MATEUS 22

Ehombolo lomona wohamba

(Luk. 14:15-24)

1Ndele Jesus okwa hovela vali oku va lombwela omafaneko, ndele ta ti: 2“Ouhamba wokeulu u nokufanekwa nohamba ya ningila omona ehombolo. 3Ndele oya tuma ovamati vayo va ka tale ko ovashivwa ve uye koshivilo, ndele vo inava hala okuuya. 4Ndele oya tumununa ko ovamati vamwe, tai ti: ‘Lombweleni ovashivwa: Tala, oshivilo shange osha pwa okutelekwa, eehove noimuna ya ondolwa oya tomwa, ashishe sha longekidwa. Ileni kehombolo.’ 5Ndelenee vo va li inave shi yavala, ndele tava i, umwe okwa ya kepya laye, nomukwao a ka shingifa; 6navakwao ova kwata ovamati vayo, ove va hepeka nove va dipaa. 7Ndele ohamba oya handuka, ndele tai tumu ko ovakwaita vayo, ndele tava hanauna po ovadipai ovo, ndele tava xwike po oilando yavo. 8Oya tya kovamati: ‘Oshivilo shehombolo osha pwa okulongekidwa, ndele ovashivwa ovo inave shi wapalela. 9Indeni hano komashakeneno eendjila, aveshe ovo tamu mono, va shivileni kehombolo.’ 10Ndele ovamati ova ya keendjila, ndele va eta mo aveshe ovo va mona ko, vai novawa; olupale loshivilo shehombolo ola yada ovaenda.

11“Ndele opo nee ohamba eshi ye uya okutala ovaenda, oya mona mo omunhu umwe ehe na oshikutu shehombolo. 12Ndele oya tya kuye: ‘Kaume, owe uya mo ngahelipi omu, uhe na oshikutu shehombolo?’ Oye okwa mwena. 13Opo nee ohamba tai ti kovamati vaye: ‘Mu mangeni komaoko nokomaulu, nye mu mu ekele momilaulu dopondjelela. Omo hamu kala elilaano nelikweshelo lomayoo.’ 14Osheshi vahapu ova ifanwa, ndele vanini ova hoololwa.”

Okuyandja efendelo

(Mark. 12:13-17; Luk. 20:20-26)

15Opo nee Ovafarisai va ya ndele va kundafana nhumbi tave mu yulu meendjovo. 16Ndele ova tuma kuye ovalongwa vavo pamwe nOvakwaherodes oku mu lombwela: “Omuhongi, otu shi shii, Oove omunashili, nondjila yaKalunga oto i longo shili, ndele ku na nande nomunhu, osheshi Ove iho tale olupe lomunhu. 17Hano tu lombwela: oto ti ngahelipi? Osha wapala tuu okupa omukesari efendelo ile inashi wapala?” 18Ndelenee Jesus okwa koneka oihelele yavo ndele ta ti: “Ovanaihelele nye, oshike tamu shindi nge? 19Ulikilei nge oshimaliwa shefendelo.” Ovo ove mu pa odenari. 20Ndele Ye okwa tya kuvo: “Efano eli neshangelo eli olalyelye?” 21Ovo va nyamukula: “Olomukesari.” Opo nee Ye ta ti kuvo: “Hano osho shomukesari, shi peni omukesari, naasho shaKalunga, shi peni Kalunga.” 22Ndele vo eshi ve shi uda, ova kumwa, ove mu fiya po, ndele tava i.

Enyumuko

(Mark. 12:18-27; Luk. 20:27-40)

23Efiku olo vamwe vomOvasadukai ve uya kuye, ovo hava ti kaku nenyumuko, nove mu pula 24ndele tava ti: “Omuhongi, Moses okwa tile: ‘Ngeenge ku na ou ta fi ehe na oludalo, omumwaina na hombole haukwe waye, oye na dalele omumwaina oludalo.’ 25Pufye apa opa li ovanhu novamwaina vaheyali. Omukulunhu okwa hombola omukainhu waye ndele ta fi; naashi kwa li ehe na oludalo, okwa fiila omumwaina omukainhu waye. 26Osho tuu omutivali nomutitatu, nafiyo tuu aveshe vaheyali. 27Ndele hauxuuninwa omukainhu okwa fya. 28Hano menyumuko ota ningi walyelye mwaava vaheyali? Osheshi vo aveshe va li ve mu kwete.”

29Jesus okwe va nyamukula ta ti: “Nye omwa puka, osheshi inamu shiiva omishangwa neenghono daKalunga. 30Osheshi menyumuko ihava hombola ngaashi ihava hombolwa; ndelenee, otava ka kala ngaashi ovaengeli vaKalunga meulu. 31Ndele mokupopya enyumuko lovafi, hamba, inamu lesha odo mwe di lombwelwa kuKalunga eshi ta ti: 32‘Aame Kalunga kaAbraham naKalunga kaIsak naKalunga kaJakob?’ Kalunga Oye ke fi Kalunga koonakufya, 33Opo nee ovanhu eshi ve di uda, ova kuminwa elongo laye.”

Oshipango shinene

(Mark. 12:28-34; Luk. 10:25-28)

34Ndele Ovafarisai eshi va uda, Oye a tomha Ovasadukai, ova ongala; 35naumwe womuvo omunongomhango, okwe mu yeleka ndele te mu pula: 36“Omuhongi, oshipango shinene shomomhango oshilipipo?” 37Ndele Ye okwa tya kuye: “ ‘Hola Omwene Kalunga koye nomutima woye aushe nomwenyo woye aushe neendunge doye adishe.’ 38Oshipango shinene noshotete osho tuu eshi. 39Noshitivali shi fike pusho, osheshi, ‘Hola mukweni ngaashi ove u lihole mwene.’ 40Moipango ei ivali omhango aishe novaxunganeki ova kwatelelwa mo.”

Kristus omona walyelye?

(Mark. 12:35-37; Luk. 20:41-44)

41Ndele Ovafarisai eshi va hangika va ongala, Jesus okwe va pula: 42“Kristus, otamu mu tile ngahelipi? Oye omona walyelye?” Vo ova tya kuye: “OwaDavid.” 43Oye okwa tya kuvo: “David okwe mu ifana hano ngahelipi momhepo Omwene, eshi ta ti:

44‘Omwene okwa lombwela Omwene wange:

Kala omutumba kolulyo lange,

fiyo handi tula ovatondi voye koshi yeemhadi doye.’

45Hano David eshi e mu ifana Omwene, hano oye omona waye ngahelipi?” 46Ndele kakwa li ou a dula oku mu nyamukula nande ondjovo imwe; ndele kakwa li ou a shiiva oku mu pula nande osha, okefiku tuu olo.

Currently Selected:

MATEUS 22: OKYB

Highlight

Copy