ᐅᐸᓓᑭᔅ ᒫᕐᒃ 12
12
ᓇᔅᐱᑐᐌᐎ ᐋᑕᓗᑳᓐ ᔓᒥᓈᑎᑯᐎ ᓂᑖᐎᑭᒋᑲᓐ ᐊᑐᔅᑫᓛᑲᓇᒃ ᐅᒋ
(ᒫᑎᐤ 21:33–46; ᓘᒃ 20:9–19)
1ᓇᔅᐱᑐᐌᐎ ᐋᑕᓗᑳᓂᒃ ᒫᑲ ᑮ ᒫᒋ ᐋᔭᒥᐁᐤ᙮ ᐯᔭᒃ ᐃᓕᓕᐤ ᑮ ᐅᔑᑕᐤ ᔓᒥᓈᑎᑯ ᓂᑖᐎᑭᒋᑲᓂᓕᐤ, ᑮ ᑭᐸᐊᒻ ᒫᑲ ᒥᓯᐌ ᐙᔅᑲ, ᑮ ᒧᓇᐊᒻ ᒫᑲ ᐃᑕ ᔓᒥᓈᐳᓕᐤ ᑭᒋ ᐅᒋᑳᐎᑖᑦ, ᑮ ᒋᒪᑕᐤ ᒫᑲ ᐊᔕᐙᐱᐎᑲᒥᑯᓕᐤ, ᑮ ᐋᐎᐁᐤ ᒫᑲ ᐅᓂᑕᐎᑭᒋᑫᐗ, ᐁᑯ ᒫᑲ ᐊᔅᑮᒃ ᐙᓚᐤ ᐁᑐᑌᑦ᙮ 2ᐃᔅᐱ ᒫᑲ ᐌᑎᒋᐸᓕᓕᒃ ᑮ ᐃᔑᑎᔕᐌᐤ ᐊᑑᔅᑫᓛᑲᓇ ᑭᒋ ᓈᑖᓕᒋ ᐅᓂᑖᐎᑭᒋᑫᐗ, ᑭᒋ ᒥᓕᑯᑦ ᐅᓂᑖᐎᑭᒋᑫᐗ ᒥᓂᔕ ᔓᒥᓈᑎᑯ ᓂᑖᐎᑭᒋᑲᓂᒃ ᐅᒋ᙮ 3ᑮ ᐅᑎᑎᓀᐗᒃ ᒫᑲ, ᓀᔥᑕ ᐁ ᑮ ᐅᑖᒪᐙᒋᒃ, ᐱᔑᔑᒃ ᑮ ᑭᒋᑎᔕᐌᐗᒃ᙮ 4ᒥᓇ ᒫᑲ ᑮ ᐃᔑᑎᔑᐊᒪᐌᐤ ᑯᑕᑭᔭ ᐊᑑᔅᑫᓛᑲᓇ: ᐊᓂᐃ ᒫᑲ ᑮ ᐱᒶᓯᓈᑕᐌᐗᒃ, ᐁ ᒥᔣᑲᓂᑳᑌᐙᒋᒃ ᐅᔅᑎᒀᓂᓕᒃ, ᑮ ᑭᒋᑎᔕᐌᐗᒃ ᒫᑲ ᓈᔅᐱᒡ ᐁ ᒪᒋᑐᑕᐙᑲᓂᐎᓕᒋ᙮ 5ᒥᓇ ᒫᑲ ᑯᑕᑭᔭ ᑮ ᐃᔒᑎᔕᐌᐤ; ᐊᓂᐃ ᒫᑲ ᑮ ᓂᐸᐁᐗᒃ, ᓀᔥᑕ ᒥᒉᑦ ᑯᑕᑭᔭ; ᐋᑎᑦ ᐁ ᐅᑖᒪᐙᒋᒃ, ᐋᑎᑦ ᒫᑲ ᐁ ᓂᐸᐋᒋᒃ᙮ 6ᑫᔮᐸᒡ ᒫᑲ ᐁ ᐋᔭᐙᑦ ᐯᔭᒃ ᐅᑯᓯᓴ, ᓈᔅᐱᒡ ᑳ ᓵᑭᐋᑦ, ᐁᐗᒀᓂᐃ ᐊᓯᒋ ᒫᒋᒡ ᐁᑎᔕᐊᒪᐙᑦ, ᐁ ᐃᑗᑦ ᑲᑕ ᑭᔅᑌᓕᒣᐗᒃ ᓂᑯᓯᓴ᙮ 7ᒫᑲ ᐅᑯ ᐅᓂᑖᐎᑭᒋᑫᐗᒃ ᑮ ᐋᔨᑎᑐᐗᒃ, ᐊᐗ ᐁᐗᒀᓇ ᑳ ᐊᑎ ᐋᓂᔅᑫ ᑎᐯᓕᑕᒃ; ᒫᑎ, ᓂᐸᐋᑕᐤ, ᐁᑯ ᑫ ᐋᔮᔮᒃ ᐊᓂᒪ ᑎᐯᓕᒋᑫᐎᓐ᙮ 8ᑮ ᐅᑎᓀᐗᒃ ᒫᑲ, ᓀᔥᑕ ᐁ ᑮ ᓂᐸᐋᒋᒃ, ᔓᒥᓈᑎᑯ ᓂᑖᐎᑭᒋᑲᓂᒃ ᑮ ᐅᒋ ᐗᓚᐎᐌᐱᓀᐗᒃ᙮
9ᑖᓂ ᑫ ᑐᑕᒃ ᒫᑲ ᐊᓇ ᑳ ᑎᐯᓕᑕᒃ ᔓᒥᓈᑎᑯ ᓂᑖᐎᑭᒋᑲᓂᓕᐤ? ᑲᑕ ᐯᒋ ᓂᔑᐗᓈᒋᐁᐤ ᐊᓂᐃ ᐅᓂᑖᐎᑭᒋᑫᐗ, ᓀᔥᑕ ᑯᑕᑭᔭ ᑲᑕ ᒥᓓᐤ ᔓᒥᓈᑎᑯ ᓂᑖᐎᑭᒋᑲᓂᓕᐤ᙮ 10ᓇᒪ ᓈ ᓀᔥᑕ ᑭ ᐅᒋ ᐋᔭᒥᑖᓇᐗᐤ ᐅᒪ ᑭᒋ ᒪᓯᓇᐃᑫᐎᓐ, ᐊᓇ ᐊᓯᓂ ᑳ ᑮ ᐋᑕᐌᓕᒥᑯᑦ ᐅᐙᔅᑳᔨᑲᓂᑫᐗ ᐁᐗᑯ ᑫᔅᑕᓛᑲᓂᐎᑦ ᑭᑫᔮᒃ: 11ᐁᐗᑯ ᐅᒪ ᐅᑎᐯᓕᒋᑫᐤ ᐅᑦ ᐃᑐᑕᒧᐎᓐ, ᑭ ᒫᒪᔅᑳᓯᓀᓈᓇᐤ ᒫᑲ?
12ᐁᑯ ᓂᐋᓇᑕᐌᓕᑕᑭᒃ ᑭᒋ ᐅᑎᑎᓈᒋᒃ, ᒫᑲ ᑮ ᑯᔅᑌᐗᒃ ᐃᓕᓕᐗ; ᐌᓴ ᑮ ᑭᔅᑫᓕᑕᒶᒃ ᐎᓚᐗᐤ ᐁ ᑮ ᐃᑎᑯᒋᒃ ᐊᓂᐁᓕᐤ ᓇᔅᐱᑐᐌᐎ ᐋᑕᓗᑳᓂᓕᐤ: ᑮ ᓇᑲᑌᐗᒃ ᒫᑲ, ᓀᔥᑕ ᑮ ᑭᑐᑌᐗᒃ᙮
ᑲᑴᒋᑫᒧᐎᓐ ᑎᐯᓕᒋᔭᐎ ᔓᓕᔭᓐ ᐅᒋ
(ᒫᑎᐤ 22:15–22; ᓘᒃ 20:20–26)
13ᑮ ᐃᔑᑎᔕᐊᒪᐌᐗᒃ ᒫᑲ ᐗᑎᑦ ᐸᕋᓯᔭ; ᓀᔥᑕ ᐦᐁᕈᑎᔮᓇ ᑭᒋ ᓇᒀᑖᓕᒋ ᐅᑦ ᐋᔭᒥᐎᓂᓕᒃ᙮ 14ᐃᔅᐱ ᒫᑲ ᑌᑯᔑᑭᒃ, ᑮ ᐃᑌᐗᒃ, ᑫᔅᑭᓄᐊᒫᑫᔭᓐ, ᓂ ᑭᔅᑫᓕᑌᓈᓐ ᐁ ᑖᐺᔭᓐ, ᐁᑳ ᓀᔥᑕ ᐊᐌᓇ ᐁ ᑯᔅᑕᑦ; ᐌᓴ ᓇᒪᐎᓚ ᑮ ᐱᓯᔅᑫᓕᑕᒸᓐ ᐃᓕᓕᐗᒃ ᐁ ᐃᔑᓈᑯᓯᒋᒃ, ᒫᑲ ᐁ ᑭᔅᑭᓄᐊᒫᑫᐗᑦ ᑭᒋᒪᓂᑐ ᐅᑦ ᐃᔑᑣᐎᓐ ᑖᐺᐎᓂᒃ: ᐅᓚᔓᐌᓕᑖᑾᓐ ᓈ ᑭᒋ ᒪᓛᑲᓂᐎᑦ ᓯᓴᕐ ᑎᐯᓕᒋᑫᐎ ᔔᓕᐋᓇ, ᓀᔥᑕᐱᑯ ᐁᑳ?
15ᓂ ᑳ ᒥᓕᐙᓈᓐ ᓈ, ᓀᔥᑕᐱᑯ ᐁᑯᔑ ᓈ ᓇᒪᐎᓚ ᓂ ᑳ ᒥᓕᐙᓈᓐ? ᒫᑲ ᐎᓚ, ᐁ ᑭᔅᑫᓕᑕᒸᑦ ᐅ ᑲᑳᔦᓕᓯᐎᓂᓕᐤ, ᑮ ᐃᑌᐤ, ᑖᓀᑭ ᐌᒋ ᑲᑴᒋᐃᔦᒃ? ᐯᑐᐎᓐ ᐯᔭᒃ ᔔᓕᐋᓈᐱᔅᑯᔑᔥ, ᑭᒋ ᐙᐸᒪᒃ᙮
16ᐁᑯ ᐱᐁᔑᐙᒋᒃ, ᐃᑌᐤ ᒫᑲ, ᐊᐌᓇ ᐅᑦ ᐃᔑᓈᑯᓯᐎᓐ ᐅᒪ, ᓀᔥᑕ ᐊᐌᓇ ᑳ ᒪᓯᓇᐃᑳᓱᑦ ᐅᑕ?
ᑮ ᐃᑌᐗᒃ ᒫᑲ᙮ ᓯᓴᕐ᙮
17ᒋᓴᔅ ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᒥᓕᒃ ᓯᓴᕐ ᐊᓂᐃ ᐌᑖᔮᓂᑦ ᓯᓴᕐ, ᓀᔥᑕ ᑭᒋᒪᓂᑐ ᐊᓂᐃ ᐌᑖᔮᓂᑦ ᑭᒋᒪᓂᑐ᙮
ᑮ ᒫᒪᔅᑳᑌᐗᒃ ᒫᑲ᙮
ᑲᑴᒋᑫᒧᐎᓐ ᐁ ᐗᓂᔥᑳᓂᐗᒃ ᓂᐱᐎᓂᒃ ᐅᒋ
(ᒫᑎᐤ 22:23–33; ᓘᒃ 20:27–40)
18ᐁᑯ ᐱᐁᒋ ᓈᑎᑯᑦ ᓵᑦᔫᓯᔭ, ᓇᒪ ᐃᑕᑾᓐ ᐗᓂᔥᑳᐎᓐ ᑳ ᐃᑗᒋᒃ; ᑮ ᑲᑴᒋᒥᑯ ᒫᑲ, ᐁ ᐃᑎᑯᑦ, 19ᑫᔅᑭᓄᐊᒫᑫᔭᓐ, ᒧᓯᔅ ᓂ ᑮ ᒪᓯᓇᐊᒫᑯᓈᓐ, ᑮᔥᐱᓐ ᐃᓕᓕᐤ ᐗᒋᔖᓇ ᓂᐱᓕᑌ, ᐁᑳ ᒫᑲ ᓇᑲᑖᓕᑌ ᐊᐙᔑᔕ, ᐎᒋᔖᓇ ᑲᑕ ᐎᑭᒣᓕᐗ ᐎᐗ, ᑲᑕ ᐅᑕᐙᔑᒥᔑᑲᐙᑦ ᒫᑲ ᐎᒋᔖᓇ᙮ 20ᑮ ᐃᑖᐗᒃ ᒫᑲ ᓂᔂᔅ ᑳ ᐎᒋᔖᓂᑐᒋᒃ: ᐊᓇ ᓃᔥᑕᒻ ᒫᑲ ᑮ ᐎᐎᐤ, ᐁ ᓂᐱᑦ ᒫᑲ, ᓇᒪᐎᓚ ᐅᒋ ᓇᑲᑌᐤ ᐊᐙᔑᔕ᙮ 21ᐊᓇ ᓂᔓ ᓀᔥᑕ ᑮ ᐅᑌᓀᐤ, ᑮ ᓂᐱᐤ ᒫᑲ, ᓇᒪ ᓀᔥᑕ ᐅᒋ ᓇᑲᑌᐤ ᐊᐙᔑᔕ: ᐊᓇ ᓂᔅᑐ ᓀᔥᑕ᙮ 22ᐊᓂᑭ ᓂᔂᔅ ᒫᑲ ᑮ ᐋᔭᐗᐗᒃ: ᒫᒋᒡ ᒫᑲ ᐊᓇ ᐃᔅᑴᐤ ᓀᔥᑕ ᑮ ᓂᐱᐤ᙮ 23ᐁᐗᑯ ᒫᑲ ᐅᒋ ᐃᔅᐱ ᐗᓂᔥᑳᓂᐗᑫ, ᐃᔅᐱ ᐗᓂᔥᑳᑡᐌ, ᐊᐌᓇ ᐁ ᐃᑕᓯᒋᒃ ᑫ ᐎᐎᑦ ᐅᐅ ᐃᔅᑴᐗ? ᐌᓴ ᐊᓂᑭ ᓂᔂᔅ ᑮ ᐎᐎᐗᒃ᙮
24ᒋᓴᔅ ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᓇᒪ ᓈ ᑭ ᓇᔅᐹᒡ ᐃᑌᓕᑌᓇᐗᐤ, ᐁᑳ ᐁ ᑭᔅᑫᓕᑕᒣᒃ ᑭᒋ ᒪᓯᓇᐃᑫᐎᓇ, ᐁᑳ ᓀᔥᑕ ᐅ ᑲᔥᑭᐅᐎᓐ ᑭᒋᒪᓂᑐ? 25ᐌᓴ ᐃᔅᐱ ᐗᓂᔥᑳᑡᐌ ᓂᐱᐎᓂᒃ ᐅᒋ, ᓇᒪᐎᓚ ᐎᑭᑐᓋᓂᐗᓐ, ᓇᒪ ᓀᔥᑕ ᐎᑭᑐᐃᐙᓂᐗᓐ: ᒫᑲ ᓇᔅᐱᑕᐌᐗᒃ ᐁᓐᒐᓚ ᑭᒋᑭᔑᑯᒃ᙮ 26ᒫᑲ ᑖᐺ ᐁ ᐙᓂᔥᑳᒋᒃ ᑳ ᓂᐱᒋᒃ; ᓇᒪ ᓈ ᑭ ᐅᒋ ᐋᔭᒥᑖᓇᐗᐤ ᒧᓯᔅ ᐅ ᒪᓯᓇᐃᑲᓂᒃ, ᑳ ᐃᔑ ᐋᔭᒥᐃᑯᑦ ᐱᔅᑯᑯᐹᒃ, ᐁ ᐃᑎᑯᑦ, ᓂᓚ ᓂᑦ ᐋᐐᓐ ᐁᑉᕃᐋᒻ ᐅ ᑭᒋᒪᓂᑐᒪ, ᓀᔥᑕ ᐋᐃᓯᒃ ᐅ ᑭᒋᒪᓂᑐᒪ, ᓀᔥᑕ ᒉᑲᑉ ᐅ ᑭᒋᒪᓂᑐᒪ? 27ᓇᒪᐎᓚ ᐅ ᑭᒋᒪᓂᑐᒥᐙᐗ ᑳ ᓂᐱᒋᒃ, ᒫᑲ ᐅ ᑭᒋᒪᓂᑐᒥᐙᐗ ᑳ ᐱᒫᑎᓯᒋᒃ ᐁᐗᑯ ᐅᒋ ᓈᔅᐱᒡ ᑭ ᓇᔅᐹᒡ ᐃᑌᓕᑌᓇᐗᐤ᙮
ᒋᓴᔅ ᐎᑕᒻ ᑖᓂᒪ ᒫᐗᒋ ᑭᔅᑌᓕᑖᑾᒃ ᑲᑫᔅᑫᐎᓐ
(ᒫᑎᐤ 22:34–40; ᓘᒃ 10:25–28)
28ᐯᔭᒃ ᒫᑲ ᐊᓂᑭ ᐅᒪᓯᓇᐃᑫᐗᒃ ᑮ ᐯᒋ ᐃᑐᑌᐤ, ᓀᔥᑕ, ᐁ ᑮ ᐯᑕᐙᑦ ᐁ ᐋᔭᔭᒥᐃᑐᓕᒋ, ᓀᔥᑕ ᐁ ᐙᐸᑕᒃ ᐁ ᑮ ᒥᓗ ᓇᔥᑴᐗᔑᐋᓕᒋ, ᑮ ᑲᑴᒋᒣᐤ, ᑖᓂᒪ ᒫᐗᒋ ᓃᔥᑕᒻ ᑲᑫᔅᑴᐎᓐ?
29ᒋᓴᔅ ᒫᑲ ᑮ ᓇᔥᑴᐗᔑᐁᐤ, ᐊᓂᒪ ᒫᐗᒋ ᓃᔥᑕᒻ ᑲᑫᔅᑴᐎᓐ ᐁᐗᑯ ᐅᒪ, ᓇᑐᑕ, ᐅ ᐃᔅᕃᐃᓪ, ᐅᑎᐯᓕᒋᑫᐤ ᑭ ᑭᒋᒪᓂᑐᒥᓇᐤ ᐯᔭᑯ ᐁ ᑎᐯᓕᒋᑫᑦ: 30ᑭ ᑳ ᓵᑭᐊᐤ ᒫᑲ ᐅᑎᐯᓕᒋᑫᐤ ᑭ ᑭᒋᒪᓂᑐᒻ ᒥᓯᐌ ᑭᑌᐃᒃ, ᓀᔥᑕ ᒥᓯᐌ ᑭᑦ ᐊᒑᑯᒃ, ᓀᔥᑕ ᒥᓯᐌ ᑭ ᒥᑐᓀᓕᒋᑲᓂᒃ, ᓀᔥᑕ ᒥᓯᐌ ᑭ ᒪᔥᑲᐎᓯᐎᓂᒃ᙮ ᐁᐗᑯ ᐅᒪ ᓃᔥᑕᒻ ᑲᑫᔅᑴᐎᓐ᙮ 31ᐊᓂᒪ ᓂᔓ ᒫᑲ ᓇᔅᐱᑐᐌᒪᑲᓐ, ᐅᒪ ᐅᑎ, ᑭ ᑳ ᓵᑭᐊᐤ ᑭᒋᐃᓕᓕᐤ ᑖᐱᔅᑯᒡ ᐁ ᐃᔑ ᓵᑭᐃᑎᓱᔭᓐ᙮ ᓇᒪᐎᓚ ᐃᑕᑾᓐ ᑯᑕᒃ ᑲᑫᔅᑴᐎᓐ ᐊᐙᓯᑌ ᐁ ᐃᑌᓕᑖᑾᒃ ᐃᔥᐱᔥ ᐅᐅ᙮
32ᐅᒪᓯᓇᐃᑫᐤ ᒫᑲ ᑮ ᐃᑌᐤ, ᑖᐺ ᑫᔅᑭᓄᐊᒫᑫᔭᓐ, ᑭ ᑮ ᑖᑆᓐ ᑳ ᐃᑗᔭᓐ: ᐌᓴ ᐯᔭᑯ ᑭᒋᒪᓂᑐ; ᓇᒪ ᓀᔥᑕ ᐃᑕᐤ ᑯᑕᒃ ᐱᑯ ᐎᓚ: 33ᓀᔥᑕ ᑭᒋ ᓵᑭᐋᑲᓂᐎᑦ ᒥᓯᐌ ᒥᑌᐃᒃ, ᓀᔥᑕ ᒥᓯᐌ ᓂᓯᑕᑐᒧᐎᓂᒃ, ᓀᔥᑕ ᒥᓯᐌ ᐊᒑᑯᒃ, ᓀᔥᑕ ᒥᓯᐌ ᒪᔥᑲᐎᓯᐎᓂᒃ, ᓀᔥᑕ ᑭᒋ ᓵᑭᐋᑦ ᐎᒋᐃᓕᓕᐗ ᑖᐱᔅᑯᒡ ᐁ ᐃᔑ ᓵᑭᐃᑎᓱᑦ, ᐊᐙᓯᑌ ᐃᑌᓕᑖᑾᓐ ᐃᔥᐱᔥ ᐁ ᒥᓯᐌᔮᑭ ᐃᔥᒀᑌᐎ ᐸᑭᑎᓂᑫᐎᓇ ᓀᔥᑕ ᓵᓵᑭᐎᓕᐌᐎᓇ᙮
34ᐃᔅᐱ ᒫᑲ ᒋᓴᔅ ᐎᐋᐸᑕᒃ ᐁ ᑲᑫᑕᐎ ᓇᔥᑴᐗᔑᐃᐌᓕᒋ, ᑮ ᐃᑌᐤ, ᓇᒪᐎᓚ ᑭ ᓚᐙᐸᑕᒸᓐ ᑭᒋᒪᓂᑐ ᐅᑦ ᐅᑭᒫᐎᐎᓐ᙮
ᐁᑯᔅᐱ ᒫᑲ ᐅᒋ ᓇᒪᐎᓚ ᐊᐌᓇ ᑮ ᐃᔅᐱᒋ ᓱᑭᑌᐁᐤ ᑫᒀᓕᐤ ᑭᒋ ᑲᑴᒋᒪᑦ᙮
ᑲᑴᒋᑫᒧᐎᓐ ᒥᓵᔭ ᐅᒋ
(ᒫᑎᐤ 22:41–46; ᓘᒃ 20:41–44)
35ᒋᓴᔅ ᒫᑲ ᑮ ᐋᔭᒥᐤ ᓀᔥᑕ ᑮ ᐃᑗᐤ, ᒣᒀᒡ ᐁ ᑭᔅᑭᓄᐊᒫᑫᑦ ᑭᒋᐋᔭᒥᐁᐎᑲᒥᑯᒃ, ᑕᓀᑭ ᐌᒋ ᐃᑗᒋᒃ ᐅᒪᓯᓇᐃᑫᐗᒃ ᙭ ᐁ ᐋᐎᑦ ᑌᐱᑦ ᐅᑯᓯᓴ? 36ᐌᓴ ᑌᐱᑦ ᑫᒋᐙᒃ ᑮ ᐃᑌᐤ ᐸᓓᑭ ᐊᒑᑾ ᐅᒋ, ᐅᑎᐯᓕᒋᑫᐤ ᑮ ᐃᑌᐤ ᓂ ᑎᐯᓕᒋᑫᒪ, ᐊᐱ ᑭᓚ ᓂ ᑭᒋᓂᔅᑭᒃ, ᐹᑎᒫ ᑭ ᑐᑕᒫᓀ ᑭᒋ ᐅ ᑕᑯᔅᑳᒋᑲᓂᔭᓐ ᐊᓂᑭ ᑳ ᐸᒀᑎᔅᑭᒃ᙮ 37ᐁᐗᑯ ᐅᒋ ᑌᐱᑦ ᑫᒋᐙᒃ ᐅᑎᐯᓕᒋᑫᐤ ᐃᔑᓂᑳᑌᐤ; ᑖᓐᑌ ᒫᑲ ᐌᒋ ᐅᑯᓯᓯᑦ?
ᒋᓴᔅ ᔮᑾᒥᒥᐌᐤ ᐅᓚᔓᐌᐎᓂᓕᐤ ᑳ ᑭᔅᑭᓄᐊᒫᑫᒋᒃ ᐅᒋ
(ᒫᑎᐤ 23:1–36; ᓘᒃ 20:45–47)
ᑳ ᑯᐹᓀᓯᒋᒃ ᐃᓕᓕᐗᒃ ᒫᑲ ᑮ ᒥᓗᑕᐌᐗᒃ᙮ 38ᑮ ᐃᑌᐤ ᒫᑲ ᐅ ᑭᔅᑭᓄᐊᒫᑫᐎᓂᒃ, ᔮᒀᒥᔅᑖᑯᒃ ᐅᒪᓯᓇᐃᑫᐗᒃ, ᑳ ᓵᑭᑕᒋᒃ ᑭᒋ ᐸᐸᒧᑌᒋᒃ ᐁ ᑭᓄᐎᓦᒋᑲᓇᒋᒃ, ᓀᔥᑕ ᑳ ᓵᑭᑖᒋᒃ ᐊᑕᒥᔅᑳᑯᓯᐎᓇ ᐃᑕ ᐁ ᐊᑖᒥᑐᓈᓂᐗᒃ᙮ 39ᓀᔥᑕ ᑭᒋ ᑌᑕᐱᐎᓇ ᐋᔭᒥᐁᐎᑲᒥᑯᒃ, ᓀᔥᑕ ᐁ ᑭᔅᑌᓕᑖᑾᓂᓕᑭ ᐊᐱᐎᓇ ᐁ ᒪᑯᔖᓂᐗᒃ; 40ᑳ ᒣᔅᑎᓇᒸᒋᒃ ᑭᑎᒫᑭᔅᑴᐗ ᐎᑭᓕᐗ, ᓀᔥᑕ ᐙᔦᔑᐃᐌᐎᓂᒃ ᑳ ᑭᓄᑖᒋᒃ ᐅᑦ ᐋᔭᒥᐋᐗᓂᐙᐗ: ᐅᑯ ᑲᑕ ᐋᔭᐗᒃ ᐊᐙᓯᑌ ᓂᔑᐗᓈᒋᒥᑯᓯᐎᓂᓕᐤ᙮
ᑭᑎᒫᑭᔅᑴᐤ ᐅᐸᑭᑎᓂᑫᐎᓐ
(ᓘᒃ 21:1–4)
41ᒋᓴᔅ ᒫᑲ ᑮ ᐊᐱᐤ ᑎᐱᔅᑯᒡ ᔔᓕᐊᓇᐎᑲᒥᑯᒃ, ᑮ ᑲᓇᐙᐸᒣᐤ ᒫᑲ ᐃᓕᓕᐗ ᐁ ᐃᔑ ᐌᐱᓈᓕᒋ ᔔᓕᐋᓇ ᔔᓕᐋᓇᐎᑲᒥᑯᒃ: ᒥᒉᑦ ᒫᑲ ᑳ ᒥᔕᑭᓯᒋᒃ ᒥᔅᑕᐃ ᑮ ᐱᒋᐌᐱᓀᐗᒃ᙮ 42ᑮ ᑕᑯᔑᓐ ᒫᑲ ᐯᔭᒃ ᑳ ᒪᓀᓯᑦ ᑭᑎᒫᑭᔅᑴᐤ; ᑮ ᐱᒋᐌᐱᓀᐤ ᒫᑲ ᓂᔓ ᒫᐗᒋ ᐊᐱᔅᒋ ᔔᓕᐊᓈᐱᔅᑯᔕ, ᐯᔭᒃ ᐊᐱᔅᒋ ᔓᓕᐊᓈᐱᔅᑯᔥ ᑳ ᐃᑕᑭᒫᑲᓂᐎᓕᒋ᙮ 43ᑮ ᓇᑐᒣᐤ ᒫᑲ ᐅ ᑭᔅᑭᓄᐊᒪᐙᑲᓇ, ᐃᑌᐤ ᒫᑲ, ᑖᐺ ᑭᑦ ᐃᑎᓇᐗᐤ, ᐊᐗ ᑳ ᒪᓀᓯᑦ ᑭᑎᒫᑭᔅᑴᐤ ᐊᐙᓯᑌ ᒥᔅᑕᐃ ᑮ ᐱᒋᐌᐱᓀᐤ ᐃᔥᐱᔥ ᒥᓯᐌ ᐊᓂᑭ ᑳ ᑮ ᐱᒋᐌᐱᓂᑫᒋᒃ ᔔᓕᐋᓇᐎᑲᒥᑯᒃ: 44ᐌᓴ ᒥᓯᐌ ᐊᓂᑭ ᐅ ᐌᓗᑎᓯᐎᓂᐙᒃ ᑮ ᐅᒋ ᐸᑭᒋᐌᐱᓀᐗᒃ; ᐎᓚ ᒫᑲ ᐅ ᒪᓀᓯᐎᓂᒃ ᑮ ᐱᒋᐌᐱᓇᒻ ᒥᓯᐌ ᑳ ᐋᔮᑦ, ᒥᓯᐌ ᐅᑎ ᑳ ᐋᔮᑦ ᑭᒋ ᐅᒋ ᐱᒫᑎᓰᑦ᙮
Currently Selected:
ᐅᐸᓓᑭᔅ ᒫᕐᒃ 12: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.