MATEUS 24

Omadidiliko exulilo lefimbo lounyuni

(Mark. 13:1-2; Luk. 21:5-6)

1Ndele Jesus okwa dja mo motembeli nokwa ya, ovalongwa vaye ove uya kuye ve mu ulikile omatungilo otembeli. 2Ndele Ye okwa nyamukula ta ti kuvo: “Kamu a wete aeshe oo! Oshili handi mu lombwele: itapa fiwa apa emanya la tenhekwa kulikwao inali ngumaunwa po.”

3Ndele eshi e li omutumba kOmhunda yEemono, ovalongwa vaye ove uya kuye, eshi ve li po aveshe, tava ti: “Tu lombwela: onaini hano eshi tashi ka ningwa, nedidiliko lokuuya kwoye nolexulilo lefimbo lounyuni olilipi?”

4Ndele Jesus okwe va nyamukula ndele ta ti: “Taleni, muha pukifwe nande okulyelye. 5Osheshi otaku uya vahapu omedina lange ndele tava ti: aame Kristus, ndele tava pukifa vahapu. 6Ndele tamu ka uda oita nomakundano oita; taleni, muha tulwe oumbada. Osheshi osho oshi nokuningwa, ndele exulilo inali fika manga. 7Osheshi oiwana otai fikamene oiwana, noshilongo otashi fikamene oshilongo, otaku di omakakamo edu keembinga neembinga, ondjala tai uya nomapiyaano. 8Ndelenee aishe ei ehovelo lefeto lokudala.

Ehovelo loixuna yehanauno

(Mark. 13:9-13; Luk. 21:12-19)

9“Ndelenee tave mu yandje okuhepekwa, ndele tave mu dipaa, nde tamu tondelwa edina lange koiwana aishe. 10Opo nee vahapu tava efa ndele tava kengelelafana ndele tava tondafana. 11Ndele otaku uya ovaxunganeki ovanaipupulu vahapu, ndele tava pukifa vahapu. 12Oukolokoshi tau hapupala, nohole yavahapu otai talala. 13Ndelenee ou te lididimike fiyo exulilo, oye ta xupifwa. 14Ndele evaengeli eli louhamba otali udifilwa ounyuni aushe li ningile oiwana aishe ondobwedi, opo nee taku uya exulilo.

Ehanauno laJerusalem

(Mark. 13:14-20; Luk. 21:20-24)

15“Hano ngeenge tamu mono oixuna yehanauno, ya popiwa komuxunganeki Daniel, i li ofika ponhele iyapuki (omuleshi ne shi didilike) 16opo nee aveshe ovo ve li muJudea, nava ye onhapo keemhunda; 17naau ta hangika kombada yongulu, aha londoloke ko a ka pitule oinima yaye meumbo, 18naau ta hangika mepya, aha shune a ka tale elwakani laye. 19Woo ovafimba novamwali vopomafiku enya! 20Ndele indileni, okuya onhapo kweni kuhe mu hange okufu ile efiku lEshabata, 21osheshi omafiku oo otapa kala oudjuu unene, inau kala ko okehovelo lounyuni fiyo opaife, ndele ngaashi itau uya vali. 22Ndele omafiku enya ngeno inaa xupipikwa, ngeno kaku na nande ombelela imwe tai xupifwa; ndele omafiku enya otaa xupipikwa omolwovahoololwa.

Ookristus novaxunganeki ovanaipupulu

(Mark. 13:21-23)

23“Hano ngeenge ku na ou te mu lombwele: ‘Tala, Kristus oku li apa’, ile oku li kwinya, inamu mu itavela. 24Osheshi otaku holoka, ookristus ovanaipupulu novaxunganeki ovanaipupulu, ndele tava longo omadidiliko manene noikumwifalonga, va pukife, ngeenge tashi dulika novahoololwa yo.

Efiku lOmona wOmunhu

(Luk. 17:23-24, 27)

25“Tala, onda tetekela oku shi mu lombwela. 26Onghee hano, ngeenge tamu lombwelwa: ‘Tala, omombuwa e li’, inamu ya ko, ile: ‘Tala, omondjuwo e li’, inamu itavela. 27Osheshi ongaashi oluvadi tali shela koushilo ndele tali monika fiyo okouninginino, nokuuya kwOmona wOmunhu osho taku ningi. 28Osheshi koima ku noshimhu, oko taku ongala eenhwa.

Ealuko lOmwene

(Mark. 13:24-27; Luk. 21:25-28)

29“Ndele oudjuu womafiku oo otau shikulwa diva kelauliko letango, nohani itai yela vali, neenyofi otadi u meulu, neenghono domeulu otadi kakamifwa. 30Edidiliko lOmona wOmunhu tali monika keulu, opo nee oiwana aishe yedu tai lilaana; ndele tai ka mona Omona wOmunhu te uya kombada yoilemo yeulu e neenghono dihapu noshinge; 31ndele ta tumu ko ovaengeli vaye ve nomanghuma e neendaka dopombada, ndele tava ongele ko ovahoololwa vaye keembinga nhee, okominghulo deulu fiyo okudikwao.

Efaneko lomukwiyu

(Mark. 13:28-29; Luk. 21:29-31)

32“Ndele lilongeni omafaneko komukwiyu: Oshitai shao ngeenge tashi tende, omafo taa hape, opo nee omu shi shii, okwenye kwe uya. 33Hano osho nanye yo, ngeenge tamu mono aishe ei, kaleni mu shi shii, oku li popepi, poshivelo.

Efimbo lealuko

(Mark. 13:30-32; Luk. 21:32-33)

34“Oshili handi mu lombwele: epupi eli itali xulu po, fiyo aishe ei tai wanifwa. 35Eulu nedu otali xulu po, ndele eendjovo dange kadi na apa tadi xulu po.

Elilongekido

(Luk. 17:26-27, 34-35; 12:39-40)

36“Ndelenee efiku olo notundi oyo kape na ou e i shii, nande ovaengeli vomeulu, ile Omona, Tate Oye aeke. 37Ndele ngaashi sha li pomafiku aNoa, osho tuu taku ka kala pokuuya kwOmona wOmunhu. 38Osheshi ngaashi ovanhu va li pomafiku enya a tetekela eyelu: kwa li hava li nohava nu, hava hombola nohava hombolifa, fiyo efiku olo Noa a ya monguluwato, 39ndele vo inave shi shiiva, fiyo eyelu le uya nole va hanauna po aveshe; hano osho taku ningi yo pokuuya kwOmona wOmunhu. 40Otaku ka kala ovalumenhu vavali mepya, umwe ota tambulwa, nomukwao ota fiwa po. 41Ovakainhu vavali tava tu koshini, umwe ota tambulwa, nomukwao ota fiwa po. 42Opo nee hano kaleni oupafi, osheshi kamu shi shii efiku lilipipo Omwene weni te uya. 43Ndelenee kaleni hano mu shi shii, mwene weumbo ngeno e nowino, efimbo lilipi omulunga te uya, ngeno ta pashukile eumbo laye liha teywe. 44Onghee hano nanye yo kaleni mwe lilongekida, osheshi Omona wOmunhu ote uya efimbo tuu olo inamu mu teelela.”

Omupiya ta pulwa oudiinini

(Luk. 12:41-48)

45“Olyelye hano omupiya omudiinini nomunaendunge, omwene waye e mu tula kombada yovapiya vaye, e va pe oikulya pefimbo lavo? 46Omupiya ou e nelao, omwene waye ngeenge ta aluka te mu hange a ninga ngaha. 47Oshili handi mu lombwele: Oye te mu ningi elenga loinima yaye aishe. 48Ndelenee omupiya ou ngeenge omwii, note lipopile momwenyo waye: ‘Omwene wange ota kala ko’, 49ndele ta hovele okudenga ovapiya vakwao ndele ta li ndele ta nu pamwe neengholwe, 50opo nee omwene womupiya ou ote uya efiku olo ine mu teelela notundi oyo ine i shiiva, 51ndele te mu shashaula ndele te mu pe oshipewa shovanaihelele. Omo hamu kala elilaano nelikweshelo lomayoo.

Currently Selected:

MATEUS 24: OKYB

Highlight

Copy