2 Co 11
11
Pablo nataq'aen jogaa'me eetapela'ajalo namaĝa's
1Ami ñachoĝodenoto qaedi a'nañaĝachiyeguet da'me cat'olec ñichiyoĝojoĝoc qomle. 2Dios jayem 'yetem da'me qaedi ami jenate'talo. Da'me jepaquetapega ta'le yataqachiñe ami yataqatelo'te onolec oquiyegue ñe'me Cristo, uotaĝa ena'am ta'le aueñiya'am jaga'me nojaĝaua jo'ne joote qo'yaĝateguet da'me 'lonaĝac qomle, jo'ne en yataqatelegue onolec q'aen ga'me lojaĝaua, qama'le 'nañaĝatela't. 3Qalaĝaja jo'oyapega ta'le aueñiya'am jadi'me Eva ca'li ñe'me nanaic yoqovin, 'me ja naqala'te' da'me loqovinaĝanaĝac. Nach'e ena'am da'me ami qom yovida'a da'me ami qoyoqovi'n, qama'le uotaĝa aĝañiñi da'me ami nedo'ta't nataq'aen yataqatelo'te da'me oquiyegue ñe'me Cristo. 4Qa'a da'me ami nale gamachaqaega ami yovida'alo jo'ne 'yaĝatetac ñe'me Jesús qalaĝaja ja ena'am ga'me joote ami ja'aĝataĝama, qanach'e paja'a 'uo da'me adamaiqui da'me auacoñiyeguet. Ñe'me Dios Lepaqal 'me ja 'nalegue 'me auacoñiyeguet joote ami uetauelo, qalaĝaja auacoñiyeguet nale ga'me nepaqal laqaya jo'ne yaqa'a, nataq'aen 'naqataĝanaĝac laqaya jo'ne ja ena'am ga'me joote auacoñiyeguet. 5Qalaĝaja ja naqaeda ta'le jayem napaquedalegue gaa'me jo'ne novideda'aquena ca'li, jo'ne eetapela'ajalo p'ajodaye namaĝa's. 6Mate mane'e jayem qalaqa't da'me yojaĝac ja jena'ama jogaa'me, qalaĝaja yaguegue ga'me yayatenaĝanaĝac ñapacalo'te jogaa'me, jo'ne joote nach'e eta't ami jaloĝonaĝalo nale jauoqo'oe gaa'me qat'onataqa.
7¿Jach'e jogamaĝa yoec? Nach'edata da'me onolec je'etetac: ca'li ami ja'aĝatema da'me 'laqataĝanaĝac ñe'me Dios, ja ami 'te jachiyoĝotauelo ga'me ñejetenaguec, dite da'me ñoqochiñe da'me jayem p'ajaye qaedi anichiquitajeguem da'me ami. 8Jogaa'me p'etaqadaiquipi laqaya' jayem qoyanem jaga'me laicaua ca'li qaedi ami jo'onataĝanouelo nayi nataq'aen ami yecochiyalo. 9Ca'li ami jouetauelo qama'le 'uo ga'me jouetaque, qalaĝaja qaya'te ua'a ta'le ami jachoĝoyalo qaedi jayem alecochiiya. Yema di'me aleua jo'ne Macedonia jogaa'me p'etaqadaiquipi jayem novideta ca'li qama'le jayem yate'm yema ga'me jouetaque. Jepaquetapega ta'le ja diyachitapiyelo naa'me adai'lidi' qa'a jouaĝat da'me jayem, qama'le nach'e eta't ja'uo da'me dojo'. 10Qama'le naq'aeta da'me yataqachiñe ñayatela't da'me jayaten joda'me eja jo'ne chiyaqayi ñe'me Cristo, nach'e ena'am jayatetelegue queda'me yema di'me aleua Acaya qaya'te doĝotaĝanec da'me ji'yoĝode'n jogaa'me. 11¿Toqoch'e naq'aeta ga'me 'yaqatac? ¿Qo'li ja ami 'te joqopitalo? Aja'y. ¡Dios yayaten queda'me yataqachiñe ami joqopitalo!
12Qalaĝaja jequetelegue je'etetac ga'me jo'ne joote ja'uo, qaedi ja ja'uo 'te ledaqa't gaa'me yelotedaque da'me 'uo ga'me chiyaqayi da'me ni'yoĝodenaĝa'j ena'am ga'me joote ñaqataĝañi ga'me joote qo'mi uetauelo. 13Qa'a jogaa'me nach'edata da'me pecayaqa 'me eetapela'ajalo namaĝa's, nataq'aen qovinaĝanaĝayaqa jo'ne ch'e nojomaĝaquidi'ña da'me eetapela'ajalo Cristo lamaĝa's. 14Dojo' nach'eda ja aloualiya'a. Chayovida'a ñe'me Satanás nojomaĝaqui'ña da'me eetapela't piyem le'ec 'me yoqochiñe, 15qama'le nach'e ena'am gaa'me lecochaĝa'u nojomaĝaquidi'ña da'me eetapela'ajalo jiyaĝa'u jo'ne yauote da'me 'noota. Qalaĝaja ga'me loiquiaqa't tayet da'me qoyanema da'me ne'uaĝanague'j jouaĝat gaa'me ja 'noe'n 'lonataqa.
Pablo tayet ta'le ni'yoĝodela't
16Yitaĝa ami ji'iyelaĝatelo'te: ena'te 'uo ga'me eetapega jayem jalaĝaic. Mate mane'e ena'am ta'le jayem naq'aeta, qalaĝaja naq'aeta da'me jayem auacoñiyeguet, qaedi jaqanatet ta'le cat'olec 'uo da'me ñi'yoĝodenaĝac. 17'Uo ga'me ami ja'aĝatema, qalaĝaja ja chiyaqayi ñe'me Dios. Ñatetola't queda'me 'uo da'me ñichiyoĝojoĝoc nale mach'e jayem 'ñaĝatapela't nataq'aen ñiyamaĝadela't. 18Qalaĝaja queda'me uo'oe gaa'me qayoĝode' 'naĝatapela'ajalo da'me niyamaĝadetapela'ajalo, qama'le ¿toqoch'e ja nach'e ena'am da'me jayem naq'aeta ga'me ja'uo? 19¡Yataqachiñe ami yatenaĝanaĝayaqa, qalaĝaja yataqachiñe adaloyeguet ta'le anapogaĝadeñiyegueta gaa'me jalaĝayaqa! 20¡Chayovida'a adaloyeguet ta'le anapogaĝadeñiyegueta gaa'me ami ee'tema ta'le lelataqa, nach'egaua jo'ne ami yoqovi'tape nataq'aen ami ye'ue'tape nataq'aen jogaa'me jo'ne ye'uaĝatapegouelo naa'me adatajoĝocodi'!
21'Uo da'me yepocoĝo da'me ñenaĝategue, qa'a ja ch'e yichiyaqatelegue ta'le naq'aeta ga'me je'etaĝaque. Qalaĝaja queda'me uo'oe gaa'me naq'aeta da'me yauote 'me ni'yoĝodela'ajalo, jayem nach'e ena'am naq'aeta ga'me ja'uo, mate mane'e dojo' chiyojoĝoc. 22¿Qo'li hebreo laje'pi jogaa'me? Jayem nach'e ena'am. ¿Qo'li Israel c'oqo'tepi? Jayem nach'e ena'am. ¿Qo'li chiyoĝoteguet di'me Abraham? Jayem nach'e ena'am. 23¿Qo'li Cristo lalemaĝaje'te? Jayem nach'e ena'am, ñapacalo'te jogaa'me, mate mane'e da'me ñenaĝategue da'me dojo' ena'am ta'le jayem chiyoĝojeta't. Da'me 'yonataĝanaĝac napacalo'te jogaa'me, ñapacalo'te jogaa'me da'me nach'e eta't jayem qoyecoñe', ñapacalo'te jogaa'me da'me nach'e eta't jayem qoye'uaĝan, nataq'aen ñapacalo'te jogaa'me da'me nach'e eta't jayem qoyadetapelegue da'me jetaque jayem qoyalat. 24Jogaa'me judiopi lajoĝola'te cinco jayem naqachidiñe nalochiguilo treinta y nueve jayem qoye'uaĝanec jaga'me 'uaĝanaĝanaqate. 25Tres jayem naqachidiñe gaa'me Roma laje' qama'le jayem ye'uaĝatec ga'me epaq. 'Uo ga'me ua'a ca'li nach'e ena'am jayem qoyajaĝac gaa'me qadipi. Ca'li tres ja'uo yeuoĝoc nalochiguilo gaa'me licotal jo'ne jonañilo domalidiñe ca'li nataq'aen yamta'le jayem ouaĝaic. 'Uo ga'me ua'a ca'li onolec pi'yaq nataq'aen onolec nolo' da'me jouetañgui ga'me noĝop let'a. 26Jayem jalcote da'me ja'uo yeuoĝoc; 'uo ga'me ua'a jauana ga'me ñache jo'ne 'uo da'me lichic, nataq'aen gaa'me cachaĝaiquipi, nataq'aen gaa'me mach'e yeyepiyayipi nataq'aen gaa'me yaqa'a jiyaĝadipi. Nataq'aen jauana da'me 'uo da'me lichic ga'me noic let'adaic, ga'me 'nonaĝa, nataq'aen ga'me noĝop let'a nataq'aen gaa'me qadaqaya' jo'ne ja yataqachiñe ejoda. 27Jalcote da'me 'yonataĝanaĝac, 'uo ga'me ua'a ja jaqanatet ta'le jo'oche; jec'on yoqouaĝa nataq'aen jelinquip, nataq'aen queda'me jouetaque ga'me yoĝot qama'le jec'on ga'me 'lomaĝa.
28Ja nach'edata da'me dojo', dite da'me uoja'ae gaa'me laqaya' 'me qayoĝode', onolqa'tape noloqo'ote jayem ualegue da'me jenate'talo gaa'me p'etaqadaiquipi qaedi yecochiyalo. 29Qom 'uo ga'me yeleuac, nach'e ena'am jayem jeleuac; 'uo da'me yepocoĝo nataq'aen yalemataic da'me jauana ga'me qadaqaya qoyen taue ga'me loec.
30Qom 'uo ga'me chiyaqayi da'me ñi'yoĝodenaĝac, ñi'yoĝodetapiyelo gaa'me uo'oe jo'ne jayem di'yoĝoma 'me yachoĝolaĝaco. 31Ñe'me Dios nataq'aen Let'a ñe'me Qadejaliaĝanec Jesús, jo'ne nach'eñe qoyanem da'me nach'e eta't qo'nonaĝachigui, nach'eñe yayaten queda'me ja joqovinaĝatac. 32Ca'li joue'ta di'me Damasco, ñe'me qoyen nejaliaĝatelegue di'me chiyaqayi ñe'me p'ajaye jaliaĝanec Aretas, yauo'oe vitaĝayaqa ca'li di'me noic qaedi jayem yecoñe'. 33Qalaĝaja uo'oe gaa'me qadaqaya' jayem yanedañgui jaga'me 'noĝona qoyen ja'ya jaga'me 'laete lauac ga'me lequepaĝanaĝat ga'me noic da'me jayem qonajejaĝa'ñigui. Naq'aeta da'me jayem qoyaĝan.
Currently Selected:
2 Co 11: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina
