Gén 32

Ri Jacob y ri Esaú xkik'ul-ki'

1Y ri Jacob xuchop chik k'a el rubey, y jari' toq ek'o ángel ri e taqon-pe roma ri Dios y xkik'ul ri Jacob pa bey. 2Y toq rija' xerutz'et xubij k'a qa pa ránima: Re' jere' ri e banoy oyowal, ri e richin ri Dios, xcha-qa. Y roma ri' ri chiri' ri akuchi xeruk'ul-wi xubij Mahanaim chire, y re' nel chi tzij ri ka'i' tzobaj ri xkik'ul-ki'.

3Y ri Jacob jari' toq xuben chi yeruteq k'a el uk'uey rutzijol pa Seir, ri k'o pa ruwach'ulew Edom richin tibekiya' rutzijol chire ri Esaú. 4Y rija' xubij-el chike ri k'o chi nibekibij chire: Kere' rubin-pe ri asamajel Jacob: Chiri' pa rachoch ri qach'utitata' Labán xinapon-wi y chiri' xik'oje-wi k'a ri q'ij toq xinel-pe re wakami. 5Wakami ek'o chik nuwákix y ek'o nubur, ek'o chuqa' nukarne'l, nutzuntzun, ek'o e k'iy nusamajela' chi achi'a' chi ixoqi'. Ninteq rubixik re' chawe richin rat yinak'ul ta chi utzil, xcha' ri Jacob.

6Y toq ri e uk'uey rutzijol ri e rutaqon-el ri Jacob xetzolin-pe, xokibij chire: Xojpe rik'in ri awach'alal Esaú. Y rija' chuqa' peteneq richin yatoruk'ulu' y e rachibilan-pe e 400 achi'a', xcha'.

7Toq ri Jacob xrak'axaj re' janila xuk'en rukiy y xsach ruk'u'x, k'ari' xeruch'er pa ka'i' tzobaj konojel ri e beneq chirij, ri winaqi' y ri rawej ri e kokoj y ri e nima'q, y chuqa' ri camello. 8Y xubij: Wi ta ri Esaú yeruchop ta chi oyowal jun chike ri tzobaj, ri jun chik tzobaj xtikolotej kan. 9Y jari' toq rija' xubij: Ri Dios richin ri numama' Abraham y richin ri nata' Isaac, rat Jehová ri xabij chuwe chi kitzolin chupan ri nuruwach'ulew kik'in ri wach'alal y kan xtaya' urtisanik pa nuwi': 10Yin man ruk'amon ta k'a richin xink'ul ronojel utzil re xaya' chuwe, y kan abanon wik'in ronojel ri qitzij. Toq yin xiq'ax-el pa ruwi' re raqen-ya' Jordán, man jun nuk'uan-el, xaxe re ti nuch'ame'y y wakami xitzolin-pe y e peteneq e ka'i' tzobaj winaqi' wik'in. 11Kinakolo' k'a wakami pa ruq'a' ri wach'alal Esaú, roma janila ninxibij-wi' chuwech; rik'in juba' yirukamisaj yin y ri ak'uala' y ri kite'. 12Y rat xabij chuqa' chuwe: Yin janila jebel xtinben chawe y ri awijatzul ri xkebek'oje' kan achi'el ri sanayi' ri k'o chuchi' ri palou ri man jun nitikir najlan kichin, xacha' chuwe, xcha' ri Jacob chire ri Dios.

13Y chiri' k'a xk'oje-wi kan ri aq'a' ri', y chiri' xuben-wi ruchojmil ri sipanik richin chi nuya' chire ri Esaú, ri rach'alal. Y ri sipanik ri' kere' rubanik: 14E 200 ixoqi' taq tzuntzun y e juwineq achija' taq tzuntzun, chuqa' e 200 ixoqi' taq karne'l y e juwineq achija' taq karne'l, 15e juwineq lajuj teja' taq camello kachibilan taq kal, e kawineq teja' taq wákix y e lajuj achija' taq wákix, e juwineq teja' taq bur y e lajuj achija'. 16Y re chikopi' re' xerujech k'a pa kiq'a' ri rusamajela' ri e ximil pa samaj rik'in y xubij-el chike: Kixik'o-el chinuwech y tiyala' kikojol ri tzobaj awej, xcha'.

17Y xuteq-el ri nabey rusamajel y xubij-el chire: Toq xtak'ul ri Esaú, ri wach'alal y xtuk'utuj chawe: ¿Achike ri awajaw? ¿Akuchi yabe-wi? ¿Achoq ichin re awej re ak'uan?, xticha' chawe. 18K'ari' rat xtabij k'a chire: Re' e richin ri Jacob, ri asamajel, y e rutaqon-pe richin jun sipanik chire ri wajaw Esaú, y ri wajaw Jacob xambey kan, xkacha' chire.

19Y chuqa' keri' xubij-el chike ri xe'uk'uan-el ri ruka'n, y ri rox, y konojel ri e tzeqelibeyon-el ri tzobaj sipanik ri': Kere' xtibij chire ri Esaú toq xtik'ul, 20y chuqa' tibij chire: Ri asamajel Jacob xa xambey kan, xkixcha', xcha' chike.

Roma ri Jacob xuch'ob: Rik'in ri nusipanik ri ninteq-el xa xtik'o-qa ri royowal y toq yin xtintz'et k'a ruwech rik'in juba' kan xkiruk'ul chi utzil, xcha-qa. 21Y keri' ri Jacob xuteq k'a el nabey ri sipanik, y rija' chupan ri aq'a' ri' xwer kan chiri' ri akuchi k'o-wi-qa.

Ri Jacob xuben oyowal rik'in jun ángel

22Chupan k'a ri aq'a' ri', ri Jacob xyakatej-el, xeruk'uaj-el ri ka'i' rixjayilal, ri e ka'i' rusamajela' ixoqi', y chi julajuj ruk'ajol, y xkiq'axaj-apo ri raqen-ya' ri nibix Jaboc chire, ri akuchi xax juba' rupan ri ya', 23xeruk'uaj y xeruq'axaj k'a konojel y ronojel ri k'o kik'in chupan ri ch'uti'n raqen-ya'. 24Keri' ri Jacob xk'oje' k'a kan ruyon. Y k'o k'a jun achin ri xkichuq-ki' rik'in, k'a xseqer na pe. 25Y toq ri achin ri' xutz'et chi man nitikir ta nuch'ek ri Jacob, xuya' jun q'a' tzan-racheq y xujalk'atij-ri' ri rubaqil, keri' xuben rokik xkichuq-ki' rik'in ri achin, 26y xeri' ri achin xubij: Taya-el q'ij chuwe richin yibe, roma niseqer yan pe, xcha'.

Jak'a ri Jacob xubij chire: Man xkatinya' ta el k'a toq in awurtisan chik kan, xcha'.

27Y ri achin xuk'utuj k'a chire: ¿Achike ri abi'?

Y rija' xubij chire: Yin Jacob ri nubi', xcha' chire.

28Y rija' xubij chire ri Jacob: Man xtabini'aj ta chik Jacob, xa kan xtabini'aj k'a Israel, roma xatej-aq'ij richin xach'ek ri Dios y ri achi'a'; y kan xach'akon, xcha'.

29K'ari' ri Jacob xuk'utuj y xubij chire: Taq'alajirisaj ri abi' chinuwech, xcha'.

Y ri achin xubij: ¿Achike roma nak'utuj nubi'?, xcha'. Xeri' ri achin xrurtisaj kan ri Jacob ri chiri'. 30Y ri Jacob xubij Penuel*f28* chire ri tinamit ri', roma xinwetamaj ruwech ri Dios y k'a in k'es na kan, xcha'.

31Y toq rija' xuq'axaj-apo ri tinamit Penuel, jari' toq xel-pe ri q'ij pa ruwi'; y rija' nijekma'y k'a nibiyin. 32Roma ri' k'a re wakami ri rijatzul ri Israel man nikitej ta ri iboch' ri k'o chutzan-racheq ri kawej roma chiri' xsokotej-wi chire ri Jacob.

Currently Selected:

Gén 32: KQC

Highlight

Copy