ᐅᐸᓓᑭᔅ ᓘᒃ 22
22
ᑭᒧᒡ ᐁ ᐎ ᐸᑭᑎᓈᒋᒃ ᒋᓴᓴ
(ᒫᑎᐤ 26:1–5; ᒫᕐᒃ 14:1–2; ᒑᓐ 11:45–53)
1ᐁᑳ ᐁ ᐅᐱᓱᑦ ᐊᓚᑯᓇᐤ ᒪᑯᔐᐎᓐ ᒫᑲ ᑮ ᐯᔓᓈᑾᓐ, ᒥᔮᔥᑳᑫᐎᓂ ᒪᑯᔐᐎᓐ, ᑳ ᐃᔑᓂᑳᑌᒃ᙮ 2ᑭᒋ ᓵᓵᑭᐎᓕᐌᐎᓕᓕᐗᒃ ᒫᑲ ᓀᔥᑕ ᐅᒪᓯᓇᐃᑫᐗᒃ ᑮ ᓈᓇᑕᐌᓕᑕᒶᒃ ᑫ ᐃᔑ ᓂᐸᐋᒋᒃ; ᐌᓴ ᑮ ᑯᔅᑌᐗᒃ ᐃᓕᓕᐗ᙮
ᒎᑕᔅ ᓈᔅᑯᒧ ᒋ ᐗᔦᔑ ᐸᑭᑎᓈᑦ ᒋᓴᓴ
(ᒫᑎᐤ 26:14–16; ᒫᕐᒃ 14:10–11)
3ᐁᑯ ᓭᑖᓐ ᐹᑐᑫᔅᑳᑯᐙᑦ ᒎᑕᓴ ᑳ ᐊᔅᐱᓂᑳᓱᓕᒋ ᐃᔅᑳᕆᔭᑦ, ᐁ ᐊᔑᑕᑭᒫᑲᓂᐎᓕᒋ ᐊᓂᐃ ᓂᔓᔖᑉ᙮ 4ᑮ ᑭᑐᑌᐤ ᒫᑲ, ᑮ ᐙᐎᒋᐋᔭᒥᒣᐤ ᒫᑲ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᓇᑐᐸᓕᐎᑭᒫᐗ, ᑫ ᐃᔑ ᐙᔦᔑᐸᑭᑎᓇᒪᐙᑦ᙮ 5ᑮ ᓯᑭᓓᓯᐗᒃ ᒫᑲ, ᑮ ᐊᔓᑕᒪᐌᐗᒃ ᒫᑲ ᔔᓕᐋᓇ ᑭᒋ ᒥᓛᒋᒃ᙮ 6ᑮ ᓇᔅᑯᒧ ᒫᑲ, ᓀᔥᑕ ᑮ ᓈᓇᑕᐌᓕᑕᒻ ᑫ ᐃᔑ ᐙᔦᔑᐸᑭᑎᓇᒪᐙᑦ ᐁᑳ ᐁ ᒫᒪᐎᒥᒉᑎᓕᒋ ᐱᓕᓕᐗ᙮
ᒋᓴᔅ ᐙᐌᓕᐤ ᒋ ᒥᒋᑦ ᒥᔭᔅᑳᑫᐎ ᒪᑯᔐᐎᓐ
(ᒫᑎᐤ 26:17–25; ᒫᕐᒃ 14:12–21; ᒑᓐ 13:21–30)
7ᐁᑯ ᐌᑎᒋᐸᓕᒃ ᐁ ᑭᔑᑳᒃ ᐁᑳ ᐁ ᐅᐱᓱᑦ ᐊᓚᑯᓇᐤ ᐁ ᐋᐸᒋᐋᑲᓂᐎᑦ, ᐃᔅᐱ ᔮᓕᑌᓪ ᑫ ᓂᐸᐋᑲᓂᐎᑦ ᒥᔮᔥᑳᑫᐎ ᒫᓂᔥᒑᓂᔑᔥ᙮ 8ᑮ ᑭᒋᑎᔕᐌᐤ ᒫᑲ ᐱᑕᕋ ᓀᔥᑕ ᒑᓇ, ᐁ ᐃᑗᑦ, ᓇᑕᐎ ᐋᔦᔅᑲᐎᑕᒪᐎᓈᓐ ᒥᔮᔥᑳᑫᐎ ᒪᑯᔐᐎᓐ, ᑭᒋ ᒥᒋᓱᔭᒃ᙮
9ᑮ ᐃᑎᑯ ᒫᑲ, ᑖᓐᑌ ᐁᔑ ᓇᑕᐌᓕᒥᔮᒃ ᑭᒋ ᐋᔦᔅᑲᐎᑖᔮᒃ?
10ᑮ ᐃᑌᐤ ᒫᑲ, ᒫᑎᑲ, ᐃᔅᐱ ᑮ ᐱᑐᑫᔦᑴ ᐃᑖᐎᓂᒃ, ᑭ ᑳ ᓇᑭᔥᑳᑯᐗᐤ ᐃᓕᓕᐤ ᐁ ᐱᒥᐎᑖᑦ ᒀᐱᑳᑲᓂᓕᐤ ᐁ ᓵᑲᔅᑭᓀᓕᒃ ᓂᐱᓕᐤ: ᓄᔅᐱᓇᑎᒃ ᐱᑯ ᐊᓂᒪ ᐙᔅᑳᔨᑲᓂᒃ ᑫ ᐃᔑ ᐱᑐᑫᑦ᙮ 11ᑭ ᑳ ᐃᑖᐗᐤ ᒫᑲ ᐊᓇ ᑳ ᑎᐯᓕᑕᒃ ᐙᔅᑳᔨᑲᓂᓕᐤ, ᐅᑭᔅᑭᓄᐊᒫᑫᐤ ᑭᑎᒃ, ᑖᓐᑌ ᒫᓐᑌᐎᑲᒥᒃ ᐃᑕ ᑫ ᒥᒋᔮᓐ ᒥᔮᔥᑳᑫᐎ ᒪᑯᔐᐎᓐ ᐊᓯᒋ ᓂ ᑭᔅᑭᓄᐊᒪᐙᑲᓇᒃ? 12ᑭ ᑳ ᐙᐸᑎᓕᑯᐗᐤ ᒫᑲ ᐁ ᒥᔖᓕᒃ ᐱᔅᑭᒋ ᐙᔅᑳᔦᑲᓂᓕᐤ ᐃᔥᐱᒥᒃ, ᐁ ᐙᐌᔑᒋᑳᑌᓕᒃ: ᐁᑯᑕ ᐋᔦᔅᑲᐎᑖᒃ᙮
13ᑮ ᐃᑐᑌᐗᒃ ᒫᑲ, ᓀᔥᑕ ᑮ ᒥᔅᑲᒶᒃ ᑖᐱᔅᑯᒡ ᐁ ᑮ ᐃᑎᑯᒋᒃ: ᑮ ᐋᔦᔅᑲᐎᑖᐗᒃ ᒫᑲ ᒥᔮᔥᑳᑫᐎ ᒪᑯᔐᐎᓂᓕᐤ᙮
ᐅᑎᐯᓕᒋᑫᐤ ᐅᓂᐯᑴᐎᓐ
(ᒫᑎᐤ 26:26–30; ᒫᕐᒃ 14:22–26; ᓂᔥᑕᒻ ᑯᕆᓐᑎᐊᓇ 11:23–25)
14ᐃᔅᐱ ᒫᑲ ᐌᑎᒋᐸᓕᒃ ᑎᐹᔨᑲᓐ ᐱᓯᒧᑳᓂᒃ, ᑮ ᓇᐊᐱᐤ, ᐊᓯᒋ ᓀᔥᑕ ᐊᓂᑭ ᓂᔓᔖᑉ ᐊᐸᔅᑕᓚᒃ᙮ 15ᑮ ᐃᑌᐤ ᒫᑲ, ᓈᔅᐱᒡ ᓂ ᑮ ᓇᑕᐌᓕᑌᓐ ᑭᒋ ᐎᒋᒥᒋᓱᒥᑕᑾᒃ ᐅᒪ ᒥᔮᔥᑳᑫᐎ ᒪᑯᔐᐎᓐ ᐸᒧᔑ ᐎᓴᑫᓕᑕᒫᓐ: 16ᐌᓴ ᑭᑦ ᐃᑎᓇᐗᐤ, ᓇᒪᐎᓚ ᒥᓇ ᓂ ᑳ ᐅᒋ ᒥᒋᓐ, ᐹᑎᒪ ᑎᐱᐸᓕᑫ ᑭᒋᒪᓂᑐ ᐅᑦ ᐅᑭᒫᐎᐎᓂᒃ᙮
17ᑮ ᐅᑎᓇᒻ ᒫᑲ ᒥᓂᒀᑲᓂᓕᐤ, ᓀᔥᑕ ᑮ ᓇᓈᔅᑯᒧ, ᑮ ᐃᑗᐤ ᒫᑲ, ᐅᑎᓇᒧᒃ ᐅᒪ, ᒫᑎᓇᒫᑐᒃ ᒫᑲ: 18ᐌᓴ ᑭᑦ ᐃᑎᓇᐗᐤ, ᓇᒪᐎᓚ ᓂ ᑳ ᐅᒋ ᒥᓂᒀᑐᑕᒸᓐ ᐅ ᒥᓂᔕ ᔓᒥᓈᑎᒃ, ᐹᑎᒫ ᐅᑎᒋᐸᓕᓕᑫ ᑭᒋᒪᓂᑐ ᐅᑦ ᐅᑭᒫᐎᐎᓐ᙮
19ᑮ ᐅᑎᓀᐤ ᒫᑲ ᐊᓚᑯᓇᐗ, ᑮ ᓇᓇᔅᑯᒧ ᒫᑲ, ᓀᔥᑕ ᑮ ᐱᑯᓀᐤ, ᐁᑯ ᒫᓛᑦ, ᐁ ᐃᑗᑦ, ᐁᐗᑯ ᐅᒪ ᓂᔭᐤ ᑳ ᒥᓕᐙᓂᐗᒃ ᑭᓚᐗᐤ ᐅᒋ: ᐅᒪ ᑐᑕᒧᒃ ᐁ ᑭᔅᑭᓯᑐᑕᐎᔦᒃ᙮ 20ᑖᐱᔅᑯᒡ ᓀᔥᑕ ᒥᓂᒀᑲᓂᓕᐤ ᑳ ᓂᐯᑴᒋᒃ, ᐁ ᐃᑗᑦ, ᐅᒪ ᒥᓂᒀᑲᓐ ᐁᐗᑯ ᐅᔥᑭ ᓇᔅᑯᒥᑐᐎᓐ ᓂᒥᑯᒃ, ᑲᓚᐗᐤ ᑳ ᐅᒋ ᓯᑭᓂᑳᑌᒃ᙮
21ᒫᑲ, ᒫᑎᑲ, ᐅᑕ ᐁ ᐃᑖᔮᓐ ᐃᑕᑾᓂᓕᐤ ᒥᒋᓱᓈᑎᑯᒃ ᐅᒋᒋ ᐊᓇ ᑳ ᐙᔦᔑᐸᑭᑎᓂᑦ᙮ 22ᑖᐺ ᒫᑲ ᐃᓕᓕᐎᑯᓯᓵᓐ ᑭᑐᑌᐤ, ᐁ ᑮ ᐃᔑ ᐅᓓᓕᒋᑳᑌᒃ: ᒫᑲ ᑲᑕ ᑲᒀᑕᑭᓯᐤ ᐊᓇ ᐃᓕᓕᐤ ᑫ ᐙᔦᔑᐸᑭᑎᓈᑦ!
23ᑮ ᒫᒋ ᑲᑴᒋᒥᑐᐗᒃ ᒫᑲ, ᐊᐌᓇ ᐁ ᐃᑕᓯᒋᒃ ᑫ ᑐᑕᒃ ᐅᒣᓕᐤ᙮
ᐊᔭᒥᐃᑎᐎᓐ ᑭᔅᑎᓯᐎᓐ ᐅᒋ
24ᑮ ᐋᔑᑌᒥᑐᐗᒃ ᒫᑲ, ᐊᐌᓇ ᐁ ᐃᑕᓯᒋᒃ ᑫ ᒫᐗᒋ ᐃᔅᐯᓕᑖᑯᓯᑦ᙮ 25ᑮ ᐃᑌᐤ ᒫᑲ, ᒉᓐᑖᐃᓚᒃ ᑎᐯᓕᒥᑯᐗᒃ ᐅ ᑭᒋᐅᑭᒫᒥᐙᐗ; ᐊᓂᐃ ᒫᑲ ᑳ ᑎᐯᓕᒥᑯᒋᒃ ᐃᔑᓂᑳᑖᑲᓂᐎᓕᐗ ᐅᒥᓗᑐᑖᑫᐗᒃ᙮ 26ᒫᑲ ᓇᒪᐎᓚ ᐅᒪ ᑭ ᑳ ᐃᔑ ᐋᔮᓇᐗᐤ: ᒫᑲ ᐊᓇ ᐁ ᐃᑕᔑᔦᒃ ᑳ ᒪᐗᒋ ᑭᔅᑎᓯᑦ, ᐁᑯᔑ ᑲᑕ ᐃᑎᐤ ᑖᐱᔅᑯᒡ ᐊᓇ ᑳ ᐅᔑᒥᒫᐎᑦ; ᐊᓇ ᓀᔥᑕ ᑳ ᓂᑳᓀᓕᑖᑯᓯᑦ, ᑖᐱᔅᑯᒡ ᐊᓇ ᑳ ᐱᒥᐃᐌᑦ᙮ 27ᐌᓴ ᐊᐌᓇ ᐊᓇ ᐊᐙᓯᑌ ᑫᔅᑎᓯᑦ, ᐊᓇ ᑳ ᐊᐱᑦ ᐁ ᒥᒋᓱᑦ, ᓀᔥᑕᐱᑯ ᐊᓇ ᑳ ᐱᒥᐃᐌᑦ? ᓇᒪ ᓈ ᐊᓇ ᑳ ᐊᐱᑦ ᐁ ᒥᒋᓱᑦ? ᓂᓚ ᒫᑲ ᑭ ᐎᒉᐎᑎᓇᐗᐤ ᑖᐱᔅᑯᒡ ᐊᓇ ᑳ ᐱᒥᐃᐌᑦ᙮
28ᑭᓚᐗᐤ ᐁᐗᒀᓂᑭ ᑳ ᑮ ᐎᒉᐎᔦᒃ ᓂ ᑲᑴᒋᐃᑯᓯᐎᓂᒃ: 29ᑭ ᐸᑭᑎᓇᒫᑎᓇᐗᐤ ᒫᑲ ᐅᑭᒫᐎᐎᓐ, ᑖᐱᔅᑯᒡ ᐁ ᑮ ᐸᑭᑎᓇᒪᐎᑦ ᓄᑖᐎ; 30ᑭᒋ ᒥᒋᓱᔦᒃ ᓀᔥᑕ ᑭᒋ ᒥᓂᑴᔦᒃ ᓂ ᒥᒋᓱᓈᑎᑯᒃ ᓂᑦ ᐅᑭᒫᐎᐎᓂᒃ, ᓀᔥᑕ ᐅᑭᒪᐗᐱᐎᓂᒃ ᑭᒋ ᐊᐱᔦᒃ, ᐁ ᑎᐹᔅᑯᓀᑾᒃ ᐊᓂᑭ ᐁ ᓂᔓᔖᐳᑌᐎᓯᑦ ᐃᔅᕃᐃᓪ᙮
ᒋᓴᔅ ᓂᑳᓂᐎᑕᒻ ᑫ ᐋᑕᐌᓕᒥᑯᑦ ᐱᑕᕋ
(ᒫᑎᐤ 26:31–35; ᒫᕐᒃ 14:27–31; ᒑᓐ 13:36–38)
31ᐅᑎᐯᓕᒋᑫᐤ ᒫᑲ ᑮ ᐃᑗᐤ, ᓵᐃᒪᓐ, ᓵᐃᒪᓐ, ᒫᑎᑲ, ᓭᑖᓐ ᑭ ᑮ ᓇᑕᐌᓕᒥᑯᐗᐤ ᑭᒋ ᓯᑳᐌᐸᓕᐃᑖᒃ ᑖᐱᔅᑯᒡ ᐸᑴᔑᑲᓂᒥᓇ᙮ 32ᒫᑲ ᑭ ᑮ ᐋᔭᒥᐁᔅᑕᒫᑎᓐ, ᐁᑳ ᑭᒋ ᓄᑌᐸᓕᒃ ᑭ ᑖᐺᔦᓕᑕᒧᐎᓐ᙮ ᐃᔅᐱ ᒫᑲ ᑮ ᑴᔅᑳᑎᓯᔭᓀ, ᓵᐱᐎᐃᒃ ᑭᒋᔖᓇᒃ᙮
33ᑮ ᐃᑌᐤ ᒫᑲ, ᑌᐯᓕᒋᑫᔭᓐ, ᓂᑦ ᐋᔦᔅᑲᐎᓰᓐ ᑭᒋ ᐎᒉᐎᑖᓐ, ᑭᐸᐅᑐᐎᑲᒥᑯᒃ, ᓀᔥᑕ ᓂᐱᐎᓂᒃ ᐃᔑ᙮
34ᑮ ᐃᑗᐤ ᒫᑲ, ᑭ ᐎᑕᒫᑎᓐ ᐱᑕᕐ, ᓈᐯ ᐸᑲᐋᒀᓐ ᓇᒪᐎᓚ ᑲᑕ ᓄᑖᑯᓯᐤ ᐊᓄᒡ ᐁ ᑭᔑᑳᓕᒃ ᐸᒧᔑ ᓂᔅᑡᐤ ᐋᓉᑕᒪᓐ ᐁ ᑭᔅᑫᓕᒥᔭᓐ᙮
ᔔᓕᐋᓂᐗᑦ, ᒥᒋᒥᐗᑦ, ᓀᔥᑕ ᔑᒫᑲᓐ
35ᑮ ᐃᑌᐤ ᒫᑲ, ᐃᔅᐱ ᑳ ᑭᒋᑎᔕᐅᑕᑾᒃ ᐁᑳ ᐁ ᐋᔮᔦᒃ ᔔᓕᐊᓂᐗᑦ, ᓀᔥᑕ ᒥᒋᒥᐗᑦ, ᓀᔥᑕ ᒪᔅᑭᓯᓇ, ᑭ ᑮ ᐙᐙᓂᓯᓇᐗᐤ ᓈ ᑫᒀᓐ?
ᑮ ᐃᑗᐗᒃ ᒫᑲ, ᓇᒪ ᑫᒀᓐ᙮
36ᐁᑯ ᐁᑖᑦ, ᒫᑲ ᐊᓄᒡ, ᐊᓇ ᑳ ᐋᔮᑦ ᔔᓕᐊᓂᐗᑎᓕᐤ, ᑳᔮᒻ ᑲᑕ ᐅᑎᓇᒻ, ᓀᔥᑕ ᐅ ᒥᒋᒥᐗᑦ: ᐊᓇ ᓀᔥᑕ ᐁᑳ ᑳ ᐋᔮᑦ ᔑᒫᑲᓂᓕᐤ ᐁᑯᔑ ᑲᑕ ᐊᑖᐙᑫᐤ ᐅ ᐎᓛᒋᑲᓐ, ᐯᔭᒃ ᒫᑲ ᑲᑕ ᐊᑖᐌᐤ᙮ 37ᐌᓴ ᑭᑦ ᐃᑎᓇᐗᐤ, ᐅᒪ ᑳ ᒥᓯᓇᐃᑳᑌᒃ ᑲᑕ ᑎᐱᐸᓕᐤ ᓂᓚ ᐅᒋ, ᑮ ᐃᔑᑕᑭᒫᑲᓂᐎᐤ ᒫᑲ ᐊᓂᐃ ᑳ ᐗᓂᑐᑕᒥᓕᒋ: ᐌᓴ ᐊᓂᐃ ᑫᒀᓇ ᑳ ᐃᑖᒋᒥᑲᐎᔮᓐ ᑲᑕ ᐃᔥᒀᐸᓕᐗ᙮
38ᑮ ᐃᑗᐗᒃ ᒫᑲ, ᑌᐯᓕᒋᑫᔭᓐ, ᒫᑎᑲ, ᐅᐅ ᓂᔓ ᔑᒫᑲᓇ᙮
ᑮ ᐃᑌᐤ ᒫᑲ, ᐁᒀᓂ᙮
ᒋᓴᔅ ᐊᔭᒥᒋᑫᐤ ᐗᒋᒃ
(ᒫᑎᐤ 26:36–46; ᒫᕐᒃ 14:32–42)
39ᑮ ᐯᒋ ᐗᓚᐎᐤ ᒫᑲ, ᓀᔥᑕ ᑮ ᐃᑐᑌᐤ, ᒬᒋ ᑳ ᐋᔨᑐᑕᑭᐸᓐ, ᐊᓐᑕ ᐊᓕᑉᔅ ᐗᒌᒃ; ᑮ ᓄᔅᐱᓈᑎᑯ ᓀᔥᑕ ᐅ ᑭᔅᑭᓄᐊᒪᐙᑲᓇ᙮ 40ᐃᔅᐱ ᒫᑲ ᐁᑯᑕ ᑳ ᑕᑯᔑᒃ, ᑮ ᐃᑌᐤ, ᐋᔭᒥᐋᒃ ᐁᑳ ᑲᑴᒋᐃᐌᐎᓂᒃ ᑭᒋ ᐃᔅᐸᓕᔦᒃ᙮
41ᑮ ᓇᑲᑌᐤ ᒫᑲ ᓈᓐᑕᐤ ᐃᔥᐱᔥ ᐊᓯᓂ ᐁ ᐌᐱᓈᑲᓂᐎᑦ; ᑮ ᐅᒋᒋᑾᓇᐱᐤ ᒫᑲ, ᓀᔥᑕ ᑮ ᐋᔭᒥᐋᐤ᙮ 42ᐁ ᐃᑗᑦ, ᓄᑖ, ᑮᔥᐱᓐ ᐙ ᑐᑕᒧᐗᓂ, ᐃᑲᑌᓇᒪᐎᓐ ᐅᒪ ᒥᓂᒀᑲᓐ: ᐁᓕᐌᒃ ᒫᑲ, ᓇᒪᐎᓚ ᓂᓚ ᐁ ᐃᑌᓕᑕᒫᓐ, ᒫᑲ ᐁ ᐃᑌᓕᑕᒪᓐ ᑭᓚ, ᑲᑕ ᐃᑭᓐ᙮ 43ᑮ ᓄᑯᓰᔅᑖᑯ ᒫᑲ ᐁᓐᒐᓚ ᑭᒋᑭᔑᑯᒃ ᐅᒋ ᐁ ᓵᐱᐎᐃᑯᑦ᙮ 44ᓈᔅᐱᒡ ᒫᑲ ᐁ ᒥᔕᒣᓕᑕᒃ ᐊᐙᓯᑌ ᓱᑲ ᑮ ᐋᔭᒥᐋᐤ: ᐅᑦ ᐋᐺᓯᐎᓐ ᒫᑲ ᑮ ᐃᔑᓈᑾᓂᓕᐤ ᑖᐱᔅᑯᒡ ᒥᑯ ᐁ ᒥᔑᐸᑭᑲᐗᒃ ᐊᔅᑮᒃ᙮
45ᐃᔅᐱ ᒫᑲ ᐯᓯᑯᑦ ᐁ ᑮ ᐋᔭᒥᐋᑦ, ᓀᔥᑕ ᑳ ᐯᒋ ᓈᑖᑦ ᐅ ᑭᔅᑭᓄᐊᒪᐙᑲᓇ, ᑮ ᒥᔅᑲᐌᐤ ᐁ ᓂᐹᓕᒋ ᐁᔅᐱᒋ ᒥᒋᓚᐌᓯᓕᒋ᙮ 46ᑮ ᐃᑌᐤ ᒫᑲ, ᑖᓀᑭ ᐌᒋ ᓂᐹᔦᒃ? ᐗᓂᔥᑳᒃ, ᐋᔭᒥᐋᒃ ᒫᑲ, ᐁᑳ ᑲᑴᒋᐃᐌᐎᓂᒃ ᑭᒋ ᐃᔅᐸᓕᔦᒃ᙮
ᐅᑎᓀᐗᒃ ᒋᓴᓴ
(ᒫᑎᐤ 26:47–56; ᒫᕐᒃ 14:43–50; ᒑᓐ 18:3–11)
47ᒣᒀᒡ ᒫᑲ ᑫᔮᐸᒡ ᐁ ᐋᔭᒥᑦ, ᒫᑎᑲ, ᒥᔮᒪᐎᒥᒉᑎᒋᒃ ᐃᓕᓕᐗᒃ, ᐊᓇ ᓀᔥᑕ ᒎᑕᔅ ᑳ ᐃᔑᓂᑳᓱᑦ, ᐯᔭᒃ ᐊᓂᑭ ᓂᔓᔖᑉ, ᐁ ᓂᑳᓄᑕᐙᑦ, ᑮ ᐊᑎ ᐯᔣᐸᒣᐤ ᒫᑲ ᒋᓴᓴ ᑭᒋ ᐅᒉᒫᑦ᙮ 48ᒫᑲ ᒋᓴᔅ ᑮ ᐃᑌᐤ, ᒎᑕᔅ, ᑭ ᐙᔦᔑᐸᑭᑎᓇᐤ ᓈ ᐃᓕᓕᐎᑯᓯᓵᓐ ᐁ ᐅᒉᒪᑦ?
49ᐃᔅᐱ ᐊᓂᑭ ᑳ ᐎᒉᐙᒋᒃ ᐎᐋᐸᑕᑭᒃ ᑫᒀᓕᐤ ᑫ ᐊᑎ ᐃᑭᓂᓕᒃ, ᑮ ᐃᑌᐗᒃ, ᑌᐯᓕᒋᑫᔭᓐ, ᓂ ᑳ ᐅᑖᒪᐅᐙᑫᓈᓐ ᓈ ᔑᒫᑲᓐ? 50ᐯᔭᒃ ᐁ ᐃᑕᓯᒋᒃ ᒫᑲ ᑮ ᐅᑖᒪᐅᒣᐤ ᐅᑦ ᐊᑑᔅᑫᓛᑲᓂᒪ ᒪᐗᒋ ᑭᒋ ᓵᓵᑭᐎᓕᐌᐎᓕᓕᐤ, ᑮ ᒪᓂᔕᒬᐤ ᒫᑲ ᐅᑕᐗᑳᓕᐤ ᐅ ᑭᒋᓂᔅᑭᓕᒃ ᐃᑌᑫ᙮
51ᒋᓴᔅ ᒫᑲ ᑮ ᓇᔥᑴᐗᔑᐃᐌᐤ, ᐁ ᐃᑗᑦ, ᐸᑭᑎᓇᒧᒃ ᐅᒪ ᐃᔥᐱᔥ᙮ ᑮ ᓵᒥᓇᒬᐤ ᒫᑲ ᐅᑕᐗᑳᓕᐤ, ᓀᔥᑕ ᑮ ᒥᓇᐙᒋᑕᐌᐤ᙮
52ᐁᑯ ᒋᓴᔅ ᐁᑖᑦ ᑭᒋ ᓵᓵᑭᐎᓕᐌᐎᓕᓕᐗ, ᓀᔥᑕ ᐊᓂᐃ ᑳ ᑎᐯᓕᑕᒥᓕᒋ ᑭᒋᐋᔭᒥᐁᐎᑲᒥᑯᓕᐤ, ᓀᔥᑕ ᑳ ᓂᑳᓀᓕᑖᑯᓯᓕᒋ, ᑳ ᐯᒋ ᓈᑎᑯᑦ, ᑭ ᐯᒋ ᐃᑐᑖᓇᐗᐤ ᓈ ᑖᐱᔅᑯᒡ ᐁ ᓈᑌᒃ ᑭᒧᑎᔉ, ᐁ ᐋᔮᔦᒃ ᔑᒫᑲᓇ ᓀᔥᑕ ᓴᔅᑲᐅᓇ? 53ᒣᒀᒡ ᑕᑡᐤ ᑲᔑᑲᑭ ᑳ ᐎᒉᐎᑕᑾᒃ ᑭᒋᐋᔭᒥᐁᐎᑲᒥᑯᒃ, ᓇᒪᐎᓚ ᑭ ᐅᒋ ᔓᐎᓂᔅᑫᓕᓇᐗᐤ ᑭᒋ ᐅᑎᓂᔦᒃ: ᒫᑲ ᐁᐗᑯ ᐅᒪ ᑭᓚᐗᐤ ᑭ ᑎᐹᔨᑲᓂᐗᐤ ᐱᓯᒧᑳᓂᒃ ᓀᔥᑕ ᐁ ᐃᔑ ᑲᔥᑭᐅᒪᑲᒃ ᐗᓂᑎᐱᔅᑭᓯᐎᓐ᙮
ᐱᑕᕐ ᐋᑕᐌᓕᒣᐤ ᒋᓴᓴ
(ᒫᑎᐤ 26:57–58, 69–75; ᒫᕐᒃ 14:53–54, 66–72; ᒑᓐ 18:12–18, 25–27)
54ᐁᑯ ᐌᑎᓈᒋᒃ, ᓀᔥᑕ ᑮ ᐃᑐᑕᐁᐗᒃ, ᑮ ᐱᑐᑲᐁᐗᒃ ᒫᑲ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐗ ᐅ ᐙᔅᑳᔨᑲᓂᒥᓕᒃ᙮ ᐱᑕᕐ ᒫᑲ ᑮ ᓄᔅᐱᓇᔑᐌᐤ ᐙᓚᐤ ᐅᒋ᙮ 55ᐃᔅᐱ ᒫᑲ ᑳ ᑰᑕᐌᒋᒃ ᐱᑐᑲᒥᒃ, ᓀᔥᑕ ᑳ ᒫᒪᐎ ᓇᐊᐱᒋᒃ, ᑮ ᐎᑕᐱᒥᑯᐗᒃ ᐱᑕᕋ᙮ 56ᒫᑲ ᐯᔭᒃ ᐅᔥᑭᓂᑭᔅᑴᐤ ᑮ ᑲᓇᐙᐸᒣᐤ ᐁ ᒋᑭᔥᑯᑌᐗᐱᓕᒋ, ᓱᑲ ᒫᑲ ᑮ ᑲᓇᐙᐸᒣᐤ, ᓀᔥᑕ ᑮ ᐃᑗᐤ, ᐊᐗ ᐃᓕᓕᐤ ᓀᔥᑕ ᑮ ᐎᒉᐌᐤ᙮
57ᑮ ᐋᓉᑕᒻ ᒫᑲ, ᐁ ᐃᑗᑦ, ᐃᔅᑴᐤ, ᓇᒪᐎᓚ ᓂ ᑭᔅᑫᓕᒪᐤ᙮
58ᓈᑫᔑᔥ ᒫᑲ, ᑯᑕᒃ ᑮ ᐙᐸᒣᐤ, ᑮ ᐃᑗᐤ ᒫᑲ, ᑭᓚ ᓀᔥᑕ ᐯᔭᒃ ᐁ ᐃᑕᓯᒋᒃ᙮
ᐱᑕᕐ ᒫᑲ ᑮ ᐃᑗᐤ, ᐃᓕᓕᐤ, ᓇᒪᐎᓚ ᓂᓚ᙮
59ᐹᑎᒫ ᒫᑲ ᓈᓐᑕᐤ ᐯᔭᒃ ᑎᐹᔨᑲᓐ ᐱᓯᒧᑲᓐ ᐃᔥᐱᔥ, ᑯᑕᒃ ᐁ ᑫᒋᓇᐅᑦ, ᑮ ᐃᑗᐤ, ᑖᐺ ᐊᐗ ᓀᔥᑕ ᑮ ᐎᒉᐌᐤ; ᐌᓴ ᑳᓕᓕᐎᓕᓕᐎᐤ᙮
60ᐱᑕᕐ ᒫᑲ ᑮ ᐃᑗᐤ, ᐃᓕᓕᐤ, ᓇᒪᐎᓚ ᓂ ᑭᔅᑫᓕᑌᓐ ᑳ ᐃᑗᔭᓐ᙮
ᑣᔦᒃ ᒫᑲ, ᒣᒀᒡ ᑫᔮᐸᒡ ᐁ ᐋᔭᒥᑦ, ᓈᐯ ᐹᑲᐋᒀᓐ ᑮ ᓄᑖᑯᓯᐤ᙮ 61ᐅᑎᐯᓕᒋᑫᐤ ᒫᑲ ᑮ ᑴᔅᑭᔅᑴᓕᐤ, ᓀᔥᑕ ᑮ ᑲᓇᐙᐸᒣᐤ ᐱᑕᕋ: ᐱᑕᕐ ᒫᑲ ᑮ ᑭᔅᑭᓯᑐᑕᒬᐤ ᐅᑎᐯᓕᒋᑫᐗ ᐅᑦ ᐋᔭᒥᐎᓂᓕᐤ, ᐁ ᑮ ᐃᑎᑯᑦ, ᐸᒧᔑ ᓄᑖᑯᓯᑦ ᓈᐯ ᐹᑲᐋᒀᓐ, ᓂᔅᑡᐤ ᑭ ᑳ ᐋᓉᑌᓐ ᐁ ᑭᔅᑫᓕᒥᔭᓐ᙮ 62ᐱᑕᕐ ᒫᑲ ᑮ ᐗᓚᐎᐤ, ᓱᑲ ᒫᑲ ᑮ ᒫᑐ᙮
ᐋᔮᓵᒋᐁᐗᒃ ᓀᔥᑕ ᐅᑕᑖᒧᐌᐗᒃ ᒋᓴᓴ
(ᒫᑎᐤ 26:67–68; ᒫᕐᒃ 14:65)
63ᐊᓂᑭ ᐃᓕᓕᐗᒃ ᒫᑲ ᑳ ᒪᒫᒋᑯᓈᒋᒃ ᒋᓴᓴ, ᑮ ᐋᔭᓵᒋᐁᐗᒃ, ᓀᔥᑕ ᑮ ᐅᑖᒪᐌᐗᒃ᙮ 64ᐃᔅᐱ ᒫᑲ ᑳ ᑮ ᐋᑲᐗᐸᐱᑖᒋᒃ, ᑮ ᐸᓯᑴᐌᐗᒃ, ᓀᔥᑕ ᑮ ᑲᑴᒋᒣᐗᒃ, ᐁ ᐃᑗᒋᒃ, ᐸᑾᓇᐤ ᐎᑕ, ᐊᐌᓇ ᑳ ᐸᓯᑴᐅᔉ? 65ᒥᒉᑦ ᑯᑕᑭᔭ ᑫᒀᓇ ᒫᑲ ᑫ ᐹᔅᑕᒧᐎ ᐃᑌᐗᒃ᙮
ᒋᓴᔅ ᐅᑎᔥᑳᐤ ᐅᑎᐹᔅᑯᓂᑫᐗ
(ᒫᑎᐤ 26:59–66; ᒫᕐᒃ 14:55–64; ᒑᓐ 18:19–24)
66ᐎᐸᒡ ᒫᑲ ᐎᐋᐸᓂᓕᒃ, ᐃᓕᓕᐗᒃ ᐅ ᓂᑳᓀᓕᑖᑯᓯᒥᐙᐗ ᓀᔥᑕ ᑭᒋ ᓵᓵᑭᐎᓕᐌᐎᓕᓕᐗᒃ, ᓀᔥᑕ ᐅᒪᓯᓇᐃᑫᐗᒃ, ᑮ ᐯᒋ ᒫᒪᐎ ᐃᑐᑌᐗᒃ, ᓀᔥᑕ ᑮ ᐃᑐᑕᐁᐗᒃ ᐃᑕ ᐁ ᐃᔑ ᑎᐹᔅᑯᓂᑫᒋᒃ, ᐁ ᐃᑗᒋᒃ, 67ᑭᓚ ᓈ ᐊᓇ ᙭? ᐎᑕᒪᐎᓈᓐ᙮
ᑮ ᐃᑌᐤ ᒫᑲ, ᑮᔥᐱᓐ ᐎᑕᒫᑕᑾᑫ, ᓇᒪᐎᓚ ᑭ ᑳ ᑖᐺᑌᓇᐗᐤ: 68ᑮᔥᐱᓐ ᓀᔥᑕ ᑲᑴᒋᒥᑖᑾᑫ, ᓇᒪᐎᓚ ᑭ ᑳ ᓇᔥᑴᐗᔑᐃᓇᐗᐤ ᓇᒪ ᓀᔥᑕ ᑭ ᑳ ᐸᑭᑎᓂᓇᐗᐤ᙮ 69ᐹᑎᒪ ᐃᓕᓕᐎᑯᓯᓵᓐ ᑲᑕ ᐊᐱᐤ ᑭᒋᓂᔅᑮᒃ ᐃᑌᑫ ᑭᒋᒪᓂᑐᐗ ᐅ ᑲᔥᑭᐅᐎᓂᓕᒃ᙮
70ᐁᑯ ᐁᑗᒋᒃ ᒥᓯᐌ, ᑭᓚᓍ ᑭᒋᒪᓂᑐ ᐅᑯᓯᓴ?
ᑮ ᐃᑌᐤ ᒫᑲ, ᑭᑦ ᐃᑣᓇᐗᐤ ᐁ ᐋᐎᔮᓐ᙮
71ᑮ ᐃᑗᐗᒃ ᒫᑲ, ᑫᒀᓐ ᐌᒋ ᑫᔮᐸᒡ ᓇᑕᐌᓕᑕᒪᒃ ᑯᑕᒃ ᑎᐹᒋᒧᐎᓐ? ᐌᓴ ᑭᓚᓈᓇᐤ ᑫᒋᐙᒃ ᑭ ᑮ ᐯᑕᒸᓈᓇᐤ ᑎᐱᓚᐌ ᐅᑐᓂᒃ ᐅᒋ᙮
Currently Selected:
ᐅᐸᓓᑭᔅ ᓘᒃ 22: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
