2 Timoteus 3
3
Omatango athiinina
1Iya tangan̯eka okutya pomatango athiinina mapa ka kala omaluvedhe omadheu. 2Iya ovantu mava ka kala ave lihole ovene, ave hole odhombongo, ovalinomi, ovalitangi. Mava ka kala ovapenyi, mbahava tee kovanene, mbahava pandula, mbahave thi ovadhilikwa. 3Wo kaava ka kala ave na ohole, kave na onkenda, owokulikumaenena, odhomputji nambava ngala ovithitu, mbave yele ouwa. 4Ovantu mboka mava ka kala ovalungameni, mbahave na ko natja, mbave lithela, mbave hole ovihulo poluvedhe lwokukala ave hole Kalunga. 5Mava ka moneka ngangumo tya va tila Kalunga, iya ve litendela odhonkono dhe. Kala kokule novantu mbave li nyahoka. 6Iya vamo owomovantu mboka mave ke liyombela modhonganda, hava hekele ovakadhintu mbave ulwa koulundhi, mbava alauluka mena lyomahalo awo omavi ngae lili nangae lili. 7Ovakadhintu hemba apehe va kala amave lilongo, atjaa kave na tango maveya iwa otjatjili. 8NgaJannes naJambres nawanawa hiva kondjethele Moses, ovantu hemba otjatjili kave tji hala. Ovantu hemba va ngwangwana odhondunge, kave liun̯ikile muKristus.#Eks. 7:11 9Iya kaava vyuuka komeho, mena lyokutya omuntu auhe ma ka mona owoova wawo nawanawa ngahembunya owoJannes naJambres.
Omapukululo
10Iya ove wa landula nawa elongo lyandje, onkalo yandje nontanto yandje. Wa ndandula meitavelo, melikambulithilo, mohole nahihe tyola, 11momatatetho, movihuna mbyaa mbadha moAntiokia, moIkonium, moListra. Iya Muhona wa ntjupitha mo movipuka hembi avihe.#Ovil. 13:14-52; 14:1-7,8-20 12Ovantu avehe mbamava hala okuundapela Kalunga nontilokalunga muKristus Jesus, mava ka tatethwa. 13Iya ovantu ovavi novalungameni mava ka ya komeho okuundapa ouvi, mava pukitha ovakwawo, nawo wo mave li pukitha. 14Iya ove kala movipuka mbyoka mbiwa longwa, mbii u i tjatjili, mena lyokutya ngwee ku longa vyo, u mu i. 15Omisonekwa omidhilikwa u vi i okudha koulele woye. Mavi ulu oku ku pa ounongo, u hupithwe okupitila meitavelo muKristus Jesus. 16Omusonekwa auhe wa sonekethwa kOmbepo yaKalunga, u na otjilinga tjokulonga otjatjili, okulondola, okupukulula nokuyulikila omuntu ondjila ndjaa vyuuka, 17omuntu waKalunga auhe opo e tjiiwe okuthevelwa otjilinga atjihe otjiwa.
Currently Selected:
2 Timoteus 3: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
