MATEUS 9
9
Jesus ta velula oshingudu
(Mark. 2:1-12; Luk. 5:17-26)
1Ndele Ye okwa ya mowato, a tauluka, ndele te uya koshilando shambulavo. 2Ndele tala, ovo va eta kuye oshingudu a nangala kolutala. Jesus eshi a mona eitavelo lavo, okwa tya koshingudu: “Kala nomwenyo muwa, omumwange, omatimba oye taa dimwa po.” 3Ndele tala, vamwe vomovanongo vomishangwa ove lipopila ndele tava ti: “Ou ota sheke.” 4Ndele Jesus eshi a shiiva omadiladilo avo okwa tya kuvo: “Otamu diladilile shike owii momitima deni? 5Ndele eshi shipu shi dule shikwao oshilipipo, okutonga: ‘omatimba oye otaa dimwa po’, ile okutonga: ‘fikama, u ende?’ 6Ndelenee opo mu kale mu shi shii, Omona wOmunhu e neenghono kombada yedu okudima po omatimba.” Okwa lombwela oshingudu: “Fikama, kufa olutala loye, u ye kombuleni.” 7Ndele ye okwa fikama ndele ta i kombulavo. 8Ndele eengudu dovanhu eshi de shi mona, oda haluka ndele tadi fimaneke Kalunga, eshi a pa ovanhu eenghono di fike apa.
Jesus ta ifana Mateus
(Mark. 2:13-17; Luk. 5:27-32)
9Ndele Jesus eshi a dja ko, okwa mona ko omunhu, edina laye Mateus, e li omutumba pongulu yomafutilo opeengaba, ndele ta ti kuye: “Shikule nge.” Ou okwa fikama ndele te mu shikula. 10Ndele okwa ningwa, fimbo ta li meumbo laau, tala, ovafutifi vahapu novalunde ve uya mo, ndele tava li pamwe naJesus novalongwa vaye. 11Ndele Ovafarisai eshi ve shi mona, ova tya kovalongwa vaye: “Omuhongi weni oshike ta lile pamwe novafutifi novalunde?” 12Ndelenee Jesus eshi e shi uda, okwa tya: “Ava va pama, ihava pumbwa omuveluli, ndelenee ovanaudu ovo tuu aveke. 13Ndelenee indeni mu ke lilonge kutya, eshi otashi ti shike: ‘Efilonghenda nda hala, hayambo.’ Osheshi inandi uya okwiifana ovayuki, ndelenee ovalunde ovo tuu.”
Okulidilika oikulya
(Mark. 2:18-22; Luk. 5:33-39)
14Ovalongwa vaJohannes ove uya kuye ndele tava ti: “Ofye nOvafarisai luhapu ohatu lidilike oikulya; oshike ovalongwa voye ihave lidilike?” 15Ndele Jesus okwa tya kuvo: “Ookaume komuhomboli otava shiiva ngahelipi okunyika oluhodi fimbo omuhomboli e li puvo? Ndele omafiku tae uya, omuhomboli te va kufwa, opo nee otave lidilike oikulya. 16Ndele kaku na ou ta vandeke oshikutu shikulu noshivando shipe, osheshi oshivando sha tya ngaha otashi pombaula oshikutu, nombululu otai ningi inene i dule yonale. 17Nomaviinyu mape ihaa dilwa momakutu makulu; osheshi omakutu otaa tauka, nomaviinyu taa tika mo, nomakutu otaa nyonauka po; ndele omaviinyu mape ohaa dilwa momakutu mape, opo aishe ivali tai xupu.”
Jesus ta velula omukainhu ndele ta nyumuna omona waJairus
(Mark. 5:21-43; Luk. 8:40-56)
18Fimbo kwa li te di va lombwele, tala, omukulunhu woshinagoga e uya po, okwe linyongamena poshi kuye ndele ta ti: “Omona wange okakadona opo a fi paife, ndele ila tuu u mu tenheke eke loye, opo a ninge omwenyo.” 19Ndele Jesus okwa fikama ndele ta i naye pamwe novalongwa vaye. 20Ndele tala, omukainhu umwe, a li a vela etiko lohonde omido omulongo nambali, e uya konima yaye ndele ta kumu konyemba yoshikutu shaye. 21Osheshi ye okwe lipopila ta ti: “Shimha tuu handi kumu koshikutu shaye, ohandi veluka.” 22Ndele Jesus okwa punguluka, okwe mu tala ndele ta ti: “Kala nomwenyo muwa, omumwange; eitavelo loye le ku velula.” Pefimbo tuu olo omukainhu okwa veluka.
23Ndele Jesus eshi e uya meumbo lomukulunhu ndele ta mono oonakushika eenyalilo nongudu ya weelela. 24Okwa tya: “Djeni mo, osheshi okakadona inaka fya, oka kofa.” Ovo ve mu yola. 25Ndele ongudu yovanhu eshi ya tewa mo, okwa ya mo, ndele te mu kwata keke; opo nee okakadona ka penduka. 26Ndele ondaka ei oya udika moshilongo shinya ashishe.
Ovapofi vavali nomufitandaka
27Ndelenee Jesus eshi a dja ko, ovapofi vavali ove mu shikula, ova ingida ndele tava ti: “Omona waDavid, tu fila onghenda!” 28Ndele eshi e uya meumbo, ovapofi venya ove uya kuye; Jesus okwa tya kuvo: “Onye tamu itavele tuu ndi neenghono oku shi ninga?” Ovo va tya kuye: “Heeno, Omwene.”
29Ye okwa kuma omesho avo ndele ta ti: “Ningilweni paitavelo leni.” 30Nomesho avo a twikuluka. Jesus okwe va kumaida neenghono ndele ta ti: Taleni, eshi shiha udike nande okomunhu. 31Ndelenee ova ya ndele tave mu hepaulula moshilongo shinya ashishe.
32Ndele tala, ava eshi va ya, ovo va eta kuye omunhu iha popi, e nondemoni. 33Ndele ondemoni eshi ya tewa mo, omufitandaka okwa popya, neengudu dovanhu da kumwa, ndele tadi ti: “Oshinima sha tya ngaha inashi monika nale nande efiku limwe muIsrael.” 34Ndelenee Ovafarisai ova tya: “Eendemoni ohe di tefa mo omukulunhu weendemoni.”
Jesus ta udifa ndele ta velula
35Ndele Jesus okwa li ta endaenda noilando aishe nomikunda, ndele ta longo meeshinagoga davo, ndele ta udifa evaengeli lOuhamba, ndele ta velula ovanaudu vavo, nakeshe tuu oshiponga. 36Ndele eshi a tala eengudu dovanhu okwe di uditila onghenda, osheshi ovo va li va hepekwa, ndele va loloka va fa eedi dihe na omufita. 37Ye okwa tya kovalongwa vaye: “Oilya oi li po ihapu, ndele ovatei ovo ovanini. 38Ilikaneni hano Omwene weteyo, a tume ovatei keteyo laye.”
Currently Selected:
MATEUS 9: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
