MATEUS 8
8
Jesus ta velula omunashilundu
(Mark. 1:40-45; Luk. 5:12-16)
1Ndele Oye eshi a londoloka komhunda, a shikulwa kovanhu vahapu unene. 2Ndele tala, omulumenhu omunashilundu e uya po, okwe mu linyongamena poshi ndele ta ti: “Omwene, ngeenge wa hala, oto dulu okuyelifa nge.” 3Oye okwa nana eke laye, e mu kuma ndele ta ti: “Onda hala, yela!” Opo tuu opo a yela koshilundu shaye. 4Ndele Jesus okwe mu lombwela: “Tala, ino shi lombwela nande olyelye, ndele inda u ke liulike komupristeli, ove u ka yandje oshali sha tongwa kuMoses, shi va ningile ondobwedi.”
Jesus ta velula omumati welenga
(Luk. 7:1-10; Joh. 4:43-54)
5Ndele Jesus eshi a fika kuKapernaum, omunefele okwe uya kuye nokwe mu indila, 6ndele ta ti: “Omwene, omumati wange okwa nangala ta vele keumbo, e noudu wombada noku na ouyehame muhapu.” 7Jesus okwa tya kuye: “Ohandi uya ndi ke mu velule.” 8Ndele omunefele okwe mu nyamukula ndele ta ti: “Omwene, ame inandi wana u uye monduda yange; ndele tonga ashike ondjovo imwe, omumati wange opo ta veluka. 9Osheshi naame yo omunhu omupangelwa, ndele ame ondi novakwaita handi va pangele, ndele handi lombwele ou: ‘Inda,’ ndele ta i, nomukwao: ‘Ila,’ ndele te uya, nomumati wange: ‘Longa shonhumba,’ ndele te shi longo.” 10Hano Jesus eshi e di uda okwa kumwa, ndele ta ti kwaava ve mu shikula: “Oshili handi mu lombwele: MOvaisraeli inandi mona nande umwe e neitavelo li fike pwaali. 11Ndelenee Ame ohandi mu lombwele: otaku di vahapu koushilo nokouninginino, ndele tava ka lya pamwe naAbraham naIsak naJakob mouhamba womeulu; 12ndelenee ovana voshilongo otava ka ekelwa momilaulu dopondjelela; omo tamu ka kala elilaano nelikweshelo lomayoo.” 13Jesus okwa lombwela omunefele: “Inda nee! Ngaashi wa itavela, osho to ningilwa. Omumati okwa veluka mefimbo tuu olo.”
Jesus ta velula inamweno yaPetrus
(Mark. 1:29-34; Luk. 4:38-41)
14Ndele Jesus eshi e uya meumbo laPetrus, okwa hanga inamweno ta vele olwiidi. 15Ndele Jesus okwe mu kuma keke, ndele olwiidi le mu fiya po. Oye okwa fikama ndele ta yakula Jesus. 16Ndele onguloshi eshi ye uya, vahapu ava ve kwetiwe keendemoni, ova etwa kuye. Eendemoni okwe di tefa mo ondjovo, novanaudu aveshe okwe va velula; 17opo pa wanifwe odo da tongwa komuxunganeki Jesaja, eshi a tya: “Okwe litwika oungone wetu, noudu wetu okwe u humbata.”
Jesus ta londwele ovashikuli vaye
(Luk. 9:57-62)
18Ndele Jesus eshi a mona ovanhu vahapu unene ve mu dingilila, okwe va lombwela va alukile komunghulo walanghele kwinya. 19Ndele omunongo womishangwa umwe okwe uya ndele ta ti kuye: “Omuhongi, onda hala oku ku shikula keshe apa to i.” 20Ndele Jesus okwa tya kuye: “Eembadje odi nomakwena, needila dokeulu odi noihadi, ndele Omona wOmunhu ke na apa ta wilike omutwe waye.” 21Ndele umwe vali womovalongwa vaye okwa tya kuye: “Omwene, lekele nge, ndi ye manga ndi ka pake tate.” 22Ndelenee Jesus okwa tya kuye: “Shikule nge, efa ovafi nava pake ovafi vavo.”
Jesus ta lotifa efuta
(Mark. 4:35-41; Luk. 8:22-25)
23Ndele Ye okwa ya mowato novalongwa vaye ve mu shikulila mo. 24Ndele tala, mefuta omwa tukuluka omhepo i neenghono nomakufikufi a tuvika owato; ndele Ye okwa hangika a kofa. 25Ndele ova ya kuye, ve mu pendula ndele tava ti: “Omwene, tu xupifa, ohatu ningine mo!” 26Ndele Oye okwa tya kuvo: “Ovaneitavelo linini nye, oshike mu noumbada?” Ndele okwa fikama, ndele ta hanyene omhepo nefuta, ndele pa ninga eloto linene. 27Ndele ovanhu ova kumwa ndele tava ti: “Ou okwa tya ngahelipi, eshi omhepo nefuta tali dulika kuye?”
Jesus ta velula ovanhu vavali ve kwetiwe keendemoni
(Mark. 5:1-20; Luk. 8:26-39)
28Ndele eshi e uya kombinga inya medu lOvagadara, ovanhu vavali ve kwetiwe keendemoni va dja meembila ve mu shakeneka, va pwiduka nai, onghee kapa li ou a dula okweenda nondjila inya. 29Ndele tala, ova ingida va tya: “Ove wa hala shike mufye, Oove Omona waKalunga? Owe uya oku tu hepeka efimbo manga inali fika?” 30Ndele kwinya kokule navo okwa li ku nongudu inene yoingulu tai nape. 31Ndele eendemoni de mu indila tadi ti: “Ngeenge to tu te mo, tu tuma mongudu yoingulu.” 32Ndele Oye okwa tya kudo: Djeni mo, mu ye ko! Odo da dja mo muvo, ndele tadi i moingulu. Tala, opo nee ongudu aishe ye liundula ko komunghulo womhunda ndele tai mbonyokele mefuta noya fila mo. 33Ovafita ova dja ko onhapo; ova ya koshilando ndele tava hepaulula aishe, novanhu ve neendemoni nhumbi va ningwa. 34Ndele tala, oshilando ashishe sha kongoloka nosha shakeneka Jesus; ndele eshi ve mu mona, ove mu indila a dje mo moshilongo shavo.
Currently Selected:
MATEUS 8: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.