Mc 13

Jesús yaqataĝañi da'me 'laqatac queda'me pal qomle ga'me tamenaĝaiqui

(Mt 24.1-2; Lc 21.5-6)

1Mane'e ca'li yenoĝonegue ñe'me Jesús ga'me tamenaĝaiqui, 'uo ga'me lapaĝaguenatac jo'ne enaac:

—¡Auec'aten jenjo', Paĝaguenataĝanaĝaic! ¡Degueja na'me qadipi, nataq'aen degueja joca'li qo'yoĝon jenjo' emec!

2Qama'le Jesús 'yateguet:

—Nayi auanalo naajo' t'adayaqa emaqa, qalaĝaja qomle qama'le qaya'te onolec ta'le uetalegue ga'me laqaya ga'me qa': yema qoyapalaĝat qom'te.

'Nanaqa jo'ne uo'oe qom nadi'ta ga'me loiquiaqa' jena'me aleua

(Mt 24.3-28; Lc 21.7-24; 17.22-24)

3Yem da'me dojo' qama'le dajotegue ga'me qajoĝonaĝa jo'ne Olivo Lichidijat, jo'ne dajo'teta ga'me tamenaĝaiqui, Jesús ñiyiñe, qama'le Pedro, Santiago, Juan nataq'aen ñe'me Andrés yejamaĝa'te' joñe'me Jesús qama'le yena't:

4—¿Jach'e jogamaĝa laloqo' da'me 'uo da'me dojo', nataq'aen jach'e jogamaĝa 'nanec qom nadi'ta da'me male yepacalegue ga'me 'uo jo'ne loiquiaqa'yaĝac?

5Jesús 'yategueta jogaa'me:

—'Noota qom at'oiya'aguet ta'le 'uo gamachaqaega ami yoqovi'n. 6Qa'a qayoĝode' gaa'me novi't qomle jo'ne ch'e jayem 'naĝachidiye. Eetojo' ga'me 'laqata'j: «Mach'e jayem Jesús», qama'le jalcote ga'me jiyaĝadipi jo'ne yoqovi'n qomle.

7“Qom auep'iquitapega queda'me 'uo ga'me nalatetapega't jo'ne maqapi'ña jenjo', uotaĝa maqapi'ña di'cha'a, 'noota qom ena'te at'oiyi. Qa'a nach'eda taue ga'me 'uo qomle, qalaĝaja maliaĝa ja laloqo' ga'me loiquiaqa'yaĝac jena'me aleua. 8Qama'le ga'me noic delo'ye' ga'me noic laqaya, nataq'aen gaa'me nejaliaqa'te deloiquitapega't. Nataq'aen qayoĝode' gaa'me ale'u lael deda'tape, nataq'aen 'uo da'me noqouaĝa. Naqaenaua naajo' 'uaediñe uo'oe qomle daa'me nachoĝodeco.

9“'Noota qom mach'e anechilela't, qa'a ami qoyanouelo gaa'me nemaĝaiqui' lejaliaĝanaqa qomle, nataq'aen ami qoye'uaĝa'n nale oviyauelo gaa'me nemaĝaiqui'. Ami qoyajoĝona'agueta gaa'me jaliaĝanaqa jo'ne yelolo'te nale gaa'me ale'u lael nataq'aen jogaa'me jaliaĝanaqa jo'ne p'ajodaye, yajouaĝat da'me ami yapaĝaguenataqa, qaedi naq'aeta da'me male auaqanachichi ta'le jayem a'uaĝachetac nale auajoyiya'agueta jogaa'me. 10Qama'le da'me 'naqataĝanaĝac jo'ne onaĝaic 'noota ta'le 'uaeñe qot'aqataĝatapema yema ga'me noyaqapi. 11Nataq'aen ena'te at'oiyapega ga'me jo'ne anenaĝachiyegue qom ami qoyajoĝona'agueta gaa'me lejaliaĝanaqa gaa'me nemaĝaiqui'. Nach'ega laloqo' da'me anenaĝachiyegue ga'me jo'ne Dios ami yaloĝonalo, qa'a ja naqa'ami ta'le mach'e auojeyi, dite ñe'me Lepaqal joñe'me Dios jo'ne ami yojaĝanaĝa'n. 12Jogaa'me jo'ne yataqachiñe naqayadejoda yepoleguelo'te da'me leleuaĝa gaa'me mach'e laqaya'; nataq'aen gaa'me net'al yepoleguelo'te jogaa'me mach'e lec'oqo'te, nataq'aen jogaa'me nec'oqo'te nautenalo gaa'me mach'e let'al qama'le yala't. 13Yema ga'me aleua laje'pi ami nautenalo qa'a yajouaĝat da'me jayem oquiyegue; qalaĝaja ga'me jo'ne 'nañaĝatela't chayovida'a da'me loiquiaqa', nach'ega qoyanem da'me lec'alaĝa jo'ne ja 'naidena'a.

14“Mane'e qom auañiya ga'me jo'ne te'me adiquiyayi'ya jo'ne yapalaĝat ena'uac, queda'me naue da'me Dios 'lemec jo'ne ja 'nalegue —ga'me jo'ne yec'aten da'me dojo', 'noota qom yayaten—, chane'eja gaa'me jo'ne ueteda'a di'me Judea, 'noota da'me dajodegue yec'atalo gaa'me qajoĝona'a. 15Qama'le ga'me jo'ne netalegue ga'me 'lemec, qom nenochiñe, 'noota da'me ja taue ga'me 'lemec ta'le cha'li ya'uo li'yac. 16Nataq'aen ga'me jo'ne ue'ta ga'me 'nonaĝa, 'noota da'me ja 'viyelaĝauo uotaĝa ta'le cha'li naconajeguem ga'me lapoto. 17¡Yataqachiñe choĝodailole gaa'me yauo' jo'ne nalotapegueta gaa'me noloqo'ote qom'te da'me qo'uaĝail, uotaĝa yauanalo gaa'me 'najodolqa jo'ne maliaĝa uanoque'tape! 18'Noota qom auajelaĝañiyot joñe'me Dios qaedi da'me dojo' jo'ne 'uo qom'te ja tachiguilo gaa'me noloqo'ote qom uo'oe gaa'me uochi'pi. 19Gaa'me noloqo'ote qom'te yataqachiñe 'uo da'me nachoĝodec, jo'ne ja naq'aeta ga'me 'uo chiyoqo'teguet ca'li 'uaechiñe ye'et jena'me aleua joñe'me Dios, chayovida'a nayi, uotaĝa ta'le yitaĝa 'uo qom'te. 20Qalaĝaja qom ñe'me Jaliaĝanec ja yip'iaĝataye da'me dojo' gaa'me noloqo'ote qama'le qaya'te yaqanatet ta'le nec'alegue; qalaĝaja, yip'iaĝataye qom'te, jouaĝat da'me lichoĝodenataĝanaĝac jogaa'me lec'oqo'tolqa jo'ne mach'e liquiyaqa.

21“Qama'le qom 'uo gamachaqaega ami 'yaĝatema jo'ne enaac: «¡Auec'achiñe: jenjo' jena'me Dios Liquiyac joote ue'tena!», uotaĝa enaac: «¡Auec'achiñe: di'cha'a di'me ue'ta!», ena'te a'uamaqachiñe. 22Qa'a novi't qom'te gaa'me pecayaqa jo'ne eetapela'ajalo Dios liquiyaqa, nataq'aen gaa'me qovinaĝanaĝayaqa jo'ne eetapela'ajalo Dios 'laqataĝanaĝanaqa; qama'le nach'egaua yauo'oe gaa'me 'lanaqa nataq'aen gaa'me lañoqotaĝanaĝaco jo'ne p'ajodaye, qaedi doqovinaĝa'n, da'me jetaque yañoĝo't chayovida'alo gaa'me Dios lec'oqo'tolqa jo'ne mach'e liquiyaqa. 23¡Achiya'aguet da'me dojo'! Male ami ja'aqataĝanouelo da'me 'uo qom'te jo'ne tatalegue.”

Da'me 'liyelaĝajoĝoc ñe'me yataqachiñe Jiyaĝaua Lec'oĝot

(Mt 24.29-44; Lc 21.25-36)

24Nataq'aen Jesús enaac:

—Qalaĝaja gaa'me noloqo'ote qom'te, qom joote yenoĝodegue gaa'me noloqo'ote jo'ne nachoĝodaĝaiqui', qama'le jañe'me ajeua 'uo da'me 'lalaĝa, nataq'aen ñe'me auoĝoic male qaya da'me lauaqayaĝac; 25ga'me uaqachiñipi chiyoqodaje'ma di'me piyem da'me 'naqadañe, nataq'aen qoyedada'tape ena'uaque gaa'me jo'ne neda'ague di'me p'ajeguem 'me laqauaejeguem. 26Qom yem da'me dojo', qama'le jayem jo'ne yataqachiñe Jiyaĝaua Lec'oĝot jayem qoyela'aguet da'me japetalo'te gaa'me piyem loje' da'me ñovi', choqoda'me yañoqotaĝanaĝac nataq'aen da'me 'yonaĝac. 27Qama'le ñamaĝatequena gaa'me piyem laje' qaedi yemata'a't ena'uaque jogaa'me yiquiyaqa, jo'ne chiyoĝoteda'ague ga'me nayapije'ma jañe'me ajeua, nataq'aen tayapi'ña jañe'me ajeua, choqoga'me qolauaic ladic nataq'aen ga'me uaquiaĝaic ladic, chayovida'a gaa'me naua'alo jo'ne chiyoqo'teguet naa'me loiquiaqa'te jena'me aleua.

28“'Noota qom auayachiñe da'me dojo' jo'ne jaloqotenaĝana jaga'me epaq jo'ne higuera: qom male nole'l naa'me lepeel nataq'aen nejetedegue naa'me layoqotel, qama'le auetadeñi queda'me yauaqa'a da'me laloqo' ga'me uo'e. 29Chane'eja naq'aeta qomle da'me dojo', mane'e qom auañiya da'me di'yo't naa'me naajo' uo'oe, auayachiñe queda'me joote yamta'le ñovitequena. 30Eja ami ja'aĝatema queda'me yema da'me dojo' yepaquichigui qom maliaĝa 'uo jena'me jenjo' jiyaĝadipi naa'me naajo' noloqo'ote. 31Jodi'me piyem nataq'aen jena'me aleua ja yitaĝa 'uo qom'te, qalaĝaja daa'me 'yaqataqa qamqa'me ja yenoĝodegue.

32“Qalaĝaja ga'me ua'a ga'me nolo' uotaĝa ga'me laloqo' da'me dojo', qaya'te gamachaqaega ta'le yayaten, uotaĝa gaa'me piyem laje' jo'ne neteda'ña di'me piyem, uotaĝa jayem jo'ne Dios Lec'oĝot; onolec ñe'me Taĝadena' yayaten da'me dojo'. 33Chane'eja ¡achiya'aguet! Aneloyitaye nataq'aen a'vicheta't, qa'a ja auayachiñe qom novi' ga'me nolo' jo'ne laloqo'. 34'Noota qom aueñe'tema gaa'me lalemaĝaje'te ñe'me jiyaĝaua jo'ne yec'ata ga'me aleua laqaya. Qama'le yepotanegueta gaa'me lalemaĝaje'te ga'me 'lachaqa' qaedi neteleta: onolqa'tape yepotaneguet ga'me 'lonatac, nataq'aen yamaĝalegue ga'me neteloqo't ga'me jom qaedi yeviteta't. 35Chane'eja, 'noota qom a'nañaĝachiyec da'me adevitaĝaqui, qa'a ena'am ta'le ja auayachiñe ga'me laloqo' qom novi' ñe'me loĝot ga'me 'nachaqa', uotaĝa qom yemta pi'yaq, uotaĝa laeñi ga'me pi'yaq, uotaĝa qom jaya'agueteda, uotaĝa yamta'le 'yoĝoñi. 36Qa'a ja 'noota qom pelaqatela't da'me paja'a ñovi' qama'te ami jejomalo'te da'me ena'am ta'le a'uochetac. 37Da'me 'yaqatac jo'ne ami janema, nach'e ena'am janema yema ga'me jiyaĝadipi: ¡A'nañaĝachela't: aneloyitaye!”

Currently Selected:

Mc 13: TSN

Highlight

Copy