OMAPSALOME 91
91
Mepopilo laau wOkombadambada
1Ou e li omutumba meameno laau wOkombadambada,
ndele ta kala momudidimbe wOmunaenghono adishe,
2ye ota ti kOmwene:
“Eameno lange, nohotengulu yange,
Kalunga kange, ou handi mu lineekele.”
3Osheshi Oye tuu, te ku xupifa
melulo lomuteli womwiyo nomoudu wolutapo.
4Ote ku tuvike nomalwenya aye,
nomomavava aye omo to hondama;
oudiinini waye, owo oshikelelifo neameno.
5Ove ku na okutila oitilifa youfiku,
noshikuti, eshi tashi ku vakele omutenya,
6noudu wolutapo,
ou tau ku hondjaunine momulaulu,
neefya, edi hadi hanauna po pouyelele.
7Nande nava wile po eyovi limwe
kolumosho loye,
nomayovi omulongo kolulyo loye,
kwoove itau hange ko.
8Nokuli, oto ke shi mona nomesho oye mwene,
u tale, nhumbi ovadinikalunga
tava shunifilwa eshi va longela.
9Osheshi wa ninga Omwene eameno loye,
naau wOkombadambada owe mu ninga ohote yoye.
10Ito hangika nande koudjuu,
neumbo loye itali mono oshiponga.
11Osheshi Ye ote ku lombwelele ovaengeli vaye,
ve ku amene meendjila doye adishe.
12Otave ku humbata nomaoko avo,
uhe lipume omhadi yoye kemanya.
13Oto ende nokulyata onghoshi nonhoka,
oto lyataula onghoshona neyoka.
14Oye eshi a dama kwaame,
onda hala ndi mu xupife,
nda hala ndi mu amene,
osheshi ota shiiva edina lange.
15Ngeenge ta ifana nge, Ame ohandi mu udu;
ohandi liameke kuye moudjuu waye,
Ame ndi mu mangulule mo,
nohandi mu fimanekifa.
16Ame ohandi mu palula
noku mu kaleka nomwenyo mule,
ndele ohandi mu monifa exupifo lange.
Currently Selected:
OMAPSALOME 91: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
