1 Ts 3
3
Namaĝajoĝoc joñe'me Timoteo
1Qama'le nayi, male yataqata ja qadalo'oguet, qama'le 'uo ga'me qadelnataĝac jo'ne jenaqaac cha'li jouaqa'ta jena'me jenjo' Atenas 2qama'le jamaĝajoq ñe'me Timoteo, qa'a jayatenaq da'me yataqata lalemaĝajet joñe'me Dios, nataq'aen qadecochaĝaua da'me ja'aĝataqatac da'me onaĝaic 'laqataĝanaĝac joñe'me Jesús, mach'e Cristo. Jamaĝajoq ñe'me qadaqaya qaedi male yataqata ami 'yañaĝateque chayovida'a da'me male t'añi joda'me adepi'i, 3nataq'aen qaedi male ami yataqata qaya'te yoqovi'n, jena'me jenjo' 'uo nayi naa'me naajo' noloqo'ote, qa'a joote ami yataqata auayachiñe queda'me male qo'mi yedalo'te jo' qomle naa'me naajo' qadachoĝodeco. 4Nach'e ena'am ca'li cha'li ami jouaqatauelo, joote ami ja'aĝatapema queda'me gamachaqaega nolo' male jaĝaue ga'me qadachoĝodec, qama'le nayi naqaena male 'uo, qalaĝaja joote auayachiñe. 5Qama'le nayi jayem, jo'ne mach'e yoĝot, male yataqata male ja jalo'oguet joga'me jayem ualegue, qama'le ja'uo joga'me yenataĝanaĝac quelqaya, jouaĝat da'me ami, jetaque jayaten qom maliaĝa oquitelegue jena'me jenjo' mach'e qadepe'e ladic, 'noota qom maliaĝa ja aĝañiñi, qa'a 'uo da'me yoqolanaĝa joñe'me oiquiaĝaic ta'le 'uo ga'me ami 'yeteque joga ta'le ami nauanegueta chayovida'a da'me ami yoqovi'n, qama'le joga'me qat'onatac yataqata yijamaĝajaye, qaya'te chiyaqayi.
6Qama'le nayi joote 'niyelaq joñe'me Timoteo, chiyoĝogue di'me Tesalónica, qama'le yataqata onaĝaic ga'me 'laqataĝanaĝac, da'me ami yataqata t'añi nayi joga'me adepi'i, chayovida'a da'me adoqopich'ii jo'ne ami uetauelo. Choqoda'me qo'mi t'aqataĝatapema da'me nach'e eta't qo'mi auenachetapegalo da'me qo'mi, yataqata ja qo'mi 'te auapalaĝache'talo, nach'e eta't qo'mi avichoĝodeñi, chayovida'a da'me 'uo ga'me lamaic da'me yitaĝa qo'mi auañiyalo, qama'le nach'e ena'am da'me qo'mi 'uo da'me qadamaic da'me yitaĝa ñauanaĝa't qomle. 7Qama'le nayi, ami yaqaya', nayi da'me 'uo joga'me qo'mi nauatapeguet jo'ne qoyen qadachoĝodec choqoga'me qadouenaĝanaĝac, qalaĝaja nayi yataqata qo'mi machidiñe yajouaĝat da'me male ami jayatenaq da'me maliaĝa oquitalegue jena'me jenjo' qadepe'e ladic. 8Qama'le ena'am ta'le yataqata qadec'aletaye nayi, da'me jayatenaq da'me yataqata ami 'uañaĝayaqa, da'me a'vichi joga'me 'lonataĝanaĝac ñe'me Qadejaliaĝanec. 9Qama'le ¿jach'e ga'me jenaqatec qaedi yataqata jalcote da'me janemaĝam da'me qadamaic joñe'me Qadet'a Dios, queda'me ami chiyaqauelo joga'me t'adaic qadamaic nale yataqata qo'mi nelochi'ñalo joñe'me Qadejaliaĝanec? 10Pi'yaĝadi choqoga'me noloqo'ote 'uo joga'me qanachoĝodenaĝac janemaĝam joñe'me Qadet'a Dios qaedi qo'mi yaje'tema da'me yitaĝa ami jauanaĝalo qomle, nataq'aen da'me male ami yecochaĝalo qaedi yataqata nalochiñe da'me adepi'iyaĝaqui.
Netamenaĝac ñe'me Pablo
11Qadamaic ta'le Qadet'a Dios nach'eñe choqoñe'me Qadejaliaĝanec mach'e Jesús yataqata qo'mi lecochiyalo qaedi 'uo da'me qat'añaĝac da'me yitaĝa ami jajoĝoguelo qomle choqoda'me ami jejapichaĝalo. 12Nach'e ena'am 'noota ta'le Qadejaliaĝanec yataqata ami yanema da'me jalcote da'me nichiguegue da'me adoqopich'ii, qaedi nichigaĝategue da'me anoqopichiyapega't nataq'aen da'me adoqopichiyalo yema ga'me jiyaĝadipi, chayovida'a da'me qo'mi auadenaĝachi da'me yataqata ami qadoqopitalo nale da'me ami. 13Nataq'aen yataqata 'yañaĝachilo jonaa'me adai'lidi', qaedi yataqata ami uauelo joga'me ja 'nalegue, nataq'aen da'me yataqata ami ejoda yataqata qaya'te adoecodi' da'me ami nelotapi'ñalo joñe'me ja 'nalegue mach'e Qadet'a Dios, qom male 'niyelaq joñe'me Qadejaliaĝanec mach'e Jesús qama'le naequetedapegue' yema joga'me Dios lec'oqo'tepi jo'ne ja 'nalo'te. Jaja'a, nach'e naq'aeta da'me dojo'.
Currently Selected:
1 Ts 3: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina
