MATEUS 23
23
Jesus ta kunghilile ovanhu va lungame oihelele
(Mark. 12:38-39; Luk. 11:43, 46; 20:45-46)
1Opo nee Jesus okwa lombwela eengudu dovanhu novalongwa vaye 2ndele ta ti: “Ovanongo vomishangwa nOvafarisai ove li omutumba kolukalwa laMoses. 3Onghee hano, keshe osho tave shi mu lombwele, shi ningeni nye mu shi diinine; ndele inamu hopaenena oilonga yavo, osheshi ovo tava lombwele, ndele itava longo sha. 4Ovo ohava mange omitengi didjuu nokuhumbata ndele tave di twike komapepe ovanhu, ndele voovene inava hala oku di kuma nande nomunwe. 5Noilonga yavo aishe ohave i longo, va monike kovanhu. Oipeko yavo yomatumbulo omOmbiibeli ohave i taula inene, neenyemba doikutu yavo odiledile, 6nove hole peenhele dokomesho moivilo nomomalukalwa okombada omeeshinagoga, 7nokukundwa poilandelo nokwiifanwa kovanhu: ‘Rabbi, rabbi.’ 8Ndele onye inamu itavela nande mu ifanwe Rabbi, osheshi omuhongi weni Oumwe, ndele onye amushe ovamwainafana. 9Ndele inamu ifana nande olyelye wokombada yedu xo, osheshi nye omu na Xo umwe aeke, ou womeulu. 10Ndele inamu itavela mu ifanwe omupukululi, osheshi omupukululi weni umwe aeke, Oye Kristus. 11Ndele omunene womokati keni na kale omuyakuli weni. 12Ndele ou te linenepeke, oye ta ninipikwa, naau te lininipike, ye ota nenepekwa.”
Jesus ta ingidile “Woo” kovanaihelele
(Mark. 12:40; Luk. 11:37-42, 44, 52; 20:47)
13“Woo nye, ovanongo vomishangwa nOvafarisai, ovanaihelele nye, eshi tamu idilile po ovanhu oshivelo shOuhamba wokeulu. Osheshi onye vene itamu i mo, ndele tamu kelele ovo va hala okuya mo. 14Woo nye, ovanongo vomishangwa nOvafarisai, ovanaihelele nye, eshi hamu li omaumbo ovafiyekadi, ndele hamu indile omaindilo male mu monike ashike! Onye hano tamu ka mona etokolo lidjuu unene.
15“Woo nye, ovanongo vomishangwa nOvafarisai, ovanaihelele nye, eshi hamu taulula efuta nedu mu likole omulongwa umwe; ndele ngeenge sha ningwa, otamu mu ningi omona woheli, e mu dule luvali.
16“Woo nye, ovakwatiketi vovapofi, onye hamu ti: ‘Ngeenge ku na ou ta ane kotembeli, eano laye olongaho, ndele ou ta ane koshingoldo shotembeli, oye e noku li diinina.’ 17Onye omalai novapofi. Oshilipipo shi dule shikwao, oshingoldo ile otembeli, oyo hai yapula oshingoldo? 18Na: ‘ngeenge pe na ou ta ane koaltari, eano laye olongaho, ndele ou ta ane koshali i li koaltari, oye e noku li diinina.’ 19Ovapofi nye! Oshilipipo shi dule oshikwao, oshali ile oaltari, oyo hai yapula oiyandjiwa? 20Onghee hano, ou ta ane koaltari, oye ta ane kuyo nokwaai aishe tai kala kuyo. 21Ndele ou ta ane kotembeli, oye ta ane kuyo nokwaau a kala muyo; 22ndele ou ta ane keulu, oye ta ane kolukalwapangelo laKalunga nokwaau a kala ko omutumba.
23“Woo nye, ovanongo vomishangwa nOvafarisai, ovanaihelele nye, eshi hamu yandje oshitimulongo shoumbidi ava vanini vomomapya, ndele hamu efa oinenenima yomomhango ouyuki nefilonghenda noudiinini! Ei i nokuwanifwa, naainya ihe shi okweefiwa. 24Onye ovakwatiketi vovapofi, omwe otamu i dindi mo, nongamelo otamu i pona!
25“Woo nye, ovanongo vomishangwa nOvafarisai, ovanaihelele nye, eshi hamu yelifa eholo netiti kombada, ndele meni oli yadi enyeko noufukenhu! 26Omufarisai ove omupofi, yelifa tete eholo meni, opo li yele nokombada yo.
27“Woo nye, ovanongo vomishangwa nOvafarisai, ovanaihelele nye, omwa fa eembila da kolongwa, da wapala okutalwa kombada, ndele meni lado omu yadi omakipa ovafi nonyata aishe! 28Osho nanye yo moipafi yovanhu mwa fa ovayuki, ndele meni omu yadi oihelele nomatauluko omhango.
29“Woo nye, ovanongo vomishangwa nOvafarisai, ovanaihelele nye, eshi hamu tungu eembila dovaxunganeki ndele hamu wapeke omamanya okeembila dovayuki, 30ndele hamu ti: ‘Ngeno otwa li ko pomafiku ootatekulu, ngeno fye tuhe na etimba lohonde yovaxunganeki pamwe!’ 31Hano opopo otamu lihepaulula, onye ovana vovadipai vovaxunganeki. 32Wanifeni hano nokufikifa oulunde wooxekulu. 33Omayoka nye, noludalo leenhoka, otamu shiiva ngahelipi okuya onhapo etokolo loheli? 34Ndele tala, Ame ohandi tumu kunye ovaxunganeki novanaendunge novanongo vomishangwa. Vamwe vavo otamu va dipaa ndele tamu va valele komushiyakano, vamwe otamu va denge neeshokoto omeeshinagoga deni, ndele tamu va taataa moshilando noshilando; 35ohonde aishe iyapuki, ya tilwashi kombada yedu opo i uye kombada yeni okohonde yaAbel omuyuki fiyo okohonde yaSakaria, omona waBerekia, mwe mu dipaela pokati kotembeli noaltari. 36Oshili handi mu lombwele: aishe ei otai uya kombada yepupi eli.
37“Jerusalem, Jerusalem, ove ho dipaa ovaxunganeki ndele ho dipaa nomamanya ava ve ku tuminwa, olungapi nda hala okwoongela ovamwoye, ngaashi oxuxwa hai ongele ouxuxwena vayo koshi yomavava ayo! Ndele nye inamu hala. 38Tala, ongulu yeni otai mu fiilwa i kale hamungaho. 39Osheshi ohandi mu lombwele: itamu mono nge vali, fiyo tamu ka tya: ‘Na nangekwe noupuna, ou te uya medina lOmwene!’ ”
Currently Selected:
MATEUS 23: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
