1 Ts 2
2
Da'me 'lonatac ñe'me Pablo ca'li ue'ta di'me Tesalónica
1Ami qadaqaya', yataqata auayachiñe joga'me qadeuoĝoc ja ch'e yijamaĝajaye da'me ami jec'ataĝalo. 2Yataqata auayachiñe da'me yataqata qo'mi qo'eetapegalo nataq'aen ja qo'mi 'te qoyiyamaĝate'tape ca'li jouaqa'ta di'me Filipos, qalaĝaja Dios qo'mi yanema da'me lañoqotaĝanaĝac qaedi maqachaĝa ami ja'aĝataĝama ga'me 'laqataĝanaĝac, mate mane'e 'uo ga'me t'adaic qanep'aguenataĝanaguec. 3Qa'a ja qadejometac ca'li ami japaĝaguenaq, nataq'aen ja chiyaqayi ga'me qadelnataĝac jo'ne paĝachigui, uotaĝa ga'me qadoqovinaĝanaĝac. 4Qa'a nach'eñe joñe'me Dios joote qo'mi yiyamaĝade'n nataq'aen qo'mi 'yelopeque qaedi ja'aĝataqatac jena'me jenjo' 'noota ladic qama'le nach'ena jena'me jenjo' jo'ne ja'aĝataqatac. Qalaĝaja ja jenaqatapega ta'le ga'me jiyaĝadipi male yataqata 'yamaqaten ga'me ja'aĝataqatac, dite ta'le yataqata qo'mi yiyamaĝaden joñe'me Dios, qa'a naqaeñe male yec'ate'tape naa'me qadai'li. 5Qa'a ami joote auayachiñe da'me ja auañiya ta'le ch'e ji'yoĝodenaqatac ga'me qadojaĝac, uotaĝa ta'le 'uo ga'me qadapaĝaguenataĝanaĝac jo'ne jenaĝa chiyaqayi ga'me qo'mi qoyejete'n. Jena'me jenjo' yataqata Dios joote yayaten nach'eñe qo'mi nelota'ñalo. 6Yataqata ja jeloqotac ta'le 'uo ga'me qo'mi 'nonaĝachiguilo, uotaĝa ta'le ami uotaĝa gamachaqaega ta'le qo'mi 'nonaĝachiguilo: ja naq'aeta. 7Qalaĝaja ta'le ami jenaqateque da'me dojo' jo'ne ami jaloĝonaĝalo ga'me t'adaic nejaliaĝa jo'ne qo'mi ue'tajopa da'me qo'mi lamaĝa's joñe'me Cristo, qalaĝaja da'me qo'mi nach'edata da'me jadenaĝataq da'me qo'mita jaqayi't nale ami jouaqatauelo, ena'am jaga'me nat'e nale yataqata netela ga'me yataqata c'oqo'te. 8Qo'mi yataqata jalcote da'me ami qadoqopitalo. Chane'eja ja nach'edata da'me 'laqataĝanaĝac ñe'me Dios jo'ne jetaque ami janemaĝama, dite da'me nach'e ena'am jetaque ami janemaĝama da'me mach'e qat'oyaĝac. Qa'a ¡nayi yataqata ami qanauotaĝa'u! 9Ami yaqaya'olqa, anetoviñetac ga'me qat'onataĝanaĝac ca'li, choqoga'me yataqata qadepagaĝac qaedi maqachaĝa 'uo ga'me qadomataĝanaĝac ga'me 'noyaĝac, yataqata 'uo ga'me qat'onataĝanaĝac gaa'me noloqo'ote chayovida'a gaa'me pi'yaĝadi, qaedi ja ami 'te qaueladetalo'te ca'li da'me ami, da'me cha'li ami ja'aĝataqatapema joga'me 'naqatac jo'ne yataqata chiyoqo'ot joñe'me Dios.
10Qama'le naqa'ami 'me auatetoñi ga'me 'yonatac, nataq'aen ñe'me Dios nach'eñe 'me joote yayaten da'me yema joga'me jauoqo yataqata ja ch'e qanequejaĝac, yataqata ja 'nalegue, yataqata chimaqachiñe, choqoda'me yataqata ami lecochiyalo da'me ami p'etaqadayaqa. 11Nataq'aen auayachiñe da'me yataqata ami jañaĝadijeguem, chayovida'a da'me yataqata ami jichoĝodenaq, onolqa'tape da'me ami, ena'am ga'me net'a nale ee'teque gaa'me c'oqo'te. 12Qama'le ga'me qadet'ayaĝac 'noota ta'le yataqata ami ejoda auauoyi ga'me yataqata qoyiyamaĝaden ga'me yataqata Dios lec'oqo'te joga, jo'ne nach'egaua male yaqanate't da'me uedaue ga'me lejaliaqa' jo'ne yataqata ja 'nalegue nataq'aen da'me qaya'te loiquiaqa' da'me qo'nonaĝachigui.
13Chane'eja da'me qo'mi, nach'e eta't da'me janemaĝam da'me qadamaic joñe'me Dios, yajouaĝat da'me auomachiiya ca'li ga'me qadapaĝaguenataĝanaĝac, jo'ne mach'e 'laqataqa ñe'me Dios, qama'le yataqata auacoñiyeguet ga'me, ja aueñetapega ta'le ch'e jiyaĝaua 'laqatac. Qa'a eja yataqata Dios mach'e 'laqataqa, qama'le yataqata eja 'uo joga'me ami chiyaqayilo, da'me ami jo'ne male yataqata eja auep'iiya'a. 14Ami yaqaya', ca'li 'uo ga'me adachoĝodequi male ami qoyecaa'tape chiyaqauelo ga'me at'achaqadiaĝauaipi, qama'le nach'e ena'ama uauelo ga'me netamenaĝaiqui ñe'me Dios, jo'ne mach'e loqo'te ñe'me Cristo Jesús, jo'ne neda'ña di'me Judea, jo'ne nach'e ena'ama yataqata qoyecaa'tape ca'li, qalaĝaja ja yaqa'alo joga'me yecaa'tape mach'e layi joga'me judiopi. 15Naa'me naajo' judiopi nach'enaua ca'li yala't ñe'me Jaliaĝanec Jesús, ena'ama ga'me let'alpi jo'ne yala't ca'li dia'me Dios 'laqataĝanaĝanaqa, qama'le da'me qo'mi ch'e qo'mi yeladedegue, ja qo'mi 'te najeteta, qa'a jouaĝat da'me ja noqopideta joñe'me mach'e Qadet'a jo'ne Dios, eetedapega da'me yataqata qaya'te 'yamaqaten. 16Qama'le nale jetaque jojaqapegue'to joga'me ja judiopi qaedi nach'e ena'am da'me qonec'alaĝatedegue, nach'e ena'am ja qo'mi 'te yaje'tema. Qama'le nach'eda da'me dojo' yataqata en nichiquetedajeguem da'me loe'j. Qalaĝaja qom qoya'uo ga'me loiquiaqa' jena'me jenjo', yataqata jalcote t'adaic joga'me en lachoĝode'j joga'me, mach'e chiyoqo'ot joñe'me Dios.
Pablo yataqata 'uo da'me lamaic da'me yitaĝa 'uo joga'me leuoĝoc
17Ami yaqaya, cha'li jeetapega qo'mi qolaĝayelo cha'li ja paja'a qanauanaĝa't jo' qomle. Da'me ami, mate mane'e ja jalcote nale ta'le ami jauanaĝalo, qalaĝaja nach'e eta't ami ñetouenaqataque, yataqata na'me qadauel ja ami 'te yapalaĝate'talo, qama'le yataqata 'uo da'me lamaic da'me ami jajoĝoguelo, qaedi yitaĝa ami jauanaĝalo. 18Te'me japiyenaq da'me ami jajoĝoguelo quelqaya, da'me jayem Pablo, nach'eda da'me japiyen da'me jetaque ami jajoyilo, qalaĝaja ñe'me Satanás nach'eñe qo'mi nauanegueta ca'li. 19Qalaĝaja, ¿jach'e ga'me mach'e qaneuatoqo't, uotaĝa mach'e qadamaic, chayovida'a ga'me chiyaqayi ga'me ñetonaqata't, nale qo'mi yec'ate'tape joñe'me Qadejaliaĝanec mach'e Jesús jo' qomle male 'niyelaq? Qom ja naqa'ami, ¿teua'atoqo' ta'le 'uo ga'me jiyaĝaua laqaya ta'le eetapega naqaega male qoyichoĝoden? 20Eja da'me ami naqaenaua jo'ne 'uo da'me nejiyaĝauayaĝac jo'ne yataqata onaĝaic, chayovida'a da'me ami chiyaqauelo nale ga'me qadamaic.
Currently Selected:
1 Ts 2: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina
