2 Co 9
9
1Qama'le jaga'me najaqaje' jo'ne jetaque qolecochaĝanegueta jogaa'me qadaqaya'olqa 'me qadepi'iyaĝa'u, eja ja youetaque ta'le ji'iyelaĝalegue ja'aĝatetac da'me ami yitaĝa jedenaqatenalo ga'me yediije. 2Joote ami jayate'n queda'me eja jetaque alecochiiyalo. Qo'che' 'uo da'me ñi'yoĝodenaĝac ca'li ja'aqataĝatapema jogaa'me qadaqaya'olqa 'me neda'ña di'me aleua 'me Macedonia queda'me ami 'me at'achaqadi' di'me Acaya, ami uetauelo da'me nach'e eta't jetaque alecochiiyalo chiyoqo'teguet jo'me uo'e laqaya. Ca'li domachita da'me dojo' jogaa'me Macedonia laje' qayoĝode' jogaa'me yauote da'me lecochaĝa'j.
3Qalaĝaja jamaĝaquena ñe'me Tito nataq'aen uoja'aegaua dojolqa qadaqaya' qaedi ami 'yañaqate't qaedi auec'ataĝañita't yema ga'me ja auauoyi qaedi auañiyegue jaga'me adajaqaje; qaedi naq'aeta da'me male di'yoq queda'me yataqachiñe qo'mi ejoda da'me 'uo da'me qani'yoĝodenaĝac jo'ne ami chiyaqayilo. 4Ta'le uo'oe gaa'me Macedonia laje' jayem quetegue qama'te maliaĝa ja aviyamaĝacheta't jaga'me adajaqaje, qama'le degueja da'me 'yaloĝo, ja jetaque ñenaĝategue ga'me mach'e auanomiguet ta'le, qama'le ¡jach'e jogamaĝa p'ayapegue da'me ami qauepeteque! 5Qo'che' jeetapega 'noota da'me ami je'uauaĝa'talo naajo' qadaqaya'olqa, qom maliaĝa ja ami 'te jec'atalo. Naqaenaua ami lecochiyalo da'me auapichiñiya't jaga'me najaqaje jo'ne joote a'uaĝachetac da'me auañiyegue, naq'aeta da'me aualoĝoñi da'me ami made'tape da'me auachetaĝañi, choqoda'me 'uo da'me adoqopich'ii, nataq'aen ja naqaeda ta'le ami qopaquetapegue'to.
'Noota qom qo'mi made'tape nale 'uo ga'me janaĝaye
6'Noota qom anetoviñetac da'me dojo': “Ga'me jo'ne jaleca ga'me yanegue, jaleca ga'me qoyanem; ga'me jalcote ga'me yanegue, jalcote ga'me qoyanem.” 7Onolqa'tape yadegue ga'me eetedapega nalo'taguet ta'le yanegue. Qom jachetaĝanaq qama'le 'noota qom ja qo'mi 'te totelo'te, uotaĝa qa'a qo'mi qopaquetapegue'to. ¡Dios noqopita ga'me jo'ne matac da'me dachetaĝan! 8Dios yaqanatet ta'le e'n yodapecache gaa'me ami yanema jo'ne anachiquiyaĝaqui, qaedi nach'e eta't auañiya yema ga'me jo'ne auoviñetaque. Uoja'eda ja yemeta da'me adecochaĝaqui da'me alecochiiyalo ena'uaque gaa'me 'nonataqa jo'ne 'noote'. 9Ga'me qoyediñe jo'ne 'yaĝatetac ga'me choĝodenataĝanaĝaic, eet'oi:
“Yanegue yema ga'me leuoyaĝac, yanema jogaa'me choĝodache;
Gaa'me onaĝayaqa 'lonataqa nach'e eta't qonetouetapegalo.”
10Dios jo'ne ya'uo jaga'me petapi jo'ne qoyaañi nale nataq'aen ga'me niqui'yaĝat jo'ne qoyalic nale, nach'e ena'am ami yanema yema ga'me jo'ne auoviñetaque, nataq'aen nichiyaĝataye ga'me ami yanema, qaedi auaqanachichi ta'le alecochiiyalo jogaa'me adaqayadi'. 11Qama'le naq'aeta da'me yodapecache gaa'me neuoyaĝaco ami yanema, qaedi auaqanachichi ta'le auechetaĝañi. Jaga'me anaicauai jo'ne auapichiñiya't qaedi jachoĝojoq qomle, dojo' chiyaqayi da'me qayoĝode' gaa'me 'nonaĝachidegue ñe'me Dios qomle. 12Qa'a da'me jachoĝojoq jaga'me necochaĝanaqate jo'ne ami chiyaqauelo ja jaldata yelo'teguet da'me qaedi gaa'me qadaqaya'olqa 'uo ga'me jo'ne youetedaque, dite da'me nach'e ena'am chiyaqayi da'me yate'm lamai'j joñe'me Dios. 13Janjo' necochaĝanaqate nach'eda yaloĝon queda'me ami auacoñiyeguet da'me onaĝaic 'naqataĝanaĝac nataq'aen auoqochiya ga'me 'yaĝatetac. Qo'che' jogaa'me netotedapec nataq'aen 'nonaĝachidegue joñe'me Dios. 14Nataq'aen uoja'eda ami dajelaĝalo'te jogaa'me jalcote ami noqopitalo, yajouaĝat da'me aualoĝoñiyalo da'me lichoĝodenataĝanaĝac ñe'me Dios jo'ne qaya'te ena'am. 15¡Janem da'me yamaic ñe'me Dios queda'me 'uo da'me qo'mi yeyala'aque jo'ne yataqachiñe let'adaic, jo'ne qaya'te 'yaqataqa ta'le ja'aĝatetac!
Currently Selected:
2 Co 9: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina