MATEUS 6
6
Eudifo lokomhunda: Okuyandja
1“Lungameni okutalifa ouyuki weni moipafi yovanhu mu monike kuvo; ndele ngeenge tamu u talifa, kamu noshipewa kuXo yeni meulu.
2“Onghee hano, ngeenge to yandje oikwafa yeehepele ino tetekelifa okushika enghuma ngaashi ovanaihelele hava ningi omeeshinagoga nomeendjila, opo va fimanekwe kovanhu. Oshili ohandi mu lombwele: vo ova pewa ondjabi yavo. 3Ndelenee ove ngeenge ho yandje oikwafa yeehepele, eke loye lokolumosho inali shiiva, eshi eke loye lokolulyo tali ningi, 4opo oikwafa yeehepele yoye i kale meholeko; naXo, ou ha mono meholeko, ote ku futu.
Okwiilikana
(Luk. 11:2-4)
5“Ndele ngeenge tamu ilikana, inamu kala ngaashi ovanaihelele; osheshi ve hole okukala ofika nokwiilikana meeshinagoga nopomashakeneno eendjila, va monike kovanhu. Oshili handi mu lombwele: ovo va pewa ondjabi yavo. 6Ndelenee ove ngeenge to ilikana, inda monduda yoye, idila po oshivelo shoye, u ilikane Xo, ou ha kala meholeko; ndele Xo ou ha mono meholeko, ote ku futu moipafi.
7“Ndele ngeenge tamu ilikana, inamu popyaana ngaashi ovapaani, ovo ve shii tava udilwa okupopyaana kweendjovo dihapu. 8Hano inamu va fa; osheshi Xo yeni e shi shii eshi mwe shi pumbwa fimbo inamu mu indila.
9“Hano, mu nokwiilikana ngaha:
‘Tate yetu ou u li meulu!
Edina loye nali yapulwe;
10Ouhamba woye nau uye;
ehalo loye nali wanifwe
kombada yedu ngaashi yo meulu;
11omungome wetu womafiku aeshe u tu pa yo nena;
12tu kufila po omatimba etu,
ngaashi nafye yo hatu kufile po ovanamatimba nafye;
13ndele ino tu twala momayeleko,
ndelenee tu xupifa mowii.’
14“Osheshi onye ngeenge hamu kufile po ovanhu omanyono avo, Xo yeni meulu ote mu kufile po yo; 15ndelenee ngeenge itamu dimine po ovanhu, naXo yeni ita dimi po omanyono eni.
Okulidilika oikulya
16“Ndele onye ngeenge tamu lidilike oikulya, inamu kala noshidimbi moshipala ngaashi ovanaihelele, osheshi vo ohava lulike oipala yavo, opo ovanhu va koneke ove lidilika oikulya. Oshili handi mu lombwele: ovo va pewa ondjabi yavo. 17Ndelenee ove ngeenge to lidilike oikulya, vaeka omutwe woye ndele kosha oshipala shoye, 18opo uha monike kovanhu we lidilika oikulya, ndelenee okuXo ou e li meholeko, naXo ou ha mono meholeko ote ku futu moipafi.
Okulikola kwashili
(Luk. 12:33-34)
19“Inamu liongelela omamona kombada yedu, oko eenhwishi noilemo hai nyonauna, naaku ovalunga hava fe, ndele tava vake. 20Ndelenee liongeleleni omamona meulu, omo eenhwishi ile oilemo ihai nyonauna, novalunga ihava fe ndele itava vake. 21Osheshi oko kwa kala emona loye, oko yo kwa kala omutima woye.
Ouyelele wolutu
(Luk. 11:34-36)
22“Eisho olo ouyelele wolutu. Hano eisho loye ngeenge oli li nawa, olutu loye alishe ola yela. 23Ndelenee eisho loye ngeenge oli li nai, olutu loye alishe oli li momulaulu. Hano ouyelele ou u li mwoove ngeenge wo omulaulu, hano omulaulu u fike peni!
Okulineekela Kalunga
(Luk. 12:22-31)
24“Kaku na ou ta dulu okukalela oovene vavali; osheshi ota tondo umwe, ye e hole omukwao, ile a hokwa ou ndele ta dini winya. Kamu dulu okukalela Kalunga nemona.
25“Onghee hano handi mu lombwele: inamu fila okukalamwenyo kweni oshisho, mu lye shike ile mu nwe shike, nomalutu eni mu djale shike. Omwenyo kau dule hamba oikulya, nolutu kali dule oikutu? 26Taleni eedila dokeulu: ihadi kunu, do ihadi teya, ndele ihadi tuvikile momaanda, ndelenee Xo yeni meulu ohe di palula. Hanye ovo mu di dule unene? 27Olyelye ou mokati keni, nande a kale e noshisho, ta dulu okuweda ko koule womafiku aye nande oludimbo limwe?
28“Ndele oshike mu noshisho shoikutu? Taleni nokudidilika eenhemo domoixwa, nhumbi hadi kulu; odo ihadi longo noihadi hodila. 29Ndele Ame ohandi mu lombwele: naSalomo moshinge shaye ashishe ka djalele ngaashi imwe yado. 30Hano Kalunga ngeenge ta djaleke ngaha eidi lomoixwa, eli tali kala po ashike nena, mongula otali ekelwa mediko, ite shi mu ningile mbela unene ngeno, onye ava veitavelo linini? 31Hano inamu kala mu noshisho mu tye: ‘Ohatu li shike?’ ile: ‘Hatu nu shike?’ ile: ‘Hatu djala shike?’ 32Osheshi eshi ashishe ovapaani ohave shi kongo. Osheshi Xo yeni meulu oku shi shii mwa pumbwa ei aishe. 33Ndelenee kongeni tete ouhamba waKalunga nouyuki waye, opo tamu wedelwa ko ei aishe. 34Inamu kala noshisho shefiku lomongula. Osheshi lo otali uya li na shalo vene. Okeshe tuu efiku la wana oudjuu walo.
Currently Selected:
MATEUS 6: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
