2 Co 10
10
Da'me lañoqotaĝanaĝac ñe'me Pablo jo'ne Jesús lamaĝajec
1Mach'e jayem Pablo ami ñachoĝodenoto, yajouaĝat da'me qademe'teguet ñe'me Cristo jo'ne joĝodaic nataq'aen choĝodenataĝanaĝaic, mate mane'e 'uo ga'me eetapega nale ami jouetauelo da'me yataqachiñe jayem uategaĝaic, qalaĝaja mane'e da'me jayem qaya'a qama'te ena'am ta'le jayem vichaqaic. 2Chane'eja, male ami ñachoĝodenouelo queda'me qom ami jec'atalo qama'le ena'te jayem auepagaqachitapega da'me ja jayem 'te damitelegue qom jajoya'agueta gaa'me jo'ne 'uo da'me 'lenaĝanataĝanaĝa'j. Jogaa'me qo'mi eetapegalo queda'me je'etaqa'tape gaa'me uo'oe qa'a ch'e qanaquitetac naq'aeta jenaqa'am gaa'me 'lonataqa ga'me jiyaĝadipi jo'ne quetalo'te da'me ch'e nejiyaĝauayaĝa'j lamaico. 3Qa'ejo' eja queda'me jouaqatalegue jena'me aleua, qalaĝaja ja jadenaĝata' gaa'me 'lonataqa jogaa'me aleua laje'pi, dite da'me jaconaĝa da'me lañoqotaĝanaĝac ñe'me Dios da'me ñolaĝataĝadiñe daa'me 'lañaĝaco joda'me ja no'en. 4Ga'me qat'euoĝonaĝat jo'ne jaconaĝa ja aleua le'ec, dite da'me mach'e lañoqotaĝanaĝac ñe'me Dios jo'ne 'yañoqotet ta'le yolaĝachigui joda'me ja no'en. Qama'le naq'aeta da'me jolaĝataĝaye da'me qo'mi qoyepoleguelo'te, 5nataq'aen yema 'yoĝodenaĝaco jo'ne jetaque nauateguet da'me qaedi qoyateton ñe'me Dios. Dojo' nañoqotaĝanaĝac jedoĝolo'te gaa'me loeco lo'olpi qaedi 'yemaĝadiñe yaĝadegue gaa'me lelnataĝaco jo'ne toye's qama'le yoqochideta ñe'me Cristo. 6Joote ñiyamaĝataqata't qaedi jauoqo ne'uaĝanague'j yemeda gaa'me jo'ne ja yoqochideta ñe'me Cristo, ami chiyoqotelo'te chayovida'a ga'me nolo' qom male auoqochiya joñe'me.
7Ami nach'edata da'me auacoñiyeguet ga'me jo'ne auañiya. Qom aueñetapela't yataqachiñe oquiyegue ñe'me Cristo, jetaque ami ja'aĝatema da'me nach'e ena'ama qo'mi. 8Mate mane'e jen yaguegue da'me ñi'yoĝodenaĝac da'me ja'aĝatetac da'me qadañoqotaĝanaĝac, ja jepocoĝolegue. Ñe'me Jaliaĝanec Jesucristo qo'mi yanema da'me qaedi ami jeloĝolo'te, qaedi ami yecochaĝanaĝanaĝaque da'me yataqachiñe auep'iiya'a joñe'me nataq'aen ja ami 'te japalaĝata'. 9Ja naqaeda ta'le jetaque ami joqochoqoteteque nale ami jamaĝalo naa'me yediijel. 10Uo'oe gaa'me enapega't ja damitelo'te gaa'me yediijel nataq'aen vichaĝagueta, qalaĝaja qaya'te 'yañaĝac nale yataqachiñe ja'aqataĝatac, nataq'aen ja yataqachiñe jayaten da'me yojaĝac, ja jayem 'te yoqoch'em gamachaqaega. 11Naajo' jiyaĝa'u jo'ne naq'aete' naa'me 'laqataqa, 'noota qom nach'e ena'am yayate'n da'me naq'aeta da'me ja damitelo'te gaa'me qat'aqataqa jo'ne ualo'te gaa'me qadediijel, nach'e naq'aeta ga'me jauoqo qom ami jovitaĝalo.
12Ja jovita da'me ta'le jeetapega jena'ama jogaa'me jo'ne mach'egaua ni'yoĝodetapela'ajalo. Da'me 'uo ga'me mach'ega naloqotela't, nach'eda chiyoĝojoĝoc. 13Qalaĝaja da'me qo'mi qamqa'me ja ñapagaqalo'te gaa'me qoye'n qadoiquiaqa'te da'me ñi'yoĝodenaqatapela't. Qom 'uo ga'me chiyaqayi da'me ñi'yoĝodenaqatapela't, qa'a 'uo ga'me 'nonatac jo'ne Dios qo'mi yamaĝalo'te qaedi je'etaq. Qama'le ami lae da'me dojo' qat'onatac. 14Qo'che' ja ñapagaqalo'te naa'me qoye'n qadoiquiaqa'te, ga'me eeta toqogamaĝa da'me adajouaĝajechi ta'le ja paja'a ami jovitaĝalo, naqaqo'mi je'uauaĝañe da'me ami ñidaqa'alo. Qalaĝaja qo'mi je'uauaĝañe ñovitaĝa jena'me Corinto, qama'le ami ja'aĝataĝama da'me onaĝaic 'laqataĝanaĝac ñe'me Jesucristo. 15Nataq'aen ja ñi'yoĝodenaqatapiye ga'me 'lonata'j jogaa'me jiyaĝa'u laqaya', dite da'me 'uo da'me qadeuataqataĝanaĝac yataqachiñe jalcote da'me qat'onataĝanaĝac da'me ami jouaqatauelo, 'uo da'me qanaquitetapega da'me jetaque nichiquetaye da'me yataqachiñe auep'iiya'a ñe'me Dios. Naqaega loiquiaqa' jo'ne joote jeloqo'ta da'me qat'onataĝanaĝac. 16Nach'e ena'am qadamaic ta'le ja'aĝataqatac da'me onaĝaic 'naqataĝanaĝac gaa'me ale'u lael 'me qayada'aguelo napaquedalegue di'me Corinto, jo'ne qaya'te ua'a ta'le 'uo ga'me 'uaeñe t'onataĝa'ña joca'li. Qalaĝaja ja joqotaĝalegue ga'me 'lonatac ga'me jiyaĝaua laqaya, qaedi qaya'te eetapega ñi'yoĝodenaqatapiye ga'me ja qat'onatac.
17Da'me Dios 'laqatac enaac: “Ga'me jetaque ni'yoĝodela't, 'noota qom yi'yoĝodetac ñe'me Jaliaĝanec.” 18Ga'me jiyaĝaua jo'ne 'uo da'me niyamaĝadenataguec ja naqaega ga'me jo'ne mach'e niyamaĝadetapela't, dite ga'me jo'ne ñe'me Jaliaĝanec yiyamaĝaden.
Currently Selected:
2 Co 10: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina