MATEUS 7
7
Eudifo lokomhunda: Okutokolafana
(Luk. 6:37-38, 41-42)
1“Inamu tokola, opo muha tokolwe; 2osheshi etokolo eli tamu li tokolifa, nanye yo otamu li tokolifwa; noshiyelekifo eshi tamu shi yelekifa, nanye yo otamu ke shi yelekifwa. 3Ndele ongahelipi hano wa tala okambodi ke li meisho lamukweni, ndele endangalati li li meisho loye mwene, ku li wete? 4Ile to shiiva ngahelipi okulombwela omumwanyoko: ‘Handi uya, ndi kufe mo okambodi meisho loye’, ndele tala, ove u nendangalati meisho loye mwene? 5Omunaihelele ove, kufa mo tete endangalati meisho loye mwene, opo to mono nawa, nhumbi to kufa mo okambodi ke li meisho lamukweni.
6“Oshiyapuki inamu shi yandja keembwa, noilanda yeni inamu i ekela koingulu, opo efiku limwe ihe mu lyate nomakondo ayo, ndele tai aluka ndele tai mu pombaula.
Okwiilikana
(Luk. 11:9-13)
7“Indileni, ndele tamu pewa; kongeni, ndele tamu mono; kongholeni, ndele tamu yeululwa. 8Osheshi keshe tuu ou ta indile ota pewa, naau ta kongo, ota mono, naau ta konghola, oye ta yeululwa. 9Ile omu na tuu omunhu mokati keni, omona ngeenge te mu indile omungome, ndele te mu pe emanya, 10ndele, ngeenge te mu indile oshi, ndele te mu pe eyoka? 11Hano onye ava muvai, ngeenge mu shii okupa ovana veni oipewa iwa, unene tuu Xo yeni meulu ota yandje ouwa kwaava, tave mu indile!
12“Onghee hano, keshe eshi mwa hala ovanhu ve mu ningile, osho va ningileni yo: osheshi omhango novaxunganeki oyo tuu oyo.
Ondjila yefyo noyomwenyo
(Luk. 13:23-24)
13“Indeni mu pite moshivelo sha finana. Osheshi oshivelo oshinene, nondjila oya mbwalangadja ei tai twala mekano, ndele ava tava i mo ovahapu; 14ndele oshivelo oshinini nondjila oya finana ei tai twala momwenyo, novanini vongaho ovo tave i mono.
Ovaxunganeki ovanaipupulu
(Luk. 6:43-44)
15“Ndelenee lungameni ovaxunganeki ovanaipupulu, ava have uya kunye moipa yeedi, ndele meni lavo ovo omambungu haa lyaana. 16Otamu va koneke koiimati yavo. Eeviinyu ohadi likolwa ngeno komano ile eenghwiyu keeshosholo? 17Osho omuti keshe muwa ohau ima oiimati iwa, ndele omuti mwii ohau ima oiimati ii; 18omuti muwa itau dulu okwiima oiimati ii, ngaashi omuti mwii itau dulu okwiima oiimati iwa. 19Okeshe tuu omuti ihau ima oiimati iwa, otau kewa po ndele tau ekelwa momundilo. 20Onghee hano otamu va koneke koiimati yavo.
Ewanifo lehalo laKalunga
(Luk. 13:25-27)
21“Hakeshe ou ta ti kwaame: ‘Omwene, Omwene!’ ta i mouhamba womeulu, ndelenee oye tuu ou ha longo ehalo laTate womeulu. 22Efiku olo vahapu otava ti kwaame: ‘Omwene, Omwene, hafye tuu ovo twa xunganekele medina loye notwa ta mo eendemoni medina loye notwa longa oilonga ihapu yeenghono medina loye?’ 23Ndelenee Ame ohandi va lombwele: ‘Inandi mu shiiva nandenande; djeni po pwaame, onye ovakolokoshi!’
Ovatungi vavali
(Luk. 6:47-49)
24“Hano keshe tuu ou ta udu eendjovo edi dange ndele te di wanifa, oye ta yelekwa nomulumenhu omunaendunge, a tungila ongulu yaye kemanya. 25Ndele odula ya pauka, efundja le uya, neemhepo da pepa de litwa mongulu ei, ndele ongulu inai teka po, osheshi oyo oya tungilwa kemanya. 26Ndelenee keshe ou ta udu eendjovo edi dange ye ite di wanifa, ota yelekwa nomulumenhu elai, a tungila ongulu yaye mehenge. 27Ndele odula oya pauka, efundja le uya, neemhepo da pepa de litwa mongulu ei, ndele tai ngumauka po, nengumauko layo la li linene.”
28Ndele okwa ningwa, Jesus eshi a mana okupopya eendjovo edi, ovanhu ova kuminwa elongo laye, 29osheshi okwe va longa ngaashi ou e neenghono, hangaashi ovanongo vomishangwa vavo.
Currently Selected:
MATEUS 7: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.