ᐅᐸᓓᑭᔅ ᓘᒃ 20
20
ᑲᑴᒋᑫᒧᐎᓐ ᒋᓴᔅ ᐅᓱᑳᑎᓯᐎᓐ ᐅᒋ
(ᒫᑎᐤ 21:23–27; ᒫᕐᒃ 11:27–33)
1ᑮ ᐃᑭᓐ ᒫᑲ ᐯᔭᒃ ᐊᓂᐃ ᐁ ᑭᔑᑳᓕᑭ, ᒣᒀᒡ ᐁ ᑭᔅᑭᓄᐊᒪᐙᑦ ᐃᓕᓕᐗ ᑭᒋᐋᔭᒥᐁᐎᑲᒥᑯᒃ, ᓀᔥᑕ ᐁ ᐙᐎᑕᒃ ᒥᓗ ᐋᒋᒧᐎᓂᓕᐤ, ᑮ ᐯᒋ ᐅᑎᑎᑯ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᐅᒪᓯᓇᐃᑫᐗ, ᐊᓯᒋ ᓀᔥᑕ ᑳ ᓂᑳᓀᓕᑖᑯᓯᓕᒋ, 2ᑮ ᐋᔭᒥᐃᑯ ᒫᑲ, ᐁ ᐃᑗᓕᒋ, ᐎᑕᒫᐎᓈᓐ, ᑫᑯ ᑲᔥᑭᐅᐎᓐ ᐌᒋ ᑐᑕᒪᓐ ᐅᐅ ᑫᒀᓇ? ᓀᔥᑕᐱᑯ, ᐊᐌᓇ ᑳ ᒥᓕᔉ ᐅᐅ ᑭᒋ ᑐᑕᒪᓐ?
3ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᓂᓚ ᓀᔥᑕ ᑭ ᑳ ᑲᑴᒋᒥᑎᓇᐗᐤ ᐯᔭᒃ ᑫᒀᓐ? ᓇᔥᑴᐗᔑᐃᒃ ᒫᑲ᙮ 4ᒑᓐ ᐅ ᓯᑲᐋᑖᑫᐎᓐ, ᑭᒋᑭᔑᑯᒃ ᓈ ᑮ ᐅᒋᐸᓕᓕᐤ, ᓀᔥᑕᐱᑯ ᐃᓕᓕᓈᒃ?
5ᑮ ᐋᔭᔭᒥᐃᑐᐗᒃ ᒫᑲ, ᐁ ᐃᑗᒋᒃ, ᑮᔥᐱᓐ ᐃᑗᔭᑴ, ᑭᒋᑭᔑᑯᒃ ᐅᒋ; ᑲᑕ ᐃᑗᐤ, ᑖᓀᑭ ᒫᑲ ᐌᒋ ᐁᑳ ᑮ ᑖᐺᑕᐌᒃ? 6ᒫᑲ ᑮᔥᐱᓐ ᐃᑗᔭᑴ, ᐃᓕᓕᓈᒃ ᐅᒋ; ᒥᓯᐌ ᐃᓕᓕᐗᒃ ᑭ ᑳ ᐱᒶᓯᓈᑕᐅᑯᓇᐗᒃ: ᐌᓴ ᑖᐺᐗᑫᓕᑕᒶᒃ ᐁ ᐅᑭᔅᑭᐙᐃᑫᐎᓕᒋ ᒑᓇ᙮ 7ᑮ ᓇᔥᑴᐗᔑᐁᐗᒃ ᒫᑲ ᐁᑳ ᐁ ᑭᔅᑫᓕᑕᑭᒃ ᑖᓐᑌ ᐌᒋᐸᓕᓕᒃ᙮
8ᒋᓴᔅ ᒫᑲ ᑮ ᐃᑌᐤ, ᓂᓚ ᓀᔥᑕ ᓇᒪᐎᓚ ᑭ ᑳ ᐎᑕᒫᑎᓇᐗᐤ ᑖᓐᑌ ᑳ ᐅᒋ ᑲᔥᑭᑖᔮᓐ ᐅᐅ ᑫᒀᓇ ᑭᒋ ᑐᑕᒫᓐ᙮
ᓈᔅᐱᑐᐌᐎ ᐋᑕᓗᑳᓐ ᔓᒥᓈᑎᑯᐎ ᓂᑖᐎᑭᒋᑲᓐ ᐊᑐᔅᑫᓛᑲᓇᒃ ᐅᒋ
(ᒫᑎᐤ 21:33–46; ᒫᕐᒃ 12:1–12)
9ᐁᑯ ᒥᐋᒋ ᐃᑖᑦ ᐃᓕᓕᐗ ᐅᒣᓕᐤ ᓇᔅᐱᑐᐌᐎ ᐋᑕᓗᑳᓂᓕᐤ; ᐯᔭᒃ ᐃᓕᓕᐤ ᑮ ᐅᔑᑕᐤ ᔓᒥᓈᑎᑯ ᓂᑖᐎᑭᒋᑲᓂᓕᐤ, ᓀᔥᑕ ᑮ ᐋᐎᐁᐤ ᐅᓂᑖᐎᑭᒋᑫᐗ, ᐁᑯ ᒫᑲ ᐊᔅᑮᒃ ᐙᓚᐤ ᐁᑐᑌᑦ ᑭᓉᔥ ᑭᒋ ᐃᑖᐱᒌᑦ᙮ 10ᐃᔅᐱ ᒫᑲ ᐌᑎᒋᐸᓕᒃ ᐊᑑᔅᑫᓛᑲᓇ ᑮ ᐃᔑᑎᔕᐊᒪᐌᐤ ᐅᓂᑖᐎᑭᒋᑫᐗ, ᑭᒋ ᒥᓛᓕᒋ ᐁ ᐃᔑ ᒥᓂᔑᐗᓂᓕᒃ ᔓᒥᓈᑎᑯ ᓂᑖᐎᑭᒋᑲᓂᓕᐤ: ᒫᑲ ᐅᓂᑖᐎᑭᒋᑫᐗᒃ ᑮ ᐅᑖᒪᐌᐗᒃ, ᓀᔥᑕ ᐱᔑᔑᒃ ᑮ ᑭᒋᑎᔕᐌᐗᒃ᙮ 11ᒥᓇ ᒫᑲ ᑯᑕᑭᔭ ᐊᑑᔅᑫᓛᑲᓇ ᑮ ᐃᔑᑎᔕᐌᐤ; ᐅᐅ ᓀᔥᑕ ᑮ ᐅᑖᒪᐌᐗᒃ, ᓀᔥᑕ ᓈᔅᐱᒡ ᐁ ᑮ ᒪᒋᑐᑕᐙᒋᒃ, ᐱᔑᔑᒃ ᑮ ᑭᒋᑎᔕᐌᐗᒃ᙮ 12ᒥᓇ ᒫᑲ ᑯᑕᑭᔭ ᐁᑯ ᓂᔅᑐ ᑮ ᐃᔑᑎᔕᐌᐤ: ᐅᐅ ᓀᔥᑕ ᑮ ᒥᔣᑲᓂᑳᑌᐗᒃ, ᓀᔥᑕ ᑮ ᐗᓚᐎᐌᐱᓀᐗᒃ᙮ 13ᐁᑯ ᐁᑗᑦ ᐊᓇ ᑳ ᑎᐯᓕᑕᒃ ᔓᒥᓈᑎᑯ ᓂᑖᐎᑭᒋᑲᓂᓕᐤ, ᑫᒀᓐ ᑫ ᑐᑕᒫᓐ? ᓂ ᑳ ᐃᔑᑎᔕᐗᐤ ᓂᑯᓯᔅ ᑳ ᓵᑭᐊᒃ: ᒫᔅᑯᒡ ᑲᑕ ᑭᔅᑌᓕᒣᐗᒃ ᐙᐸᒫᑡᐌ᙮ 14ᒫᑲ ᐃᔅᐱ ᐅᓂᑖᐎᑭᒋᑫᐗᒃ ᐎᐋᐸᒫᒋᒃ, ᑮ ᐋᔭᔭᒥᐃᑐᐗᒃ, ᐁ ᐃᑗᒋᒃ, ᐊᐗ ᐁᐗᒀᓇ ᑫ ᐋᓂᔅᑫ ᑎᐯᓕᑕᒃ: ᒫᑎ, ᓂᐸᐋᑕᐤ, ᐁᑯ ᑫ ᐋᔭᔭᒃ ᐊᓂᒪ ᑎᐯᓕᒋᑫᐎᓐ᙮ 15ᐁᑯ ᐌᓚᐎᐌᐱᓈᒋᒃ ᔓᒥᓈᑎᑯ ᓂᑖᐎᑭᒋᑲᓂᒃ ᐅᒋ, ᓇᔥᑕ ᑮ ᓂᐸᐁᐗᒃ᙮
ᑖᓂ ᒫᑲ ᑫ ᑐᑕᐙᑦ ᐊᓇ ᑳ ᑎᐯᓕᑕᒃ ᔓᒥᓈᑎᑯ ᓂᑖᐎᑭᒋᑲᓂᓕᐤ? 16ᑲᑕ ᐯᒋ ᓂᔑᐗᓈᒋᐁᐤ ᐅᐅ ᐅᓂᑖᐎᑭᒋᑫᐗ, ᓀᔥᑕ ᔓᒥᓈᑎᑯ ᓂᑖᐎᑭᒋᑲᓂᓕᐤ ᑯᑕᑭᔭ ᑲᑕ ᒥᓓᐤ᙮ ᐃᔅᐱ ᒫᑲ ᐱᐁᑕᑭᒃ, ᑮ ᐃᑗᐗᒃ, ᓇᒪᐎᓚ ᑲᑕ ᐎ ᐃᑭᓐ᙮
17ᑮ ᑲᓇᐙᐸᒣᐤ ᒫᑲ, ᓀᔥᑕ ᑮ ᐃᑗᐤ, ᑫᒀᓐ ᒫᑲ ᐅᒪ ᑳ ᒥᓯᓇᐃᑳᑌᒃ, ᐊᓇ ᐅᓯᓂ ᑳ ᑮ ᐋᑕᐌᓕᒥᑯᑦ ᐅᐙᔅᑳᔨᑲᓂᑫᐗ, ᐁᐗᑯ ᑫᔅᑕᓛᑲᓂᐎᑦ ᑭᑫᔮᒃ? 18ᐊᐌᓇ ᒫᑲ ᑫ ᐸᑭᔑᓄᑴ ᐅᐅ ᐊᓯᓂᒃ, ᑲᑕ ᐱᑯᔑᓐ; ᒫᑲ ᐊᐌᓐ ᑫ ᑕᓱᓱᑴ ᑲᑕ ᐱᓯᐳᓕᑯ᙮
ᑲᑴᒋᑫᒧᐎᓐ ᐅᑎᐯᓕᒋᑫᐎ ᔔᓕᐋᓐ ᐅᒋ
(ᒫᑎᐤ 22:15–22; ᒫᕐᒃ 12:13–17)
19ᑭᒋ ᓵᓵᑭᐎᓕᐌᐎᓕᓕᐗᒃ ᒫᑲ ᓀᔥᑕ ᐅᒪᓯᓇᐃᑫᐗᒃ ᐊᓂᒪ ᑫᔮᐸᒡ ᑎᐹᔨᑲᓐ ᐱᓯᒧᑳᓂᒃ, ᑮ ᐎ ᒫᑯᓀᐗᒃ; ᑮ ᑯᔅᑌᐗᒃ ᒫᑲ ᐃᓕᓕᐗ: ᐌᓴ ᑮ ᑭᔅᑫᓕᑕᒶᒃ ᐁ ᑮ ᐃᑗᓕᒋ ᐅᒣᓕᐤ ᓇᔅᐱᑐᐌᐎ ᐋᑕᓗᑳᓂᓕᐤ ᐁ ᐎ ᐋᓉᓕᒥᑯᒋᒃ᙮ 20ᑮ ᓈᓈᑲᒋᐁᐗᒃ ᒫᑲ, ᓀᔥᑕ ᑮ ᐃᔑᑎᔕᐌᐗᒃ ᐅᓈᓈᑲᒋᐃᐌᐗ, ᑭᒋ ᒀᔭᔅᑭᑎᑳᓱᓕᒋ ᐃᓕᓕᐗ, ᑭᒋ ᑳᒋᑎᓇᒸᓕᒋ ᐅᑦ ᐋᔭᒥᐎᓂᓕᐗ, ᑭᒋ ᐅᒋ ᐸᑭᑎᓈᒋᒃ ᐅ ᑲᔥᑭᐅᐎᓂᓕᒃ ᓀᔥᑕ ᐅ ᑎᐯᓕᒋᑫᐎᓂᓕᒃ ᐅᑭᒪᐗ᙮ 21ᑮ ᑲᑴᒋᒣᐗᒃ ᒫᑲ, ᐁ ᐃᑗᒋᒃ, ᑫᔅᑭᓄᐊᒫᑫᔭᓐ, ᓂ ᑭᔅᑫᓕᑌᓈᓐ ᒀᔭᔉ ᐁ ᐃᑗᔭᓐ, ᓀᔥᑕ ᒀᔭᔉ ᐁ ᑭᔅᑭᓄᐊᒫᑫᔭᓐ, ᐁᑳ ᓀᔥᑕ ᐁ ᑭᔅᑌᓕᑕᒶᑦ ᐊᐌᓇ ᐅᑦ ᐃᔑᓈᑯᓯᐎᓐ, ᒫᑲ ᑖᐺᐎᓂᒃ ᐁ ᑭᔅᑭᓄᐊᒫᑫᐗᑦ ᑭᒋᒪᓂᑐ ᐅᑦ ᐃᔑᑣᐎᓐ; 22ᐅᓚᔓᐌᓕᑖᑾᓐ ᓈ ᑭᒋ ᒥᓚᑭᑦ ᓯᓴᕐ ᑎᐯᓕᒋᑫᐎ ᔔᓕᐋᓇ, ᓀᔥᑕᐱᑯ ᐁᑳ?
23ᒫᑲ ᑮ ᑭᔅᑫᓕᑕᒬᐤ ᐅ ᑲᑳᔦᓕᓯᐎᓂᓕᐤ, ᑮ ᐃᑌᐤ ᒫᑲ, ᑖᓀᑭ ᐌᒋ ᑲᑴᒋᐃᔦᒃ? 24ᐙᐸᑎᓕᒃ ᔔᓕᐋᓈᐱᔅᑯᔥ᙮ ᐊᐌᓇ ᐅᑦ ᐃᔑᓈᑯᓯᐎᓐ ᐅᒪ ᓀᔥᑕ ᐊᐌᓇ ᑳ ᒪᓯᓇᐃᑳᓱᑦ ᐅᑕ?
ᑮ ᓇᔥᑴᐗᔑᐁᐗᒃ ᒫᑲ, ᐁ ᐃᑖᒋᒃ, ᓯᓴᕐ᙮
25ᐁᑯ ᐁᑖᑦ, ᒦᓕᒃ ᓯᓴᕐ ᐊᓂᐃ ᐌᑖᔮᓂᑦ ᓯᓴᕐ, ᓀᔥᑕ ᑭᒋᒪᓂᑐ ᐊᓂᐃ ᐌᑖᔭᓂᑦ ᑭᒋᒪᓂᑐ᙮
26ᓇᒪᐎᓚ ᒫᑲ ᑮ ᑳᒋᑎᓇᒬᐗᒃ ᐅᑦ ᐋᔭᒥᐎᓂᓕᐗ ᐁ ᐙᐸᒥᑯᒋᒃ ᐃᓕᓕᐗ; ᑮ ᒫᒪᔅᑳᑕᒬᐗᒃ ᒫᑲ ᐅ ᓇᔥᑴᐗᔑᐃᐌᐎᓂᓕᐤ, ᓀᔥᑕ ᑮ ᑭᐱᑐᐌᐗᒃ᙮
ᑲᑴᒋᑫᒧᐎᓐ ᐁ ᐗᓂᔥᑳᓂᐗᒃ ᓂᐱᐎᓂᒃ ᐅᒋ
(ᒫᑎᐤ 22:23–33; ᒫᕐᒃ 12:18–27)
27ᐁᑯ ᐱᐁᒋ ᓈᑎᑯᑦ ᐋᑎᑦ ᓵᑦᔪᑎᓯᔭ, ᓇᒪ ᐃᑕᑾᓐ ᐗᓂᔥᑳᐎᓐ ᑳ ᐃᑗᒋᒃ; ᑮ ᑲᑴᒋᒥᑯ ᒫᑲ, 28ᐁ ᐃᑎᑯᑦ, ᑫᔅᑭᓄᐊᒫᑫᔭᓐ, ᒧᓯᔅ ᓂ ᑮ ᒪᓯᓇᐊᒫᑯᓈᓐ, ᑮᔥᐱᓐ ᐃᓕᓕᐤ ᐎᒋᔖᓇ ᓂᐱᓕᑌ, ᐁ ᐎᐎᓕᒋ, ᓂᐱᓕᑌ ᒫᑲ ᐁᑳ ᐁ ᐅᑦ ᐊᐙᔑᒥᔑᓕᒋ, ᐊᓇ ᐃᓕᓕᐤ ᑲᑕ ᐎᑭᒥᒣᐤ ᐎᒋᔖᓇ ᐎᐎᓕᐗ, ᑭᒋ ᓂᑖᐎᑭᑕᒪᐙᑦ ᐊᐙᔑᔕ ᐎᒋᔖᓇ᙮ 29ᑮ ᐃᑖᐗᒃ ᒫᑲ ᓂᔂᔅ ᐁ ᐎᒋᔖᓂᑐᒋᒃ: ᐊᓇ ᓃᔥᑕᒻ ᒫᑲ ᑮ ᐎᐎᐤ, ᑮ ᓂᐱᐤ ᒫᑲ ᐁᑳ ᐁ ᐅᑦ ᐊᐙᔑᒥᔑᑦ᙮ 30ᐊᓇ ᓂᔓ ᓀᔥᑕ ᑮ ᐅᑎᓀᐤ ᑭᒋ ᐎᐎᑦ, ᑮ ᓂᐱᐤ ᒫᑲ ᐁᑳ ᐁ ᐅᑦ ᐊᐙᔑᒥᔑᑦ᙮ 31ᐊᓇ ᓂᔅᑐ ᓀᔥᑕ ᑮ ᐅᑎᓀᐤ; ᐁᑯ ᑖᐱᔅᑯᒡ ᐊᓂᑭ ᓂᔂᔅ ᓀᔥᑕ; ᓇᒪ ᒫᑲ ᐅᒋ ᓇᑲᑌᐗᒃ ᐊᐙᔑᔕ, ᑮ ᓂᐱᐗᒃ ᒫᑲ᙮ 32ᒫᒋᒡ ᒫᑲ ᐊᓇ ᐃᔅᑴᐤ ᓀᔥᑕ ᑮ ᓂᐱᐤ᙮ 33ᐁᐗᑯ ᒫᑲ ᐅᒋ ᐃᔅᐱ ᐗᓂᔥᑳᓕᐗᑫ, ᐊᐌᓇ ᐁ ᐃᑕᓯᒋᒃ ᑫ ᐎᐎᑦ ᐅᐅ ᐃᔅᑴᐗ? ᐌᓴ ᓂᔂᔅ ᑮ ᐋᔭᐌᐗᒃ᙮
34ᒋᓴᔅ ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᐊᓂᑭ ᑳ ᐅᑦ ᐊᐙᔑᒥᔑᒥᑯᒋᒃ ᐅᒣᓕᐤ ᐊᔅᑭᓕᐤ ᐎᑭᑐᐗᒃ ᓀᔥᑕ ᐎᑭᑐᐋᑲᓂᐎᐗᒃ: 35ᒫᑲ ᐊᓂᑭ ᑫ ᑌᐸᑫᓕᑖᑯᓯᒋᒃ ᑭᒋ ᐋᔮᒋᒃ ᐊᓂᐁᓕᐤ ᐊᔅᑭᓕᐤ, ᓀᔥᑕ ᐗᓂᔥᑳᐎᓂᓕᐤ ᐅᓂᐱᐗ ᐅᒋ, ᓇᒪᐎᓚ ᐎᑭᑐᐗᒃ, ᓇᒪ ᓀᔥᑕ ᐎᑭᑐᐋᑲᓂᐎᐗᒃ: 36ᓇᒪᐎᔅᑳᑦ ᒫᑲ ᒥᓇ ᑲᑕ ᑮ ᓂᐱᐗᒃ: ᐌᓴ ᓇᔅᐱᑕᐌᐗᒃ ᐁᓐᒐᓚ: ᓀᔥᑕ ᐅᑦ ᐊᐙᔑᒥᔑᒥᑯᐗᒃ ᑭᒋᒪᓂᑐᐗ, ᐁ ᐅᑦ ᐊᐙᔑᒥᔑᒥᑯᒋᒃ ᐗᓂᔥᑳᐎᓂᓕᐤ᙮ 37ᑖᐺ ᒫᑲ ᐁ ᐗᓂᔥᑳᓈᑲᓂᐎᒋᒃ ᑳ ᓂᐱᒋᒃ, ᒧᓯᔅ ᑖᐺ ᑮ ᐙᐸᑎᓕᐌᐤ ᐱᔅᑯᑯᐹᒃ, ᐃᔅᐱ ᐁᔑᓂᑳᑖᑦ ᐅᑎᐯᓕᒋᑫᐗ, ᐁᑉᕃᐋᒻ ᐅ ᑭᒋᒪᓂᑐᒪ, ᓀᔥᑕ ᐋᐃᓯᒃ ᐅ ᑭᒋᒪᓂᑐᒪ, ᓀᔥᑕ ᒉᑲᑉ ᐅ ᑭᒋᒪᓂᑐᒪ᙮ 38ᐌᓴ ᓇᒪᔦᐤ ᐅ ᑭᒋᒪᓂᑐᒥᐙᐗ ᑳ ᓂᐱᒋᒃ, ᒫᑲ ᑳ ᐱᒫᑎᓯᒋᒃ: ᐌᓴ ᒥᓯᐌ ᐱᒫᑎᓰᔅᑖᑯ᙮
39ᐁᑯ ᐋᑎᑦ ᐅᒪᓯᓇᐃᑫᐗᒃ ᐁ ᓇᔥᑴᐗᔑᐃᐌᒋᒃ, ᑮ ᐃᑗᐗᒃ, ᑫᔅᑭᓄᐊᒫᑫᔭᓐ, ᒀᔭᔉ ᑭ ᑮ ᐃᑣᓐ᙮ 40ᐹᑎᒫ ᐊᓂᐁᓕᐤ ᒫᑲ ᓇᒪᐎᓚ ᑮ ᐃᔅᐱᒋ ᓱᑭᑌᐁᐗᒃ ᑫᒀᓕᐤ ᑭᒋ ᑲᑴᒋᒫᒋᒃ᙮
ᑲᑴᒋᑫᒧᐎᓐ ᙭ ᐅᒋ
(ᒫᑎᐤ 22:41–46; ᒫᕐᒃ 12:35–37)
41ᑮ ᐃᑌᐤ ᒫᑲ, ᑖᓀᑭ ᐌᒋ ᐃᑣᓂᐗᒃ ᙭ ᐁ ᐅᑯᓯᓯᒥᑯᑦ ᑌᐱᑕ? 42ᑌᐱᑦ ᒫᑲ ᑫᒋᐙᒃ ᐃᑗᐤ ᓂᑲᒧᐎ ᒪᓯᓇᐃᑲᓂᒃ, ᐅᑎᐯᓕᒋᑫᐤ ᑮ ᐃᑌᐤ ᓂ ᑎᐱᓕᒋᑫᒪ ᐊᐱ ᑭᓚ ᓂ ᑭᒋᓂᔅᑮᒡ, 43ᐹᑎᒫ ᑮ ᑐᑕᒫᓀ ᑭᒋ ᐅ ᑕᑯᔅᑳᒋᑲᓂᔭᓐ ᐊᓂᑭ ᑳ ᐸᒀᑎᔅᑭᒃ᙮ 44ᐁᐗᑯ ᐅᒋ ᑌᐱᑦ, ᐅᑎᐯᓕᒋᑫᐤ, ᐃᔑᓂᑳᑌᐤ, ᑖᓐᑌ ᒫᑲ ᐌᒋ ᐅᑯᓯᓯᑦ?
ᒋᓴᔅ ᔮᑾᒥᒥᐌᐤ ᐅᓚᔓᐌᐎᓂᓕᐤ ᑳ ᑭᔅᑭᓄᐊᒫᑫᒋᒃ ᐅᒋ
(ᒫᑎᐤ 23:1–36; ᒫᕐᒃ 12:38–40)
45ᐁᑯ ᒫᑲ ᐁ ᐯᑖᑯᑦ ᒥᓯᐌ ᐃᓕᓕᐗ, ᑮ ᐃᑌᐤ ᐅ ᑭᔅᑭᓄᐊᒪᐗᑲᓇ, 46ᔮᒀᒥᔅᑖᑯᒃ ᐅᒪᓯᓇᐃᑫᐗᒃ, ᑳ ᓇᑕᐌᓕᑕᑭᒃ ᑭᒋ ᐱᒧᑌᒋᒃ ᐁ ᑭᓉᑭᓂᓕᑭ ᐅᑦ ᐊᑯᐅᓂᐙᐗ, ᓀᔥᑕ ᑳ ᓵᑭᑖᒋᒃ ᐊᑕᒥᔅᑳᑯᓯᐎᓇ ᐃᑕ ᐁ ᐊᑖᒥᑐᓈᓂᐗᒃ, ᓀᔥᑕ ᑭᒋ ᑌᑕᐱᐎᓇ ᐋᔭᒥᐁᐎᑲᒥᑯᒃ, ᓀᔥᑕ ᑳ ᑭᔅᑌᓕᑖᑾᓂᓕᑭ ᐊᐱᐎᓇ ᐁ ᒪᑯᔖᓂᐗᒃ; 47ᑳ ᒣᔅᑎᓇᒸᒋᒃ ᑭᑎᒫᑭᔅᑴᐗ ᐎᑭᓕᐗ, ᓀᔥᑕ ᑭᒋ ᐅᒋ ᒥᓗᑣᐌᓕᒫᑲᓂᐎᒋᒃ ᑭᓉᔥ ᑳ ᐋᔭᒥᐋᒋᒃ: ᐁᐗᒀᓂᑭ ᐊᐙᓯᑌ ᑫ ᐋᔮᒋᒃ ᓂᔑᐗᓈᒋᒥᑯᓯᐎᓂᓕᐤ᙮
Currently Selected:
ᐅᐸᓓᑭᔅ ᓘᒃ 20: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
