ᐅᐸᓓᑭᔅ ᒫᕐᒃ 13
13
ᒋᓴᔅ ᐋᓕᒧᑕᐤ ᒋ ᓂᔑᐗᓈᑕᒃ ᑭᒋ ᐊᔭᒥᐁᐎᑲᒥᑯᓕᐤ
(ᒫᑎᐤ 24:1–2; ᓘᒃ 21:5–6)
1ᐁ ᐊᑎ ᐗᓚᐎᑦ ᒫᑲ ᑭᒋᐋᔭᒥᐁᐎᑲᒥᑯᒃ ᐅᒋ, ᐃᑎᑯ ᐯᔭᒃ ᐅ ᑭᔅᑭᓄᐊᒪᐗᑲᓇ, ᑫᔅᑭᓄᐊᒫᑯᔭᓐ, ᐙᐸᒥᒃ ᐁ ᐃᔑᓈᑯᓯᒋᒃ ᐅᑯ ᐊᓯᓂᔭᒃ ᓀᔥᑕ ᐅᐅ ᐙᔅᑲᔨᑲᓇ ᐅᑕ ᑳ ᐃᑕᑾᑭ!
2ᒋᓴᔅ ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᑭ ᐙᐸᑌᓐ ᓈ ᐅᐅ ᑭᒋ ᐙᔅᑳᔨᑲᓇ? ᓇᒪᐎᓚ ᐙᐙᒡ ᐯᔭᒃ ᐊᓯᓂ ᑲᑕ ᓇᑲᑖᑲᓂᐎᐤ ᐁ ᑌᑕᐱᑦ ᑯᑕᑭᔭ, ᐁᑳ ᑫ ᓂᒋᐌᐱᓈᑲᓂᐎᑦ᙮
ᐊᓕᒥᓯᐎᓇ ᓀᔥᑕ ᑲᒀᑕᑭᓯᐎᓇ
(ᒫᑎᐤ 24:3–14; ᓘᒃ 21:7–19)
3ᒣᒀᒡ ᒫᑲ ᐁ ᐊᐱᑦ ᐊᓕᑉᔅ ᐗᒌᒃ, ᑎᐱᔅᑯᒡ ᑭᒋᐋᔭᒥᐁᐎᑲᒥᑯᒃ, ᐱᑕᕐ, ᓀᔥᑕ ᒉᒻᔅ, ᓀᔥᑕ ᒑᓐ, ᓀᔥᑕ ᐋᓐᑦᕉ ᑭᒧᒡ ᑮ ᑲᑴᒋᒣᐗᒃ, 4ᐎᑕᒫᐎᓈᓐ, ᑖᓂᔅᐱ ᑫ ᐃᑭᑭ ᐅᐅ ᑫᒀᓇ? ᓀᔥᑕ ᑫᑯ ᑭᔅᑭᓄᐗᒋ ᐙᐸᑎᓕᐌᐎᓐ ᑫ ᓄᑾᒃ ᐃᔅᐱ ᒥᓯᐌ ᐅᐅ ᑫᒀᓇ ᑫ ᑎᐱᐸᓕᑭ?
5ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᑮ ᒫᒋ ᐃᑌᐤ, ᔮᒀᒥᓰᒃ ᐁᑳ ᐊᐌᓇ ᑭᒋ ᐙᔦᔑᐃᑖᒃ᙮ 6ᐌᓴ ᒥᒉᑦ ᑲᑕ ᑕᑯᔑᓋᒃ ᓂᑦ ᐃᔑᓂᑳᓱᐎᓂᒃ, ᐁ ᐃᑗᒋᒃ, ᓂᓚ ᐁᐗᒀᓇ ᙭; ᒥᒉᑦ ᒫᑲ ᑲᑕ ᐙᔦᔐᒣᐗᒃ᙮ 7ᐃᔅᐱ ᒫᑲ ᐯᑕᒣᑴ ᓇᑐᐸᓕᐎᓇ, ᓀᔥᑕ ᓇᑐᐸᓕᐎᓇ ᐁ ᑎᐹᑐᑖᑲᓂᐎᑭ, ᐁᑳᐎᓚ ᒥᑯᔥᑳᑌᓕᑕᒧᒃᐧ ᐌᓴ ᐅᐅ ᑐᐎ ᑫᒋᓈᔥ ᑲᑕ ᐃᑭᓋ; ᒫᑲ ᓇᒪᐎᓚ ᐁᔥᑾ ᑲᑕ ᐃᔥᒀᐸᓕᐤ᙮ 8ᐌᓴ ᐁ ᐯᔭᑯᔅᑳᓀᓯᒋᒃ ᐃᓕᓕᐗᒃ ᑲᑕ ᐸᓯᑯᔅᑕᐌᐗᒃ ᐁ ᐱᑐᔥᐃᔅᑳᓀᓯᓕᒋ ᐃᓕᓕᐗ, ᓀᔥᑕ ᐅᑭᒫᐎᐎᓐ ᑯᑕᒃ ᐅᑭᒫᐎᐎᓐ; ᓀᔥᑕ ᓇᓈᑐᒃ ᐃᔑ ᑲᑕ ᑶᑾᓐ, ᑲᑕ ᑲᐗᑲᑖᓂᐗᓐ ᒫᑲ, ᓀᔥᑕ ᑲᑕ ᐊᓕᒥᓯᓈᓂᐗᓐ: ᐅᐅ ᐁᐗᑯ ᐱᒉᓚᒃ ᐁ ᒫᒋᐸᓕᑭ ᓇᓀᑳᑌᓕᒧᐎᓇ᙮
9ᒫᑲ ᔮᒀᒥᓰᒃ ᑭᓚᐗᐤ: ᐌᓴ ᑭ ᑳ ᐸᑭᑎᓂᑯᐙᐗᒃ ᑭᒋ ᑎᐹᔅᑯᓂᑲᐎᔦᒃ; ᓀᔥᑕ ᐋᔭᒥᐁᐎᑲᒥᑯᒃ ᑭ ᑳ ᐅᑕᑕᒪᐅᑳᐎᓇᐗᐤ: ᑭ ᑳ ᐃᑐᑕᐃᑲᐎᓇᐗᐤ ᒫᑲ ᑭᒋ ᐃᑎᔥᑲᐃᔥᑲᐌᑾᒃ ᐅᑭᒫᐗᒃ ᓀᔥᑕ ᑭᒋᐅᑭᒫᐗᒃ ᓂᓚ ᐅᒋ, ᐁᐗᑴᓕᐤ ᑭᒋ ᒫᒥᔑᒥᑯᒋᒃ᙮ 10ᒥᓗᐋᒋᒧᐎᓐ ᒫᑲ ᓃᔥᑕᒻ ᑲᑕ ᐙᐎᑖᑲᓂᐗᓐ ᐃᑕ ᐁ ᐃᑖᒋᒃ ᒥᓯᐌ ᑳ ᑕᑐᔅᑳᓀᓯᒋᒃ ᐃᓕᓕᐗᒃ᙮ 11ᒫᑲ ᐃᔅᐱ ᐃᑐᑕᐃᑖᑾᐌ, ᓀᔥᑕ ᐸᑭᑎᓂᑖᑾᐌ, ᐁᑳᐎᓚ ᓂᔮᑲᓇ ᒫᒥᑐᓀᓕᑕᒧᒃ ᑫᒀᓐ ᑫ ᐃᑗᔦᒃ, ᐁᑳᐎᓚ ᓀᔥᑕ ᐋᔦᔅᑲᐌᓕᑕᒧᒃ; ᐱᑯ ᑫᒀᓐ ᒫᑲ ᐁᐗᑯ ᑎᐹᔨᑲᓂᒃ ᐱᓯᒧᑳᓂᒃ ᑫ ᒥᓕᑲᐎᐌᑴ, ᐁᐗᑯ ᐃᑗᒃ: ᐌᓴ ᓇᒪᔦᐤ ᑭᓚᐗᐤ ᑳ ᐋᔭᒥᔦᒃ, ᒫᑲ ᐸᓓᑭ ᐊᒑᒃ᙮ 12ᐎᒋᔖᓂᒪᐤ ᒫᑲ ᑲᑕ ᒫᒥᔑᒣᐤ ᐎᒋᔖᓇ ᑭᒋ ᓂᐹᔨᒥᒋ, ᓀᔥᑕ ᐅᑖᐎᒪᐤ ᐅᑯᓯᓴ; ᐊᐙᔑᔕᒃ ᒫᑲ ᑲᑕ ᐸᓯᑯᔅᑕᐌᐗᒃ ᐅ ᓂᑭᐃᑯᐙᐗ, ᑲᑕ ᐃᑐᑕᐌᐗᒃ ᒫᑲ ᑭᒋ ᓂᐹᔨᒥᒋ᙮ 13ᑭ ᑳ ᐸᒀᑎᑯᐙᐗᒃ ᒫᑲ ᒥᓯᐌ ᐃᓕᓕᐗᒃ ᓂᑦ ᐃᔑᓂᑳᓱᐎᓐ ᐅᒋ: ᒫᑲ ᐊᓇ ᐁᑳ ᑫ ᔖᑯᒋᐋᑲᓂᐎᑦ ᐃᔥᒀᔭᒡ ᐃᔅᑯ, ᐁᐗᒀᓇ ᑫ ᐱᒫᒋᐋᑲᓂᐎᑦ᙮
ᐊᓂᒪ ᓂᐹᓯᓈᑯᓯᐎᓐ ᑳ ᓂᔑᐗᓈᒋᐃᐌᒪᑲᒃ
(ᒫᑎᐤ 24:15–28; ᓘᒃ 21:20–24)
14ᒫᑲ ᐃᔅᐱ ᐙᐸᑕᒣᑴ ᐊᓂᒪ ᓂᐹᓯᓋᑯᓯᐎᓐ ᑳ ᓂᔑᐗᓈᒋᐃᐌᒪᑲᒃ ᑳ ᐋᓕᒧᑕᒃ ᑖᓂᔭᓪ ᐅᑭᔅᑭᐙᐃᑫᐤ, ᐁ ᓂᐸᐎᒪᑲᒃ ᐃᑕ ᐁᑳ ᑫ ᐃᑕᑾᑭᐸᓐ, (ᐊᓇ ᑳ ᐋᔭᒥᑖᑦ ᐁᑯᔑ ᑲᑕ ᓂᓯᑐᑕᒻ,) ᐁᑯ ᐊᓂᑭ ᒎᑎᐊᐃᒃ ᑳ ᐃᑖᒋᒃ ᐁᑯᔑ ᐗᒌᒃ ᑲᑕ ᐃᑎᔑᒧᐗᒃ: 15ᐊᓇ ᓀᔥᑕ ᑕᑯᒡ ᐙᔅᑳᔨᑲᓇᒃ ᑳ ᐃᑖᑦ, ᐁᑳᐎᓚ ᑲᑕ ᓂᔥᑕᐎᐤ ᐙᔅᑳᔨᑲᓂᒃ, ᐁᑳ ᓀᔥᑕ ᐁᑯᑕ ᑲᑕ ᐱᑐᑫᐤ, ᑭᒋ ᐅᑎᓂᒃ ᑫᒀᓕᐤ ᐅ ᐙᔅᑳᔨᑲᓂᒥᒃ ᐅᒋ: 16ᐁᑳᐎᓚ ᓀᔥᑕ ᐊᓇ ᓂᑖᐎᑭᒋᑲᓂᒃ ᑳ ᐃᑖᑦ ᑲᑕ ᑭᐌᐤ ᑭᒋ ᐅᑎᓇᒃ ᐅ ᐎᓦᒋᑲᓐ᙮ 17ᒫᑲ ᑲᑕ ᑲᒀᑕᑭᓯᐗᒃ ᐊᓂᑭ ᑫ ᑲᓄᔥᑲᑖᐗᓱᒋᒃ, ᐊᓂᑭ ᓀᔥᑕ ᑫ ᓄᔖᓂᐃᐌᒋᒃ ᒣᒀᒡ ᐅᐅ ᑫ ᑭᔑᑳᓕᑭ! 18ᓇᑐᑕᒫᑫᒃ ᒫᑲ ᐁᑳ ᒣᒀᒡ ᐁ ᐱᐴᒃ ᑭᒋ ᐅᔑᒧᔦᒃ᙮ 19ᐌᓴ ᒣᒀᒡ ᐊᓂᐃ ᐁ ᑭᔑᑳᑭ ᑲᑕ ᐊᓕᒥᓯᓋᓂᐗᓐ, ᐁᑳ ᐐᔅᑳᑦ ᑳ ᐃᔑ ᐯᒋ ᐋᓕᒪᒃ ᐊᔅᐱᓐ ᑳ ᒫᒋ ᐅᔑᑖᓂᐗᒃ ᐊᓂᐁᓕᐤ ᑳ ᑮ ᐅᔑᑖᑦ ᑭᒋᒪᓂᑐ, ᐱᓕᔥ ᐊᓄᒡ, ᐁᑳ ᐎᔅᑳᑦ ᓀᔥᑕ ᑫ ᐃᔅᐱᒋ ᐋᓕᒪᒃ᙮ 20ᑮᔥᐱᓐ ᒫᑲ ᐅᑎᐯᓕᒋᑫᐤ ᐁᑳ ᐅᒋ ᒐᑲᐙᔑᔑᑖᑯᐸᓀ ᐊᓂᐃ ᑭᔑᑳᐗ, ᓇᒪᐎᓚ ᐊᐌᓇ ᑲᑕ ᑮ ᐱᒫᒋᐅᐸᓐ; ᒫᑲ ᐙᐌᓛᐸᒫᑲᓇ ᐅᒋ, ᑳ ᑮ ᐙᐌᓛᐸᒫᑦ ᑮ ᒐᑲᐙᔑᔑᑕᐤ ᐊᓂᐃ ᑭᔑᑳᐗ᙮
21ᐁᑯᔅᐱ ᒫᑲ, ᑮᔥᐱᓐ ᐊᐌᓇ ᐃᑎᑖᑴ, ᒫᑎᑲ, ᐅᑕ ᐃᑕᐤ ᙭; ᓀᔥᑕᐱᑯ, ᒫᑎᑲ, ᐊᓐᑕ ᐃᑕᐤ; ᐁᑳᐎᓚ ᑖᐺᑖᒃ᙮ 22ᐌᓴ ᓇᔅᐹᒡ ᙭ᑕᒃ ᓀᔥᑕ ᓇᔅᐹᒡ ᐅᑭᔅᑭᐙᐃᑫᐗᒃ ᑲᑕ ᐃᑖᐗᒃ, ᓀᔥᑕ ᑲᑕ ᐙᐸᑎᓕᐌᐗᒃ ᑭᔅᑭᓄᐙᒋ ᐙᐸᑎᓕᐌᐎᓇ ᓀᔥᑕ ᑳ ᒫᒪᔅᑳᑌᓕᑖᑾᑭ ᑫᒀᓇ, ᑫ ᐅᒋ ᐙᔦᔑᐋᒋᒃ ᐋᐳᒋᑲ ᐊᓂᐃ ᑳ ᐙᐌᓛᐸᒥᒥᒋ, ᑮᔥᐱᓐ ᑮ ᑐᒋᑳᑌᑭᐸᓐ᙮ 23ᒫᑲ ᔮᒀᒥᓯᒃ: ᒫᑎᑲ, ᓂᔮᑲᓇ ᑭ ᑮ ᐎᑕᒫᑎᓇᐗᐤ ᒥᓯᐌ ᑫᒀᓇ᙮
ᐁ ᐯᒋ ᐃᑐᑌᑦ ᐃᓕᓕᐎᑯᓯᓵᓐ
(ᒫᑎᐤ 24:29–31; ᓘᒃ 21:25–28)
24ᒫᑲ ᒣᒀᒡ ᐊᓂᐃ ᑫ ᑭᔑᑳᑭ, ᑭᐃᔥᑾ ᐊᓂᒪ ᐋᓕᒣᓕᑕᒧᐎᓐ, ᐱᓯᒻ ᑲᑕ ᐗᓂᑎᐱᔅᑭᓯᐤ, ᑎᐱᔅᑭᐱᓯᒻ ᓀᔥᑕ ᓇᒪᐎᓚ ᑲᑕ ᒐᑳᓯᑫᐤ; 25ᐊᒐᑯᔕᒃ ᓀᔥᑕ ᑭᔑᑯᒃ ᑳ ᐊᑯᒋᑭᒃ ᑲᑕ ᐸᑭᔑᓋᒃ, ᑲᔥᑭᐅᐎᓇ ᓀᔥᑕ ᑭᔑᑯᒃ ᑳ ᐃᑕᑾᑭ ᑲᑕ ᓇᓂᑭᐸᓕᐗ᙮ 26ᐁᑯ ᒫᑲ ᑫ ᐙᐸᒫᒋᒃ ᐃᓕᓕᐎᑯᓯᓵᓇ ᐁ ᐯᒋ ᐃᑐᑌᓕᒋ ᐗᔅᑯᒃ, ᑭᒋ ᑲᔥᑭᐅᐎᓂᒃ ᓀᔥᑕ ᑭᔅᑌᓕᑖᑯᓯᐎᓂᒃ᙮ 27ᐁᑯ ᒫᑲ ᑫ ᐃᔑᑎᔕᐙᑦ, ᑲᑕ ᒪᐗᒋᐁᓕᐗ ᒫᑲ ᐅ ᐙᐌᓛᐸᒫᑲᓇ ᓀᐤ ᐁ ᐅᒋᓚᐌᒃ ᐅᒋ, ᐁ ᒫᐗᒋ ᐃᔥᒀᔮᒡ ᐊᔅᑭ ᐅᒋ ᐱᓕᔥ ᐁ ᒫᐗᒋ ᐃᔥᒀᔮᒡ ᑭᔑᒃ᙮
ᐊᓂᒪ ᑭᔅᑭᓄᐊᒫᑫᐎᓐ ᐸᑫᓵᒥᓈᑎᒃ ᐅᒋ
(ᒫᑎᐤ 24:32–35; ᓘᒃ 21:29–33)
28ᐁᑯ ᐎᑲᑴ ᑭᔅᑫᓕᑕᒧᒃ ᓇᔅᐱᑐᐌᐎ ᐋᑕᓗᑳᓈ ᐸᑫᓵᓂᒥᓈᑎᒃ ᐅᒋ: ᐃᔅᐱ ᐗᑎᑾᓇ ᐁᔥᑾ ᐁ ᐅᔥᑭ ᓂᑖᐎᑭᑭ, ᓀᔥᑕ ᓂᐱᔑᐗᑭ, ᑭ ᑭᔅᑫᓕᑌᓇᐗᐤ ᓃᐱᓐ ᐁ ᐯᔓᓈᑳᒃ: 29ᐁᑯ ᑖᐱᔅᑯᒡ ᑭᓚᐗᐤ, ᐃᔅᐱ ᐙᐸᑕᒣᑴ ᐅᐅ ᑫᒀᓇ ᐁ ᑎᐱᐸᓕᑭ, ᑭᔅᑫᓕᑕᒧᒃ ᐋᔕᔾ ᐁ ᐯᔓᓈᑾᒃ, ᐃᔥᒀᑌᒥᒃ ᐃᔥᐱᔥ᙮ 30ᑖᐺ ᑭᑦ ᐃᑎᓇᐗᐤ, ᐅᑯ ᐃᓕᓕᐗᒃ ᐊᓄᒡ ᑳ ᐱᒫᑎᓯᒋᒃ ᓇᒪᐎᓚ ᑲᑕ ᒣᒋᐸᓕᐗᒃ, ᐹᑎᒫ ᒥᓯᐌ ᐅᐅ ᑫᒀᓇ ᑮ ᑐᒋᑳᑌᑾᐌ᙮ 31ᑭᔑᒃ ᓀᔥᑕ ᐊᔅᑭ ᑲᑕ ᐃᔥᒀᐸᓕᐗ; ᒫᑲ ᓂᑦ ᐋᔭᒥᐎᓇ ᓇᒪᐎᓚ ᑲᑕ ᐃᔥᒀᐸᓕᐗ᙮
ᒧᓇ ᐊᐌᓇ ᑲᑕ ᑭᔅᑫᓕᑕᒻ ᑖᓂᔅᐱ ᑫ ᑕᑯᔑᒃ ᐃᓕᓕᐎᑯᓯᓵᓐ
(ᒫᑎᐤ 24:36–44)
32ᒫᑲ ᐊᓂᒪ ᐁ ᑭᔑᑳᒃ, ᓀᔥᑕ ᐊᓂᒪ ᑎᐹᔨᑲᓐ ᐱᓯᒧᑳᓂᒃ, ᓇᒪᐎᓚ ᐊᐌᓇ ᑭᔅᑫᓕᑕᒻ, ᓇᒪᐎᓚ, ᓇᒪ ᓀᔥᑕ ᐁᓐᒐᓚᒃ ᑭᒋᑭᔑᑯᒃ ᑳ ᐃᑖᒋᒃ, ᓇᒪ ᓀᔥᑕ ᐅᑯᓯᓯᒪᐤ, ᒫᑲ ᐅᑖᐎᒪᐤ ᐱᑯ᙮ 33ᔮᒀᒥᓰᒃ ᑭᓚᐗᐤ, ᐊᔕᐙᐱᒃ ᓀᔥᑕ ᐋᔭᒥᐋᒃ: ᐌᓴ ᓇᒪᐎᓚ ᑭ ᑭᔅᑫᓕᑌᓇᐗᐤ ᐃᔥᐱᔥ ᑫ ᐅᑎᒋᐸᓕᒃ᙮ 34ᐌᓴ ᐃᓕᓕᐎᑯᓯᓵᓐ ᓇᔅᐱᑕᐌᐤ ᐃᓕᓕᐗ ᐙᓚᐤ ᐁ ᐃᑐᑌᓕᒋ, ᑳ ᓇᑲᑕᒃ ᐅ ᐙᔅᑳᔨᑲᓂᒻ, ᓀᔥᑕ ᑳ ᑎᐯᓕᑕᒥᐋᑦ ᐅᑦ ᐊᑑᔅᑫᓛᑲᓇ, ᓀᔥᑕ ᒥᓯᐌ ᑕᑐ ᐃᓕᓕᐗ ᐅᑦ ᐊᑑᔅᑫᐎᓂᓕᐤ, ᓀᔥᑕ ᑳ ᐃᑕᔓᒫᑦ ᐅᑲᓇᐎᔥᒀᑕᐌᐗ ᑭᒋ ᐊᔕᐙᐱᓕᒋ᙮ 35ᐁᐗᑯ ᐅᒋ ᒫᑲ ᐊᔕᐙᐱᒃ; ᐌᓴ ᓇᒪᐎᓚ ᑭ ᑭᔅᑫᓕᑌᓇᐗᐤ ᐃᔅᐱ ᑌᐯᓕᑕᒃ ᐙᔅᑳᔨᑲᓂᓕᐤ ᑫ ᑕᑯᔑᒃ, ᐁ ᐅᑖᑯᔑᓂᓕᒃ, ᓀᔥᑕᐱᑯ ᐁ ᐋᐱᑕᐤ ᑎᐱᔅᑳᓕᒃ, ᓀᔥᑕᐱᑯ ᐁ ᓄᑖᑯᓯᓕᒋ ᓈᐯ ᐹᑲᐋᒀᓇ, ᓀᔥᑕᐱᑯ ᐁ ᑭᑭᔐᐹᔮᓕᒃ; 36ᑫᑲ, ᑫᑕᑕᐌ ᑕᑯᔑᑫ, ᑭ ᑳ ᒥᔅᑳᑯᐗᐤ ᐁ ᓂᐹᔦᒃ᙮ 37ᐊᓂᒪ ᓀᔥᑕ ᑳ ᐃᑎᑖᑾᒃ, ᓂᑦ ᐃᑖᐗᒃ ᒥᓯᐌ, ᐊᔕᐙᐱᒃ᙮
Currently Selected:
ᐅᐸᓓᑭᔅ ᒫᕐᒃ 13: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
