2 Co 8
8
'Noota qom made'tape naa'me qadai'li da'me jauoqo qadejaqaje
1Ami yaqaya'olqa, jetaque ami ja'aĝatema da'me loqopich'i ñe'me Dios jo'ne uetauelo gaa'me p'etaqadaiqui di'me aleua jo'ne Macedonia. 2Temaqaedi da'me joote tauelo gaa'me qayoĝode' laqalaico, qalaĝaja nach'e eta't made'tape jogaa'me. Mate mane'e choĝodache, qalaĝaja jaga'me lajaqaje' ena'am ta'le neuoyaĝadi. 3Eja naqayem ja'aĝatetac queda'me yadegue yema ga'me maqachaĝa yaqanate't, nataq'aen yaguegue q'aen ga'me yadegue. Ja naqaeda ta'le qopaquetapegue'to, dite da'me naq'aeta da'me mach'e yauote, 4nataq'aen chayovida'a jalcote qo'mi nachoĝodenoto qaedi jajenaqa'tem da'me qaedi yacoteguet da'me qadecochaĝac jogaa'me Dios lec'oqo'tepi. 5Uoja'eda yaguegue ga'me yauote jo'ne ja naq'aeta ga'me qadelnataĝac. 'Uaeñe mach'egaua nemetot ñe'me Jaliaĝanec; yem qama'le qo'mi nemetot. Naq'aeta da'me dojo' jo'ne Dios dajo'talo qaedi yauote jogaa'me.
6Tito nach'eñe 'uaeñe ami yachiyoĝotauelo jaga'me adajaqajai ca'li qaedi qoya'uo jaga'me necochaĝanaqate. Qo'che' ñachoĝodenoqot qaedi quetalegue da'me 'yetetac. 7Ena'uac ami qoyayate'n queda'me yataqachiñe ami 'noote': nataq'aen ja aualajaĝañi da'me auep'iiya'a joñe'me Dios, 'noote' naa'me at'aqataqa, yaguegue da'me adayatenaĝanaĝaqui, ami yatenaĝanaĝayaqa, 'uo da'me adamaiqui ta'le alecochiiyalo jogaa'me adaqayadi' nataq'aen jalcote qo'mi adoqopichiyalo. Nayi auec'auayegue onaĝaic ga'me adajoĝoqui.
8Ja naqaeda ta'le ami janema ga'me yamaĝajoĝonaĝac. Jaldata da'me jetaque auayachiñe da'me eeta da'me yauote lajaqaje' jogaa'me qadaqaya'olqa jo'ne p'etaqadaiquipi, qaedi ami auaqanachichi ta'le aualoĝoñi da'me adoqopich'ii jo'ne qaya'te lale'gue. 9Ami auayachiñe ñe'me Qadejaliaĝanec Jesucristo yataqachiñe neuoyaq ca'li, qalaĝaja queda'me ami noqopitalo qama'le nec'ata jena'me aleua, yaconeguet da'me lachoĝodec qaedi ami auovidiya'a da'me ami neuoyaĝadi.
10Qaedi 'uo da'me mach'e adiyamaĝaqui, ami janema da'me jaqatelegue da'me dojo'. Jo'me uo'e laqaya naqa'ami a'uaviñe 'uo ga'me auañiyegue, nataq'aen jalcote avidiaqailegue ta'le auauoyi da'me dojo'. 11'Noota qom auomachi ga'me chiyoqochiñe a'vichi, nach'e naq'aeta ca'li avidiaqaitalegue da'me a'vichi ca'li yemta nach'eda a'nañaĝachiyec, onolqa'tape yanegue ga'me maqachaĝa yaqanatet. 12Qa'a qom 'uo ga'me ami yataqachiñe eja 'uo ga'me yanegue, Dios matac q'aen qom auauoyi jaga'me adajaqajai, qa'a ñe'me ja yeuate'ta ta'le janaĝaye ga'me ja jauanaĝa.
13Qalaĝaja ja 'noota ta'le 'uo da'me adouenaĝanaĝaqui queda'me alecochiiyalo jogaa'me adaqayadi'. Da'me jepagaqatapega ta'le ami uetauelo da'me adaloi'ta't. 14Nayi jalcote ga'me auañiya, qama'le 'noota qom alecochiiyalo ga'me jaleca ga'me yauata. Qa'a uotaĝa gaa'me noloqo'ote, qauadegue jogaa'me nach'e ena'am 'uo ga'me yauata jogaa'me qama'le ami lecochiyalo. Nach'eda naq'aeta da'me dojo' male adaloi'ta't. 15Naq'aeta ga'me 'yaĝatetac gaa'me nedii's, eet'oi: “Ga'me jo'ne jalcote ga'me latoc, qaya'te 'liyoĝot. Nataq'aen ga'me jaleca ga'me latoc, qaya'te louenaĝanaĝac.”
Qouenate'ta da'me qoyapetena't jaga'me necochaĝanaqate
16¡Janem yamaic ñe'me Dios queda'me Tito ami uenate'talo qaedi ami lecochiyalo nach'e naq'aeta da'me jayem! 17Ñe'me yataqachiñe jetaque ami yauanalo, chane'eja yaconeguet da'me je'elopec, nataq'aen yemalegue q'aen da'me lauelyaĝac da'me jetaque ami yec'atalo.
18Jayem nataq'aen Tito 'uo ñe'me mach'e qadaqaya jo'ne jalcote ga'me 'lonatac, da'me 'yaĝatetac da'me onaĝaic 'naqataĝanaĝac: nach'eñe jamaĝajoq. Ena'uaque jogaa'me p'etaqadaiquipi onaĝaic da'me 'nenaguec joñe'me, 19nataq'aen nach'eñe niquiyac qaedi qo'mi equeguelo qom jachoĝojoq jaga'me necochaĝanaqate. Yema da'me dojo' jauoqo qaedi qo'nonaĝachigui joñe'me Dios, nataq'aen qaedi jaloĝonaq da'me qadamaic ta'le jauoqo qadecochaĝac. 20Jetaque qadetela'aguet qom 'uo gamachaqaega ya'uo 'lenaĝanataĝanaĝac qa'a jouaĝat jaga'me lat'edai necochaĝanaqate jo'ne jachoĝojoq. 21Qo'che' ja'aedenaqatac da'me 'noota ga'me je'etaq, ja jaldata da'me qa'a yauana ñe'me Jaliaĝanec dite nach'e ena'am gaa'me jiyaĝa'u.
22Naajo' dojolqa jo'ne je'elopaĝaque da'me dojo', uoja'ae ñe'me qadaqaya jo'ne jamaĝajoq 'me quetapegue' ñe'me Cristo jo'ne nach'e eta't, nataq'aen yodapecache ga'me 'loyaĝac q'aen da'me jetaque ya'uo lecochaĝac, qama'le p'ajaye nayi jetaque ye'et, qa'a jalcote ami p'eteque. 23Anetoviñetac queda'me Tito mach'e ñaigaĝaua, nataq'aen queda'me qadalo'ta't da'me jo'onataĝanaq qaedi ami yecochaĝalo. Anetoviñetaque gaa'me dojolqa jiyaĝa'u laqaya' jo'ne quetegue ñe'me Tito mach'e lamaĝa's gaa'me p'etaqadaiquipi jo'ne 'nonaĝachidegue ñe'me Cristo. 24Qo'che' aualoĝoñiyalo da'me adoqopich'ii, qaedi jogaa'me p'etaqadaiqui jo'ne yama' naajo' lamaĝa's yataqata yayate'n queda'me qo'mi ejoda da'me qani'yoĝodenaĝac jouaĝat ami.
Currently Selected:
2 Co 8: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina
