ᐅᐸᓓᑭᔅ ᓘᒃ 19
19
ᒋᓴᔅ ᓀᔥᑕ ᓵᑭᐊᔅ
1ᒋᓴᔅ ᒫᑲ ᑮ ᐱᑐᑫᐤ ᓀᔥᑕ ᑮ ᔖᐳᑕᐌᔥᑲᒻ ᒉᕆᑯ᙮ 2ᒫᑎᑲ, ᒫᑲ, ᑮ ᐃᑖᐤ ᐃᓕᓕᐤ ᓵᑭᐊᔅ ᐁ ᐃᔑᓂᑳᓱᑦ, ᑳ ᑭᒋ ᐸᑉᓕᑳᓂᐎᑦ, ᑮ ᒥᔕᑭᓯᐤ ᒫᑲ᙮ 3ᑮ ᑯᒋ ᐙᐸᒣᐤ ᒫᑲ ᒋᓴᓴ ᐊᐌᓕᐗ ᐃᐋᐎᓕᒋ; ᓇᒪᐎᓚ ᒫᑲ ᑮ ᑲᔥᑭᑕᐤ ᐁ ᐃᔥᐱᔑ ᓯᑎᔥᑳᑐᓈᓂᐗᓂᓕᒃ, ᐌᓴ ᑮ ᑕᑯᑳᐸᐎᐤ᙮ 4ᑮ ᓂᑲᓂᐸᑕᐤ ᒫᑲ, ᓀᔥᑕ ᑮ ᐃᔥᒀᑕᐎᐤ ᓯᑭᒧᕌᑎᑯᒃ: ᐌᓴ ᐁᑯᑕ ᑫ ᐱᒧᑌᓕᒋ᙮ 5ᐃᔅᐱ ᒫᑲ ᐁᑯᑕ ᑌᑯᔑᒃ ᒋᓴᔅ, ᑮ ᑕᔅᑕᓵᐱᐤ, ᓀᔥᑕ ᑮ ᐙᐸᒣᐤ, ᑮ ᐃᑌᐤ ᒫᑲ, ᓵᑭᐊᔅ, ᑭᓕᐱ ᓂᑖᑕᐎ, ᐌᓴ ᐊᓄᒡ ᐁ ᑭᔑᑳᒃ ᓂ ᑳ ᐃᑖᓐ ᑭᑭᒃ᙮
6ᑮ ᑭᓕᐱ ᓂᑖᑕᐎᐤ ᒫᑲ, ᓀᔥᑕ ᐁ ᒥᓚᐙᑕᒃ ᑮ ᐱᑐᑲᐁᐤ᙮ 7ᐃᔅᐱ ᒫᑲ ᐎᐋᐸᑕᑭᒃ, ᒥᓯᐌ ᑮ ᐙᔦᔥ ᐃᑗᐗᒃ, ᐁ ᐃᑗᒋᒃ, ᓇᑕᐎ ᒪᐗᑎᑌᐤ ᐃᓕᓕᐗ ᑳ ᒪᒋᑣᓕᒋ᙮
8ᓵᑭᐊᔅ ᒫᑲ ᑮ ᓂᐸᐎᐤ, ᓀᔥᑕ ᑮ ᐃᑌᐤ ᐅᑎᐯᓕᒋᑫᐗ, ᒫᑎᑲ, ᑌᐯᓕᒋᑫᔭᓐ, ᐋᐱᑕᐤ ᓂᑦ ᐋᔮᓇ ᓂ ᒥᓚᐗᒃ ᐅᑭᑎᒫᑭᓯᐗᒃ; ᑮᔥᐱᓐ ᒫᑲ ᑳ ᒪᔅᑲᒪᑭ ᐊᐌᓇ ᑫᒀᓕᐤ ᐁ ᑭᓛᔅᑭ ᑎᐹᒋᒧᔮᓐ, ᒥᓇ ᓂ ᒥᓚᐤ ᓀᐗᐤ ᐃᔥᐱᔥ᙮
9ᒋᓴᔅ ᒫᑲ ᑮ ᐃᑌᐤ, ᐊᓄᒡ ᑳ ᑭᔑᑳᒃ ᐱᒫᒋᐃᐌᐎᓐ ᐱᑐᑫᒪᑲᓐ ᐅᑕ ᐙᔅᑳᔨᑲᓂᒃ, ᐌᓴ ᐎᓚ ᓀᔥᑕ ᐅᑯᓯᓯᒥᑯ ᐁᑉᕃᐊᒪ᙮ 10ᐌᓴ ᐃᓕᓕᐎᑯᓯᓵᓐ ᐯᒋ ᑕᑯᔑᓐ ᑭᒋ ᓈᓇᑕᐙᐸᒫᑦ ᓀᔥᑕ ᑭᒋ ᐱᒫᒋᐋᑦ ᐊᓂᐃ ᑳ ᐗᓂᔑᓂᓕᒋ᙮
ᓈᔅᐱᑐᐌᐎ ᐋᑕᓗᑳᓐ ᐅᓵᐎᔓᓕᔭᓈᐱᔅᑯᔕᒃ ᐅᒋ
(ᒫᑎᐤ 25:14–30)
11ᒣᒀᒡ ᒫᑲ ᐱᐁᑕᒥᓕᒋ ᐅᐅ ᑫᒀᓇ, ᑮ ᑕᑯᑕᐤ ᓀᔥᑕ ᑮ ᐃᑗᐤ ᓇᔅᐱᑐᐌᐎ ᐋᑕᓗᑳᓂᓕᐤ, ᐯᔓᒡ ᒋᕉᓴᓚᒥᒃ ᐁ ᐃᑖᑦ, ᓀᔥᑕ ᐁ ᐃᑌᓕᑕᒥᓕᒋ ᑭᒋᒪᓂᑐ ᐅᑦ ᐅᑭᒫᐎᐎᓐ ᐎᐸᒡ ᑭᒋ ᓄᑾᓂᓕᒃ᙮ 12ᐁᐗᑯ ᐌᒋ ᐃᑗᑦ, ᐯᔭᒃ ᐅᑭᒪᐤ ᑮ ᐃᑐᑌᐤ ᐙᓚᐤ ᐊᔅᑮᒃ, ᑭᒋ ᐅᑎᓇᒫᓱᑦ ᐅᑭᒫᐎᐎᓂᓕᐤ, ᐁᑯ ᑭᒋ ᑭᐌᑦ᙮ 13ᑮ ᓇᑐᒣᐤ ᒫᑲ ᐅᑦ ᐊᑑᔅᑫᓛᑲᓂᒪ ᐁ ᒥᑖᑕᓯᓕᒋ, ᑮ ᐸᑭᑎᓇᒪᐌᐤ ᒫᑲ ᒥᑖᑦ ᑭᒋᔔᓕᐋᓇ, ᑮ ᐃᑌᐤ ᒫᑲ, ᐋᐸᑎᓯᒃ ᐹᑎᒪ ᐯᒋ ᑕᑯᔑᓂᔮᓀ᙮ 14ᐅᑦ ᐃᑖᐎᓂᓕᓕᒪ ᒫᑲ ᑮ ᐸᒀᑎᑯ, ᓀᔥᑕ ᑮ ᐸᑯᓇᐎᐃᑎᑯ, ᐁ ᐃᑗᓕᒋ, ᓇᒪᐎᓚ ᓂ ᓇᑕᐌᓕᒫᓈᓐ ᐊᐗ ᐃᓕᓕᐤ ᑭᒋ ᑎᐯᓕᒥᔭᒥᑦ᙮
15ᑮ ᐃᑭᓐ ᒫᑲ, ᐃᔅᐱ ᑳ ᐯᒋ ᑭᐌᑦ, ᐁ ᑮ ᐅᑎᓇᒃ ᐅᑭᒫᐎᐎᓂᓕᐤ, ᐁᑯ ᐁᑕᔓᐌᑦ ᑭᒋ ᓇᑐᒫᑲᓂᐎᓕᒋ ᐊᓂᐃ ᐊᑑᔅᑫᓛᑲᓇ ᑳ ᑮ ᒥᓛᑦ ᔔᓕᐋᓇ, ᑭᒋ ᑭᔅᑫᓕᑕᒃ ᐃᔥᐱᔥ ᑳ ᐅᑎᓯᓕᒋ ᒥᓯᐌ ᑕᑐ ᐃᓕᓕᐗ ᐁ ᐊᑖᒥᐌᓕᒋ, 16ᐁᑯ ᐱᐁᒋ ᐃᑐᑌᑦ ᐊᓇ ᓃᔥᑕᒻ, ᐁ ᐃᑗᑦ, ᐅᑭᒪᐤ, ᑭ ᑭᒋᔔᓕᐋᓂᒻ ᑮ ᑕᑯᑲᔥᑭᐁᐤ ᒣᑖᑦ ᑭᒋᔔᓕᐋᓇ᙮ 17ᑮ ᐃᑌᐤ ᒫᑲ, ᐁᑯᔔᓂ, ᑭᓚ ᒥᓗ ᐊᑑᔅᑫᓛᑲᓐ: ᐁ ᑮ ᒀᔭᔅᑭᑎᔭᓐ ᐊᓂᒪ ᓈᔅᐱᒡ ᐁ ᐋᐱᔖᔑᒃ ᐅᒋ, ᑎᐯᓕᑕ ᒥᑖᑦ ᐃᑖᐎᓇ᙮ 18ᐊᓇ ᓂᔓ ᓀᔥᑕ ᑮ ᐯᒋ ᐃᑐᑌᐤ, ᐁ ᐃᑗᑦ, ᐅᑭᒪᐤ, ᑭ ᑭᒋᔔᓂᐋᓂᒻ ᑮ ᑕᑯᑲᔥᑭᐁᐤ ᓂᔮᓚᓐ ᑭᒋᔖᓕᐋᓇ᙮ 19ᑮ ᐃᑌᐤ ᐊᓂᐃ ᓀᔥᑕ, ᑎᐯᓕᑕ ᑭᓚ ᓀᔥᑕ ᓂᔮᓚᓪ ᐃᑖᐎᓇ᙮
20ᑯᑕᒃ ᒫᑲ ᑮ ᐯᒋ ᐃᑐᑌᐤ, ᐁ ᐃᑗᑦ, ᐅᑭᒪᐤ, ᒫᑎᑲᐗ ᑭ ᑭᒋᔔᓕᐋᓂᒻ, ᑳ ᑲᓇᐌᓕᒪᒃ ᐁ ᓇᐋᓛᑲᓂᐎᑦ ᐸᐸᑭᐙᔮᓀᑭᓄᒃ᙮ 21ᐌᓴ ᑭ ᑮ ᑯᔅᑎᑎᓐ, ᐁ ᐊᓕᒥᓯᐎ ᐃᓕᓕᐎᔭᓐ; ᑭᑦ ᐅᑎᓀᓐ ᐊᓂᒪ ᐁᑳ ᑳ ᐅᒋ ᐸᑭᑎᓇᒪᓐ, ᓀᔥᑕ ᑭ ᒪᓂᔐᓐ ᐊᓂᒪ ᐁᑳ ᑳ ᐅᒋ ᐗᓴᓶᐱᓇᒪᓐ᙮ 22ᐃᑌᐤ ᒫᑲ, ᑎᐱᓚᐌ ᑭᑐᓂᒃ ᐅᒋ ᑭ ᑳ ᑎᐹᔅᑯᓂᑎᓐ, ᑭᓚ ᒪᒋ ᐊᑑᔅᑫᓛᑲᓐ᙮ ᑭ ᑭᔅᑫᓕᑌᑖᔾ ᐁ ᐊᓕᒥᓯᐎ ᐃᓕᓕᐎᔮᓐ, ᐁ ᐅᑎᓇᒫᓐ ᐊᓂᒪ ᐁᑳ ᑳ ᐅᒋ ᐸᑭᑎᓇᒫᓐ, ᓀᔥᑕ ᐁ ᒪᓂᔕᒫᓐ ᐊᓂᒪ ᐁᑳ ᑳ ᐅᒋ ᐌᓴᓶᐱᓇᒫᓐ᙮ 23ᑖᓀᑭ ᒫᑲ ᐌᒋ ᐁᑳ ᑳ ᐸᑭᑎᓇᑦ ᓂ ᔔᓕᐋᓂᒻ ᔔᓕᐋᐎᑲᒥᑯᒃ, ᐁ ᑕᑯᔑᓂᔮᓐ ᑭᒋ ᐋᔭᐗᒃ ᐊᓇ ᑳ ᑎᐱᓚᐌᐎᓯᔮᓐ ᐊᓯᒋ ᓀᔥᑕ ᐊᓂᐃ ᑳ ᑕᑯᑲᔥᑭᐋᑦ?
24ᑮ ᐃᑌᐤ ᒫᑲ ᐊᓂᐃ ᑳ ᓀᐯᒥᑳᐸᐎᓕᒋ, ᒫᔅᑲᒥᒃ ᐊᓂᐃ ᑭᒋᔔᓕᐋᓇ, ᒥᓕᒃ ᒫᑲ ᐊᓇ ᑳ ᐋᔭᐙᑦ ᒥᑖᑦ ᑭᒋᔔᓕᐋᓇ᙮ 25(ᑮ ᐃᑌᐗᒃ ᒫᑲ, ᐅᑭᒪᐤ, ᐋᔭᐌᐤ ᒥᑖᑦ ᑭᒋᔔᓕᐋᓇ᙮) 26ᐌᓴ ᑭᑦ ᐃᑎᓇᐗᐤ, ᒥᓯᐌ ᑕᑐ ᐊᐌᓇ ᑳ ᐋᔮᑦ ᑲᑕ ᒥᓛᑲᓂᐎᐤ: ᐊᓇ ᒫᑲ ᐁᑳ ᑳ ᐋᔮᑦ ᐋᐳᒋᑲ ᐊᓂᐁᓕᐤ ᑳ ᐋᔮᑦ ᑲᑕ ᒪᔅᑲᒫᑲᓂᐎᐤ᙮ 27ᒫᑲ ᐊᓂᑭ ᑳ ᐸᒀᔑᒋᒃ, ᐁᑳ ᑳ ᐅᒋ ᓇᑕᐌᓕᒥᒋᒃ ᑭᒋ ᑎᐯᓕᒪᑭᒃ, ᐅᑕ ᐯᔑᑯᒃ, ᓂᐹᐃᑯᒃ ᒫᑲ ᐁ ᐙᐸᒪᑭᒃ᙮
ᐸᔅᑫᓛᑫᐎ ᓈᑕᒻ ᒋᕉᓴᓚᒻ
(ᒫᑎᐤ 21:1–11; ᒫᕐᒃ 11:1–11; ᒑᓐ 12:12–19)
28ᐃᔅᐱ ᒫᑲ ᐅᒪ ᑳ ᐃᔑ ᐋᔭᒥᑦ, ᑮ ᓂᑳᓄᑌᐤ, ᐁ ᐊᑎ ᐃᑐᑌᑦ ᒋᕉᓴᓚᒥᒃ᙮ 29ᑮ ᐃᑭᓐ ᒫᑲ ᐃᔅᐱ ᑭᔑᐙᑦ ᐁᑖᑦ ᐯᑦᐯᒋᐃᒃ ᓀᔥᑕ ᐯᑕᓂᐃ, ᐗᒋᐤ ᐊᓕᑉᔅ ᑳ ᐃᔑᓂᑲᑌᒃ, ᑮ ᐃᔑᑎᔕᐌᐤ ᓂᔔ ᐅ ᑭᔅᑭᓄᐊᒪᐙᑲᓇ, 30ᐁ ᐃᑗᑦ, ᐃᑐᑌᒃ ᓀᒪ ᐃᑖᐎᓂᔑᒃ ᐅᑎᔥᑳᐤ ᑳ ᐃᑕᑾᒃ; ᐁᑯᑕ ᒫᑲ, ᐱᑐᑫᔦᑴ, ᑭ ᑳ ᒥᔅᑲᐙᐗᐤ ᐋᓯᔑᔥ ᐁ ᒫᑯᐱᓱᑦ, ᐁᑳ ᐎᔅᑳᑦ ᐊᐌᓇ ᑳ ᐅᒋ ᑌᑕᐱᑦ: ᐋᐸᐅᒃ, ᐅᑕ ᒫᑲ ᐯᔑᒃ᙮ 31ᑮᔥᐱᓐ ᒫᑲ ᐊᐌᓇ ᑲᑴᒋᒥᑖᑴ, ᑖᓀᑭ ᐌᒋ ᐋᐸᐌᒃ? ᐅᒪ ᑭ ᑳ ᐃᑖᐗᐤ, ᐅᑎᐯᓕᒋᑫᐤ ᓇᑕᐌᓕᒣᐤ᙮
32ᐊᓂᑭ ᒫᑲ ᑳ ᐃᔑᑎᔕᐙᑲᓂᐎᒋᒃ ᑮ ᑭᑐᑌᐗᒃ, ᑮ ᒥᔅᑲᒶᒃ ᒫᑲ ᑖᐱᔅᑯᒡ ᐁ ᑮ ᐃᑎᑯᒋᒃ᙮ 33ᒣᒀᒡ ᒫᑲ ᐁ ᐋᐸᐙᒋᒃ ᐋᓯᔑᔕ, ᑮ ᐃᑎᑯᐗᒃ ᐊᓂᐃ ᑳ ᑎᐯᓕᒫᓕᒋ, ᑖᓀᑭ ᐌᒋ ᐋᐸᐌᒃ ᐋᓯᔑᔥ?
34ᑮ ᐃᑗᐗᒃ ᒫᑲ, ᐅᑎᐯᓕᒋᑫᐤ ᓇᑕᐌᓕᒣᐤ᙮ 35ᑮ ᐯᑐᐌᐗᒃ ᒫᑲ ᒋᓴᓴ: ᑮ ᑌᑕᔅᑖᐗᒃ ᒫᑲ ᐅ ᐎᓛᒋᑲᓂᐙᐗ ᐋᓯᔑᔑᒃ, ᐁᑯ ᒫᑲ ᑎᐁᑕᓛᒋᒃ ᒋᓴᓴ᙮ 36ᐁ ᐊᑎ ᐱᒧᑌᒋᒃ ᒫᑲ, ᑮ ᑕᔗᑭᑎᑖᐗᒃ ᐅ ᐎᓛᒋᑲᓂᐙᐗ ᒣᔅᑲᓈᒃ᙮
37ᐃᔅᐱ ᒫᑲ ᑭᔑᐙᒃ ᑌᑯᔑᒃ ᐃᑕ ᐁ ᐅᒋ ᓵᑲᒋᐌᒃ ᐊᓕᑉᔅ ᐗᒋ, ᒥᓯᐌ ᒥᔭᒪᐎᒥᒉᑎᒋᒃ ᑭᔅᑭᓄᐊᒪᐙᑲᓇᒃ ᑮ ᒫᒋ ᒥᓚᐙᑕᒶᒃ, ᓀᔥᑕ ᒫᒥᒋᒣᐗᒃ ᑭᒋᒪᓂᑐᐗ ᐁ ᑭᔗᐌᒋᒃ, ᒥᓯᐌ ᐊᓂᐃ ᒫᒪᑖᐎ ᐊᑑᔅᑫᐎᓇ ᐅᒋ ᑳ ᑮ ᐙᐸᑕᑭᒃ; 38ᐁ ᐃᑗᒋᒃ, ᔕᐌᓕᑖᑯᓯᐤ ᐊᓇ ᑭᒋᐅᑭᒪᐤ ᑳ ᐯᒋ ᐃᑐᑌᑦ ᐅᑎᐯᓕᒋᑫᐗ ᐅᑦ ᐃᔑᓂᑳᓱᐎᓂᓕᒃ; ᑳᔮᒣᓕᑕᒧᐎᓐ ᑭᒋᑭᔑᑯᒃ, ᒫᒥᒋᒥᑯᓯᐎᓐ ᒫᑲ ᒫᐗᒋ ᐃᔥᐱᒥᒃ ᑭᔑᑯᒃ᙮
39ᐋᑎᑦ ᒫᑲ ᐸᕋᓯᔭᒃ ᒥᔮᒪᐎᒥᒉᑎᓕᒋ ᐃᓕᓕᐗ ᐅᒋ ᑮ ᐃᑌᐗᒃ, ᑫᔅᑭᓄᐊᒫᑫᔭᓐ, ᑭᑕᐊᒪᐎᒃ ᑭ ᑭᔅᑭᓄᐊᒪᐙᑲᓇᒃ᙮
40ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᑭ ᐎᑕᒫᑎᓇᐗᐤ, ᑮᔥᐱᓐ ᐅᑯ ᑭᐱᑕᐌᒋᒃ, ᐊᓯᓂᔭᒃ ᑣᔦᒃ ᑲᑕ ᑌᐺᐸᓇᒃ᙮
ᒋᓴᔅ ᒫᑐᑐᑕᒻ ᒋᕉᓴᓚᒻ
41ᐃᔅᐱ ᒫᑲ ᑭᔑᐙᒃ ᑌᑯᔑᒃ, ᑮ ᑲᓇᐙᐸᑕᒻ ᐃᑖᐎᓂᓕᐤ, ᓀᔥᑕ ᑮ ᒫᑐᑐᑕᒻ, 42ᐁ ᐃᑗᑦ, ᑮᔥᐱᓐ ᑭ ᑭᔅᑫᓕᑕᒧᐙᐸᓀ, ᑭᓚ ᐅᑎ, ᒥᑯᒋᑲ ᐊᓄᒡ ᒣᒀᒡ ᐁ ᐅᑭᔑᑳᒥᔭᓐ ᐊᓂᐃ ᑫᒀᓇ ᑫ ᐅᒋ ᑳᔮᒣᓕᑕᒪᓐ! ᐊᓄᒡ ᒫᑲ ᑳᑖᓂᐗᓋ ᑭᔅᑭᔑᑾ ᐅᒋ᙮ 43ᐌᓴ ᐊᓂᐃ ᑭᔑᑳᐗ ᑭ ᑳ ᐅᑎᑎᑯᓐ, ᐃᔅᐱ ᐊᓂᑭ ᑳ ᐸᒀᑎᔅᑭᒃ ᑫ ᐱᔅᑾᑖᐗᑲᐃᑫᔅᑖᔅᑭᒃ, ᓀᔥᑕ ᒥᑐᓂ ᑫ ᐙᔅᑳᔅᑳᔅᑭᒃ, ᓀᔥᑕ ᑫ ᑭᐸᐅᔅᑭᒃ ᒥᓯᐌ ᐊᓕᑕᐤ, 44ᓀᔥᑕ ᑭ ᑳ ᑕᑕᑯᐅᑾᒃ ᒧᔅᑕᔅᑲᒥᒃ, ᓀᔥᑕ ᑭᑦ ᐊᐙᔑᒥᔕ ᑳ ᐱᒋᔅᑳᔅᑭᒃ; ᓇᒪᐎᓚ ᒫᑲ ᑲᑕ ᐃᔥᑯᓀᐗᒃ ᐯᔭᒃ ᑭᑦ ᐊᓯᓂᒪ ᑕᑯᒡ ᑯᑕᑭᔭ, ᐁᑳ ᐁ ᐅᒋ ᑭᔅᑫᓕᑕᒪᓐ ᐃᔅᐱ ᐁ ᒫᐗᑎᑎᑲᐎᔭᓐ᙮
ᒋᓴᔅ ᐃᑐᑌᐤ ᑭᒋ ᐊᔭᒥᐁᐎᑲᒥᑯᒃ
(ᒫᑎᐤ 21:12–17; ᒫᕐᒃ 11:15–19; ᒑᓐ 2:13–22)
45ᑮ ᐱᑐᑫᐤ ᒫᑲ ᑭᒋᐋᔭᒥᐁᐎᑲᒥᑯᒃ, ᓀᔥᑕ ᑮ ᒫᒋ ᐗᓚᐎᐌᐱᓀᐤ ᐊᓂᐃ ᐁᑯᑕ ᑳ ᐊᑖᐙᑫᓕᒋ, ᓀᔥᑕ ᐊᓂᐃ ᑳ ᐊᑖᐌᓕᒋ; 46ᐁ ᐃᑖᑦ, ᐃᑕᓯᓇᐃᑳᑌᐤ, ᓂ ᐙᔅᑳᔨᑲᓂᒻ ᐁᐗᒀᓂ ᐋᔭᒥᐁᐎᑲᒥᒃ; ᒫᑲ ᑭᓚᐗᐤ ᑭᒧᑎᔥᑲᒃ ᐅ ᐙᑎᐗᐤ ᑭ ᑮ ᐃᔑᑖᓇᐗᐤ᙮
47ᒣᔕᒃ ᒫᑲ ᑮ ᑭᔅᑭᓄᐊᒫᑫᐤ ᑭᒋᐋᔭᒥᐁᐎᑲᒥᑯᒃ᙮ ᒫᑲ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᐅᒪᓯᓇᐃᑫᐗᒃ, ᓀᔥᑕ ᑳ ᓂᑳᓀᓕᑖᑯᓯᒋᒃ ᐃᓕᓕᐗᒃ ᑮ ᓈᓇᑕᐌᓕᑕᒶᒃ ᑭᒋ ᓂᔑᐗᓈᒋᐋᒋᒃ; 48ᓇᒪᐎᓚ ᒫᑲ ᑮ ᒥᔅᑲᒶᒃ ᑫᒀᓕᐤ ᑫ ᑐᑕᑭᒃ: ᐌᓴ ᒥᓯᐌ ᐃᓕᓕᐗᒃ ᓈᔅᐱᒡ ᑮ ᑯᔥᒀᐙᒋ ᓇᑐᑕᐌᐗᒃ᙮
Currently Selected:
ᐅᐸᓓᑭᔅ ᓘᒃ 19: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
