OMAPSALOME 31
31
Ekemo, eilikano nepandulo
Epsalme laDavid, la pewa enyakwa lolwiimbo.
1Omwene, kwoove oko nde uya okuhondama;
ino fifa nge nande ohoni.
Xupife nge molwouyuki woye.
2Endekela okutwi kwaame,
endelela u xupife nge!
Ninga emanya lokwaamena nge,
nohotemhunda yange muyo u xupifile nge.
3Oove emanya lange nohote yange;
molwedina loye oto ka endifa nge,
ndele to kwatele nge komesho,
4Oto shili nge mo meendjadja odo va tela nge meholeko,
osheshi Oove omwaameni wange.
5Omhepo yange ohandi i yandje momake oye;
Ove wa kulila nge, Omwene,
Kalunga omudiinini.
6Ava va kwatelela moikalunga yongaho,
ohandi va tondo,
ndele ame onde lineekela kOmwene.
7Handi hafele nokunyakukilwa
ouwanghenda woye,
shaashi wa tala oudjuu wange,
nowa dimbulukwa omatilifo omwenyo wange,
8noino yandja nge momake ovatondi,
neemhadi dange owe di endifa poluhaela.
9Omwene, file nge onghenda!
Osheshi ame nda mbadapala;
omesho ange a wiwikifwa kouyehame wange,
omwenyo nolutu osho tuu.
10Osheshi okukalamwenyo kwange otaku pu po moudjuu,
nomido dange ometwo lomadima;
eenghono dange oda utamekwa kowii wange,
nomakipa ange a fa a tukwa.
11Onda ninga oshiyolifa shovayelani vange,
novashiinda vange otava kukuma nge;
ava tava litu nge mondjila,
otava i nge onhapo.
12Onda dimbuwa, nda fa omufi, ou a dja mokudimbulukiwa,
nda fa oshikangwa itashi kwatelwa vali.
13Heeno, ondi udite,
vahapu tava ambaamba nge,
oixuna keembinga adishe,
mokungudumana kwavo
otava diladilile nge efyo.
14Ndelenee ame ohandi ku lineekele, Omwene,
ndele handi ti: Oove ngaho Kalunga kange.
15Omafimbo ange e li meke loye;
Ove, xupife nge meke lovatondi nolovataatai vange!
16Yelifila omupiya woye oshipala shoye,
xupife nge omolwouwanghenda woye!
17Omwene, ino efa nge ndi lengaifwe,
Oove handi ifana.
Ava vehe na ko nasha naave,
ovo nava lengaifwe,
ndele eshi va tomhwa, nava ye moshovafi!
18Omilungu doipupulu ngeno di mwenekwe,
edi tadi tongo omuyuki
mowii nomelinenepeko nomokudina.
19Ouwa woye ounene u fike peni,
ou we u tuvikilila ava, have ku tila.
Noto u yandje moipafi yovanhu kwaava,
have ku lineekele.
20Oto va amenifa oshipala shoye
molwomaduto ovanhu mai,
oto va holeke keemhata domalaka avo mondjuwo yoye.
21Omwene na fimanekwe,
eshi a monifa nge onghenda yaye inene,
ya kumwifa moshilando sha pama.
22Mokulimbililwa kwange onda li ndi shii,
onda kandulilwa kokule
ndi dje momesho oye;
ndelenee mboli nokuli
eshi nda kuwa kwoove,
owa uda ekwenauko lange.
23Kaleni mu hole Omwene,
ovakoshoki nye amushe!
Ava tava diinine, Omwene ote va amene;
ndelenee ou te litumbaleke mwene,
ote shi mu alulile oushima u yadi.
24Kaleni nomwenyo muwa,
nomitima deni nadi tiluluke,
nye amushe ava hamu teelele Omwene!
Currently Selected:
OMAPSALOME 31: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
