1 Ts 4

Da'me 'noyaĝac jo'ne 'yamaqaten ñe'me Dios

1Qama'le nayi, ami yaqaya'olqa, ami ñachoĝodenoqoto chayovida'a da'me ami jaqataĝalo queda'me jaconaĝa joda'me lañoqotaĝanaĝac ñe'me mach'e Qadejaliaĝanec Jesús, qaedi male yemeda naa'me naajo' noloqo'ote yataqata anichiquitaye, qa'a yataqata aueñi 'noota joga'me at'oyaĝaqui, nataq'aen da'me auauoyi yema joga'me auayachiñe jo'ne ami japaĝaguenaĝaque ca'li, qa'a jena'me jenjo' jo'ne auayachiñe naqaena jena'me yataqata 'yamaqaten joñe'me Dios, jena'me jenjo' jo'ne joote auauoyitac yataqata 'noota.

2Qa'a ami joote auayachiñe' jodaa'me napaĝaguenataĝanaĝaco jo'ne ami janemaĝama ca'li, da'me qo'mi jo'ne jaconaĝaguet da'me lañoqotaĝanaĝac joñe'me Qadejaliaĝanec Jesús. 3Ga'me yataqata 'yamaqaten joñe'me Dios, 'noota ta'le ga'me at'oyaĝaqui yataqata aueñi 'noota, chayovida'a da'me ja 'nalegue, nataq'aen ena'te 'uo joga'me leuaua jaga'me ja loua. 4'Noota ta'le yataqata auayachiñe naa'me anejiyaĝauayaĝaco, yataqata mach'e auelo'tegue ga'me auen ta'ya, 'noota ta'le aueñi yataqata ami uategayaqa, chayovida'a da'me yataqata ja ami 'te 'nalo'te. 5'Noota qom ch'e aualajaĝañi jena'me jenjo' jo'ne yataqata ja no'en; ena'te auadenaĝachi' jogaa'me jiyaĝa'u jo'ne yataqata ja yateto'n joñe'me Dios. 6Ena'te ta'le 'uo joga'me ch'e eetapega yoqovin joga'me laqaya uotaĝa ta'le ee'tec ga'me ja no'en, qa'a joñe'me Qadet'a yataqata ja 'yamaqaten da'me dojo', qama'le ya'uo jo' qomle joga'me laviyaĝajet. Qalaĝaja yema jena'me jenjo' joote ami ja'aĝataĝama ca'li. 7Qa'a auayachiñe joñe'me Qadet'a qo'mi yiyaĝanalo qaedi yataqata ja 'nalegue da'me qat'oyaĝac. Chane'eja ena'te oquiyegue joga'me yataqata ja no'en. 8Chane'eja, joga'me jiyaĝaua jo'ne 'yota'n naa'me naajo' napaĝaguenataĝanaĝaco, ja ena'am ta'le 'yotan ga'me ch'e jiyaĝaua, dite da'me 'yotan joñe'me Dios, ñe'me jo'ne joote qo'mi yanema joñe'me Lepaqal jo'ne ja 'nalegue.

9Ja auoviñetaque ta'le jediñe ga'me 'yaqatac jo'ne 'yaĝatetac da'me noqopich'i adoqopichiyalo jogaa'me adaqayadi'olqa jo'ne p'iida'a ñe'me Qadet'a, qa'a joñe'me joote ami yapaĝagueneque queda'me 'noota qom anoqopichiyapega't. 10Jena'me jenjo' nach'ena joote auauoyitac da'me yataqata adoqopichiyalo jogaa'me adaqayadi' jo'ne neda'ña di'me Macedonia. Qalaĝaja yitaĝa 'uo ga'me qanachoĝodenaĝac, ami qadaqaya'olqa, 'noota ta'le na'me adoqopich'ii yitaĝa aueñi nichiguegue. 11A'nañaĝachela't da'me ami machidiñe, nataq'aen ademiya'a ga'me jo'ne mach'e at'onataqui, nataq'aen a'uonataĝanaĝañi naa'me adoua'adi, nach'e ena'am queda'me joote ami jamaĝalo'te ca'li. 12Qama'le auauoyi jena'me jenjo' qaedi male yataqata ami qo'yamaqate'n chayovida'a da'me ami 'yamaqate'n joga'me ja p'iida'a jena'me jenjo' 'noota, nataq'aen qaedi qaya'te adouenaĝanaĝaqui.

Joga'me 'niyelaĝajoĝoc ñe'me Jaliaĝanec

13Ami yaqaya'olqa, ja qadelnataĝac ta'le ja auayachiñe ga'me ladiquiyaĝa'j jogaa'me joote yele'u, qaedi ja ami 'te totelo'te, da'me ja aueñiya'ama jogaa'me jo'ne qaya'te lajoĝonataĝanaĝa'j. 14Qa'a nach'ena jena'me jenjo' joote jayatenaq, ca'li yeleu joñe'me Qadejaliaĝanec Jesús qama'le nec'alijeguem ca'li, qama'le nach'e ena'am yataqata jep'iyaqa ñe'me Dios nec'alaĝachidijeguem jo' qomle jogaa'me jo'ne p'iida'a ñe'me Jesús ca'li yele'u.

15Chane'eja ami ja'aĝataĝama jena'me jenjo' jo'ne yataqata lapaĝaguenataĝanaĝac joñe'me Qadejaliaĝanec, queda'me qo'mi jo'ne maliaĝa qanec'aletaye chayovida'a qom 'niyelaq joñe'me Qadejaliaĝanec, ja je'uauaĝañe da'me qo'mi da'me jec'ataĝaje'ma di'me piyem, dite da'me 'uaediñe jodia'me joote yele'u. 16Qa'a qodomachiya jo' qomle da'me 'uo joga'me yejam, choqoda'me doje ñe'me piyem lejaliaĝanec nataq'aen jaga'me lajeede joñe'me Dios, qama'le male 'niyelaq joñe'me Qadejaliaĝanec, chiyoĝogue jodi'me piyem. Qama'le jodia'me yele'u jo'ne yataqata p'iida'a ñe'me Jaliaĝanec male naqaegaua 'uaediñe qoyen nec'alidijeguem jo' qomle. 17Qom yem jena'me jenjo' jo' qomle, qama'le jogaa'me maliaĝa nec'aletedaye, qom p'iida'a joñe'me Jaliaĝanec, male naqaegaua nataq'aen qoyachi'y quetegue joñe'me, qama'le nach'e ena'am qadalote'ta jo' qomle jogaa'me, jaĝauelo jogaa'me piyem loje', qama'le male jauanaĝa joñe'me Qadejaliaĝanec, jouaqataue ga'me ch'e layat, qo'mi p'adijeguem qama'le nale'en jouaqa'tajop joñe'me Qadejaliaĝanec. 18Chane'eja auojeyapega't nale, nataq'aen auadenaĝachi daajo' 'naqataqa qaedi a'uañaqachichi' gaa'me adaqayadi'.

Currently Selected:

1 Ts 4: TSN

Highlight

Copy