OMAPSALOME 30
30
Ouwa waKalunga ohau kalelele
Epsalme laDavid, lokwiimba peyapulo lotembeli.
1Omwene, nda hala ndi ku fimaneke pombada,
osheshi Ove wa shila nge movayelani vange,
noino va pa omhito, va hafele nge.
2Omwene, Kalunga kange,
nda li nde ku kwenaukila u kwafe nge,
ndele owa velula nge.
3Omwene, Oove wa alula omwenyo wange moshovafi,
wa alulila nge komwenyo,
hinga ndi mbonyokele mombila.
4Imbileni Omwene ehambelelo,
ovakoshoki vaye nye,
panduleni nokudimbulukwa edina laye liyapuki!
5Osheshi ehandu laye ohali kala po
okafimbo kepakumo limwe,
nonghenda yaye otai kalelele omafiku aeshe;
mokutokelwa ekweno,
nomokusha ehafo li li po.
6Eshi nda li ndi shii nda pama, opo nee nda tya:
“Itandi punduka nande.”
7Omwene, molwohokwe yoye
wa pamekela nge omhunda yange;
ndele eshi wa holeka oshipala shoye, onda haluka.
8Opo nee nde ku lalekida, Omwene,
nonda kuwa kwoove, Kalunga kange, nda tya:
9“Mohonde yange oto mono mo ouwa washike,
ngeenge nda wile melambo?
Ondwi otai ku pandula mbela,
i udife oudiinini woye?
10Omwene, ngeno u ude nge,
u file nge onghenda!
Omwene, Ove kala omukwafi wange!”
11Enyeme lange, owe li shitukifa ehafotanhelo,
Ove owa dula nge oshikutu sheenghali,
ndele to dike nge ekwamo lehafo,
12opo omwenyo wange u shiive oku ku imbila, itau loloka;
Omwene, Kalunga kange,
fiyo alushe handi ke ku hambelela!
Currently Selected:
OMAPSALOME 30: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
