Mt 24

Jesús yaqataĝañi da'me 'laqatac queda'me pal qomle ga'me tamenaĝaiqui

(Mc 13.1-2; Lc 21.5-6)

1Jesús yenoĝonegue ca'li, ca'e ga'me tamenaĝaiqui, qama'le jogaa'me lapaĝaguenataqa dojedapegue' joñe'me qaedi yaloĝoteda gaa'me 'noĝonaqa 'me lael ga'me tamenaĝaiqui. 2Jesús enaac:

—¿Qo'li yema aueloyita jena'me jenjo'? Eja ami ja'aĝatema queda'me jenjo' qaya'te onolec qa' ta'le uetalegue ga'me qa' laqaya qomle: yema qoyapalaĝat qomle.

'Nanaqa jo'ne uo'oe qom nadi'ta ga'me loiquiaqa' jena'me aleua

(Mc 13.3-23; Lc 21.7-24; 17.22-24)

3Yem qama'le yec'adeta di'me qajoĝonaĝa 'me Olivo Lichidijat. Jesús ñiyiñe ca'li yejamache' gaa'me lapaĝaguenataqa qama'le yachimaĝadeta joñe'me:

—Jetaque qo'mi a'uaĝatema jach'e ga'me ua'a qom yepacalegue da'me dojo'. ¿Jach'e jogamaĝa at'anec qomle da'me at'iyelaĝajoĝoc nataq'aen da'me loiquiaqa'yaĝac jena'me aleua?

4Jesús 'yategueta joga'me:

—'Noota qom achiya'aguet ta'le 'uo gamachaqaega ami yoqovi'n. 5Qa'a qayoĝode' gaa'me novi't qomle 'me ch'e jayem 'naĝachidiye, eetojo' qomle ga'me 'laqata'j: «Naqayem mach'e jayem Dios Liquiyac», nataq'aen qayoĝode' gaa'me yoqovi'n qomle. 6Ami novitalo qomle ga'me 'naqataĝanaĝac queda'me nalatetapega't jenjo' nataq'aen di'cha'a; qalaĝaja ena'te at'oiyi, qa'a youetaque da'me yepacalegue da'me uo'oe daa'me daajo', qalaĝaja maliaĝa ja loiquiaqa' jena'me aleua. 7Qama'le ga'me noic delo'ye' ga'me noic laqaya, nataq'aen gaa'me nejaliaqa'te deloiquitapega't. Nataq'aen 'uo da'me noqouaĝa, nataq'aen qayoĝode' gaa'me ale'u lael deda'tape. 8Qalaĝaja ena'uaque na'me naajo' naqaenaua jo'ne 'uaediñe daa'me nachoĝodeco jo'ne uo'oe qomle.

9“Chane'eja ami qoyadeuo qomle qaedi ja no'en ga'me ami qo'yeteque; nataq'aen ami qoyala't, nataq'aen yema jena'me aleua ami qoniquiya'alo qomle qa'a jouaĝat da'me jayem oquiyegue. 10Qomle gaa'me noloqo'ote qayoĝode' gaa'me nematedapec qomle da'me lepe'e', nataq'aen ja neuotena't nataq'aen onolqa'tape p'ayapega't jogaa'me. 11Ñedijeguem qomle gaa'me eetapela'ajalo Dios 'laqataĝanaĝanaqa jo'ne ja ejoda, qama'le qayoĝode' ga'me yoqovi'n qomle. 12Yataqachiñe jalcote da'me ja no'en qomle, qayoĝode' gaa'me naqaya' male qaya da'me loqopich'i'. 13Qalaĝaja ga'me jo'ne 'nañaĝatela't chayovida'a da'me loiquiaqa', nach'ega qoyanem da'me lec'alaĝa jo'ne ja 'naidena'a. 14Qama'le dojo' 'laqataĝanaĝac ñe'me Dios 'me 'yaĝatetac da'me lejaliaĝa qo'yaĝatapema qomle ena'uaque ga'me jiyaĝadipi jo'ne uetedalegue jena'me aleua qaedi yateto'n. Yem qama'le novi' ga'me loiquiaqa'.

15“Chane'eja qom auañiya ga'me jo'ne te'me adiquiyayi'ya jo'ne yapalaĝat ena'uac, da'me jo'ne 'yaĝatetapi'ñgui ñe'me Dios 'laqataĝanaĝanec Daniel, queda'me naue da'me Dios 'lemec jo'ne ja 'nalegue —ga'me jo'ne yec'aten da'me dojo', 'noota qom yayaten,— 16chane'eja gaa'me jo'ne ueteda'a di'me Judea, 'noota da'me dajodegue yec'atalo gaa'me qajoĝona'a; 17nataq'aen ga'me jo'ne netalegue ga'me 'lemec lapo', 'noota qom ja yaloĝoja nenochiñe qaedi nemetegue ga'me 'lemec; 18nataq'aen ga'me ue'tague ga'me 'nonaĝa, 'noota qom ja 'viyelaĝauo qaedi cha'li lapona't ga'me loĝot. 19¡Yataqachiñe choĝodailole gaa'me yauo' jo'ne nalotapegueta gaa'me noloqo'ote qom'te da'me qo'uaĝail, uotaĝa yauanalo gaa'me 'najodolqa jo'ne maliaĝa uanoque'tape! 20Anachoĝodeñiyot ñe'me Dios qaedi ja tachiguilo gaa'me noloqo'ote da'me 'lomaĝa uotaĝa nolo' 'me niyamaqatac da'me auajoyegue; 21qa'a gaa'me noloqo'ote qom'te yataqachiñe 'uo da'me nachoĝodec, jo'ne ja naq'aeta ga'me 'uo chiyoqo'teguet ca'li 'uaechiñe qoye'et jena'me aleua, chayovida'a nayi, uotaĝa ta'le yitaĝa 'uo qom'te. 22Qalaĝaja qom ñe'me Jaliaĝanec ja yip'iaĝataye da'me dojo' qama'le qaya'te yaqanatet ta'le nec'alegue. Qalaĝaja, yip'iaĝataye qom'te, jouaĝat da'me yataqata yichoĝode'n jogaa'me lec'oqo'tolqa jo'ne mach'e liquiyaqa.

23“Chane'eja qom 'uo gamachaqaega ami 'yaĝatema jo'ne enaac: «¡Auec'achiñe: jenjo' jena'me Dios Liquiyac joote ue'tena!», uotaĝa enaac: «¡Auec'achiñe: di'cha'a di'me ue'ta!», ena'te a'uamaqachiñe. 24Qa'a novi't qom'te gaa'me pecayaqa jo'ne eetapela'ajalo Dios liquiyaqa, nataq'aen gaa'me qovinaĝanaĝayaqa jo'ne eetapela'ajalo Dios 'laqataĝanaĝanaqa; qama'le nach'egaua yauo'oe gaa'me 'lanaqa nataq'aen gaa'me lañoqotaĝanaĝaco jo'ne p'ajodaye qaedi doqovinaĝa'n, da'me jetaque yañoĝo't chayovida'alo gaa'me Dios lec'oqo'tolqa jo'ne mach'e liquiyaqa. 25¡Auec'achiñe! Male ami ja'aqataĝanouelo da'me 'uo qom'te jo'ne tatalegue. 26Qo'che' qom qo'yaĝatema: «Auec'achiñe, di'cha'a di'me ue'ta, aleua 'me totapega't», ena'te auec'achiya. Uotaĝa qom ami qo'yaĝatema: «Jenjo' jena'me ue'ta nañoĝotapiñe», ena'te a'uamaqachiñe. 27Qa'a ena'am ga'me laqaselegaĝa di'me piyem, mane'e da'me edañgui yicoyadelo'te naa'me lael di'me piyem, nach'e naq'aeta qomle jayem jo'ne Jiyaĝaua Lec'oĝot ga'me nolo' da'me 'ñiyelaĝaquena. 28Ga'me ua'a ga'me napa'l, nach'ega qoyemetapega qomle na'me poepi.

Da'me 'liyelaĝajoĝoc ñe'me Jiyaĝaua Lec'oĝot

29“Qalaĝaja qom male yenoĝodegue naa'me naajo' uo'oe qama'le paja'a ga'me 'lalaĝa yapadelegue jañe'me ajeua nataq'aen ñe'me auoĝoic ja yitaĝa 'uo ga'me lauaq. Ga'me uaqachiñipi chiyoqodaje'ma di'me piyem da'me 'naqadañe nataq'aen da'me 'lañaĝaco 'me uedalegue di'me piyem qoyedaĝa'tape qomle. 30Chane'eja qom male di'yoq ga'me 'yanec jo'ne yataqachiñe ualegue di'me piyem, qama'le yema ga'me jiyaĝadipi jo'ne aleua laje'pi male ye'uaĝalo'te naa'me letoguel, qom yauata da'me japetalegue ga'me piyem lo'oc da'me ñovi', da'me 'uo da'me yañoqotaĝanaĝac nataq'aen da'me 'yonaĝac let'adaic. 31Qama'le ñajoya'yelo gaa'me yamaĝa's jo'ne piyem laje' da'me ñe'uauaĝa'n qaedi qom qoyajediye jaga'me najeede qama'le yemata'a't jogaa'me yiquiyaqa chiyaqa'ñalo yemeda naa'me ale'u lael chayovida'alo gaa'me loiquiaqa'te jena'me aleua.

32“'Noota qom yataqachiñe auayachiñe da'me dojo': qom yeloĝola'ñeguet jaga'me lepee ga'me higo lichidic qama'le nenoĝonegue jana'me layoqote qama'le auayachiñe queda'me yauaqa'a ga'me uo'e. 33Nach'e naq'aeta da'me ami, qom auañiyalo ena'uaque naa'me naajo' uo'oe male di'yo't qama'le auayachiñe da'me qoyoqo'ta da'me yovidaĝaiqui. 34Eja ami ja'aĝatema queda'me qom male yepaquichiguilo yema ga'me ami ja'aĝatetapema, qama'le maliaĝa ja qaya jena'me jenjo' jiyaĝadipi. 35Jodi'me piyem nataq'aen jena'me aleua yenoĝodegue qomle, qalaĝaja daa'me 'yaqataqa qamqa'me ja yenoĝodegue.

36“Qalaĝaja ga'me nolo' uotaĝa hora jo'ne laloqo' da'me dojo', qaya'te yayaten; uotaĝa gaa'me Dios lamaĝa's jo'ne neteda'ague di'me piyem nataq'aen da'me jayem yataqata ja jayaten. Nach'eñeta ñe'me Qadet'a yayaten ga'me loiquiaqa'yaĝac.

37“Qa'a ena'am gaa'me noloqo'ote ca'li 'uo di'me Noé, naq'aeta qomle da'me 'yiyelaĝajoĝoc, jayem mach'e Jiyaĝaua Lec'oĝot. 38Gaa'me noloqo'ote joca'li maliaĝa qaya'te uotep, cha'li deque'tape nataq'aen niyome'tape, 'uotapega't nataq'aen t'onataĝa'tape chayovida'a jo'me nolo' ca'li Noé naue jaga'me licota lat'edai. 39Nataq'aen ja maqachaĝa nometeguet ga'me lai'li chayovida'a joca'li novi' ga'me uotep let'adaic, qama'le ena'uaque yayoĝo'n jogaa'me. Nach'eda naq'aeta qomle da'me 'yiyelaĝajoĝoc, da'me jayem mach'e Jiyaĝaua Lec'oĝot. 40Ga'me nolo' qom novi', qom uo'oe gaa'me dojolqa jiyaĝa'u ueteda'a ga'me nanaĝanaqa't da'me t'onataĝa'tape, qama'le onolec ga'me qoyauec, laqaya qamqa'me qoyepotan. 41Nach'e ena'ama gaa'me dojole yauo' jo'ne dajotedaye jaga'me layo' da'me dejogaĝa'tape, qama'le onole jaga'me qoyauec, laqaya qamqa'me qoyepotan.

42“Chane'eja, 'noota qom aneloyitaye, qa'a ja auayachiñe ga'me nolo' qom ñovi', da'me jayem jo'ne jayem Adejaliaĝanequi. 43'Noota qom auayachiñe da'me dojo': qom ga'me ladipa ga'me emec joote yayaten jaga'me hora da'me novi' ga'me cachaĝaic, qama'le joote yeviteta't qama'le ja yajeta ga'me cachaĝaic ta'le yenoĝonoue ga'me 'lemec qaedi decachi. 44Chane'eja 'noota qom yataqata aniyamaĝacheta't, qa'a jaga'me hora qom male ja auenache'ta, male yitaĝa ñovi'.

Ñe'me nalemaĝajet jo'ne yoqo'cha ladipa

(Lc 12.41-48)

45Yitaĝa ñe'me Jesús enaac:

—Jega: ¿jach'e jogamaĝa ga'me namaĝajec da'me yataqata yepaquetelegue ga'me 'lonatac nataq'aen 'uo da'me yayaten, da'me uotaĝa ga'me ladipa yamaĝalegue qaedi yiqui'yaĝa'tape gaa'me ueteda'a ga'me 'lachaqa' nale yovita ga'me laloqo' da'me niqui'yaĝac? 46Matacolec ga'me nalemaĝajet qom novi' ñe'me ladipa, qama'le yejomalegue da'me 'yetetac ga'me jo'ne yamaĝalegue. 47Eja da'me ami ja'aĝatema queda'me qom naq'aeta, qama'le ñe'me ladipa en yelolegue yema ga'me chiyaqayi da'me liyamaĝac. 48Qalaĝaja qom ga'me nalemaĝajet jo'ne chiyoĝojec eetojo' ga'me lelnataĝac: «Ñe'me yejaliaĝanec ja paja'a novi',» 49qama'le ja no'en da'me 'yeteque jogaa'me nelataqa 'me nepotanaĝa'u, nataq'aen yema'a da'me deque'e choqoda'me niyomaĝa'u jogaa'me taĝayaqa, 50qama'le 'uo da'me lachoĝodec jo' qom'te. Qa'a qom novi' ñe'me ladipa, ga'me nolo' jo'ne qamaĝaya't da'me qoyeuatetaque nataq'aen ga'me yataqachiñe tachigui ga'me nolo' ja qoyayaten. 51Qama'le ya'uo da'me ne'uaĝanaguec, yamaĝaue da'me yepagaqate'tegue da'me lachoĝode'j jogaa'me ja ejoda, ua'a da'me noyenaĝac nataq'aen yoqolavina't jonaa'me lodaitel.

Currently Selected:

Mt 24: TSN

Highlight

Copy