al, xaben-pe chike achi'el ri ixoqi' ri yechap-pe pa labal? 27¿Achike roma xawewaj-pe-awi', xatanimej-pe y xinaq'ol kan? Roma xa ta xaya' kan rutzijol chuwe, yin xatinjech ta pe rik'in kikoten y xqaben ta jun nimaq'ij rik'in ronojel ruwech q'ojom. 28Ni man xaya' ta q'ij richin xentz'ubaj ta pe ri numi'al y ri taq numam; achi'el xa ta maneq ana'oj richin kere' xaben-pe. 29Yin kan k'o nuq'a' pan iwi' richin chi ninben itzel chiwe chi'iwonojel. Jak'a chupan re aq'a' re xq'ax kan, ri Dios richin ri atata' xch'on wik'in y xubij chuwe: Man kabech'on rik'in ri Jacob chi oyowal, xcha'. 30Utz ri' chi nawajo' yatzolin kik'in ri ate-atata'. ¿Jak'a achike roma xe'aweleq'aj-pe ri nu-dios?, xcha' ri Labán chire ri Jacob.
31Y ri Jacob xubij chire ri Labán: Yin xinel-pe roma xinxibij-wi' y xinch'ob chi rik'in juba' ye'ak'en kan ri ami'al chinuwech, xcha'. 32Y ri Jacob man retaman ta k'a chi ja ri Raquel eleq'ayon-pe ri ru-dios y roma ri' xubij: Wi k'o chiqakojol ri xeleq'an-pe ri a-dios, kan tikamisex k'a chikiwech re qach'alal re ek'o wawe'. Tach'ara-el ri awichin rat ri qak'amon-pe y tak'uaj-el, xcha' ri Jacob.
33Y ri Labán, pa rachoch k'a ri Jacob xok-wi-apo nabey chi kikanoxik ri ru-dios; xel-pe chiri' xok-apo pa kachoch ri Bilhá y ri Zilpá y man jun xril-pe chiri', xok-apo pa rachoch ri Lea y roma kan man jun chuqa' xril-pe chiri' k'ari' xok-apo pa rachoch ri Raquel. 34Y jak'a ri Raquel ri e eleq'ayon-pe ri ru-dios ri rutata' y e rewan k'a chuxe' ri ruxalma ri ru-camello y rija' ch'okol pa ruwi'; rokik ri rutata' nikurul pa rachoch y man jun xril chiri'. 35Y jari' toq rija' xubij chire ri rutata': Man tipe awoyowal chuwe táta, roma man yitikir ta yiyakatej-q'anej chawech roma xa janila in yawa' rik'in ri yabil ri nikik'owisaj konojel ixoqi' ronojel ik', xcha'.
Y keri' toq ri Labán xukanola' ri ru-dios y man jun xril. 36Y ri Jacob janila xyakatej royowal roma ri', y xuch'ojij chire ri Labán rik'in re ch'abel re': ¿Achike numak xinben chawech, richin kan xinatzeqelibej-pe? 37Y stape' xakanoj yan chukojol ronojel ri k'o wik'in, ¿k'o kami xawil-el ri kan richin pan awachoch rat? Wi keri' taya-pe wawe' chikiwech ri wach'alal yin y chikiwech ri awach'alal rat, richin keri' tikiq'ata-tzij pa qawi' achike k'o rumak chiqakojol roj oj ka'i'. 38Ri kawineq juna' ri xisamej awik'in, man jun chike ri akarne'l, ni man jun chike ri atzuntzun ri xkiben ta tzaqonik, y chuqa' ni ta jun bey xintej ta jun chike ri achija' taq akarne'l o atzuntzun. 39Ronojel awawej ri yekamisex kan koma ri k'uxunela' taq chikopi', xinya-apo kik'exel, roma rat kan jantape' xe'ach'ojij chuwe, stape' xbanatej paq'ij o chaq'a'. 40Ri paq'ij xintej poqon roma janila k'aten y ri chi'aq'a' xintej poqon roma ri tew y kan xel k'a nuwaran. 41Keri' nubanon-pe kawineq juna' ri ink'o-pe chupan ri awachoch, kajlajuj juna' xatinwilij koma ri ami'al y waqi' juna' in samajineq-pe awik'in richin xinch'ek juba' taq wawej, ¿y jampe' man ta xajel wajel? 42Y xa man ta k'o ri Dios richin ri Abraham wik'in, ri ru-Dios chuqa' ri nata' Isaac, ri kan jantape' xk'oje' rukiy chuwech, xa choj ta keri' xinateq-pe, y man jun ta xaya-pe chuwe. Jak'a ri Dios xutz'et chi janila xintej poqon awik'in y janila xisamej, roma ri' xch'on awik'in ri chaq'a' chi man kach'on wik'in chi oyowal, xcha' ri Jacob chire ri Labán.
Ri Jacob y ri Labán xkiben jun jikibel-tzij
43K'ari' ri Labán xubij chire ri Jacob: Re ixoqi' re' kan e numi'al wi yin, y re ak'uala' re' kan e numam wi yin, chuqa' re awej re' kan e wichin wi yin. Jak'a xa man jun yitikir ninben richin chi yek'oje' ta chik kan wik'in re numi'al y re numam. 44Roma ri' tiqabana' jun jikibel-tzij chiqakojol roj oj ka'i', y re' xtik'atzin richin q'alajirisabel richin ri tununri'il, xcha' ri Labán.
45K'ari' ri Jacob xberuk'ama-pe jun yuquyik abej y xutik ri chiri' richin xok jun retal. 46Y rija' xubij chuqa' chike ri achi'a' ri kan e beneq rik'in: Timolo-pe ruchi' la abej y xa jun tibana' chire re wawe', xcha'.
Y rije' xkimol k'a ruchi' ri abej richin xkiben jun molaj chire, y chiri' xewa-wi chunaqaj ri molaj abej ri'. 47Ri Labán xuya' k'a rubi' ri akuchi ek'o-wi-qa, xubij k'a Jegar Sahaduta chire, jun bi'aj richin pa ruch'abel rija'; y ri Jacob xubij Galaad chire pa ruch'abel rija'. Re ka'i' bi'aj re' ek'o pa ch'abel hebreo y arameo y ye'el chi tzij ri abej ri yeq'alajirisan ri xbanatej.
48Y ri Labán xubij chik jun bey: Re molaj abej re' jare' ri xkeq'alajirisan ri xbanatej chiqakojol roj oj ka'i', xcha'. Y roma ri' ri chiri' xubini'aj kan Galaad k'a re wakami. 49Y chuqa' ri chiri' xubini'aj kan Mispá, roma ri Labán xubij: Kan ja ta k'a ri Jehová xtitz'eton qichin toq man xtiqatz'et ta chik qi'. 50Wi k'o jun q'ij xtaben poqon chike ri numi'al o wi k'o ta jun q'ij xke'akanoj ch'aqa' chik ixoqi', stape' man jun wineq xkatz'eton, kan ja ri Dios ri xtitz'eton awichin, xcha'.
51Y ri Labán xch'on chik jun bey y xubij: Re molaj abej re' jare' ri retal ri xtik'oje' kan qoma roj oj ka'i'. 52Re molaj abej re' y ri jun abej ri xatik kan rat, jare' xtiq'alajirisan chi ni ta rat man xtaq'axaj ta la abej la xapaba-q'anej richin naben itzel chuwe yin y ni ta yin man xtinq'axaj ta re molaj abej re' richin xtaben itzel chuwe. 53Ja ri ki-Dios ri amama' ri Abraham y ri Nacor xtiq'aton-tzij pa qawi' roj oj ka'i', xcha' ri Labán.
Y ri Jacob xujikiba-rutzij chuwech ri ki-Dios ri rutata' y ru-Dios chuqa' rija'. 54Ri Jacob xerukamisaj awej chiri' richin xuben kamelabel chiri' pa ruwi' jun juyu' y xeroyoj k'a ri Labán y ri ruwinaq richin xkitej kiway junan, y chiri' xkiq'axaj-wi ri aq'a' ri'.
55Ri Labán nimaq'a' yan xyakatej y xerutz'ubaj kan ri rumam y ri rumi'al y xuya' kan urtisanik pa kiwi' y k'ari' xtzolin-pe akuchi k'o-wi ri rachoch.
Currently Selected:
Gén 31: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
