ᐅᐸᓓᑭᔅ ᓘᒃ 21
21
ᑭᑎᒫᔅᑴᐤ ᐅᐸᑭᑎᓂᑫᐎᓐ
(ᒫᕐᒃ 12:41–44)
1ᑮ ᑕᔅᑕᓵᐱᐤ ᒫᑲ, ᑮ ᐙᐸᒣᐤ ᒫᑲ ᐊᓂᐃ ᑳ ᒥᔕᑭᓯᓕᒋ ᐁ ᐱᒋᐌᐱᓇᒥᓕᒋ ᐅ ᒥᓕᐌᐎᓂᓕᐗ ᔔᓕᐋᓇᐎᑲᒥᑯᒃ᙮ 2ᑮ ᐙᐸᒣᐤ ᓀᔥᑕ ᐯᔭᒃ ᑳ ᒪᓀᓯᓕᒋ ᑭᑎᒫᑭᔅᑴᐗ ᐁᑯᑕ ᐁ ᐱᒋᐌᐱᓈᓕᒋ ᓂᔓ ᒫᐗᒋ ᐊᐱᔅᒋ ᔔᓕᐊᓈᐱᔅᑯᔕ᙮ 3ᑮ ᐃᑗᐤ ᒫᑲ, ᑖᐺ ᑭᑦ ᐃᑎᓇᐗᐤ, ᐊᐗ ᑳ ᒪᓀᓯᑦ ᑭᑎᒫᑭᔅᑴᐤ ᐊᐙᓯᑌ ᒥᔅᑕᐃ ᑮ ᐱᒋᐌᐱᓀᐤ ᐃᔥᐱᔥ ᒥᓯᐌ ᐁ ᐃᑕᓯᒋᒃ᙮ 4ᐌᓴ ᒥᓯᐌ ᐅᑯ ᐅ ᐌᓗᑎᓯᐎᓂᐙᒃ ᐅᒋ ᐱᒋᐌᐱᓇᒶᒃ ᐃᑕ ᐁ ᐃᑕᒀᓂᓕᑭ ᑭᒋᒪᓂᑐ ᐅ ᒥᓕᑯᓯᐎᓇ: ᒫᑲ ᐎᓚ, ᐅ ᒪᓀᓯᐎᓂᒃ ᑮ ᐱᒋᐌᐱᓇᒻ ᒥᓯᐌ ᑳ ᐋᔮᑦ ᑭᒋ ᐅᒋ ᐱᒫᑎᓰᑦ᙮
ᒋᓴᔅ ᐋᓕᒧᑕᒻ ᒋ ᓂᔑᐗᓈᑕᒃ ᐊᔭᒥᐁᐎᑲᒥᑯᓕᐤ
(ᒫᑎᐤ 24:1–2; ᒫᕐᒃ 13:1–2)
5ᐁ ᐋᓕᒧᑕᑭᒃ ᒫᑲ ᐋᑎᑦ ᑭᒋᐋᔭᒥᐁᐎᑲᒥᑯᓕᐤ, ᐁ ᐃᔑ ᐙᐌᔑᑖᓂᐗᓂᓕᒃ ᑳ ᒥᓗᓈᑯᓯᓕᒋ ᐊᓯᓂᔭ ᐅᒋ ᓀᔥᑕ ᒥᓕᐌᐎᓇ, ᑮ ᐃᑗᐤ᙮ 6ᐅᐅ ᑫᒀᓇ ᑳ ᐙᐸᑕᒣᒃ, ᐅᑎᒋᐸᓕᐗ ᑭᔑᑳᐗ, ᐃᔅᐱ ᐁᑳ ᑫ ᐃᔥᑯᓈᑲᓂᐎᑦ ᐯᔭᒃ ᐊᓯᓂ ᐁ ᑌᑕᐱᑦ ᑯᑕᑭᔭ ᐁᑳ ᑫ ᓂᒋᐌᐱᓈᑲᓂᐎᑦ᙮
ᐋᓕᒥᓯᐎᓇ ᓀᔥᑕ ᑲᑾᑕᑭᓯᐎᓐ
(ᒫᑎᐤ 24:3–14; ᒫᕐᒃ 13:3–13)
7ᑮ ᑲᑴᒋᒣᐗᒃ ᒫᑲ, ᐁ ᐃᑗᒋᒃ, ᑫᔅᑭᓄᐊᒫᑫᔭᓐ, ᑖᓂᔅᐱ ᑫ ᐃᑭᑭ ᐅᐅ ᑫᒀᓇ? ᑫᒀᓐ ᒫᑲ ᑫ ᑭᔅᑭᓄᐙᒋ ᐙᐸᒋᑳᑌᒃ ᐃᔅᐱ ᐅᐅ ᑫᒀᓇ ᑫ ᐃᑭᑭ?
8ᑮ ᐃᑗᐤ ᒫᑲ, ᔮᒀᒥᓯᒃ ᐁᑳ ᑭᒋ ᐙᔦᔑᐃᑲᐎᔦᒃ; ᐌᓴ ᒥᒉᑦ ᑲᑕ ᑕᑯᔑᓋᒃ ᓂᑦ ᐃᔑᓂᑳᓱᐎᓂᒃ, ᐁ ᐃᑗᒋᒃ, ᓂᓚ ᐁᐗᒀᓇ ᙭; ᐹᐸᓕᐤ ᒫᑲ ᐊᓂᒪ ᐁ ᑭᔑᑳᒃ: ᐁᑳᐎᓚ ᒫᑲ ᓄᔅᐱᓈᑎᑯᒃ᙮ 9ᐃᔅᐱ ᒫᑲ ᐯᑕᒣᑴ ᓇᑐᐸᓕᐎᓇ ᓀᔥᑕ ᑾᓗᑐᑕᑐᐎᓇ, ᐁᑳᐎᓚ ᓭᑭᓯᒃ: ᐌᓴ ᐅᐅ ᑫᒀᓇ ᔮᓕᑌᓪ ᑲᑕ ᐃᑭᓋ ᐱᑕᒪ; ᒫᑲ ᓇᒪᐎᓚ ᐁᔥᑾ ᑲᑕ ᐃᔥᒀᐸᓕᐤ᙮
10ᐁᑯ ᐁᑖᑦ, ᐁ ᐯᔭᑯᔅᑳᓀᓯᒋᒃ ᐃᓕᓕᐗᒃ ᑲᑕ ᐸᓯᑯᔅᑕᐌᐗᒃ ᐁ ᐱᑐᔥᐃᔅᑲᓀᓯᓕᒋ ᐃᓕᓕᐗ, ᓀᔥᑕ ᐅᑭᒫᐎᐎᓐ ᑯᑕᒃ ᐅᑭᒫᐎᐎᓐ: 11ᓈᔅᐱᒡ ᒫᑲ ᑲᑕ ᑶᑾᓐ ᓇᓈᑐᒃ ᐃᔑ, ᑲᑕ ᑲᐗᑲᑖᓂᐗᓐ ᒫᑲ, ᓀᔥᑕ ᑲᑕ ᐋᑯᐃᑖᔅᐱᓈᓂᐗᓐ; ᓀᔥᑕ ᐁ ᑯᔅᑖᓯᓈᑾᑭ ᑫᒀᓇ, ᓀᔥᑕ ᑭᒋ ᑭᔅᑭᓄᐙᒋ ᐙᐸᑎᓕᐌᐎᓇ ᑲᑕ ᓄᑾᓇ ᑭᔑᑯᒃ ᐅᒋ᙮ 12ᒫᑲ ᐸᒧᔑ ᒥᓯᐌ ᐅᐅ, ᑭ ᑳ ᒫᑯᓂᑯᐙᐗᒃ, ᓀᔥᑕ ᑭ ᑳ ᑲᒀᑕᑭᐃᑯᐙᐗᒃ, ᐁ ᐸᑭᑎᓂᑖᑾᒃ ᐋᔭᒥᐁᐎᑲᒥᑯᒃ, ᓀᔥᑕ ᑭᐸᐅᑐᐎᑲᒥᑯᒃ, ᐁ ᐃᑐᑕᐃᑲᐎᔦᒃ ᐅᑎᔥᑳᐤ ᑭᒋᐅᑭᒫᐗᒃ ᓀᔥᑕ ᐅᑎᐯᓕᒋᑫᐗᒃ ᓂᑦ ᐃᔑᓂᑳᓱᐎᓐ ᐅᒋ᙮ 13ᑭ ᑳ ᑭᐌᑐᑖᑯᓇᐗᐤ ᒫᑲ ᑭᒋ ᑎᐹᒋᒥᑯᔦᒃ᙮ 14ᑮᔖᒡ ᒫᑲ ᐱᑌᓕᑕᒧᒃ ᑭᑌᐃᐙᒃ ᐁᑳ ᓂᔮᑲᓇ ᑭᒋ ᒫᒥᑐᓀᓕᑕᒣᒃ ᑫ ᐃᔑ ᓇᔥᑴᐗᔑᐃᐌᔦᒃ᙮ 15ᐌᓴ ᓂᓚ ᑭ ᑳ ᒥᓕᑎᓇᐗᐤ ᒥᑐᓐ ᓀᔥᑕ ᑲᑫᑕᐌᓕᑕᒧᐎᓐ ᐁᑳ ᑫ ᑮ ᐋᓉᑕᑭᒃ ᐁᑳ ᓀᔥᑕ ᑫ ᑮ ᔖᑯᒋᑖᒋᒃ ᒥᓯᐌ ᐊᓂᑭ ᑳ ᐸᒀᑎᑖᑾᒃ᙮ 16ᑭ ᑳ ᐙᔦᔑᐸᑭᑎᓂᑯᐙᐗᒃ ᒫᑲ ᑭ ᓂᑭᐃᑯᐙᐗᒃ, ᓀᔥᑕ ᑭᒋᔖᓂᐙᐗᒃ, ᓀᔥᑕ ᑭ ᐙᑯᒫᑲᓂᐙᐗᒃ, ᓀᔥᑕ ᑭᑐᑌᒥᐙᐗᒃ, ᐋᑎᑦ ᐁ ᐃᑕᔑᔦᒃ ᒫᑲ ᑭ ᑳ ᐃᑐᑖᑯᐙᐗᒃ ᑭᒋ ᓂᐹᐃᑲᐎᔦᒃ᙮ 17ᑭ ᑳ ᐸᒀᑎᑯᐙᐗᒃ ᒫᑲ ᒥᓯᐌ ᐃᓕᓕᐗᒃ ᓂᑦ ᐃᔑᓂᑳᓱᐎᓐ ᐅᒋ᙮ 18ᓇᒪᐎᓚ ᒫᑲ ᐙᐙᒡ ᐯᔭᒃ ᑭᔅᑎᒀᓂᐱᐙᔨᐗᐗ ᑲᑕ ᓂᔑᐗᓈᑕᓐ᙮ 19ᐁ ᔑᐱᓚᐌᓯᔦᒃ ᑲᓇᐌᓕᒥᑯᒃ ᑭᑦ ᐊᒑᑯᐙᐗᒃ᙮
ᒋᓴᔅ ᐋᓕᒧᑕᒻ ᒋ ᓂᔑᐗᓈᑕᒃ ᒋᕉᓴᓚᒻ
(ᒫᑎᐤ 24:15–21; ᒫᕐᒃ 13:14–19)
20ᐃᔅᐱ ᒫᑲ ᐙᐸᑕᒣᑴ ᒋᕉᓴᓚᒻ ᐁ ᐙᔅᑳᔅᑲᑭᒃ ᒥᔮᒪᐎᓄᑎᓂᑫᐗᒃ, ᐁᑯ ᑭᔅᑫᓕᑕᒧᒃ ᐁ ᐯᔓᓈᑾᒃ ᑭᒋ ᓂᔑᐗᓈᑕᒃ᙮ 21ᐁᑯ ᐊᓂᑭ ᒎᑎᐊᐃᒃ ᑳ ᐃᑖᒋᒃ ᑲᑕ ᓈᒋᑎᔑᒧᔅᑕᒶᒃ ᐗᒋᐊ; ᐊᓂᑭ ᓀᔥᑕ ᐁᑯᑕ ᑳ ᐃᑖᒋᒃ ᑲᑕ ᑭᑐᑌᐗᒃ: ᐊᓂᑭ ᓀᔥᑕ ᐊᔅᑮᒃ ᐙᔅᑳ ᑳ ᐃᑖᒋᒃ ᐁᑳᐎᓚ ᐊᓐᑕ ᑲᑕ ᐱᑐᑫᐗᒃ᙮ 22ᐌᓴ ᐁᐗᒀᓂᐃ ᑲᒀᑕᑭᓯᐎᓂ ᑭᔑᑳᐗ ᒥᓯᐌ ᑫᒀᓇ ᑳ ᒪᓯᓇᐃᑳᑌᑭ ᑭᒋ ᑎᐱᐸᓕᑭ᙮ 23ᒫᑲ ᑲᑕ ᑲᒀᑕᑭᓯᐗᒃ ᐊᓂᑭ ᑫ ᑲᓄᔥᑲᑖᐗᓱᒋᒃ, ᐊᓂᑭ ᓀᔥᑕ ᑫ ᓄᔖᓂᐃᐌᒋᒃ ᒣᒀᒡ ᐅᐅ ᑫ ᑭᔑᑳᓕᑭ! ᐌᓴ ᓈᔅᐱᒡ ᐊᓕᒥᓯᓈᓂᐗᓐ ᐊᔅᑮᒃ, ᓀᔥᑕ ᐃᓕᓕᐗᒃ ᑲᑕ ᐅᑎᑎᑯᐗᒃ ᐋᑯᓚᐌᓯᐎᓂᓕᐤ᙮ 24ᑲᑕ ᐅᒋ ᐸᑭᔑᓋᒃ ᒫᑲ ᐁ ᑳᔕᓕᒃ ᔑᒫᑲᓂᓕᐤ, ᓀᔥᑕ ᑲᑕ ᑭᑐᑕᐋᐗᒃ ᑭᒋ ᐊᐗᑳᓂᐎᒋᒃ ᐃᑕ ᐁ ᐃᑖᓕᒋ ᒥᓯᐌ ᐁ ᐃᑕᔅᑳᓀᓯᓕᒋ ᐃᓕᓕᐗ: ᒋᕉᓴᓚᒻ ᒫᑲ ᑲᑕ ᑕᑕᑯᔅᑳᑕᒶᒃ ᒉᓐᑖᐃᓚᒃ, ᐹᑎᒫ ᑎᐱᐸᓕᓕᑾᐌ ᒉᓐᑖᐃᓚᒃ ᐅ ᑭᔑᑳᒥᐙᐗ᙮
ᒋ ᑕᑯᔑᒃ ᐃᓕᓕᐎᑯᓯᓵᓐ
(ᒫᑎᐤ 24:29–31; ᒫᕐᒃ 13:24–27)
25ᑲᑕ ᐃᑕᑾᓋ ᒫᑲ ᑭᔅᑭᓄᐗᒋ ᐙᐸᑎᓕᐌᐎᓇ ᐱᓯᒧᒃ, ᓀᔥᑕ ᑎᐱᔅᑭᐱᓯᒧᒃ, ᓀᔥᑕ ᐊᒐᑯᔑᒃ; ᓀᔥᑕ ᐅᑕ ᐊᔅᑮᒃ ᐁ ᐹᐱᑐᔥᐃᔅᑳᓀᓯᒋᒃ ᐃᓕᓕᐗᒃ ᑲᑕ ᒥᑯᔥᑳᑌᓕᑕᒶᒃ, ᐁ ᐙᐙᓀᓕᑕᑭᒃ; ᑭᒋᑲᒥ ᐁ ᑭᔗᐌᒪᑲᒃ, ᓀᔥᑕ ᑲᔅᑲᓇᒃ ᐁ ᑭᔗᐌᔮᑲᒪᐊᑭᒃ; 26ᐁ ᔖᑯᑌᐁᒋᒃ ᐃᓕᓕᐗᒃ ᐁ ᓭᑭᓯᒋᒃ, ᓀᔥᑕ ᐁ ᐯᔗᓕᑕᑭᒃ ᐊᓂᐃ ᑫᒀᓇ ᑫ ᐅᑎᒋᐸᓕᓕᑭ ᐅᑕ ᐊᔅᑮᒃ; ᐌᓴ ᑲᔥᑭᐅᐎᓇ ᑭᒋᑭᔑᑯᒃ ᑲᑕ ᓇᓂᑭᐸᓕᐗ᙮ 27ᐁᑯ ᒫᑲ ᑫ ᐙᐸᒫᒋᒃ ᐃᓕᓕᐎᑯᓯᓵᓇ ᐁ ᐯᒋ ᐃᑐᑌᓕᒋ ᐗᔅᑯᒃ, ᑲᔥᑭᐅᐎᓂᒃ ᓀᔥᑕ ᑭᒋ ᑭᔅᑌᓕᑖᑯᓯᐎᓂᒃ᙮ 28ᐃᔅᐱ ᒫᑲ ᐅᐅ ᑫᒀᓇ ᒫᒋ ᐃᑭᑾᐌ, ᐁᑯ ᑕᔅᑕᓵᐲᒃ, ᓀᔥᑕ ᐅᐱᔅᑴᓕᒃ; ᐌᓴ ᑭ ᐱᒫᒋᐃᑯᓯᐎᓂᐗᐤ ᑭᔑᐙᒃ ᐯᒋ ᐃᑕᑾᓐ᙮
ᐊᓂᒪ ᑭᔅᑭᓄᐊᒫᑫᐎᓐ ᐸᑫᓵᓂᒥᓈᑎᒃ ᐅᒋ
(ᒫᑎᐤ 24:32–35; ᒫᕐᒃ 13:28–31)
29ᑮ ᐃᑌᐤ ᒫᑲ ᓇᔅᐱᑐᐌᐎ ᐋᑕᓗᑳᓂᓕᐤ: ᑲᓇᐙᐸᒥᒃ ᐸᑫᓵᓂᒥᓈᑎᒃ ᓀᔥᑕ ᒥᓯᐌ ᒥᔅᑎᑾᒃ; 30ᐃᔅᐱ ᐁ ᓵᑭᐸᑭᑭ, ᑭᓚᐗᐤ ᑫᒋᐙᒃ ᑭ ᐙᐸᑌᓇᐗᐤ ᓀᔥᑕ ᑭ ᑭᔅᑫᓕᑌᓇᐗᐤ ᓂᐱᓐ ᐁ ᐯᔓᓈᑾᒃ᙮ 31ᐁᑯ ᑖᐱᔅᑯᒡ ᑭᓚᐗᐤ, ᐃᔅᐱ ᐙᐸᑕᒣᑴ ᐅᐅ ᑫᒀᓇ ᐁ ᐃᑭᑭ, ᑭᔅᑫᓕᑕᒧᒃ ᑭᔑᐙᒃ ᐁ ᐃᑕᒀᓂᓕᒃ ᑭᒋᒪᓂᑐ ᐅᑦ ᐅᑭᒫᐎᐎᓐ᙮
32ᑖᐺ ᑭᑦ ᐃᑎᓇᐗᐤ, ᐅᑯ ᐃᓕᓕᐗᒃ ᐊᓄᒡ ᑳ ᐱᒫᑎᓯᒋᒃ ᓇᒪᐎᓚ ᑲᑕ ᒣᒋᐸᓕᐗᒃ ᐹᑎᒫ ᒥᓯᐌ ᑮ ᑎᐱᐸᓕᑫ᙮ 33ᑭᔑᒃ ᓀᔥᑕ ᐊᔅᑭ ᑲᑕ ᐃᔥᒀᐸᓕᐗ; ᒫᑲ ᓂᑦ ᐋᔭᒥᐎᓇ ᓇᒪᐎᓚ ᑲᑕ ᐃᔥᒀᐸᓕᐗ᙮
ᓇᑕᐌᓕᑖᑯᒃ ᒋ ᐊᔕᐙᐱᓈᓂᐗᒃ
34ᔮᒀᒥᓰᒃ ᒫᑲ ᐁᑳ ᑭᒋ ᒫᑕᑯᔥᑭᑳᑌᑭ ᑭᑌᐃᐙᐗ ᒥᔅᑕᐃ ᐁ ᒥᒋᓱᔦᒃ ᓀᔥᑕ ᐁ ᑭᔥᑴᐯᔦᒃ, ᓀᔥᑕ ᐁ ᐅᑕᒣᓕᑕᒣᒃ ᐅᒪ ᐱᒫᑎᓯᐎᓐ, ᐁᑳ ᐊᓂᒪ ᐁ ᑭᔑᑳᒃ ᑫᑕᑕᐌ ᑭᒋ ᐅᑎᑎᑯᔦᒃ᙮ 35ᐌᓴ ᑖᐱᔅᑯᒡ ᐁ ᓈᑲᓱᓈᓂᐗᒃ ᑲᑕ ᐅᑎᑎᑯᐗᒃ ᒥᓯᐌ ᐊᓂᑭ ᑳ ᐃᑖᒋᒃ ᒥᓯᐌ ᐁᔅᐱᔖᒃ ᐊᔅᑮᒃ᙮ 36ᐁᐗᑯ ᐅᒋ ᒫᑲ ᐊᔕᐙᐱᒃ ᓀᔥᑕ ᐋᔭᒥᐋᒃ ᒧᔕᒃ, ᑭᒋ ᐃᑕᑭᒥᑳᐎᔦᒃ ᐁ ᑌᐸᑫᓕᑖᑯᓯᔦᒃ ᐁᑳ ᑭᒋ ᐅᑎᑎᑯᔦᒃ ᒥᓯᐌ ᐅᐅ ᑫᒀᓇ ᑫ ᐃᑭᑭ, ᓀᔥᑕ ᑭᒋ ᐅᑎᔥᑲᐎᑳᐸᐎᔅᑕᐌᒃ ᐃᓕᓕᐎᑯᓯᓵᓐ᙮
37ᐁ ᑭᔑᑳᓕᒃ ᒫᑲ ᑮ ᑭᔅᑭᓄᐊᒫᑫᐤ ᑭᒋᐋᔭᒥᐁᐎᑲᒥᑯᒃ; ᐃᔅᐱ ᒫᑲ ᐁᑎ ᑎᐱᔅᑳᓕᒃ ᑮ ᐗᓚᐎᐤ, ᓀᔥᑕ ᑮ ᑕᔑᑫᐤ ᐗᒌᒃ ᐊᓕᑉᔅ ᑳ ᐃᔑᓂᑳᑌᒃ᙮ 38ᒥᓯᐌ ᒫᑲ ᐃᓕᓕᐗᒃ ᑮ ᐯᒋ ᓈᑌᐗᒃ ᐎᐸᒡ ᐁ ᑭᑭᔐᐹᔮᓕᒃ ᑭᒋᐋᔭᒥᐁᐎᑲᒥᑯᒃ, ᑭᒋ ᐯᑕᐙᒋᒃ᙮
Currently Selected:
ᐅᐸᓓᑭᔅ ᓘᒃ 21: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.