Mt 23

Jesús 'yaĝa't joga'me fariseopi nataq'aen ga'me judiopi napaĝaguenoqo'tpi

(Mc 12.38-40; Lc 11.37-54; 20.45-47)

1Ca'li yem da'me dojo' Jesús dojapegue'to ga'me jiyaĝadipi nataq'aen jogaa'me lapaĝaguenataqa, enaac:

2—Joga'me fariseopi nataq'aen ga'me judiopi napaĝaguenoqo'tpi 'uo da'me lañoqotaĝanaĝa'j jo'ne chiyoĝoguet di'me Moisés. 3Qo'che' 'noota qom auauoyi yema ga'me ami 'yaĝatema nataq'aen aviyamaĝachi, qalaĝaja ena'te auadenaĝachi da'me e'n 'loyaĝa'j, qa'a jogaa'me 'yaĝatetedac qalaĝaja ja yauote. 4Ami yecoñetegueta ga'me adi'yaqui 'me dejali jo'ne ja auaqanachichi ta'le auachiyi, qama'le yachalo'te naa'me lauaguel jogaa'me jiyaĝa'u, mate mane'e mach'egaua ja jetaque yacota uotaĝa ta'le ch'e onole liaĝata da'me yacona. 5Yema yauote qaedi ga'me jiyaĝadipi yec'ate'n jogaa'me. Nataq'aen 'yamaqate'n da'me yauo'oe lete' na'me laliaqa gaa'me Dios 'laqataqa qaedi yachetalo'te naa'me nepel nataq'aen naa'me loua', nataq'aen yaidiñe gaa'me leuo jo'ne yededañe naa'me la'uol. 6Jetaque 'yatalo gaa'me 'lachaqa'te jo'ne onaĝayaqa nale deque'y, nataq'aen 'yatalo gaa'me je'onaĝaiqui' jo'ne p'adeuo jo'ne qoyi'yoĝode'n nale yec'ata ga'me lemaĝaiqui', 7nataq'aen nale yec'adeta ga'me laeñi ga'me noic qama'le jetaque qo'nonaĝachiguilo nale qoyep'iye'n, nataq'aen jetaque qoyiyaĝanaĝatapec paĝaguenataĝanaĝayaqa.

8“Qalaĝaja ami 'noota qom ja a'uamaqachiñe ta'le ami qoyiyaĝanaĝatapeque paĝaguenataĝanaĝayaqa, qa'a ena'uaque ami mach'e ami naqaya' nataq'aen onolec ñe'me Anapaĝaguenoqo't. 9Ena'te aueñetapega adet'ai gamachaqaega ga'me ch'e jiyaĝaua, qa'a onolec ñe'me Adet'ai jo'ne na'ague di'me piyem. 10'Noota qom ja ami 'te qoyiyaĝanaĝatapeque najoĝola'te, qa'a onolec ñe'me adajoĝoladi' nach'eñe Cristo. 11Ga'me ami uetauelo jo'ne yataqachiñe p'ajaye, 'noota qom nach'ega neualaĝaetapegue'to jogaa'me laqaya'. 12Qa'a ga'me jo'ne mach'ega eetapega p'ajaye, nach'ega ja qoyi'yoĝoden qomle. Nataq'aen ga'me ja ni'yoĝodela't nach'ega qoyi'yoĝoden qomle.

13-14“¡Degueja da'me adachoĝodequi qomle ami judiopi napaĝaguenoqo'tpi nataq'aen fariseopi 'me ja ejoda! Ami jo'ne auapadiñigueta gaa'me jiyaĝa'u laqaya' queda'me jetaque tadoue da'me lejaliaĝa joñe'me Dios, naqa'ami jo'ne ja auaqanachichi ta'le ayoue joda'me, choqoda'me ja auajeñe'tema gaa'me jo'ne jetaque tadoue. 15¡Degueja da'me adachoĝodequi qomle, ami judiopi napaĝaguenoqo'tpi nataq'aen fariseopi jo'ne ja ami 'te ejoda! Ami jo'ne oquiilegue nale jena'me aleua nataq'aen ga'me noĝop let'a qaedi anaviquila't ga'me jo'ne ja jayem 'te p'iya'a, qama'le nale auaqanachichi aueñe'tem da'me yataqata p'ajaye da'me ne'uaĝanaguec qomle qoyajaĝa'ña ga'me ne'uaĝanaqa' jo'ne payac 'lachaqa'.

16“¡Degueja da'me adachoĝodequi qomle, ami najoĝola'te 'me qana'mi! Qa'a aueñiyapega: «Qom 'uo ga'me en 'naĝataĝac da'me tamenaĝaiqui lenaĝat queda'me 'yaeñi ga'me 'laqatac, qaya'te yelo'teguet da'me 'naĝataĝac. Qalaĝaja qom en 'naĝataĝac da'me oro jo'ne li'yoĝodaĝat da'me tamenaĝaiqui qamqa'me eja qopacapegue'.» 17¡Ami chiyoĝo's nataq'aen ami qana'mi! ¿Jach'e ga'me yataqachiñe p'ajaye: qo'li jouaĝat ga'me tamenaĝaiqui uotaĝa da'me oro da'me ja 'nalegue? 18Nach'e ena'am aueñiyapega: «Qom 'uo ga'me en 'naĝataĝac da'me lenaĝat di'me c'atoĝonaĝala', qaya'te yelo'teguet; qalaĝaja qom en 'naĝataĝac da'me lenaĝat jaga'me najaqaje' 'me uetalegue ga'me c'atoĝonaĝala', qamqa'me eja qopacapegue'.» 19¡Yataqachiñe ami qana'mi! ¿Jach'e jogamaĝa yataqachiñe p'ajaye: qo'li jaga'me najaqaje uotaĝa ga'me c'atoĝonaĝala' 'me ja e'n 'te 'nalegue jaga'me najaqaje? 20Ga'me jo'ne en 'naĝataĝac di'me c'atoĝonaĝala' lenaĝat, ja jaldata da'me en 'naĝataĝac da'me c'atoĝonaĝala' lenaĝat dite da'me nach'e ena'am yema ga'me uetalegue ga'me; 21nataq'aen ga'me jo'ne en 'naĝataĝac da'me tamenaĝaiqui lenaĝat, ja jaldata da'me en 'naĝataĝac ga'me tamenaĝaiqui, dite da'me nach'e ena'am ñe'me Dios qa'a netaue ga'me. 22Nataq'aen ga'me jo'ne en 'naĝayaĝac da'me lenaĝat di'me piyem, mach'e en 'naĝataĝac da'me lenaĝat di'me Dios lejaliaqa', nach'e ena'am ñe'me Dios qa'a neta'ña jodi'me.

23“¡Degueja da'me adachoĝodequi qomle ami judiopi napaĝaguenoqo'tpi nataq'aen fariseopi! Ami jo'ne ja ami 'te ejoda, jo'ne aviyochiya'a jaga'me onole jaga'me nalequetenaĝanaqate 'me lenaĝat menta qaedi auañem ñe'me Dios, nach'e ena'am ga'me anís nataq'aen ga'me comino, qalaĝaja ja auoqochiyalo daa'me napaĝaguenataĝanaĝaco 'me yataqachiñe p'ajodaye da'me namaĝajoĝonaĝaco. 'Noota qom auayachiñe joda'me yataqatelegue, nataq'aen joda'me nichoĝodenataĝanaĝac, nataq'aen joda'me nepe'e. Daajo' 'noota qom nach'edaua auauoyi, mate mane'e ja aĝañiñi da'me auauoyi gaa'me namaĝajoĝonaĝaco laqaya'. 24¡Ami jo'ne najoĝola'te qana'mi, anapijiñi jaga'me uando, qalaĝaja auepiniyañe ñe'me camello!

25“¡Degueja da'me adachoĝodequi qomle ami judiopi napaĝaguenoqo'tpi nataq'aen fariseopi! Ami jo'ne ja ami 'te ejoda, jo'ne ch'e aviyoyii ga'me p'aye jaga'me yomaĝaiqui nataq'aen ga'me coqui, qalaĝaja ¡naa'me lai'li najaqachiguilo da'me necachaĝac nataq'aen da'me nepitaqataĝanaĝac! 26¡Am fariseo 'me qanam: 'uaeñe aviyo ga'me lauel ga'me yomaĝaiqui, qama'le nach'e ena'am yoqovita ga'me p'aye!

27“¡Degueja da'me adachoĝodequi qomle ami judiopi napaĝaguenoqo'tpi nataq'aen fariseopi! Ami jo'ne ja ami 'te ejoda, 'me aueñiya'ama gaa'me napa'l lete' nale qoyiyoĝolo'te ga'me pagaĝaic, qoyiyamaĝatetac ga'me p'aye, qalaĝaja ga'me lauel najaqachiguilo gaa'me p'inaqa dia'me yele'u nataq'aen yema gaa'me ja 'noe'n. 28Naq'aeta da'me ami: ga'me p'aye da'me anejiyaĝauayaĝaqui aualoĝoñi da'me ena'am ta'le yataqatelegue nale ami yec'ate'n jogaa'me jiyaĝa'u; qalaĝaja naa'me adai'lidi' najaqachiguilo daa'me ja ejoda nataq'aen daa'me ja 'noe'n.

29“¡Degueja da'me adachoĝodequi qomle ami judiopi napaĝaguenoqo'tpi nataq'aen fariseopi! Ami jo'ne ja ami 'te ejoda, queda'me a'noĝoñijeguem nale gaa'me napa'l lete' qaedi qoyachañguilo jogaa'me Dios 'laqataĝanaĝanaqa nataq'aen auauoyi li'yoĝodaqa'te nale ga'me lete' jodia'me yataqatelo'te. 30Yem qama'le aueñiyapega't: «Gaa'me noloqo'ote ca'li uo'oe dia'me qadet'al, ta'le nach'e ena'am qo'mi uo'oe qama'le ja jalequetenaq da'me leleuaqa' jodia'me Dios 'laqataĝanaĝanaqa.» 31Naq'aeta da'me dojo' queda'me mach'e ami anatetoñela't da'me ami lec'oqo'tepi jodia'me jo'ne yala't dia'me Dios 'laqataĝanaĝanaqa. 32Chane'eja ¡'noota qom aĝañiñi ga'me jo'ne yauote ca'li dia'me adet'aldi'!

33“¡Ami nanayaqapi! ¡Ami c'oqo'tepi ga'me nanayaqa! ¿Teua'atoqo' ami yaĝa'n qomle ga'me ane'uaĝanaguequi qomle da'me ami qoyajaĝa'ñalo di'me payac 'lachaqa'? 34Jouaĝat da'me dojo' nayi ami ñamaĝalo daa'me Dios 'laqataĝanaĝanaqa 'me yatenaĝanaĝayaqa nataq'aen paĝaguenataĝanaĝayaqa. Qalaĝaja ami aualachi' qomle nataq'aen uo'oe gaa'me auep'eñiyajeguem, gaa'me laqaya' a'uaĝañe'tape da'me uetauelo gaa'me ademaĝaiqui', nataq'aen laqaya' yapiyetapegouelo gaa'me noyaqa da'me auecaañi'tape. 35Chane'eja nach'e ami ualo'te da'me ane'uaĝanaguequi qomle jouaĝat yema jaga'me tauo' dia'me yataqatelo'te 'me qoyen naliñi chiyoqotelegue di'me Abel jo'ne yataqatelegue chayovida'a Zacarías, 'me Berequías c'oĝot, nach'edi jo'ne aualachiyalegue ga'me tamenaqa' 'me ja 'nalegue nataq'aen ga'me c'atoĝonaĝala'. 36Yataqata eja da'me dojo' ami ja'aĝatema: ga'me ane'uaĝanaguequi 'me jouaĝat da'me dojo' tachiguilo ga'me jiyaĝadipi jo'ne uo'oe nayi.

Jesús noyelegue di'me Jerusalén

(Lc 13.34-35)

37“¡Ami Jerusalén laje', jo'ne aualachi' dia'me Dios 'laqataĝanaĝanaqa nataq'aen auajaĝayique ga'me qadipi dia'me aqataĝanaĝayaqa jo'ne Dios ami namaĝalo! ¡Nach'eda da'me jetaque ami jemata'a't, ena'am jaga'me olegaĝa yapetetapega't gaa'me c'oqo'tolqa yacho'oto ga'me laua, qalaĝaja ami ja a'uamaqachiñe! 38Chane'eja auec'achiñe jena'me at'achaqadi' qodica'ae qomle qama'le totapega't; 39qama'le ami ja'aĝatema queda'me ja yitaĝa jayem auañiya chayovida'a yovita ga'me nolo' queda'me aueñiyaac jo': «¡Mach'eñe q'aen ñe'me Lamaĝajec ñe'me Jaliaĝanec, nach'eñe jo'ne namaĝaquena!»”

Currently Selected:

Mt 23: TSN

Highlight

Copy